Luca 3:1-38
3 Rü jexguma Tibériu 15 ga taunecü ãẽ̱xgacü ga tacü ixĩxgu ga Romawa, rü jexguma nixĩ ga Pṍũchiu Piratu rü Judéaaneãrü ãẽ̱xgacü jiĩxü̃, rü Erudi rü Gariréaaneãrü ãẽ̱xgacü jiĩxü̃, rü naẽneẽ ga Piripi rü Ituréaane rü Taconíteaneãrü ãẽ̱xgacü jiĩxü̃, rü Lisániã rü Abiríniããneãrü ãẽ̱xgacü jiĩxü̃.
2 Rü Aná rü Caipá rü paigüeru nixĩgü ga jexguma. Rü jexguma nixĩ ga Juã́ũ ga Zacaría nanemaã jadexaxü̃ ga Tupana ga dauxchitawa ga ngextá taxúema íxãpataxü̃wa.
3 Rü guxü̃ma ga jema nachicagü ga Judã́ũcutüarü ngaicamana jexmagüxü̃gu nixũgüchigü ga Juã́ũ. Rü duü̃xü̃gümaã nüxü̃ nixuchigü ga na namexü̃ na nüxü̃ naxoexü̃ ga nacümagü ga chixexü̃ rü ínabaiü̃xü̃, na jemaãcü Tupana nüxü̃́ nüxü̃ nangechaü̃xü̃ca̱x ga norü pecadugü.
4 Rü guma nuxcümaü̃cü ga Ichaía ga Tupanaãrü orearü uruü̃ naxümatüxü̃rüü̃ nixĩ ga nangupetüxü̃. Jerü duü̃xü̃güarü maxü̃ãrü mexẽẽchigaxü̃ nixu ga jexguma nhaxgu:“Ngẽma nachica i ngextá taxúema íxãpataxü̃wa rü tá nangẽxma i wüxi i duü̃xü̃ i ngẽ́ma tagaãcüma nhaxü̃: ‘¡Pegü pemexẽẽ naxca̱x ja Cori! ¡Rü naxca̱x ipejanawe̱xãchixẽẽ i perü maxü̃!’
5 Rü guxããrü maxü̃ rü nanaxwa̱xe i inajarüwe̱xãchi nhama wüxi i ngatexü̃ rügütaxü̃rüü̃ na ijawéxü̃ca̱x i nama. Rü guxãma ja jíxema tügü irütagüxe rü tanaxwa̱xe i ítarüxĩ nhama wüxi ja ma̱xpǘnetape̱xe idoxochixẽẽxü̃rüü̃. Rü guxü̃ma i nacüma i wü̃xü̃ rü nanaxwa̱xe i inajarüwe̱xãchigü. Rü ngẽma duü̃xü̃güarü maxü̃wa tama mexü̃ rü nanaxwa̱xe i najamexẽẽgü.
6 Rü guxü̃ma i duü̃xü̃gü rü tá nüxü̃ nadaugü ja jima Maxẽxẽẽruü̃ ja Tupana núma namucü”,
nhanagürü ga Ichaíaarü ore ga ümatüxü̃wa.
7 Rü jexguma Juã́ũxü̃tawa naxĩxgu ga duü̃xü̃gü na ínabaiü̃xẽẽãxü̃ca̱x, rü nüma ga Juã́ũ rü nhanagürüama nüxü̃: —Pema rü ãxtapearü duü̃xü̃gü peixĩgü. ¿Rü nhuxãcü nagu perüxĩnüẽ na naxchaxwa peibuxmüxü̃ i ngẽma pocu i ãũcümaxü̃chixü̃ i marü ingaicaxü̃ ega tama nüxü̃ perüxoegu i pecüma i chixexü̃?
8 —¡Rü meã pemaxẽ na ngẽmaãcü guxü̃ma i duü̃xü̃gü nüxü̃ daugüxü̃ca̱x na aixcuma marü nüxü̃ perüxoexü̃ i pecüma i chixexü̃! Rü tama name i nhaperügügü:
“Tãũxü̃táma Tupana toxü̃ napocue, erü Abrã́ũtanüxü̃ tixĩgü” nhaperügügü. Erü tama ngẽmaca̱x nixĩ ja Tupana i duü̃xü̃güxü̃ najaxuxü̃. Rü pemaã nüxü̃ chixu rü ngẽxguma Tupana naxwa̱xegu rü tama nüxü̃́ naguxcha na daa nutawa Abrã́ũtanüxü̃ nanguxü̃xẽẽxü̃.
9 —Tupanaãrü juema rü marü íimemare na jadaxü̃ãxü̃ca̱x i ngẽma nanetügü i tama mexü̃. Rü guxü̃ma i nanetügü i chixearü õṍxü̃ rü tá nadaxü̃, rü nhu̱xmachi üxüwa tá ínagu —nhanagürü ga Juã́ũ.
10 Rü jexguma ga duü̃xü̃gü rü Juã́ũna nacagü, rü nhanagürügü: —¿Ṯacü e̱xna nixĩ i mexü̃ na tanaxüxü̃? —nhanagürügü.
11 Rü Juã́ũ rü nanangãxü̃ rü nhanagürü: —Texé ja taxrearü dejuxü̃chiruã́xẽ rü name nixĩ i texé ja tüxü̃́ nataxúxena tanaxã. Rü texé ja õnaã́xẽ rü name nixĩ i texé ja ngearü õnaã́xẽmaã tangau i tümaãrü õna —nhanagürü.
12 Rü Juã́ũxü̃tawa naxĩ ta ga nhuxre ga jatügü ga Romaãrü ãẽ̱xgacüca̱x dĩẽru ngĩxü̃ ideetanüxü̃. Rü nanaxwa̱xegü ga Juã́ũ na ínabaiü̃xẽẽxü̃. Rü Juã́ũna nacagü, rü nhanagürügü: —Pa Ngúexẽẽruü̃x, ¿Ṯacü nixĩ i mexü̃ na tanaxüxü̃ i tomax? —nhanagürügü.
13 Rü Juã́ũ rü nhanagürü nüxü̃: —Tama name i ãẽ̱xgacü pemaã nüxü̃ ixuxü̃ãrü jexera penajauxgü i dĩẽru i duü̃xü̃güxü̃tawa —nhanagürü.
14 Rü nhuxre ga churaragü rü ta Juã́ũna nacagüe, rü nhanagürügü: —¿Toma rü ṯacü nixĩ i mexü̃ na tanaxüxü̃? —nhanagürügü. Rü nanangãxü̃ ga Juã́ũ rü nhanagürü: —Tama name i texéxü̃ pexãxũneãcüma tümaãrü ngẽmaxü̃gü pepuxü̃. Rü tama name i ṯacü rü doraxü̃ tümachigaxü̃ peixu na ngẽmaãcü tümaãrü ngẽmaxü̃gü pepuxü̃xü̃ca̱x. Rü name nixĩ i ngẽma dĩẽru i ãẽ̱xgacü pexü̃́ ngĩmaã naxütanücümaãtama petaãẽgü rü tama jexeracüca̱x ípeca —nhanagürü.
15 Rü jexguma ga duü̃xü̃gü rü poraãcü ínanaṉg̱uxẽẽgü na paxa ínanguxü̃ ga Tupana Nane ga Cristu. Rü nagu narüxĩnüẽ ga na bexmana Juã́ũ rü Cristu jiĩxü̃.
16 Notürü ga Juã́ũ rü guxãxü̃ nhanagürü: —Aixcuma i chama rü dexáwamare pexü̃ íchabaiü̃xẽẽ, notürü tá ínangu i to i Tupanaãrü orearü uruü̃, rü nüma tá pexna nananguxẽẽ i Tupanaãẽ i Üünexü̃ wüxi i üxüemarüü̃. Erü nüma rü poraãcü choxü̃ narüjexera na ãẽ̱xgacü jiĩxü̃. Rü chama rü nape̱xewa rü taxuwama chame rü bai i norü chapatucunüãrü wẽgüwa chame.
17 —Rü nüma rü marü ínamemare na nhama i naãnewa jadexechiãxü̃ca̱x i norü duü̃xü̃gü nhama wüxi ja jatü trigu naã́tüna idexechixü̃rüü̃. Rü ngẽmaãcü tá najadexechi i ngẽma noxrü ixĩgüxü̃ na naxü̃tawa nangẽxmagüxü̃ca̱x, notürü ngẽma tama noxrü ixĩgüxü̃, rü tá ínanagu nawa ja jima üxü ja taguma ixoxü̃ne —nhanagürü.
18 Rü jema oremaã rü muxü̃ma ga to ga ucu̱xẽgümaã, rü Juã́ũ duü̃xü̃gümaã nüxü̃ nixu ga ore ga mexü̃ ga Ngechuchuchiga.
19 Rü Juã́ũ rü ãẽ̱xgacü ga Erudixü̃ nanga, jerü ngĩmaã naxãma̱x ga Erudía ga naẽneẽ ga Piripi nama̱x. Rü nananga ta naxca̱x ga jema togü ga chixexü̃ ga naxüxü̃.
20 Notürü ga Erudi rü tama Juã́ũga naxĩnü. Rü jexeraxü̃ ga chixexü̃ naxü, jerü pocupataü̃wa Juã́ũxü̃ namu.
Ngechuchuarü baiechiga
21 Naxü̃pa ga na napocuxü̃ ga Juã́ũ, rü guxü̃ma ga duü̃xü̃güxü̃ ínabaiü̃xẽẽxguwena, rü Ngechuchuxü̃ rü ta ínabaiexẽẽ. Rü jexguma Ngechuchu íjumuxẽjane rü ningena ga dauxü̃guxü̃ ga naãne.
22 Rü Tupanaãẽ i Üünexü̃ rü wüxi ga muxtucurüü̃ inanago rü Ngechuchuna nangu. Rü dauxü̃wa inanaxũ ga wüxi ga naga ga nhaxü̃: —Cuma nixĩ i Chaune i cuxü̃ changechaü̃xü̃chicü, rü cumaã chataãẽxü̃chicü —nhaxü̃.
Ngechuchu ja Cristuarü o̱xigü
23 Maneca 30 ga taunecü nüxü̃́ najexma ga Ngechuchu ga jexguma norü puracü inaxügügu. Rü duü̃xü̃gü nagu narüxĩnüẽ rü Ngechuchu rü Juche nane nixĩ.Rü Juche rü Elí nane nixĩ.
24 Rü Elí rü Matá nane nixĩ.Rü Matá rü Lewí nane nixĩ.Rü Lewí rü Merequí nane nixĩ.Rü Merequí rü Janaĩ nane nixĩ.Rü Janaĩ rü Juche nane nixĩ.
25 Rü Juche rü Matatía nane nixĩ.Rü Matatía rü Amó nane nixĩ.Rü Amó rü Naṹ nane nixĩ.Rü Naṹ rü Echi nane nixĩ.Rü Echi rü Nagaí nane nixĩ.
26 Rü Nagaí rü Máãte nane nixĩ.Rü Máãte rü Matatía nane nixĩ.Rü Matatía rü Semeĩ́ nane nixĩ.Rü Semeĩ́ rü Juche nane nixĩ.Rü Juche rü Judá nane nixĩ.
27 Rü Judá rü Juana nane nixĩ.Rü Juana rü Resá nane nixĩ.Rü Resá rü Zorobabé nane nixĩ.Rü Zorobabé rü Salatié nane nixĩ.Rü Salatié rü Neri nane nixĩ.
28 Rü Neri rü Merequí nane nixĩ.Rü Merequí rü Adi nane nixĩ.Rü Adi rü Cosã́ũ nane nixĩ.Rü Cosã́ũ rü Elmada nane nixĩ.Rü Elmada rü Erú nane nixĩ.
29 Rü Erú rü Josué nane nixĩ.Rü Josué rü Eliéze nane nixĩ.Rü Eliéze rü Jorí nane nixĩ.Rü Jorí rü Matá nane nixĩ.Rü Matá rü Lewí nane nixĩ.
30 Rü Lewí rü Simeã́ũ nane nixĩ.Rü Simeã́ũ rü Judá nane nixĩ.Rü Judá rü Juche nane nixĩ.Rü Juche rü Jona nane nixĩ.Rü Jona rü Eriaquí nane nixĩ.
31 Rü Eriaquí rü Meréa nane nixĩ.Rü Meréa rü Mená nane nixĩ.Rü Mená rü Matatá nane nixĩ.Rü Matatá rü Natã́ũ nane nixĩ.Rü Natã́ũ rü Dawí nane nixĩ.
32 Rü Dawí rü Jesé nane nixĩ.Rü Jesé rü Obede nane nixĩ.Rü Obede rü Buá nane nixĩ.Rü Buá rü Sará nane nixĩ.Rü Sará rü Naãsú nane nixĩ.
33 Rü Naãsú rü Aminadá nane nixĩ.Rü Aminadá rü Admí nane nixĩ.Rü Admí rü Arni nane nixĩ.Rü Arni rü Erṍũ nane nixĩ.Rü Erṍũ rü Faré nane nixĩ.Rü Faré rü Judá nane nixĩ.
34 Rü Judá rü Jacú nane nixĩ.Rü Jacú rü Isaqui nane nixĩ.Rü Isaqui rü Abrã́ũ nane nixĩ.Rü Abrã́ũ rü Terá nane nixĩ.Rü Terá rü Nacú nane nixĩ.
35 Rü Nacú rü Serugue nane nixĩ.Rü Serugue rü Ragaú nane nixĩ.Rü Ragaú rü Fáreque nane nixĩ.Rü Fáreque rü Ebe nane nixĩ.Rü Ebe rü Sará nane nixĩ.
36 Rü Sará rü Cainá nane nixĩ.Rü Cainá rü Arfade nane nixĩ.Rü Arfade rü Séü̃ nane nixĩ.Rü Séü̃ rü Noẽ́ nane nixĩ.Noẽ́ rü Laméque nane nixĩ.
37 Rü Laméque rü Metusalé nane nixĩ.Rü Metusalé rü Enoqui nane nixĩ.Rü Enoqui rü Jarete nane nixĩ.Rü Jarete rü Mararé nane nixĩ.Rü Mararé rü Cainá nane nixĩ.
38 Rü Cainá rü Enú nane nixĩ.Rü Enú rü Sete nane nixĩ.Rü Sete rü Adã́ũ nane nixĩ.Rü Adã́ũ rü Tupana nane nixĩ.
