Marcu 1:1-45
1 Nhaã nixĩ i norü ügü i ore i mexü̃ ja Ngechuchu ja Cristu ja Tupana Nanechiga.
2 Rü nuxcümaü̃cü ga Tupanaãrü orearü uruü̃ ga Ichaía ümatüxü̃ ga Tupanaãrü ore, rü nhanagürü:“Cupe̱xegu chajamu i chorü orearü ngeruü̃ na namexẽẽãxü̃ca̱x i cumaü̃.
3 Rü dauxchitawa i ngextá taxúema íxãpataxü̃wa rü tá nangẽxma i wüxi i duü̃xü̃ i ngẽ́ma tagaãcü nhaxü̃: ‘¡Pegü pemexẽẽ̱x naxca̱x ja Cori. Rü naxca̱x ipejanawe̱xãchixẽẽ̱x i perü maxü̃!’ ”
nhaxü̃ tá.
4 Rü Juã́ũ rü dauxchitawa ga ngextá taxúema íxãpataxü̃wa nango̱x rü jéma ínanabaiü̃xẽẽ ga duü̃xü̃gü. Rü namaã nüxü̃ nixu ga na namexü̃ na Tupanaca̱x nadaugüxü̃ rü ínabaiü̃xü̃ na Tupana nüxü̃́ nüxü̃ nangechaü̃xü̃ca̱x ga norü pecadugü.
5 Rü guxü̃ma ga duü̃xü̃gü ga Judéaanecü̱̃ã̱x rü ĩãne ga Jerucharéü̃cü̱̃ã̱x rü jéma Juã́ũxü̃tawa naxĩĩxü̃ ga na nüxü̃́ ijanaxĩnüẽxü̃ca̱x. Rü nümagü rü norü pecadugüxü̃ jéma najarüxugüxü̃, rü Juã́ũ rü natü ga Judã́ũwa ínajabaiü̃xẽẽtanü.
6 Rü naxchiru ga Juã́ũ rü cameruta̱xanaxca̱x nixĩ, rü norü gojexü̃ rü naxcha̱xmünaxca̱x nixĩ. Rü beruremaã rü munümaã naxãwemü.
7 Rü Juã́ũ rü jema nüxü̃ jaxuxü̃ ga orewa, rü nhanagürü: —Chaweama tá ne naxũ ja choxü̃ rüjexeracü. Rü chama rü taxuwama chame rü bai na ichajarümaxãchixü̃ na íchajaw̱ẽxü̃ca̱x i norü chapatucunügü.
8 —Chama rü dexáwamare pexü̃ íchabaiü̃xẽẽ, notürü nüma rü tá Tupanaãẽ i Üünexü̃ pexna nanguxẽẽ —nhanagürü ga Juã́ũ.
Ngechuchuarü baiechiga
9 Rü jema ngunexü̃gügu, rü Ngechuchu rü ínaxũxũ nawa ga guma ĩãne ga Nacharétu ga Gariréaanewa jexmane. Rü Juã́ũ rü natü ga Judã́ũwa ínanabaiexẽẽ.
10 Rü jexguma dexáwa ínaxü̃ãchigu, rü Ngechuchu nüxü̃ nadau ga na jangenaxü̃ ga dauxü̃wa. Rü jema Tupanaãẽ i Üünexü̃ rü wüxi ga muxtucurüü̃ inanago, rü Ngechuchuna nangu.
11 Rü dauxü̃wa inanaxũ ga wüxi ga naga ga nhaxü̃: —Cuma nixĩ i Chaune i cuxü̃ changechaü̃xü̃chixü̃ rü cumaã chataãẽxü̃chixü̃ —nhaxü̃.
Ngechuchuxü̃ naxü ga Chataná
12 Rü jemawena rü Tupanaãẽ i Üünexü̃ rü dauxchitawa ga ngextá taxúema íxãpataxü̃wa Ngechuchuxü̃ naga.
13 Rü jéma najexma ga 40 ga ngunexü̃. Rü naẽü̃gü ga idüraexü̃ íjexmagüxü̃wa najexma, rü ṉg̱oxo ga Chataná rü nüxü̃ naxü. Notürü Tupanaãrü orearü ngeruü̃gü ga dauxü̃cü̱̃ã̱x rü Ngechuchuxü̃ narüngü̃xẽẽgü.
Ngechuchu rü Gariréaanewa inanaxügü ga norü puracü
14 Rü nawena ga pocupataü̃gu na napocuxü̃ ga Juã́ũ, rü Gariréaanewa naxũ ga Ngechuchu na naxunagüãxü̃ca̱x ga Tupanaãrü ore i mexü̃.
15 Rü nhanagürü: —Marü nawa nangu i ngunexü̃ ga Tupana nagu unetaxü̃, rü pexca̱x ningaica na perü ãẽ̱xgacü na jiĩxü̃. ¡Rü nhu̱xma rü name nixĩ i Tupanaca̱x pedaugü rü pejaxõgü i ngẽma norü ore i mexü̃! —nhanagürü.
Ngechuchu rü ãgümücü ga püchaetanüxü̃ca̱x naca
16 Rü jexguma naxtaxa ga Gariréaanacügu jaxũxgu ga Ngechuchu, rü jéma nüxü̃ nadau ga Chimáũ rü naẽneẽ ga Ãdré. Rü nümagü rü woetama püchaetanüxü̃ nixĩgü rü jéma naxtaawa napüchaegü.
17 Rü Ngechuchu rü nhanagürü nüxü̃: —¡Chawe perüxĩ rü tá pexü̃ charüngü̃xẽẽ na chauxü̃tawa penagagüxü̃ca̱x i duü̃xü̃gü! —nhanagürü.
18 Rü jexgumatama ga jema taxre, rü jéma nanawogü ga norü püchagü. Rü Ngechuchuwe narüxĩ.
19 Rü jéamaxü̃ra naxũ ga Ngechuchu, rü jéma nüxü̃ nadau ga Tiagu rü naẽneẽ ga Juã́ũ. Rü Zebedéu nanegü nixĩgü ga nümagü. Rü wüxi ga nguewa najexmagü, rü jéma ínanangáitagü ga norü püchagü.
20 Rü jexgumatama Ngechuchu naxca̱x naca. Rü nümagü rü jéma nguewa tüxü̃ nata̱xgü ga nanatü ga Zebedéu namaã ga tümaãrü puracütanüxü̃gü, rü Ngechuchuwe narüxĩ.
Wüxi ga jatü ga ṉg̱oxo nawa jexmaxü̃chiga
21 Rü ĩãne ga Caparnáũwa nangugü. Rü jexguma ngü̃xchigaarü ngunexü̃wa nanguxgu, rü Ngechuchu rü ngutaque̱xepataü̃wa naxũ rü jexma naxücu. Rü jéma inanaxügü ga na nangúexẽẽtaexü̃.
22 Rü duü̃xü̃gü rü naḇaixãchiãẽgü namaã ga norü ngu̱xẽẽtae, jerü aixcuma Tupanaãrü poramaã meã nanangúexẽẽ rü tama ngúexẽẽruü̃gü ga Muĩséarü mugüwa ngu̱xẽẽtaegüxü̃rüü̃ nixĩ.
23 1:23-24 Rü guma ĩãneãrü ngutaque̱xepataü̃wa najexma ga wüxi ga jatü ga ṉg̱oxo nawa jexmaxü̃. Rü aita jéma naxü, rü nhanagürü: —¿Tü̱xcüü̃ totanüwa cuxũ, Pa Ngechuchu Pa Nacharétucü̱̃ã̱x? ¿Nuã cuxũ na toxü̃ cujaḏaixü̃ca̱x? Chama rü cuxü̃ chacua̱x na Tupana Nane ja Üünecü cuiĩxü̃ —nhanagürü.
24 Nüü̃ nadau 1:23
25 Rü Ngechuchu nüxü̃ naxoo̱x ga jema ṉg̱oxo, rü nhanagürü: —¡Ijarüngea̱x rü ínaxũxũ nawa ja jima jatü! —nhanagürü.
26 Rü jexguma ga jema ṉg̱oxo rü guma jatüxü̃ nijuãchixẽẽ, rü tagaãcü aita naxüãcüma nawa ínaxũxũ.
27 Rü guxü̃ma ga duü̃xü̃gü rü naḇaixãchiãẽgü, rü namücügüna nicachigü rü nhanagürügü: —¿Ṯacü nixĩ i nhaã? Maneca wüxi i ngexwacaxü̃xü̃ i ngu̱xẽẽtae nixĩ. Nüma rü aixcuma Tupanaãrü poramaã meã nangu̱xẽẽtae. Rü woo i ṉg̱oxogü rü naga naxĩnüẽ i ngẽxguma namuãxgu —nhanagürügü.
28 Rü jemaãcü nixĩ ga paxa guxü̃wama ga Gariréaanewa rü Ngechuchuchigaxü̃ nacua̱xgüxü̃ ga duü̃xü̃gü.
Ngechuchu rü Chimáũ ga Pedru na̱xẽca̱x najataanexẽẽ
29 Rü jexguma ngutaque̱xepataü̃wa ínaxũxũgu ga Ngechuchu, rü Tiagu rü Juã́ũmaã Chimáũ rü Ãdrépatawa naxũ.
30 Rü Chimáũ na̱xẽ rü ngürücarewa ijexma, jerü ijaxaxüne. Rü Ngechuchumaã ngĩxü̃ nixugüe.
31 Rü ngĩxca̱x nixũ, rü ngĩxme̱xgu najajauxãchi, rü ngĩxü̃ ínarüdaxẽẽ. Rü jexgumatama iga̱u̱xãchi ga na jaxaxünexü̃. Rü íirüda, rü inaxügü ga naxca̱x na namexẽẽãxü̃ ga õna.
Ngechuchu rü muxü̃ma ga iḏaaweexü̃ca̱x najataanexẽẽ
32 Rü jexguma marü janaxücuxgu ga üa̱xcü ga na nachütachaü̃xü̃, rü Ngechuchuxü̃tawa nanagagü ga guxü̃ma ga duü̃xü̃gü ga iḏaaweexü̃ rü guxü̃ma ga iṉg̱oxoã̱xgüxü̃.
33 Rü guxü̃ma ga jema ĩãnecü̱̃ã̱x rü jexma guma ĩpataarü ĩã̱xwa naxca̱x nangutaque̱xegü.
34 Rü nüma nanameẽxẽẽ ga muxü̃ma ga duü̃xü̃gü ga nagúxü̃raü̃xü̃ ga ḏaawemaã iḏaaweexü̃. Rü ínanawoxü̃ ga muxü̃ma ga ṉg̱oxogü, notürü nüxna nanachu̱xu ga na jadexagüxü̃, jerü nümagü ga ṉg̱oxogü rü nüxü̃ nacua̱xgü na texé jiĩxü̃.
Ngechuchu rü nanaxunagü ga ore ga mexü̃ ga ngutaque̱xepataü̃wachigü
35 Rü ngunetüü̃ ga taũta jangóonegu, rü inaxũãchi ga Ngechuchu. Rü ĩãneãrü jéaxüra ga ngextá taxúema íxãpataxü̃wa naxũ na jéamaxü̃ra jajumuxẽxü̃ca̱x.
36 Rü Chimáũ rü namücügümaã Ngechuchuca̱x najadaugü.
37 Rü jexguma nüxü̃ ijangaugügu, rü nhanagürügü nüxü̃: —Guxü̃ma i duü̃xü̃gü rü cuxca̱x nadaugü —nhanagürügü.
38 Notürü ga nüma rü nanangãxü̃ rü nhanagürü nüxü̃: —¡Ngĩxã rü toxnamana taxĩ náĩgü ja ĩãnexãcügü ja ngaicamagünewa na ngẽ́ma rü ta chanaxunagüxü̃ca̱x i ore i mexü̃! Erü woetama ngẽmaca̱x nixĩ i Caparnáũãrü ĩãnewa íchaxũxũxü̃.
39 Rü jemaãcü ga Ngechuchu rü guxü̃ma ga Gariréaanegu nixũãgüchigü. Rü wüxichigü ga ĩãneãrü ngutaque̱xepataü̃wa rü nüxü̃ nixuchigü ga ore ga mexü̃, rü ínajawoxü̃ẽtanü ga ṉg̱oxogü.
Ngechuchu rü wüxi ga rüchaxünexü̃ca̱x najataanexẽẽ
40 Rü Ngechuchuca̱x nixũ ga wüxi ga jatü ga chaxünemaã iḏaawecü. Rü nape̱xegu najacaxã́pü̱xüãcüma nhanagürü nüxü̃: —Pa Corix, ngẽxguma cunaxwa̱xegu na choxü̃ curümexẽẽxü̃, rü cuxü̃́ natauxcha na chauxca̱x cujataanexẽẽxü̃ —nhanagürü.
41 Rü Ngechuchuaxü̃́ nangechaü̃tümüü̃ ga guma jatü. Rü nüxü̃ ningõgü rü nhanagürü nüxü̃: —Ngü̃, chanaxwa̱xe. ¡Marü curüme! —nhanagürü.
42 Rü jexgumatama nüxü̃́ inajarüxo ga na nachaxünexü̃ ga guma jatü. Rü meãma naxca̱x nitaane.
43 1:43-44 Rü Ngechuchu rü jexgumatama ínajamu. Rü meãma nanaxucu̱xẽ rü nhanagürü nüxü̃: —¡Dücax, tãũxü̃táma texémaã nüxü̃ cuixu! ¡Notürü ngẽ́ma paixü̃tawa naxũ, rü cugü nüxü̃ jadauxẽẽ! ¡Rü curü mexẽẽca̱x nüxna jaxuaxü̃ i curü ãmare ga jema Muĩsé tüxü̃ muxü̃ na nüxü̃ nacuáxü̃ca̱x i duü̃xü̃gü na curümexü̃! —nhanagürü.
44 Nüü̃ nadau 1:43
45 Notürü nüma ga guma jatü rü ínixũ rü inanaxügü ga na guxãmaãma nüxü̃ jaxuxü̃ ga jema nüxü̃ ngupetüxü̃. Rü jemaca̱x ga Ngechuchu rü marü taxucürüwa ngóxü̃wama duü̃xü̃güpe̱xewa ĩãnegügu naxücu. Notürü dauxchitagu ga ngextá duü̃xü̃gü ítaxuxü̃gu narüxã̱ũ̱x. Rü jéma naxca̱x naxĩĩxü̃ ga duü̃xü̃gü ga guxü̃ãnewa ne ĩxü̃.
