Luca 4:1-44
4 Ngechuchuxü̃tawa najexma ga Tupanaãẽ i Üünexü̃. Rü jexguma Judã́ũchiüwa ínaxü̃ãchigu ga Ngechuchu, rü Tupanaãẽ i Üünexü̃ rü dauxchitawa ga ngextá taxúema íxãpataxü̃wa nanaga.
2 Rü jéma najexma ga 40 ga ngunexü̃. Rü ṉg̱oxo ga Chataná rü nüxü̃ naxü. Rü jexguma jéma najexmagu rü taguma nachibü. Notürü ga jixcama rü nataija.
3 Rü jexguma ga ṉg̱oxo ga Chataná rü nhanagürü nüxü̃: —Ega aixcuma Tupana Nane cuixĩgu, rü ¡daa nutamaã nüxü̃ ixu na põũxü̃ nanguxuchixü̃ca̱x! —nhanagürü ga Chataná.
4 Rü Ngechuchu nanangãxü̃ rü nhanagürü: —Tupanaãrü ore i ümatüxü̃wa rü nhanagürü:“Tãũxü̃táma õnamaãxĩca namaxẽ i duü̃xü̃gü, notürü guxü̃ma i ore i Tupana nüxü̃ ixuxü̃ tá nixĩ i duü̃xü̃güxü̃ maxẽxẽẽxü̃”,
nhanagürü.
5 Rü jexguma ga ṉg̱oxo ga Chataná rü wüxi ga ma̱xpǘnetape̱xewa nanaga. Rü jéma paxaãchi nüxü̃ nüxü̃ nadauxẽẽ ga guxü̃ma ga nachiü̃ãnegü ga nhama ga naãnecü̱̃ã̱x.
6 Rü Chataná rü nhanagürü nüxü̃: —Guxü̃ i nhaã nachiü̃ãnegü i mexü̃ rü norü ngẽmaxü̃gü rü chi cuxna chanaxã. Erü choxrü nixĩ i guxü̃ma i nhaãgü, rü tüxna chanaxã ja texé ja chama chorü me ixĩxẽ na tüxna na chanaxãxü̃.
7 —Rü ngẽxguma chi chape̱xegu cucaxã́pü̱xügu rü choxü̃ cuicua̱xüü̃gu rü cuxrü chi nixĩ i guxü̃ma i nhaã cuxü̃ chawéxü̃ —nhanagürü.
8 Notürü ga Ngechuchu rü nanangãxü̃, rü nhanagürü: —¡Choxna ixũgachi! Pa Chatanáx. Erü Tupanaãrü ore i ümatüxü̃wa rü nhanagürü:“¡Nüxü̃ icua̱xüü̃ ja Cori ja curü Tupana, rü jimaãxü̃́xĩcatama napuracü!”
nhanagürü.
9 Rü jexguma ga ṉg̱oxo ga Chataná rü Jerucharéü̃ ga ĩãnewa nanaga. Rü tupauca ga taxü̃netape̱xegu nanamunagü. Rü nhanagürü nüxü̃: —Ega aixcuma Tupana Nane cuixĩgu, rü ¡nuã cugü rütae!
10 —Erü Tupanaãrü ore i ümatüxü̃wa rü nhanagürü:“Tupana tá nanamu i norü orearü ngeruü̃gü i dauxü̃cü̱̃ã̱x na cuxna nadaugüxü̃ca̱x.
11 Rü naxme̱xmaã tá cuxü̃ nijauxgü na tama ṯacü rü nutagu cunguxü̃ca̱x”,
nhanagürü.
12 Rü Ngechuchu nanangãxü̃ rü nhanagürü: —Tupanaãrü ore i ümatüxü̃wa rü nhanagürü ta:“¡Tama name i nüxü̃ na cuxüxü̃ ja Cori ja curü Tupana!”,
nhanagürü.
13 Rü jexguma marü taxucürüwama Ngechuchuxü̃ naxü̱xgu, rü nüma ga Chataná rü nüxna ninha nhu̱xmata nüxü̃ ijangau na nhuxãcü wena nüxü̃ na naxüxü̃.
Ngechuchu rü Gariréaanewa inanaxügü ga norü puracü
14 Rü Ngechuchu rü Gariréaaneca̱x nataegu. Rü Tupanaãẽ i Üünexü̃ rü naxü̃tawa najexma rü poraãcü nanaporaxẽẽ. Rü ga duü̃xü̃gü rü nachiga nidexagü ga guxü̃ ga jema naãnewa.
15 Rü wüxichigü ga ĩãneãrü ngutaque̱xepataü̃güwa rü nangu̱xẽẽtae. Rü guxü̃ma ga duü̃xü̃gü rü nüxü̃ nicua̱xüü̃gü.
Nacharétuwa najexma ga Ngechuchu
16 Rü Nacharétuwa naxũ ga Ngechuchu. Rü guma nixĩ ga ĩãne ga nanatügü nawa najaxẽẽgüne. Rü ngü̃xchigaarü ngunexü̃gu rü ngutaque̱xepataü̃gu naxücu, jerü jema nixĩ ga nacüma ga guxü̃ ga ngü̃xchigaarü ngunexü̃gu. Rü jéma inachi rü duü̃xü̃güca̱x nüxü̃ nadaumatü ga Tupanaãrü ore ga ümatüxü̃.
17 Rü nüxna nanaxãgü ga popera ga Tupanaãrü orearü uruü̃ ga Ichaía ümatüxü̃. Rü jexguma jangenaã́tüãgu, rü nüxü̃ inajangau ga ngextá ínaxümatüxü̃wa ga ore ga nhaxü̃:
18 “Cori ja Tupanaãẽ rü chauxü̃tawa nangẽxma. Rü nüma rü choxü̃ naxuneta na nüxü̃ chixuxü̃ca̱x i ore i mexü̃ namaã i ngẽma duü̃xü̃gü i ngearü dĩẽruã̱xgüxü̃. Rü choxü̃ namu na ngẽma duü̃xü̃gü i pecadutüü̃wa ngẽxmagüxü̃maã nüxü̃ na chixuxü̃ca̱x rü tá na ínanguxü̃xü̃. Rü choxü̃ namu na chajadauchixetüxẽẽgüxü̃ca̱x i ngẽma ingexetügüxü̃ rü na íchananguxü̃xẽẽxü̃ca̱x i ngẽma duü̃xü̃gü i togüme̱xẽwa ngẽxmagüxü̃.
19 Rü núma choxü̃ namu na duü̃xü̃gümaã nüxü̃ chixuxü̃ca̱x na Tupana nüxü̃ rüngü̃xẽẽchaü̃xü̃ i ngẽma nüxü̃́ jaxõgüxü̃”,
nhanagürü ga jema ore.
20 Rü jexguma ga Ngechuchu rü nügüna nananu̱xãchiátü ga popera. Rü ngutaque̱xepataü̃ãrü daruü̃na nanaxã rü nhu̱xmachi ínarüto. Notürü guxü̃ma ga jema ngutaque̱xepataü̃wa jexmagüxü̃ ga duü̃xü̃gü rü nüxü̃ narüdaunüẽcha.
21 Rü jemaca̱x Ngechuchu inanaxügü ga duü̃xü̃gümaã na jadexaxü̃, rü nhanagürü: —Nhu̱xmatama nixĩ i pepe̱xewa Tupana janguxẽẽxü̃ i nhaã ore ga Ichaía ümatüxü̃ —nhanagürü.
22 Rü guxü̃ma ga duü̃xü̃gü rü meã Ngechuchuchiga nidexagü. Rü naḇaixãchiãẽgü namaã ga jema ore ga mexü̃ ga namaã nüxü̃ jaxuxü̃. Notürü tama aixcuma najaxõgüchaü̃. Rü jemaca̱x nügüna nacagü rü nhanagürügü: —¿Taux e̱xna daa jiĩxü̃ ja Juche nane? —nhanagürügü.
23 Rü Ngechuchu rü nhanagürü nüxü̃: —Chama nüxü̃ chacua̱x rü tá chamaã penaxuxuchi i ngẽma ore i nhaxü̃:
“Pa Duturux ¡Cugütama rümexẽẽ!” nhaxü̃. Rü e̱xna tá choxü̃ nhaperügügü:
“Jema mexü̃ ga taxü̃ ga nüxü̃ taxĩnüẽxü̃ ga Tupanaãrü poramaã cuxüxü̃ ga Caparnáũwa, rü tanaxwa̱xe i nuã curü ĩãnewa rü ta na cunaxüxü̃”, nhaperügügü tá.
24 Rü nidexachigüama ga Ngechuchu: —Aixcuma pemaã nüxü̃ chixu rü guxü̃ma i Tupanaãrü orearü uruü̃, rü norü ĩãnewatama i duü̃xü̃gü rü tama meã nanajauxgü.
25 —Rü aixcuma pemaã nüxü̃ chixu rü Iraéanewa rü najexma ga muxũchixü̃ma ga ngexü̃gü ga ijutegüxü̃ ga jexguma Ería maxü̃gu. Rü jexguma nixĩ ga tamaẽ̱xpü̱x ga taunecüarü ngãxü̃ rü taguma napuxü̃, rü poraãcü nangúxü̃ ga taija ga guxü̃ ga jema naãnewa.
26 —Notürü ga Tupana rü tama wüxi ga Iraéanecü̱̃ã̱x ga jutecüxü̃tawa Eríaxü̃ namu. Notürü ngĩxü̃tawa nanamu ga jema jutecü ga Sarepacü̱̃ã̱x ga Sidã́ũãrü ĩãneãrü ngaicamagu ãchiü̃cü.
27 —Rü jexguma namaxü̃gu ga Erichéu, rü Iraéanewa najexmagü ta ga muxü̃ma ga duü̃xü̃gü ga chaxünemaã iḏaaweexü̃. Notürü taxuü̃ma ga jema iḏaaweexü̃ ga Iraéanewa jexmagüxü̃ rü naxca̱x nitaaneẽ. Rü Namáü̃ ga Síriaanecü̱̃ã̱xĩcatama nixĩ ga guma naxca̱x jataanecü —nhanagürü ga Ngechuchu.
28 Rü jexguma jema orexü̃ naxĩnüẽgu, rü guxü̃ma ga jema duü̃xü̃gü ga guma ngutaque̱xepataü̃wa jexmagüxü̃ rü poraãcü naxca̱x nanuẽ.
29 Rü inachigü ga duü̃xü̃gü rü Ngechuchuxü̃ ínata̱xüchigü ga guma ĩãnewa. Rü guma ma̱xpǘne ga guma ĩãne nawa jexmanetape̱xewa nanagagü na jéma janataegüãxü̃ca̱x.
30 Notürü ga Ngechuchu rü norü ngãxü̃tanüwa ínaxũxũãma, rü ínixũ.
Wüxi ga jatü ga ṉg̱oxo nawa jexmaxü̃chiga
31 Rü jexguma ga Ngechuchu rü Gariréaaneãrü ĩãne ga Caparnáũwa naxũ. Rü ngü̃xchigaarü ngunexü̃gu jéma duü̃xü̃güxü̃ nangúexẽẽ.
32 Rü duü̃xü̃gü rü naḇaixãchiãẽgü namaã ga norü ngu̱xẽẽtae, jerü Tupanaãrü poramaã nidexa.
33 Rü guma ngutaque̱xepataü̃wa najexma ga wüxi ga jatü ga ṉg̱oxo nawa jexmaxü̃. Rü aita jéma naxü, rü nhanagürü:
34 —¡Toxna ixũgachi! ¿Tü̱xcüü̃ totanüwa cuxũ, Pa Ngechuchux, Pa Nacharétucü̱̃ã̱x? ¿Nuã cuxũ na toxü̃ cuḏaixü̃ca̱x? Chama cuxü̃ chacua̱x na Tupana Nane ja Üünecü na cuiĩxü̃ —nhanagürü.
35 Rü Ngechuchu nananga ga jema ṉg̱oxo rü nhanagürü: —¡Ijarüngea̱x rü ínaxũxũ nawa ja jima jatü! —nhanagürü. Rü jexguma ga jema ṉg̱oxo rü duü̃xü̃güpe̱xegu najanguxẽẽ ga guma jatü, rü nawa ínaxũxũ. Notürü tama nanapi̱xẽẽ.
36 Rü guxü̃ma ga duü̃xü̃gü rü naḇaixãchiãẽgü. Rü nügümücügümaãchigü nachiga nidexagü, rü nhanagürügü: —¿Ṯacü rü ore nixĩ i ngẽma? Erü nhaã jatü rü aixcuma ngẽma ṉg̱oxogümaã inacua̱x rü poraãcü nanamu. Rü nümagü rü naga naxĩnüẽ, rü ínachoxü̃ —nhanagürügü.
37 Rü guxü̃wama ga jema naãnewa rü Ngechuchuchigaxü̃ nixugüe ga duü̃xü̃gü.
Ngechuchu rü Chimáũ ga Pedru na̱xẽca̱x najataanexẽẽ
38 Rü guma ngutaque̱xepataü̃wa ínaxũxũ ga Ngechuchu rü Chimáũpatawa naxũ. Rü Chimáũ na̱xẽ rü poraãcü ijaxaxüne. Rü Ngechuchuna nacagüe ga ngĩxca̱x na jataanexẽẽãxü̃ca̱x.
39 Rü ngĩxü̃tagu najachi ga Ngechuchu rü jema ḏaaweanexü̃ nanga. Rü jexgumatama iga̱u̱xãchi ga na jaxaxünexü̃. Rü jexgumatama íirüda, rü naxca̱x inamexẽẽ ga õna.
Ngechuchu rü muxü̃ma ga iḏaaweexü̃ca̱x najataanexẽẽ
40 Rü jexguma marü janaxücuchaü̃gu ga üa̱xcü, rü Ngechuchuxü̃tawa nanagagü ga guxü̃ma ga duü̃xü̃gü ga nagúxü̃raü̃xü̃ ga ḏaaweanemaã iḏaaweexü̃. Rü ga Ngechuchu rü wüxichigü ga jema duü̃xü̃güxü̃ ningõgü, rü jemaãcü naxca̱x najataanexẽẽchigü.
41 Rü nanameẽxẽẽ ga muxü̃ma ga duü̃xü̃gü ga iḏaaweexü̃ ga ṉg̱oxo nawa jexmagüxü̃. Rü jema ṉg̱oxogü rü aita naxüe, rü nhanagürügü: —Cuma nixĩ i Tupana Nane cuiĩxü̃ —nhanagürügü. Notürü ga Ngechuchu rü najangagü ga jema ṉg̱oxogü. Rü nüxna nanachu̱xu ga na jadexagüxü̃, jerü jema ṉg̱oxogü rü nüxü̃ nacua̱xgü na Cristu jiĩxü̃.
Ngechuchu rü nanaxunagü ga ore ga mexü̃ ga ngutaque̱xepataü̃wachigü
42 Rü jexguma noxri jangóonegu rü jema ĩãnewa ínaxũxũ ga Ngechuchu. Rü wüxi ga nachica ga taxúema íxãpataxü̃wa naxũ. Notürü ga duü̃xü̃gü rü naxca̱x nadaugü rü düxwa naxü̃tawa nangugü. Rü nüxü̃ naca̱a̱xü̃gü ga tama na ínaxũxũxü̃ca̱x ga jema norü naãnewa.
43 Notürü ga Ngechuchu rü nhanagürü nüxü̃: —Taxucürüwama petanügu charüxã́ũẽcha erü chanaxwa̱xe na náĩgü ja ĩãnegüwa ngẽxmagüxü̃ i duü̃xü̃gümaã rü ta nüxü̃ chixuxü̃ na nhuxãcü ãẽ̱xgacü jiĩxü̃ ja Tupana. Erü woetama ngẽmaca̱x núma choxü̃ namu —nhanagürü.
44 Rü jemaãcü Ngechuchu nüxü̃ nixuchigü ga ore ga ngutaque̱xepataü̃güwachigü ga guxü̃ma ga Gariréaanewa.
