Luca 6:1-49
6 Rü wüxi ga ngü̃xchigaarü ngunexü̃gu rü Ngechuchu rü norü ngúexü̃gümaã trigunecüwa nachopetü. Rü norü ngúexü̃gü rü inaxĩãcüma joxocüne trigu nicãũtanü. Rü naxme̱xmaã nanadaxi ga trigu rü najangṍẽtanü.
2 Rü nhuxre ga Parichéugü rü jema ngúexü̃güna nacagü, rü nhanagürügü: —¿Tü̱xcüü̃ ngü̃xchigaarü ngunexü̃gu penabuxu i trigu? Erü ngü̃xchigaarü ngunexü̃gu rü nachu̱xu na texé puracüxü̃ —nhanagürügü.
3 Rü Ngechuchu nanangãxü̃, rü nhanagürü: —¿Taguma e̱xna poperawa nüxü̃ pedau ga ṯacü na naxüxü̃ ga nuxcümaü̃cü ga ãẽ̱xgacü ga Dawí ga jexguma nataijagu ga nüma rü natanüxü̃gü?
4 —Rü Tupanapatagu naxücu rü nüxü̃ nadau ga jema põũ ga üünexü̃ ga jexma nuxü̃. Rü jema põũ rü nachu̱xu ga ngexerǘxemare na nangṍxü̃, rü paigüca̱xicatama nixĩ. Notürü Dawí nanajaxu ga jema põũ rü nanangõ̱x, rü natanüxü̃maã rü ta nangau —nhanagürü.
5 Rü nhanagürü ta ga Ngechuchu: —Tupana Nane ja duü̃xü̃xü̃ ixĩcü rü namaã inacua̱x i ngü̃xchigaarü ngunexü̃ —nhanagürü.
Wüxi ga jatü ga jumécüchiga
6 Rü wüxi ga to ga ngü̃xchigaarü ngunexü̃gu rü Ngechuchu rü ngutaque̱xepataü̃gu naxücu. Rü inanaxügü ga na nangu̱xẽẽtaexü̃. Rü jéma najexma ga wüxi ga jatü ga norü tügünewa jumécü.
7 Rü jema ngúexẽẽruü̃gü ga Muĩséarü mugüwa ngu̱xẽẽtaegüxü̃ rü Parichéugü, rü Ngechuchuxü̃ narüdaunü ngoxita ngü̃xchigaarü ngunexü̃gu guma jumécüxü̃ namexẽẽ, jerü naxca̱x nadaugü ga nhuxãcü norü ãẽ̱xgacügüxü̃tawa na ínaxuaxü̃güãxü̃.
8 Notürü nüma ga Ngechuchu rü nüxü̃ nacua̱x ga jema naãẽwa nagu naxĩnüẽxü̃ ga jema jatügü. Rü jemaca̱x guma jumécüxü̃ nhanagürü: —¡Írüda rü nuxã ngãxü̃tanügu jachi! —nhanagürü. Rü guma jumécü rü inachi rü norü ngãxü̃tanügu najachi.
9 Rü jexguma ga Ngechuchu rü jema jéma jexmagüxü̃na naca, rü nhanagürü nüxü̃: —¿Namexü̃ i ngü̃xchigaarü ngunexü̃gu na wüxie naxüxü̃ i mexü̃ rü e̱xna chixexü̃? ¿Rü namexü̃ i na namaxẽẽxü̃ rü e̱xna jamáxü̃? —nhanagürü.
10 Rü jexguma Ngechuchu nüxü̃ nidaugüãchi ga jema duü̃xü̃gü ga jéma jexmagüxü̃. Rü guma jumécüxü̃ nhanagürü: —¡Ijanawe̱xãchixẽẽ ja cuxme̱x! —nhanagürü. Rü guma jatü rü nügü inajarüwe̱xãchime̱xẽxẽẽ, rü narümeme̱x.
11 Notürü jema Parichéugü rü ngúexẽẽruü̃gü ga Muĩséarü mugüwa ngu̱xẽẽtaegüxü̃, rü poraãcü nanuẽ. Rü nügü nixucu̱xẽgü na nhuxãcü tá Ngechuchuxü̃ na jama̱xgüxü̃.
Ngechuchu nanade ga 12 ga norü ngúexü̃gü na tóxnamana namugüãxü̃ca̱x
12 Rü jexguma ga Ngechuchu rü dauxchitawa, wüxi ga ma̱xpǘnewa naxũ na jéma jajumuxẽxü̃ca̱x. Rü guxü̃ ga jema chütaxü̃gu rü jéma najumuxẽ.
13 Rü jexguma jangóonegu, rü Ngechuchu norü ngúexü̃güca̱x naca. Rü natanüwa najadexechi ga 12. Rü jema nixĩ ga jatügü ga Ngechuchu nüxü̃ unetagüxü̃ na tóxnamana nangegüãxü̃ca̱x ga norü ore.
14 Rü jema jatügü ga jadexechixü̃ rü Chimáũ ga Pedrugu naxüégaxü̃ nixĩ ga wüxi. Rü to nixĩ ga Ãdré ga Chimáũ naẽneẽ, rü Tiagu rü Juã́ũ, rü Piripi, rü Baturuméũ,
15 rü Mateu, rü Tumé, rü Tiagu ga Arupéu nane rü Chimáũ ga iporaãẽcüücü,
16 rü Juda ga Tiagueneẽ, rü Juda Icarióti ga jixcaama Ngechuchuxü̃ íxuaxü̃xü̃ naẽchita.
Ngechuchu rü muxü̃ma ga duü̃xü̃güxü̃ nangúexẽẽ
17 Rü Ngechuchu rü jema jatügü ga jadexechixü̃maã ínarüxĩgü nawa ga guma ma̱xpǘne. Rü wüxi ga nachica ga ínametachinüãnexü̃wa najachaxãchitanü. Rü jéma najexmagü ga muxü̃ma ga duü̃xü̃gü ga guxü̃ ga Judéaanewa ne ĩxü̃, rü Jerucharéü̃wa ne ĩxü̃, rü taxtü ga taxü̃ãnacüwa ga Sidã́ũwa rü Tiruwa ne ĩxü̃. Rü jéma naxĩ jerü Ngechuchuxü̃ naxĩnüẽchaü̃, rü nanaxwa̱xegü ga Ngechuchu na nameẽxẽẽxü̃ ga norü ḏaawegüwa.
18 Rü jema duü̃xü̃gü ga chixexü̃ ga naãẽ nawa jexmagüxü̃ rü ta naxca̱x nitaanegü.
19 Rü guxü̃ma ga duü̃xü̃gü rü Ngechuchuxü̃ ningõgügüchaü̃, jerü norü poramaã nanameẽxẽẽ.
Duü̃xü̃gü i taãẽgüxü̃chiga rü duü̃xü̃gü i ngechaü̃güxü̃chiga
20 Rü jexguma Ngechuchu rü norü ngúexü̃güxü̃ nadawenü, rü nhanagürü nüxü̃: —¡Petaãẽgü i pema ja ingearü dĩẽruã̱xgüxe! Rü Tupana ãẽ̱xgacü íixĩxü̃wa rü pema rü tá ta pexãchica.
21 —¡Rü petaãẽgü i pema i nhu̱xma taijaexe! ¡Rü tá meãma peingãxcharaü̃gü! ¡Rü petaãẽgü i pema i nhu̱xma auxexe! Rü jixcaama rü tá pecugüe.
22 —¡Rü petaãẽgü i pema i ngẽxguma duü̃xü̃gü pechi aiegu, rü pexü̃ ínawoxü̃gu, rü ṯacü pemaã jaxugüegu, rü chaugagu chixri pechiga jadexagügu!
23 —Rü ngẽxguma ngẽma pexü̃ üpetügu, rü ¡petaãẽgüama rü tama pexoegaãẽgü! Erü dauxü̃guxü̃ i naãnewa rü tá penajauxgü i wüxi i perü ãmare i mexẽchixü̃. Rü dücax, nhaã duü̃xü̃gü i nhu̱xma pechi aiexü̃ãrü o̱xigü rü jexgumarüü̃ ta nixĩ ga nachi na naxaiexü̃ ga nuxcümaü̃güxü̃ ga Tupanaãrü orearü uruü̃gü.
24 —Notürü wüxi i ngechaü̃ tá nixĩ i pexca̱x i pema ja muãrü dĩẽruã̱xgüxe erü núma nhama i naãnewa rü marü petaãẽgü.
25 —Rü wüxi i ngechaü̃ tá nixĩ i pexca̱x i pema ja marü ingaxcharaü̃güxe erü tá petaijae. Rü wüxi i ngechaü̃ tá nixĩ i pexca̱x i pema i nhu̱xma marü cugüexe, erü jixcaama rü perü ngechaü̃maã tá pexauxe.
26 —Rü wüxi i ngechaü̃ tá nixĩ i pexca̱x i ngẽxguma guxü̃ma i duü̃xü̃gü pexü̃ icua̱xüü̃gügu. Erü ngẽma duü̃xü̃gü i nhu̱xma pexü̃ icua̱xüü̃güxü̃ãrü o̱xigü rü jexgumarüü̃ nüxü̃ nicua̱xüü̃gü ga nuxcümaü̃güxü̃ ga orearü uruü̃güneta.
Nhuxãcü nüxü̃ tangechaü̃ i ngẽma tachi aiexü̃
27 —Notürü pema i nhu̱xma na choxü̃ pexĩnüẽxü̃ rü pemaã nüxü̃ chixu rü: —¡Nüxü̃ pengechaü̃ i perü uwanügü! ¡Rü meã nüxü̃ perüngü̃xẽẽ̱x i ngẽma pechi aiexü̃!
28 —¡Rü meã nachigamaã peidexagü rü naxca̱x ípeca i Tupanaãrü ngü̃xẽẽ naxca̱x i ngẽma pemaã guxchigagüxü̃! ¡Rü naxca̱x pejumuxẽgü i ngẽma chixri pechigamaã idexagüxü̃!
29 —Rü ngẽxguma texé cumaã nuxgu rü cuxü̃ tapechametügu rü name nixĩ i tama cuxütanü ega woo curü tochametüwa rü ta cuxü̃ tapechametügu. Rü ngẽxguma texé cuxü̃ napuarü dejuxü̃chiruã̱xgu, rü name nixĩ i tüxü̃ cungechaü̃ãma ega woo curü dauxü̃ rü ta cuxna tanapuxgu.
30 —¡Rü tüxna naxã ja texé ja curü ngẽmaxü̃ca̱x íc̱axe! Rü ngẽxguma texé curü ngẽmaxü̃ cuxna napuxgu, rü tama name i naxca̱x ícujaca.
31 —Rü ngẽma mexü̃ i pema penaxwa̱xexü̃ na togü pemaã naxüxü̃, rü name nixĩ i pema rü ta ngẽmaãcü mexü̃ namaã pexü.
32 —Rü ngẽxguma pema rü ngẽma duü̃xü̃gü i pexü̃ ngechaü̃xü̃xü̃xĩcatama pengechaü̃gu, rü ¿ṯacüwa namexü̃ i ngẽma? Erü ngẽma duü̃xü̃gü i tama jaxõgüxü̃ rü ngẽmaãcü nanaxügü.
33 —Rü ngẽxguma ngẽma duü̃xü̃gü i cuxü̃ rüngü̃xẽẽxü̃xü̃xĩcatama curüngü̃xẽẽgu, rü ¿ṯacüwa namexü̃ i ngẽma? Erü ngẽma duü̃xü̃gü i tama jaxõgüxü̃ rü ngẽmaãcü nanaxügü.
34 —Rü ngẽxguma ngẽma duü̃xü̃gü i ixããrü dĩẽruã́xü̃naxĩcatama cunaxãxgu i curü dĩẽru, rü ¿ṯacüwa namexü̃ i ngẽma? Erü ngẽma duü̃xü̃gü i tama jaxõgüxü̃ rü ngẽmaãcü nanaxügü, erü nüxü̃ nacua̱xgü rü tá nüxü̃́ nanataeguxẽẽ i ngẽma dĩẽru.
35 —Notürü pema rü name nixĩ i nüxü̃ pengechaü̃ i perü uwanügü, rü nüxü̃ perüngü̃xẽẽ. Rü ngẽxguma ṯacüca̱x pexna nacaxgu, rü name nixĩ i tama pexoegaãẽãcüma nüxna penaxã ega woo nagu perüxĩnüẽgu na ngürüãchi tãũxü̃táma pexü̃́ nataeguxẽẽãxü̃. Erü ngẽxguma ngẽmaãcü penaxü̱xgu, rü Tupana rü ngẽmaãrü jexera tá poraãcü pexü̃́ nanataeguxẽẽ, rü naxãcügü tá peixĩgü ja jima Tupana ja Poraxü̃chicü ja nüxü̃ rüngü̃xẽẽcü ta i ngẽma taguma moxẽ nüxna ãgüxü̃ rü ngẽma chixecümagüxü̃.
36 —Rü name nixĩ i pexü̃́ nangechaü̃tümüü̃wa̱xegüxü̃ i togü ngẽma Penatü ja Tupanaãxü̃́ nangechaü̃tümüü̃wa̱xexü̃rüü̃.
Tama name i tanangugü i togüarü maxü̃
37 —Tama name i togüxü̃ peixu rü penangugü i togüarü maxü̃. Rü ngẽxguma ja Tupana rü tãũxü̃táma nanangugü i perü maxü̃. Rü tama name i pocu namaã pexuegu i togü. Rü ngẽxguma ja Tupana rü tãũxü̃táma pocu pemaã naxuegu. ¡Rü togüaxü̃́ nüxü̃ pengechaü̃ i norü chixexü̃gü! Rü ngẽxguma ja Tupana rü tá ta pexü̃́ nüxü̃ nangechaü̃ i perü chixexü̃gü.
38 —¡Togüxü̃ perüngü̃xẽẽgü rü namaã pemecümagü! rü Tupana rü tá ta pexü̃ narüngü̃xẽẽ rü tá pemaã namecüma. Rü nhama wüxi i chacu i meãma napaxü̃rüü̃ rü ípoõcuxü̃rüü̃ tá Tupana pemaã namecüma rü pexna nanaxã i ngẽma mexü̃ i penaxwa̱xexü̃ i perü maxü̃ca̱x —nhanagürü.
39 Rü nhaã cua̱xruü̃wa duü̃xü̃gümaã nüxü̃ nixu ga Ngechuchu, rü nhanagürü: —¿Nhuxãcü i wüxi i ngexetüxü̃ rü to i ngexetüxü̃xü̃ namaxü̃ nacua̱xẽẽxü̃? Erü ngẽma taxre i ngexetüxü̃ rü wüxi i ãxmaxü̃gu tá nügümaã najajicu.
40 —Rü taxuü̃ma i wüxi i ngúexü̃ rü norü ngúexẽẽruü̃xü̃ narüjexera. Notürü ega aixcuma meã nangu̱xgu rü ngẽmaãcü norü ngúexẽẽruü̃rüü̃ tá nixĩ.
41 —¿Rü tü̱xcüü̃ cunangugü i cumücü naxca̱x i ngẽma íraxü̃ i chixexü̃ i naxüxü̃ notürü tama cugütama cungugü naxca̱x i ngẽma chixexü̃ i taxü̃ i cuxüxü̃?
42 —Rü ngẽxguma tama nüxna cucua̱xãchigu i ngẽma chixexü̃ i taxü̃ i cumatama cuxüxü̃, rü ¿nhuxũcürüwa i nagu curüxĩnüxü̃ na cunamexẽẽxü̃ i ngẽma cumücüarü chixexü̃ i íraxü̃? Pa Duü̃xü̃ i Meã Maxnetaxü̃x, name nixĩ i cuxira nüxü̃ curüxo i ngẽma chixexü̃ i taxü̃ i cumatama cuxüxü̃, rü ngẽxguma tá cume na nüxü̃ curüngü̃xẽẽxü̃ca̱x i cumücü na nüxü̃ naxoxü̃ca̱x i ngẽma chixexü̃ i íraxü̃ i naxüxü̃.
Wüxi i nanetü rü norü owa nixĩ i nüxü̃ icuáxü̃
43 —Nataxuma i nanetü i mexü̃ i chixearü oóxü̃. Rü nataxuma i nanetü i chixexü̃ i meãrü oóxü̃.
44 —Rü wüxichigü i nanetü rü norü owa nixĩ i nüxü̃ icuáxü̃. Rü wüxi i torawa rü taxucürüwama wüxi i ori i imúxü̃ tajaxu. Rü wüxi i chuxchuxü̃wa rü taxucürüwa uwa tajaxu.
45 —Rü wüxi ja mecü ja jatü rü mexü̃ i orexü̃ nixu, erü naãẽwa rü aixcuma mexü̃gu narüxĩnü. Notürü wüxi i jatü i chixecümaxü̃ rü chixexü̃ i orexü̃ nixu, erü chixexü̃gu narüxĩnü. Rü ngẽma naãẽwa nagu naxĩnüxü̃ nixĩ i nüxü̃ jaxuxü̃.
Jatü i Cristuga ĩnüxü̃ rü jatü i tama Cristuga ĩnüxü̃chiga
46 —¿Tü̱xcüü̃ i pema rü: “Pa Torü Corix” nhaperügü choxü̃, notürü tama penaxü i ngẽma pemaã nüxü̃ chixuxü̃?
47 —Rü nhu̱xma tá pemaã nüxü̃ chixu na nhuxãcü tiĩxü̃ ja jíxema chawe rüxũxẽ rü choxü̃ ĩnüxẽ rü naxǘxe i ngẽma tümamaã nüxü̃ chixuxü̃.
48 —Rü tüma rü wüxi ga jatü ga üpatacü rü jama̱xmaü̃cü ga norü caxta nhu̱xmata nutawa nangucürüü̃ tixĩ. Rü jexguma nama̱xgu ga taxtü rü jabaixü̃gu ga napata, rü woo ga na naporaü̃chiüxü̃, rü tama niwa̱xtaü̃, jerü meãma inapugüarü caxtaã̱x ga guma ĩ.
49 —Notürü jíxema nüxü̃ ĩnümarexe i chorü ore notürü tama naxǘxe i ngẽma tümamaã nüxü̃ chixuxü̃, rü wüxi ga jatü ga naxnücüétügumare üpatacürüü̃ tixĩ. Rü jexguma nama̱xgu ga taxtü, rü nibaixü̃ ga napata, rü naporaü̃chiü. Rü niwa̱xtaü̃ ga napata, rü jexma najarüxo ga guma ĩ.
