Luca 23:1-56
23 Rü guxü̃ma ga jema ãẽ̱xgacügü rü inachigü, rü ãẽ̱xgacü ga Romacü̱̃ã̱x ga Piratuxü̃tawa Ngechuchuxü̃ nagagü.
2 Rü jéma Piratupe̱xewa inanaxügüe ga Ngechuchuxü̃ na jaxugüexü̃. Rü nhanagürügü: —Nhaã jatü rü nüxü̃ itajangaugü na cumaã nanuẽxẽẽãxü̃ i duü̃xü̃gü. Rü tomaã nüxü̃ nixu na tama namexü̃ na ãẽ̱xgacü ja Romawa ngẽxmacüaxü̃́ na tanaxütanüxü̃. Rü nügü nixu na nüma na jiĩxü̃ i torü ãẽ̱xgacü i Cristu —nhanagürügü.
3 Rü jexguma ga Piratu rü Ngechuchuna naca rü nhanagürü: —¿Cuma cuiĩxü̃ i Judéugüarü ãẽ̱xgacü? —nhanagürü. Rü Ngechuchu nanangãxü̃ rü nhanagürü: —Ngẽmáãcü, ngẽma nüxü̃ cuixuxü̃ chixĩ i chamax —nhanagürü.
4 Rü jexguma ga Piratu rü nhanagürü nüxü̃ ga paigüarü ãẽ̱xgacügü rü togü ga duü̃xü̃gü: —Chauxca̱x rü taxuü̃ma i chixexü̃ naxü i nhaã jatü —nhanagürü.
5 Notürü nümagü rü jexeraãcü Ngechuchuxü̃ nixugüeama, rü nhanagürügü: —Nüma rü guxü̃ i Judéaanewa nanangúexẽẽ i duü̃xü̃gü na cuchi naxaiexü̃ca̱x. Rü Gariréaanewa inanaxügü ga jemaãcü na duü̃xü̃güxü̃ nangúexẽẽxü̃, rü ngẽmaãcü nanaxü nhu̱xmata núma Judéaanewa nangu —nhanagürügü.
Erudipe̱xewa najexma ga Ngechuchu
6 Rü jexguma jemaxü̃ naxĩnügu ga Piratu, rü duü̃xü̃güna naca rü ngoxi Gariréaanecü̱̃ã̱x jixĩ ga Ngechuchu.
7 Rü jexguma Piratu nüxü̃ ĩnügu ga aixcuma Gariréaanecü̱̃ã̱x na jiĩxü̃ ga Ngechuchu rü Gariréaaneãrü ãẽ̱xgacü ga Erudixü̃tawa nanamu, jerü Jerucharéü̃wa najexma ga Erudi ga jexguma.
8 Rü jexguma Ngechuchuxü̃ nada̱xgu ga Erudi rü nataãẽxü̃chi. Jerü nuxcümama poraãcü nüxü̃ nadauxchaü̃, jerü ü̃paacü nüxü̃ naxĩnü ga nachiga. Rü ínanaṉg̱uxẽẽ na Ngechuchuxü̃ nadauxchaü̃xü̃ na nape̱xewa naxüãxü̃ ga wüxi ga mexü̃ ga taxü̃ ga Tupanaãrü poramaã naxüxü̃.
9 Rü muẽ̱xpü̱xcüna Ngechuchuna naca ga Erudi. Notürü Ngechuchu rü tama nanangãxü̃.
10 Rü jéma najexmagü ta ga paigüarü ãẽ̱xgacügü rü ngúexẽẽruü̃gü ga Muĩséarü mugüwa ngu̱xẽẽtaegüxü̃. Rü nümagü rü poraãcü Ngechuchuxü̃ ínaxuaxü̃gü.
11 Rü jexguma ga Erudi rü norü churaragü rü poraãcü chixri Ngechuchumaã nachopetü. Rü nagu nidauxcüraü̃gü. Rü nhu̱xmachi wüxi ga ãẽ̱xgacüchirugu najacu̱xẽẽgü na jemaãcü nüxü̃ nacugüexü̃ca̱x. Rü jemawena Piratuxü̃ta wenaxãrü Ngechuchuxü̃ namu ga Erudi.
12 Rü woo ü̃paacü ga Piratu rü Erudimaã nügüchi na naxaiexü̃, notürü jema ngunexü̃gu nixĩ ga nügümaã nangüxmüẽxü̃.
Piratu rü Ngechuchumaã nanaxuegu na najuxü̃ca̱x
13 Rü jexguma ga Piratu rü nanangutaque̱xexẽẽ ga paigüarü ãẽ̱xgacügü, rü togü ga Judéugüarü ãẽ̱xgacügü, rü guxü̃ma ga duü̃xü̃gü ga jéma jexmagüxü̃.
14 Rü Piratu nhanagürü nüxü̃: —Pema nuã chauxca̱x penaga i nhaã jatü, rü nüxü̃ peixu na chamaã nanuẽxẽẽãxü̃ i duü̃xü̃gü. Notürü pepe̱xewa nüxna chaca i ngẽmachiga rü nhu̱xma rü marü nüxü̃ pedau na taxuü̃ma nawa ichajaṉg̱auxü̃ i ngẽma chixexü̃ i naxca̱x ípenaxuaxü̃xü̃.
15 —Rü Erudi rü ta taxuü̃ma nawa inajangau i ngẽma chixexü̃, rü ngẽmaca̱x wenaxãrü taxca̱x nanamuẽgu. Rü dücax, taxuü̃ma i chixexü̃ naxü na ngẽmagagu najuxü̃ca̱x.
16 —Rü ngẽmaca̱x chorü churaragüxü̃ tá chamu na nac̱uaixgüãxü̃ca̱x, rü nhu̱xmachi tá chajange̱x —nhanagürü.
17 Rü nüma ga Piratu rü guxü̃guma ga jexguma jema petawa nanguuü̃xgu rü duü̃xü̃güxü̃ nataãẽxẽẽchaü̃ namaã ga na jangéãxü̃ ga wüxi ga jatü ga pocuxü̃.
18 Notürü guxü̃ma ga jema duü̃xü̃gü rü wüxigu inanaxügüe ga aita na naxüexü̃. Rü nhanagürügü: —¡Napocu i ngẽma Ngechuchu! ¡Rü Barabáxü̃ waxi ínanguxuchixẽẽ! —nhanagürügü.
19 Rü jema Barabá rü napocu jerü ü̃paacü Jerucharéü̃wa ãẽ̱xgacümaã nananuẽxẽẽ ga duü̃xü̃gü, rü nhu̱xmachi namáẽta.
20 Notürü ga Piratu rü wenaxãrü duü̃xü̃gümaã nidexa, jerü nüma rü Ngechuchuxü̃ ningéxchaü̃.
21 Notürü ga duü̃xü̃gü rü jexeraãcü aita naxüe rü nhanagürügü: —¡Curuchawa japota! ¡Curuchawa japota! —nhanagürügü.
22 Rü Piratu norü tamaẽ̱xpü̱xcüna duü̃xü̃gümaã nidexa, rü nhanagürü: —Dücax, ¿ṯacü rü chixexü̃ e̱xna naxü? Chama rü taxuü̃ma i chixexü̃xü̃ nawa ichajangau na ngẽmaca̱x chanajuxẽẽxü̃. Rü chorü churaragüxü̃ tá chamu na nac̱uaixgüãxü̃ca̱x, rü nhu̱xmachi tá chajange̱x —nhanagürü.
23 Notürü nümagü ga duü̃xü̃gü rü jexeraãcü aita naxüeama, rü naxca̱x ínacagü na curuchawa japotaãxü̃ca̱x. Rü jema na najexeragüamaxü̃ ga jema duü̃xü̃gü rü düxwa ga Piratu rü duü̃xü̃güga naxĩnü.
24 Rü nüma ga Piratu rü norü churaragüxü̃ namu na naxügüãxü̃ca̱x ga jema duü̃xü̃gü naxwa̱xegüxü̃.
25 Rü Barabáxü̃ ninge̱x, jerü jema nixĩ ga duü̃xü̃gü naxca̱x ícagüxü̃. Rü jema Barabá nixĩ ga pocuxü̃ naxca̱x na duü̃xü̃güxü̃ ãẽ̱xgacümaã nanuẽxẽẽxü̃ rü namáẽtaxü̃. Rü jexguma ga Piratu rü duü̃xü̃güna Ngechuchuxü̃ namu na namaã naxügüãxü̃ca̱x ga jema nümagü nanaxwa̱xegüxü̃.
Ngechuchuxü̃ curuchawa nipotagü
26 Rü jema duü̃xü̃gü rü Ngechuchuxü̃ nigagü na curuchawa janapotagüãxü̃ca̱x. Rü jexguma Ngechuchuxü̃ jagagüjane, rü jexma namagu nüxü̃ nangaugü ga wüxi ga jatü ga Chirenecü̱̃ã̱x ga naãnewa ne ũcü. Rü Chimáũ nixĩ ga naẽ́ga. Rü Chimáũxü̃ nijauxgü ga duü̃xü̃gü, rü naãtügu ngĩxü̃ naxünagügü ga curucha na Ngechuchuwe ngĩxü̃ nangexü̃ca̱x.
27 Rü muxü̃ma ga duü̃xü̃gü rü nawe narüxĩ. Rü jema duü̃xü̃gütanüwa najexmagü ga muxü̃ma ga ngexü̃gü ga auxexü̃ rü aita üexü̃, jerü Ngechuchuca̱x nangechaü̃gü.
28 Notürü ga Ngechuchu rü jema ngexü̃güxü̃ nadawenü, rü nhanagürü nüxü̃: —Pa Ngecügüx, Pa Jerucharéü̃cü̱̃ã̱x ¡tãṹ i chauxca̱x pexauxexü̃, notürü pegüca̱xtama pexauxe rü pexacügüca̱x!
29 —Erü nawa tá nangu i ngunexü̃gü i nagu nhagüxü̃ tá i duü̃xü̃gü:
“Tataãẽgü ja jíxema ngeã̱xta ja taxuacüma ãxãcügüxe, rü taguma ixãũcharaü̃güxe, rü taguma maĩxãcügüxe, erü taxucatáma tümaxãcügüca̱x taxauxe”, nhagüxü̃.
30 —Rü ngẽxguma i duü̃xü̃gü rü tá ma̱xpǘnegüxü̃ naca̱a̱xü̃gü rü nhanagürügü tá:
“¡Toétügu rübuemü!” nhanagürügü tá. Rü tá ngüagüanegüxü̃xü̃ naca̱a̱xü̃gü, rü nhanagürügü tá:
“¡Toxü̃ idüxétügü!” nhanagürügü tá.
31 —¿Erü nhuxãcü tá namaã nachopetü i ngẽma duü̃xü̃gü i aixcuma chixexü̃ ügüxü̃, ega nhaã chixexü̃ chamaã naxügügu na woo taxuü̃ma i chixexü̃ chaxüchiréxü̃? —nhanagürü ga Ngechuchu.
32 Rü jéma nanagagü ta ga taxre ga máẽtagüxü̃ na Ngechuchurüü̃ curuchawa janapotagüãxü̃ca̱x.
33 Rü jexguma nawa nangugügu ga jema nachica ga Duü̃xẽẽruchina̱xãgu ãẽ́gaxü̃, rü jéma curuchawa Ngechuchuxü̃ nipotagü. Rü jema taxre ga máẽtagüxü̃ rü ta Ngechuchurüü̃ curuchawa nipotagü, wüxi ga norü tügünecüwawa rü to ga norü ṯoxwecüwawa.
34 Rü jexguma Ngechuchuxü̃ curuchawa íjapotagüjane, rü nhanagürü ga Ngechuchu: —Pa Chaunatüx, ¡nüxü̃ nangechaü̃ i nhaã duü̃xü̃gü, erü tama nüxü̃ nacua̱xgü na ṯacü rü chixexü̃ naxüexü̃! —nhanagürü. Rü jema churaragü rü nanade ga Ngechuchuchiru. Rü nhu̱xmachi wüxi ga dĩẽru ngĩxü̃ nanhanagügü na jemawa nüxü̃ nacua̱xgüxü̃ca̱x na texéarü tá jiĩxü̃ ga jema Ngechuchuchiru.
35 Rü duü̃xü̃gü rü jéma inarüdaunü. Notürü jema Judéugüarü ãẽ̱xgacügü rü Ngechuchuxü̃ nacugüe, rü nhanagürügü: —Nüma rü togüxü̃ namaxẽxẽẽ. ¡Ẽcü, nhu̱xma rü nügütama namaxẽẽ ega aixcuma Cristu ja Tupana nüxü̃ unetacü jixĩgu! —nhanagürügü.
36 Rü jema churaragü rü ta Ngechuchuxü̃ nacugüe. Rü naxü̃tawa naxĩ, rü nüxna nanaxã ga wĩũ ga üxchiücü.
37 Rü nhanagürügü nüxü̃: —Ega Judéugüarü ãẽ̱xgacü ja tacü cuixĩgu, ¡rü cugütama rüngü̃xẽẽ i nhu̱xmax, na ícunguxuchixü̃ca̱x! —nhanagürügü.
38 Rü norü curuchatape̱xewa nipota ga wüxi ga mürapewaxacü ga ãẽ́gatachinüxü̃ ga Gregugügawa rü Romacü̱̃ã̱xgügawa rü Judéugügawa ümatüxü̃ ga nhaxü̃: —Daa nixĩ ja Judéugüarü Ãẽ̱xgacü ja Tacüxü̃chi —nhaxü̃.
39 Rü wüxi ga jema máẽtaxü̃ ga naxrüü̃ curuchawa ipotaxü̃ rü Ngechuchumaã naguxchiga, rü nhanagürü: —Ega aixcuma Cristu cuixĩgu, ¡rü cugütama rüngü̃xẽẽ na ícunguxuchixü̃ca̱x, rü toxü̃ rü ta rüngü̃xẽẽ na ítanguxü̃xü̃ca̱x! —nhanagürü.
40 Notürü ga jema to ga máẽtaxü̃ rü namücüxü̃ ínangaxüchiama, rü nhanagürü nüxü̃: —Cuma rü naxrüü̃ na curuchawa cuipotachiréxü̃, ¿rü ngẽxguma rü ta tama Tupanaxü̃ cumuü̃xü̃?
41 —Jixema rü name nixĩ na ipocuexü̃ erü tagagutama nixĩ i ngúxü̃ ingegüxü̃ erü ngẽma nixĩ i tórü natanü naxca̱x ga jema chixexü̃ ga ixügüxü̃. Notürü daa jatü rü taxuü̃ma i chixexü̃ naxü —nhanagürü.
42 Rü jexguma ga jema máẽtaxü̃ rü nhanagürü: —Pa Ngechuchux, ¡choxna nacua̱xãchi i ngẽxguma wenaxãrü núma cuxũxgu rü ãẽ̱xgacüxü̃ ícunguxgu! —nhanagürü.
43 Rü Ngechuchu nanangãxü̃ rü nhanagürü: —Aixcuma cumaã nüxü̃ chixu rü nhamatátama i ngunexü̃gu chamaã cungẽxma i mexẽchixü̃ i naãnewa —nhanagürü.
Naju ga Ngechuchu
44 Rü jexguma tocuchiwa nanguxgu rü guxü̃wama naxẽãne nhu̱xmata tamaẽ̱xpü̱xarü ngorawa nangu ga jáuanecü.
45 Rü ga üa̱xcü rü nixo. Rü tupauca ga taxü̃neãrü tüjemachiü̃xü̃ rü ngãxü̃gu narügaute.
46 Rü jexguma ga Ngechuchu rü poraãcü aita naxü rü nhanagürü: —Pa Chaunatüx, cuxme̱xwa chanange̱x i chauãẽ —nhanagürü. Rü jema nhaxguwena rü naju.
47 Rü jexguma jema churaragüarü ãẽ̱xgacü ga Romacü̱̃ã̱x nüxü̃ da̱xgu ga jema ngupetüxü̃, rü Tupanaxü̃ nicua̱xüü̃, rü nhanagürü: —Aixcuma nhaã jatü rü taxuü̃ma i chixexü̃ naxü —nhanagürü.
48 Rü guxü̃ma ga jema togü ga duü̃xü̃gü ga jéma jexmagüxü̃ rü nüxü̃ daugüxü̃ ga jema ngupetüxü̃, rü poraãcü nangechaü̃güãcüma napataca̱x nawoegu.
49 Notürü guxü̃ma ga jema duü̃xü̃gü ga aixcuma Ngechuchuxü̃ cua̱xgüxü̃ rü jaxü̃watama nüxü̃ narüdaunü ga jema ngupetüxü̃. Rü jema duü̃xü̃gütanüwa ta ijexmagü ga jema ngecügü ga Ngechuchuwe rüxĩcü ga jexguma Gariréaanewa ne naxũxgu.
Ngechuchu rü naxmaü̃gu najanaxücuchigü
50 Rü najexma ga wüxi ga jatü ga Judéaanewa jexmane ga ĩãne ga Arimatéacü̱̃ã̱x, rü Juche nixĩ ga naẽ́ga. Rü nüma rü Judéugüarü ãẽ̱xgacügütanüwa naxü, notürü namecüma rü meã namaxü̃.
51 Rü nüma rü poraãcü ínanaṉg̱uxẽẽ na ínanguxü̃ ga Tupana na jéma ãẽ̱xgacü jiĩxü̃ca̱x. Rü jemaca̱x tama norü me nixĩ ga jema Ngechuchumaã naxügüxü̃ ga jema togü ga namücügü ga ãẽ̱xgacügü.
52 Rü nüma ga Juche rü Piratuxü̃tawa naxũ, rü Ngechuchuxü̃neca̱x ínajaca.
53 Rü curuchawa najajaxu ga Ngechuchuxü̃ne, rü wüxi ga düxruü̃maã nananuque. Rü wüxi ga naxmaü̃ ga nutaarü ma̱xpǘxü̃wa jacaxmaü̃güxü̃gu najanaxücuchi. Rü jema naxmaü̃ rü najexwacaxü̃, rü taguma texéxü̃ nagu jaxücuchigüxü̃ nixĩ.
54 Rü jema nixĩ ga ngunexü̃ ga nagu Judéugü nügü imexẽẽgüxü̃ naxca̱x ga ngü̃xchigaarü ngunexü̃. Rü marü ningóonechaü̃ ga jema ngü̃xchigaarü ngunexü̃.
55 Rü jema ngecügü ga Ngechuchumaã Gariréaanewa ne ĩcü, rü Ngechuchuxü̃ íjaxücuchigüxü̃wa íijadaugü. Rü nüxü̃ idaugü ga nhuxãcü na íjaxücuchigüãxü̃ ga naxü̃ne.
56 Rü jexguma ngĩpatawa nangugügu, rü inamexẽẽgü ga pumara rü chixü̃. Rü irüngü̃gü ga ngü̃xchigaarü ngunexü̃gu, jerü jema nixĩ ga Tupanaãrü mu.
