Luca 7:1-50
7 Rü jexguma nüxü̃ nachaxgu ga duü̃xü̃gümaã na jadexaxü̃ ga Ngechuchu, rü Caparnáũwa naxũ.
2 Rü jéma najexma ga wüxi ga churaragüarü capitã́ũ ga Romacü̱̃ã̱x. Rü guma capitã́ũ rü nüxü̃́ najexma ga wüxi ga norü duü̃xü̃ ga poraãcü nüxü̃ nangechaü̃xü̃. Rü jema norü duü̃xü̃ rü niḏaawe, rü naturaxü̃chi.
3 Rü jexguma Ngechuchuxü̃ naxĩnüchigagu ga guma capitã́ũ, rü Ngechuchuxü̃tawa nanamugü ga nhuxre ga Judéugüarü ãẽ̱xgacügü ga jaguã̱xgü. Rü nhanagürü nüxü̃: —¡Ngẽ́ma Ngechuchuxü̃tawa pexĩ na nüxü̃ peca̱a̱xü̃güxü̃ca̱x rü núma naxũ na chorü duü̃xü̃ca̱x janataanexẽẽãxü̃ca̱x! —nhanagürü.
4 Rü Ngechuchuxü̃tawa naxĩ, rü poraãcü nüxü̃ naca̱a̱xü̃gü, rü nhanagürügü: —Name nixĩ i nüxü̃ curüngü̃xẽẽ ja torü capitã́ũ.
5 —Erü nüma rü guxü̃ i Judéugüxü̃ nangechaü̃. Rü nümatama nanaxütanü na naxügüãxü̃ca̱x ga torü ngutaque̱xepataü̃ —nhanagürügü.
6 Rü jexguma ga Ngechuchu rü nawe narüxũ. Notürü jexguma marü capitã́ũpataxü̃ jangaicagu, rü nüma ga capitã́ũ rü Ngechuchuca̱x jéma nanamu ga nhuxre ga namücügü na namaã nüxü̃ janaxugüxü̃ca̱x ga norü ore ga nhaxü̃: —Pa Corix, tama cuxü̃ chachixewechaü̃ na chapatawa cunguxü̃ erü chama rü taxuwama chame na chapatagu na cuxücuxü̃.
7 —Rü ngẽmaca̱x nixĩ i tama chamatama cuxca̱x chajac̱axü̃. Rü chanaxwa̱xe i curü orewaxicatama nüxü̃ cuixu na naxca̱x jataanexü̃ tá i chorü duü̃xü̃.
8 —Erü chama rü ta chorü ãẽ̱xgacüme̱xẽwa changẽxma, rü cha̱xme̱xwa nangẽxmagü ta i nhuxre i churaragü. Rü ngẽxguma chanamu̱xgu i wüxi na ngextá naxũxü̃ca̱x, rü ngẽ́ma naxũ. Rü ngẽxguma chaugüxü̃tawa naxca̱x changemagu i to, rü chauxü̃tawa nangu. Rü ngẽxguma chorü duü̃xü̃xü̃ chamu̱xgu na ṯacü na naxüxü̃ca̱x, rü choxü̃́ nanaxü —nhanagürü.
9 Rü ga Ngechuchu rü jexguma nüxü̃ naxĩnügu ga jema capitã́ũãrü ore ga naxü̃tawa namuxü̃ rü naḇaixãchiãẽ. Rü jema duü̃xü̃gü ga nawe rüxĩxü̃xü̃ nadawenü, rü nhanagürü: —Aixcuma pemaã nüxü̃ chixu rü taxuü̃ma i Judéugütanüwa nüxü̃ ichajangau i wüxi i duü̃xü̃ i ngẽma jatürüü̃ aixcuma jaxõxü̃ —nhanagürü.
10 Rü jexguma nawoegugu ga jema capitã́ũmücügü ga Ngechuchuxü̃tawa namugüxü̃, rü nüxü̃ inajangaugü ga marü naxca̱x na jataanexü̃ ga jema capitã́ũãrü duü̃xü̃.
Ngechuchu ínanadaxẽẽ ga wüxi ga jutecü ngĩne
11 Rü jemawena ga Ngechuchu rü wüxi ga ĩãne ga Naĩ́gu ãẽ́ganewa naxũ. Rü nawe narüxĩ ga norü ngúexü̃gü, rü muxü̃ma ga togü ga duü̃xü̃gü.
12 Rü jexguma guma ĩãneãrü ngaicamana nanguxgu, rü tüxü̃ nadau ga wüxi ga jueta ga ta̱xgüwa tüxü̃ nangegüxe. Rü guxema juetaarü mama rü tajute rü guma jucü rü guxicatama nixĩ ga tümane ixĩcü. Rü muxü̃ma ga duü̃xü̃gü ga guma ĩãnecü̱̃ã̱x, rü guxema juetaarü mamawe narüxĩ.
13 Rü jexguma Cori ga Ngechuchu guma jucüarü mamaxü̃ da̱xgu, rü nüxü̃́ ingechaü̃tümüü̃. Rü nhanagürü ngĩxü̃: —¡Tãṹ i cuxaxuxü̃! —nhanagürü.
14 Rü jexguma ga Ngechuchu rü juetaca̱x nixũ, rü nüxü̃ ningõgü ga tümachiü̃. Rü jema tüxü̃ ingetaü̃güxü̃ rü tümamaã inajachiãchitanü. Rü nhanagürü ga Ngechuchu tüxü̃ ga guxema jueta: —Pa Ngextü̱xücüx, ¡paxa írüda! —nhanagürü.
15 Rü jexguma ga guxema juchiréxe rü ítarüto, rü itanaxügü ga na tidexaxü̃. Rü Ngechuchu rü tümaẽna tüxü̃ namu.
16 Rü jexguma jemaxü̃ nadaugügu ga duü̃xü̃gü, rü guxü̃ma namuü̃ẽ. Rü inanaxügüe ga Tupanaxü̃ na jacua̱xüü̃güxü̃. Rü nhanagürügü: —Wüxi i Tupanaãrü orearü uruü̃ i poraxü̃ tatanüwa nango̱x. Rü nhanagürügü ta: —Tupana nuã naxũ na norü duü̃xü̃güxü̃ janangü̃xẽẽxü̃ca̱x —nhanagürügü.
17 Rü guxü̃ma ga Judéaanewa rü norü ngaicamana, rü duü̃xü̃gü nüxü̃ nacuáchigagü ga jema Ngechuchu üxü̃.
Juã́ũ ga baiü̃xẽẽruü̃ rü Ngechuchuxü̃tawa nanamugü ga taxre ga norü duü̃xü̃gü
18 Rü Juã́ũ ga baiü̃xẽẽruü̃ rü nüxü̃ nacuáchiga ga guxü̃ma ga jema Ngechuchu üxü̃, jerü norü ngúexü̃gü ga Juã́ũ rü namaã nüxü̃ nixugü. Rü jemaca̱x ga Juã́ũ rü taxre ga norü ngúexü̃güca̱x naca.
19 Rü Ngechuchuxü̃tawa nanamugü. Rü Juã́ũ rü nhanagürü nüxü̃: —¡Ngẽ́ma pexĩ rü Ngechuchuna peca rü nhapegügü nüxü̃: “¿Cuma jiĩxü̃ i Cristu i cuxü̃ ítanaṉg̱uxẽẽxü̃, rü e̱xna to tá jixĩ i Cristu?” nhapegügü nüxü̃!
20 Rü jema jatügü ga Juã́ũ Ngechuchuxü̃tawa mugüxü̃, rü Ngechuchuca̱x naxĩ. Rü nhanagürügü nüxü̃: —Juã́ũ ja baiü̃xẽẽruü̃ núma cuxü̃tawa toxü̃ namugü na cuxna tajacagüxü̃ca̱x rü ¿aixcuma cuma cuiĩxü̃ i Cristu ja núma nguxchaü̃cü, rü e̱xna to tá jixĩ i Cristu? —nhanagürügü.
21 Rü jexgumatama Ngechuchuxü̃tawa nangugügu ga Juã́ũãrü ngúexü̃gü, rü Ngechuchu nanameẽxẽẽ ga muxü̃ma ga duü̃xü̃gü ga nagúxü̃raü̃xü̃ ga ḏaawemaã iḏaaweexü̃ rü jema iṉg̱oxoã́xü̃. Rü najadauchigüxẽẽ ga muxü̃ma ga ingexetüxü̃.
22 Rü jemaca̱x Ngechuchu nanangãxü̃ rü nhanagürü: —¡Pewoegu rü Juã́ũmaã nüxü̃ pejarüxu i ngẽma pematama nüxü̃ pedauxü̃ rü nüxü̃ pexĩnüẽxü̃! ¡Rü namaã nüxü̃ peixu i nhuxãcü i ngẽma ingexetüxü̃ rü marü nidauchigü, rü ngẽma ichixeparaxü̃ rü marü inachigü, rü ngẽma chaxüneã̱xgüxü̃ rü marü naxca̱x nitaanegü, rü ngẽma ngauchi̱xẽgüxü̃ rü marü ningo̱xnamachi̱xẽgü, rü ngẽma juexü̃ rü wenaxãrü namaxẽ, rü ngẽma ingearü dĩẽruã̱xgüxü̃maã rü marü nüxü̃ tixu i Tupanaãrü ore i mexü̃!
23 —Rü tataãẽ ja jíxema texé ja tama choxü̃ rüxoxe —nhanagürü ga Ngechuchu.
24 Rü jexguma nawoegu̱xgu ga jema duü̃xü̃gü ga Juã́ũ jéma mugüxü̃, rü Ngechuchu inanaxügü ga guma Juã́ũchiga na jadexaxü̃. Rü duü̃xü̃gümaã nüxü̃ nixu, rü nhanagürü: —¿Ṯacü nixĩ ga pema ípejadaugüxü̃ ga dauxchitawa ga taxúema íxãpataxü̃wa? ¿E̱xna wüxi ga jatü ga turaxü̃ ga nhama dexne ga buanecü jaxĩã̱xtanücüüxẽẽcürüü̃ ixĩxü̃ nixĩ ga ípejadaugüxü̃?
25 —Rü e̱xna tama guma ípejadaugügu, ¿rü ṯacü nixĩ ga ípejadaugüxü̃? ¿E̱xna wüxi ga jatü ga poraãcü nügü nga̱xãẽcü ípejadaugü? Pema nüxü̃ pecua̱x i ngẽma poraãcü nügü nga̱xãẽgüxü̃ rü ãẽ̱xgacügü ja tacügüpatawa nangẽxmagü, rü taxuü̃ca̱xma dauxchitawa nangẽxmagü.
26 —¿Ṯacü e̱xna nixĩ ga ípejadaugüxü̃? ¿E̱xna wüxi ga Tupanaãrü orearü uruü̃? Ngẽmáãcü aixcuma jema nixĩ ga ípejadaugüxü̃. Rü pemaã nüxü̃ chixu rü Juã́ũ ja baiü̃xẽẽruü̃ rü tama wüxi i ngẽxü̃rüüxü̃ i Tupanaãrü orearü uruü̃ nixĩ.
27 —Rü Juã́ũchiga nixĩ ga naxümatüxü̃ ga jema Tupanaãrü ore ga nhaxü̃:“Cupe̱xegu chajamu i chorü orearü ngeruü̃ na cuxca̱x namexẽẽãxü̃ca̱x i duü̃xü̃güarü maxü̃”,
nhaxü̃.
28 —Rü pemaã nüxü̃ chixu rü guxü̃ i duü̃xü̃gütanüwa rü nataxuma i Tupanaãrü orearü uruü̃ i Juã́ũ ja baiü̃xẽẽruü̃ãrü jexera. Notürü jíxema Tupana ãẽ̱xgacü íixĩxü̃wa wixwexü̃chi üxe, rü Juã́ũãrü jexera tixĩ —nhanagürü.
29 Rü guxü̃ma ga duü̃xü̃gü rü woo jema jatügü ga Romaãrü ãẽ̱xgacüca̱x dĩẽru ngĩxü̃ ideetanüxü̃, rü nüxü̃ naxĩnüẽ ga jema Ngechuchuarü ore rü nhu̱xmachi Tupanaxü̃ nicua̱xüü̃gü jerü nüxü̃ nicua̱xãchitanü na aixcuma mecü jiĩxü̃ ga Tupana. Rü jema nixĩ ga duü̃xü̃gü ga ü̃paacü Juã́ũ íbaiü̃xẽẽxü̃.
30 Notürü jema Parichéugü rü jema ngúexẽẽruü̃gü ga Muĩséarü mugüwa ngu̱xẽẽtaegüxü̃ rü tama nanaxwa̱xegü ga Juã́ũ na ínabaiü̃xẽẽxü̃. Rü jemaãcü nüxü̃ naxoe ga jema mexü̃ ga Tupana naxca̱x üxchaü̃xü̃.
31 Rü nüma ga Cori ga Ngechuchu rü nhanagürü: —¿Ṯacügu tá chanangu i nhamaü̃cüü i duü̃xü̃gü? ¿Rü nanaṯacüraü̃gü?
32 —Maneca nhaã duü̃xü̃gü rü taxuxü̃maãma nataãẽgü ngẽxgumarüü̃ i nhuxre i buxü̃gü i ĩã̱xtüwa rütogüxü̃, rü íxĩxãẽwa̱xegüxü̃, rü tagaãcü namücügüxü̃ nhagüxü̃:
“Marü wowerumaã pexca̱x tapaxetagü notürü tama ípexü̃ãchitanüxü̃. Rü marü ngechaü̃xü̃ i wijaegu pexca̱x tawijaegü notürü tama pexauxe”, nhagüxü̃. Rü ngẽma buxü̃gürüü̃ taxuxü̃maãma nataãẽgü i nhamaü̃cüü i duü̃xü̃gü.
33 —Jerü ga Juã́ũ ga baiü̃xẽẽruü̃ rü núma naxũ, rü tama põũ nangõ̱x rü tama wĩũ najaxaxü. Rü jexguma ga pema rü: “Naṉg̱oxoã̱x” nhaperügü nüxü̃.
34 —Rü nhu̱xmachi núma chaxũ i chama ja Tupana Nane na duü̃xü̃xü̃ chiĩxü̃, rü õna changõ̱x rü wĩũ chajaxaxü. Rü ngẽxguma i pema rü nhaperügügü choxü̃:
“Chama rü chataanüxü̃chi rü changãxwa̱xe, rü pecaduã̱xgüxü̃ i duü̃xü̃gümaã chaxãmücü, rü jatügü i Romaãrü ãẽ̱xgacüca̱x dĩẽru ngĩxü̃ ideetanüxü̃maã chaxãmücü”, nhaperügügü choxü̃.
35 —Notürü Tupanaãrü cua̱x rü meãma nango̱x tümawa ja jíxema aixcuma nawe rüxĩxẽ —nhanagürü ga Ngechuchu.
Ngechuchu rü Chimáũ ga Parichéupatawa najexma
36 Rü wüxi ga Parichéu rü Ngechuchuna naxu na napatawa nachibüxü̃ca̱x. Rü jéma naxũ ga Ngechuchu rü jema Parichéuarü mechawa najarüto.
37 Rü wüxi ga ngecü ga chixri maxü̃cü ga ngẽãẽcü ga jematama ĩãnegu ãchiü̃cü, rü jéma ixũ ga jexguma nüxü̃ nacuáchigagu na Parichéupatawa tá na nachibüxü̃ ga Ngechuchu. Rü jéma inange ga wüxi ga pumara ga paacaxü̃ ga wüxi ga garapaacü ga mexẽchicümaã ãxchiü̃xü̃.
38 Rü naxauxãcüma Ngechuchucutüxü̃tawa ijarütoxõchi. Rü ngĩxü̃chiüxetümaã ijawaicutüxẽẽ. Rü ngĩjaemaã íinapicutü, rü inawãxĩcutü. Rü nhu̱xmachi jema pumaramaã inachacutü.
39 Rü jexguma jemaxü̃ nada̱xgu ga jema Parichéu ga Ngechuchuna uxü̃, rü naãẽwa nagu narüxĩnü rü nügümaãtama nhanagürü: —Ngẽxguma chi nhaã Ngechuchu rü aixcuma wüxi i Tupanaãrü orearü uruü̃ jixĩgu, rü nüxü̃ chi nacua̱x na ṯacü jiĩxü̃ i nhaã ngexü̃ i nüxü̃ ingõgüxü̃ rü nhuxãcü na namaxü̃xü̃ rü poraãcü na napecaduã́xü̃ —nhanagürü ga naãẽwa.
40 Rü jexguma ga Ngechuchu rü nüxü̃ nacua̱xama rü Parichéuxü̃ nhanagürü: —Pa Chimáũx, choxü̃́ nangẽxma i wüxi i ore i cumaã nüxü̃ chixuxchaü̃xü̃ —nhanagürü. Rü nüma ga Parichéu rü Ngechuchuxü̃ nangãxü̃, rü nhanagürü: —¡Ẽcü, chamaã nüxü̃ ixu, Pa Ngúexẽẽruü̃x! —nhanagürü.
41 Rü nhanagürü ga Ngechuchu: —Taxre ga jatügü rü wüxi ga corixü̃tawa nanangetanü. Rü wüxi nanangetanü ga 500 tachinü ga dĩẽru rü to nanangetanü ga 50 tachinü.
42 —Notürü jema taxre rü taxuacü nanaxütanü ga norü ngetanü. Rü jemaca̱x düxwa jema norü cori rü nüxü̃́ nüxü̃ nangechaü̃ ga jema nüxü̃́ na nangetanügüãxü̃. Rü nhu̱xmax, Pa Chimáũx, rü ¡chamaã nüxü̃ ixu! rü ¿ngẽxü̃rüüxü̃ ga jema taxre ga jatügü rü jexeraãcü norü corixü̃ nangechaü̃? —nhanagürü.
43 Rü Ngechuchuxü̃ nangãxü̃ ga Chimáũ, rü nhanagürü: —Chauxca̱x ga jema jexeraãcü nüxü̃́ nangetanüxü̃ nixĩ ga jexeraãcü norü corixü̃ ngechaü̃xü̃ —nhanagürü. Rü Ngechuchu rü nhanagürü nüxü̃: —Ngẽmáãcü aixcuma nüma nixĩ —nhanagürü.
44 Rü jexguma ga Ngechuchu rü ngĩxü̃ nadawenü ga jema ngecü, rü nhanagürü Chimáũxü̃: —¿Ngĩxü̃ cudauxü̃ i nhaã ngecü? Rü cupatagu chaxücu i chamax, Pa Chimáũx, notürü tama dexá choxnata cuxã chorü jaxcutüruü̃. Notürü nhaã ngecü rü ngĩxü̃chiuxetümaã choxü̃ ijawaicutüxẽẽ, rü ngĩjaemaã choxü̃ íipicutü.
45 —Cuma rü tama choxü̃ cuwãxĩ i noxri choxü̃ curümoxẽgu, notürü ngĩma i nhaã ngecü rü noxri núma changuxgumama rü choxü̃ ijawãĩxcutüchigü.
46 —Cuma rü tama pumaramaã choxü̃ cuchaeruxüra, notürü ngĩma i nhaã ngecü rü chacutügu inaba i pumara.
47 —Rü ngẽmaca̱x woo namu i ngĩrü pecadugü notürü Tupana ngĩxü̃́ nüxü̃ nangechaü̃ i guxü̃ma, erü ngĩma rü aixcuma choxü̃ ingechaü̃. Notürü jíxema tama aixcuma ngechaü̃ca̱x íjac̱axe, rü tama poraãcü Tupanaxü̃ tangechaü̃ —nhanagürü.
48 Rü jexguma ga Ngechuchu rü jema ngecüxü̃ nhanagürü: —Curü pecadugü rü marü cuxü̃́ nüxü̃ changechaü̃ —nhanagürü.
49 Rü jema togü ga nüxna naxugüxü̃ ga jéma Ngechuchumaã mechawa jexmagüxü̃, rü inanaxügü ga nügümücügümaãchigü na jadexagüxü̃. Rü nhanagürügü: —¿Ṯacü nixĩ i nhaã jatü, eca̱x ngẽmaãcü duü̃xü̃güaxü̃́ pecaduxü̃ nangechaü̃xü̃? —nhanagürügü.
50 Notürü Ngechuchu rü nhanagürü ngĩxü̃ ga jema ngecü: —Marü cuxü̃́ nangẽxma i maxü̃ i taguma gúxü̃, erü choxü̃́ cujaxõ. ¡Nhu̱xma rü taãẽãcüma cuchiü̃wa naxũ! —nhanagürü.
