Luca 9:1-62
9 Rü Ngechuchu rü nanangutaque̱xexẽẽ ga jema 12 ga norü ngúexü̃gü. Rü pora nüxna naxã rü nüxna naxãga na ínawoxü̃ãxü̃ca̱x ga nagúxü̃raü̃xü̃ ga ṉg̱oxogü, rü na nameẽxẽẽãxü̃ca̱x ga duü̃xü̃gü ga iḏaaweexü̃.
2 Rü najamugü na duü̃xü̃gümaã nüxü̃ jaxugüexü̃ca̱x ga ore ga mexü̃ na nhuxãcü ãẽ̱xgacü jiĩxü̃ ja Tupana, rü na nameẽxẽẽãxü̃ca̱x ga duü̃xü̃gü ga iḏaaweexü̃.
3 Rü nhanagürü nüxü̃: —¡Rü taxuxü̃táma ípeinge i perü namawaü̃, rü bai ja perü caxü̃chigüxü̃ ja naĩxmena̱xã, rü bai i perü chacu, rü bai i perü põũ, rü bai i perü dĩẽru. Rü wüxitama i perü dauxü̃ ípeinge, rü tama i taxre!
4 —Rü ngẽxguma wüxi ja ĩãnewa pengugügu, ¡rü wüxi ja ĩpatagutama perücho rü nhu̱xmata ipexĩãchi nawa ja jima ĩãne!
5 —Rü ngextá tama pexü̃ ínajauxgüxü̃wa, ¡rü ípechoxü̃ nawa ja jima ĩãne! Rü ngẽxguma ngẽ́ma ipexĩãchigu ¡rü ipepagücutü i perü üxaxü̃cutü na ngẽmawa nüxü̃ nacua̱xgüxü̃ca̱x na chixexü̃ naxügüxü̃ i ngẽma duü̃xü̃gü! —nhanagürü.
6 Rü inaxĩãchi, rü guxü̃ma ga ĩãnexãcügüwa naxĩ. Rü nüxü̃ nixugüetanü ga Tupanaãrü ore ga mexü̃. Rü guxü̃wama nanameẽxẽẽtanü ga duü̃xü̃gü ga iḏaaweexü̃.
Naju ga Juã́ũ ga baiü̃xẽẽruü̃
7 Rü Gariréaaneãrü ãẽ̱xgacü ga Erudi, rü nüxü̃ nacuáchiga ga guxü̃ma ga jema Ngechuchu üxü̃. Rü poraãcü nagu narüxĩnü rü naxoegaãẽ ga Erudi, jerü nümaxü̃ ga duü̃xü̃gü rü nhanagürügü: —Juã́ũ ja baiü̃xẽẽruü̃ nixĩ ja jima, rü marü wena namaxü̃ —nhanagürügü.
8 Notürü togü rü nhanagürügü: —Nuxcümaü̃cü ga Tupanaãrü orearü uruü̃ ga Ería nixĩ, rü wena nango̱x —nhanagürügü. Rü togü rü nhanagürügü: —Guma nixĩ ga náĩ ga nuxcümaü̃cü ga Tupanaãrü orearü uruü̃, rü wena namaxü̃ —nhanagürügü.
9 Notürü Erudi rü nhanagürü: —Chamatama chanamu ga churaragü na Juã́ũxü̃ jadaenaxãgüxü̃ca̱x. ¿Rü ṯacü e̱xna nixĩ i ngẽma jatü i duü̃xü̃gü ngẽmaãcü poraãcü nüxü̃ ixuchigagüechaxü̃? —nhanagürü. Rü Erudi rü naxca̱x nadau ga nhuxãcü Ngechuchuxü̃ na nadauxü̃.
Ngechuchu rü nanachibüexẽẽ ga 5000 ga jatügü
10 Rü jexguma nawoeguxgu ga jema Ngechuchuarü ngúexü̃gü ga jamugüxü̃, rü Ngechuchumaã nüxü̃ nixugüe ga jema naxügüxü̃. Rü jexguma ga Ngechuchu rü wüxi ga nachica ga taxúema ixãpataxü̃wa nanagagü ga Bechaídaarü ĩãneãrü ngaicamana.
11 Notürü jexguma duü̃xü̃gü nüxü̃ cua̱xgügu ga ngextá na najexmaxü̃, rü Ngechuchuwe narüxĩ. Rü Ngechuchu rü meãma jema duü̃xü̃güxü̃ najaxu, rü namaã nüxü̃ nixu na nhuxãcü ãẽ̱xgacü jiĩxü̃ ja Tupana. Rü nanameẽxẽẽ ga jema duü̃xü̃gü ga iḏaaweexü̃.
12 Rü jexguma marü najáuanegu, rü Ngechuchuca̱x naxĩ ga jema 12 ga ngúexü̃gü ga jamugüxü̃. Rü nhanagürügü nüxü̃: —¡Íjamugü i nhaã duü̃xü̃gü na ĩãnexãcügü rü ĩpatagü ja ngaicamana ngẽxmagünewa na naxĩxü̃ca̱x, rü ngẽxma na napegüxü̃ca̱x rü norü õnata̱a̱x jataxegüxü̃ca̱x! Erü nuã íingẽxmagüxü̃wa rü nataxuma i ṯacü rü õna —nhanagürügü.
13 Notürü Ngechuchu rü nhanagürü nüxü̃: —¡Pematama penaxüwemü! —nhanagürü. Rü nanangãxü̃gü, rü nhanagürügü: —Wüxime̱ẽ̱xpü̱x i põũ rü taxre i choxnixĩcatama toxü̃́ nangẽxma. ¿Rü e̱xna cunaxwa̱xe na naxca̱x tajataxegüxü̃ i õna naxca̱x i guxü̃ma i nhaã duü̃xü̃gü? —nhanagürügü.
14 Rü 5000 ga jatügü nixĩ ga jema jéma jexmagüxü̃. Notürü Ngechuchu rü nhanagürü nüxü̃ ga norü ngúexü̃gü: —¡Ẽcü ípenatogüxẽẽ̱x rü 50 chigü i wüxi tücumüwachigü! —nhanagürü.
15 Rü jemaãcü nanaxügü ga norü ngúexü̃gü. Rü ínanatogüxẽẽ ga guxü̃ma ga duü̃xü̃gü.
16 Rü jexguma ga Ngechuchu rü nanade ga jema wüxime̱ẽ̱xpü̱x ga põũ rü jema taxre ga choxni. Rü dauxü̃gu nadawenüãcüma Tupanana moxẽ naxã, rü nhu̱xmachi inanabücu ga jema põũ rü choxni. Rü norü ngúexü̃güna nanaxã na nüxü̃ januãxü̃ca̱x ga jema duü̃xü̃gü.
17 Rü guxü̃ma ga jema duü̃xü̃gü rü meãma nachibüe. Rü jemawena rü 12 ga pexchigü nanapagüxẽẽ namaã ga jema põũ rü choxnichipe̱xegü ga ijaxügüxü̃.
Pedru nanango̱xẽẽ na Cristu na jiĩxü̃ ga Ngechuchu
18 Rü wüxi ga ngunexü̃ rü Ngechuchu norü ngúexü̃gümaã noxrüwama jajumuxẽgu, rü nüma rü norü ngúexü̃güna naca, rü nhanagürü: —¿Nhuxũ nhaxü̃ i duü̃xü̃gü i chauchiga i chama na texé chiĩxü̃? —nhanagürü.
19 Rü norü ngúexü̃gü nanangãxü̃gü rü nhanagürügü: —Nangẽxma i duü̃xü̃gü rü:
“Juã́ũ ja baiü̃xẽẽruü̃ cuixĩ”, nhagüxü̃, rü togü i:
“Ería cuixĩ”, nhagüxü̃, rü togü rü:
“Wüxi ga nuxcümaü̃cü ga Tupanaãrü orearü uruü̃ i wena maxü̃cü cuixĩ”, nhagüxü̃ —nhanagürügü.
20 Rü jexguma Ngechuchu nüxna naca rü nhanagürü: —¿Rü pema i nhuxũ nhapegüxü̃ choxü̃ na texé chiĩxü̃? —nhanagürü. Rü Pedru nanangãxü̃ rü nhanagürü: —Cuma nixĩ i Cristu i Tupana Nane —nhanagürü.
Ngechuchu nanaxunagü ga norü juxchiga
21 Rü Ngechuchu rü najaxucu̱xẽgü ga norü ngúexü̃gü na taxúemaãma nüxü̃ jaxugüexü̃ca̱x ga nüma rü Cristu na jiĩxü̃.
22 Rü nhanagürü nüxü̃ ga norü ngúexü̃gü: —Chama i Tupana Nane na duü̃xü̃xü̃ chiĩxü̃, rü poraãcü ngúxü̃ tá chinge. Rü choxü̃ tá naxoo̱xgü i Judéugüarü ãẽ̱xgacügü i jaguã̱xgü, rü paigüarü ãẽ̱xgacügü, rü ngẽma ngúexẽẽruü̃gü i Muĩséarü mugüwa ngu̱xẽẽtaegüxü̃. Rü tá choxü̃ nima̱xgü, notürü tamaẽ̱xpü̱x i ngunexü̃gu rü wena táxarü chamaxü̃ —nhanagürü.
23 Rü jixcama rü guxü̃ma ga norü ngúexü̃güxü̃ nhanagürü: —Rü ngẽxguma texé chawe rüxũxchaü̃gu, ¡ẽcü nüxü̃ tarüxo i tümaãrü ngúchaü̃, rü namaã tapora i ngẽma guxchaxü̃gü i tümaca̱x ínguxü̃ i nhama curuchawa tipotaxü̃rüü̃ tüxü̃ ixĩxẽẽxü̃, rü ngẽmaẽ́tüwa chawe tarüxũãma!
24 —Erü jíxema tügü maxẽchaxẽẽchaü̃xẽ rü tá taju, notürü jíxema chauxca̱x juxe rü aixcuma tá tüxü̃́ nangẽxma i maxü̃ i taguma gúxü̃.
25 ¿Rü ṯacüwa i nüxü̃́ namexü̃ ja wüxi ja jatü ega najauxãgu i guxü̃ma i nhama i naãneãrü ngẽmaxü̃gü, notürü ijanatauxẽẽãgu i norü maxü̃?
26 —Rü ngẽxguma texé chauxca̱x ãnegu rü naxca̱x taxãnegu i chorü ore, rü chama i Tupana Nane i duü̃xü̃xü̃ na chiĩxü̃ rü tá ta tümaca̱x chaxãne i ngẽxguma ãẽ̱xgacü chixĩãcüma núma chaxũxgu. Rü ngẽxguma wenaxãrü núma chaxũxgu rü Chaunatü ja Tupanarüü̃ tá chapora, rü dauxü̃cü̱̃ã̱x i Tupanaãrü orearü ngeruü̃gü i üünegüxü̃rüü̃ tá chamexẽchi.
27 —Rü aixcuma pemaã nüxü̃ chixu rü nhuxre i duü̃xü̃gü i nuã ngẽxmagüxü̃ rü tá nüxü̃ nadaugü na nhuxãcü ãẽ̱xgacü na jiĩxü̃ ja Tupana naxü̃pa na najuexü̃ —nhanagürü.
Ngechuchu rü naxüchicüü
28 Rü 8 ga ngunexü̃guwena ga na jema nhaxü̃, rü Ngechuchu rü wüxi ga ma̱xpǘnewa naxũ na jéma jajumuxẽxü̃ca̱x. Rü ínajaxümücügü ga Pedru rü Tiagu rü Juã́ũ.
29 Rü jexguma ínajumuxẽjane ga Ngechuchu rü nachametü rü ngürüãchi nij̱auracüü, rü naxchiru rü ta nij̱auracüü, rü poraãcüxü̃chima nacómü.
30 Rü jexguma rü jéma nango̱x ga taxre ga jatügü ga Ngechuchumaã idexagüxü̃. Rü Muĩsé nixĩ ga wüxi, rü Ería nixĩ ga to.
31 Rü jema taxre íjexmagüxü̃wa rü poraãcüxü̃chi nangóone. Rü ínidexagü nachiga ga nhuxãcü Jerucharéü̃gu tá na najuxü̃ ga Ngechuchu.
32 Rü woo ga Pedru rü namücügü rü poraãcü na najaxtaexü̃ rü tama napee. Rü nüxü̃ nadaugü ga nhuxãcü poraãcü na nangóonexü̃ ga naxü̃tawa ga Ngechuchu rü jema taxre ga jatügü ga namaã jexmagüxü̃xü̃tawa.
33 Rü jexguma jema taxre ga jatügü Ngechuchuna ixĩgachitanügu, rü Pedru rü nhanagürü Ngechuchuxü̃: —Pa Ngúexẽẽruü̃x, namexẽchi nixĩ na nuã ingẽxmagüxü̃. ¡Rü ngĩxã tanaxü ja tamaẽ̱xpü̱x ja düxenü, rü wüxi ja cuxca̱x, rü náĩ ja Muĩséca̱x, rü náĩ ja Eríaca̱x! —nhanagürü. Notürü ga Pedru rü tama nüxü̃ nacua̱x ga na nhuxũ nhaxü̃ jerü poraãcü naḇaixãchiãẽ.
34 Rü jexguma íjadexajane ga Pedru, rü wüxi ga caixanexü̃ natanügu najanga̱i̱xema. Rü poraãcü namuü̃ẽ ga jema ngúexü̃gü ga jexguma jema caixanexü̃ natanügu janga̱i̱xemagu.
35 Rü jema caixanexü̃wa inanaxũ ga wüxi ga naga ga nhaxü̃: —Daa nixĩ ja Chaune ja nüxü̃ changechaü̃xü̃chicü. ¡Rü naga pexĩnüẽ! —nhaxü̃.
36 Rü jexguma jema nhaxguwena ga jema naga rü Ngechuchuarü ngúexü̃gü rü taxúexü̃ma ga toguexü̃ nadaugü, rü Ngechuchuxü̃xĩcatama nadaugü. Rü jema ngúexü̃gü rü taxúemaãma nüxü̃ nixugüe ga jema nüxü̃ nadaugüxü̃.
Ngechuchu rü nanamexẽẽ ga wüxi ga bucü ga ṉg̱oxo nawa jexmacü
37 Rü jexguma moxü̃ãcü ga guma ma̱xpǘnewa janachoü̃gu, rü muxü̃ma ga duü̃xü̃gü jexma Ngechuchuxü̃ najangaugü.
38 9:38-39 Rü jema duü̃xü̃gütanüwa rü wüxi ga jatü tagaãcü Ngechuchuxü̃ nhanagürü: —Pa Ngúexẽẽruü̃x, ¡choxü̃ rüngü̃xẽẽ, rü tüxü̃ nadau ja chaune! Erü tügümaã choxü̃́ tawüxica̱x, rü wüxi i ṉg̱oxo tümawa nangẽxma. Rü ngẽxguma tüxü̃ naxüxgu, rü aita tüxü̃ naxüxẽẽ, rü tüxü̃ naxãũãẽxẽẽ, rü tüxü̃ narüchia̱xẽẽ. Rü chixexü̃ tümamaã naxü, rü tama tüxü̃ ningéxchaü̃.
39 Nüü̃ nadau 9:38
40 Rü marü nüxü̃ chaca̱a̱xü̃ i curü ngúexü̃gü na tümawa ínata̱xüchigüãxü̃ca̱x i ngẽma ṉg̱oxo, notürü tama nüxü̃́ inaxĩnü —nhanagürü.
41 Rü jexguma Ngechuchu nanangãxü̃, rü nhanagürü: —Pa Duü̃xü̃gü i Tama Jaxõgüxü̃x, ¿Nhuxguratáta i pemaã chanuxmaxü̃ rü jaxna pemaã chaxĩnüxü̃? ¡Nuã naga ja cune! —nhanagürü.
42 Notürü jexguma Ngechuchuxü̃tawa nanguxgu ga guma bucü, rü jema ṉg̱oxo rü guma bucüxü̃ nhaxtüanegu najanguxẽẽ, rü nanaxãũãẽxẽẽ. Notürü Ngechuchu nananga ga jema ṉg̱oxo, rü nanamexẽẽ ga guma bucü. Rü nhu̱xmachi nanatüxü̃tawa nanamu.
43 Rü guxü̃ma ga duü̃xü̃gü rü naḇaixãchiãẽgü ga jexguma nüxü̃ nadaugügu ga nhuxãcü na naporaxü̃ ja Tupana.
Rü jexguma duü̃xü̃gü namaã ḇaixãchiejane ga jema Ngechuchu üxü̃, rü nhanagürü ga Ngechuchu nüxü̃ ga norü ngúexü̃gü:
Ngechuchu rü wenaxãrü nanaxunagü ga norü juxchiga
44 —¡Meã iperüxĩnüẽ i nhaã ore i pemaã nüxü̃ chixuxü̃! ¡Rü tãũxü̃táma nüxü̃ ipejarüngümaẽ! Chama i Tupana Nane na duü̃xü̃xü̃ chiĩxü̃, rü chauechita tá choxü̃ ínaxuaxü̃gü i duü̃xü̃gü na ãẽ̱xgacügü choxü̃ ijauxgüxü̃ca̱x —nhanagürü.
45 Notürü ga norü ngúexü̃gü rü tama nüxü̃ nacua̱xgüéga ga jema namaã nüxü̃ jaxuxü̃. Jerü Tupana rü tama naxca̱x nanango̱xẽẽ ga jema ore na nüxü̃ nacua̱xgüxü̃ca̱x. Rü jema ngúexü̃gü rü namuü̃ẽ ga Ngechuchuna na nacagüxü̃ na meã namaã nango̱xẽẽãxü̃ca̱x ga jema namaã nüxü̃ jaxuxü̃.
¿Texé tá tixĩ ja guxããrü jexera ixĩxẽ?
46 Rü jexguma ga norü ngúexü̃gü rü inanaxügüe ga nügümaã na japoragatanücüüxü̃ nachiga ga texé tá tiĩxü̃ ja natanüwa guxããrü jexera ixĩxẽ.
47 Notürü Ngechuchu rü nüxü̃ nacua̱xama ga jema norü ngúexü̃gü nagu rüxĩnüẽxü̃. Rü jemaca̱x wüxi ga buxü̃ nügüxü̃tawa naga, rü nügüxü̃tagu najachixẽẽ.
48 Rü nhanagürü nüxü̃ ga norü ngúexü̃gü: —Texé ja nhaã buxü̃xü̃ meã jaxúxe chauégagu, rü choxü̃ nixĩ i tajaxuxü̃. Rü jíxema meã choxü̃ jaxúxe, rü Chaunatü ja núma choxü̃ mucüxü̃ rü ta meã tajaxu. Rü jíxema guxããrü jexera tügü írüxíraxe, rü jíxema tixĩ ja guxããrü jexera ixĩxẽ —nhanagürü.
Texé ja tama tachi aixe rü tórü ngü̃xẽẽruü̃ tixĩ
49 Rü jexguma ga Juã́ũ rü nhanagürü nüxü̃: —Pa Ngúexẽẽruü̃x, nüxü̃ tadau ga wüxi ga jatü ga cuégagu ṉg̱oxogü íwoxü̃xü̃. Rü toma nüxna tanachu̱xu ga jema jerü tama tatanüxü̃ nixĩ ga nümax —nhanagürü.
50 Notürü Ngechuchu rü nhanagürü nüxü̃: —Tama name i nüxna na penachu̱xuxü̃. Erü texé ja tama tachi aixe, rü tórü ngü̃xẽẽruü̃ tixĩ —nhanagürü.
Ngechuchu najangagü ga Tiagu rü Juã́ũ
51 Rü jexguma marü jangaicagu ga Ngechuchu ga dauxü̃guxü̃ ga naãnewa na naxũxü̃, rü tama namuü̃ãcüma inaxũãchi ga Jerucharéü̃wa na naxũxü̃.
52 Rü nügüpe̱xegu najamugü ga nhuxre ga norü orearü ngeruü̃gü. Rü nümagü rü nawa naxĩ ga wüxi ga ĩãnexãcü ga Chamáriaanewa jexmane, na jexma naxca̱x jadaugüxü̃ca̱x ga wüxi ga ĩ na Ngechuchu nagu pexü̃nexü̃.
53 Notürü jema Chamáriaanecü̱̃ã̱x rü tama nanajauxgüchaü̃, jerü nüxü̃ nacua̱xgü ga Jerucharéü̃wa tá na naxũxü̃.
54 Rü jexguma jemaxü̃ nadaugügu ga norü ngúexü̃gü ga Tiagu rü Juã́ũ, rü nhanagürügü Ngechuchuxü̃: —Pa Corix, ¿cunaxwa̱xexü̃ na Tupanana naxca̱x tacaxü̃ na dauxü̃wa ne namuãxü̃ca̱x ja üxü na nagu̱xẽẽãxü̃ca̱x i guxü̃ma i nhaã duü̃xü̃gü, jema nuxcümaü̃cü ga Tupanaãrü orearü uruü̃ ga Ería üxü̃rüü̃? —nhanagürügü.
55 Rü jexguma ga Ngechuchu rü nüxü̃ nadawenü, rü najangagü, rü nhanagürü nüxü̃: —Pema rü tama nagu perüxĩnüẽ na texéarü duü̃xü̃gü peixĩgüxü̃.
56 —Erü chama i Tupana Nane na duü̃xü̃xü̃ chiĩxü̃, rü tama duü̃xü̃güarü tauxexẽẽwa núma chaxũ, notürü núma chaxũ na duü̃xü̃güxü̃ chamaxẽxẽẽxü̃ca̱x —nhanagürü. Rü jexguma rü náĩ ga ĩãnexãcüwa naxĩ.
Duü̃xü̃gü ga Ngechuchuwe rüxĩxchaü̃xü̃chiga
57 Rü jexguma namagu naxĩxgu rü wüxi ga jatü Ngechuchuxü̃ nhanagürü: —Pa Corix, cuwe charüxũxchaü̃ i ngextá cuma ícuxũxü̃wa —nhanagürü.
58 Rü Ngechuchu nanangãxü̃ rü nhanagürü: —Ngowagü rü nüxü̃́ nangẽxma i naxmaxü̃gü, rü werigü rü nüxü̃́ nangẽxma i naxchiãü̃gü, notürü chama i Tupana Nane na duü̃xü̃xü̃ chiĩxü̃, rü nataxuma i chauchica i ngextá nagu chicuxeruxü̃ —nhanagürü.
59 Rü Ngechuchu nhanagürü nüxü̃ ga wüxi ga to ga jatü: —¡Chawe rüxũ! —nhanagürü. Notürü nüma ga jema jatü rü nhanagürü nüxü̃: —Pa Corix, noxri chanawa̱xe i chaunatüxü̃ ichajata̱xira —nhanagürü.
60 Rü Ngechuchu nanangãxü̃ rü nhanagürü: —Nüẽ́ ngẽma cutanüxü̃ i tama jaxõgüxü̃ ijata̱xgü i ngẽma naxrüü̃ juexü̃, notürü cuma rü curü puracü nixĩ na paxa duü̃xü̃gümaã nüxü̃ cujarüxuxü̃ i Tupanaãrü ore na nhuxãcü guxããrü ãẽ̱xgacü na jiĩxü̃ i nümax —nhanagürü.
61 Rü wüxi ga to ga duü̃xü̃ rü nhanagürü Ngechuchuxü̃: —Pa Corix, ngẽmáãcü cuwe charüxũxchaü̃, notürü noxri chanaxwa̱xe i nüxü̃ chajarümoxẽ i ngẽma chapatacü̱̃ã̱xgü —nhanagürü.
62 Notürü Ngechuchu rü nhanagürü nüxü̃: —Texé ja jíxema inaxügüxe na Tupanaãrü puracüwa tapuracüxü̃ notürü tümaãrü ngẽmaxü̃guama rüxĩnüxẽ, rü tama tame na Tupanaãxü̃́ tapuracüxü̃ —nhanagürü.
