Marcu 11:1-33
11 Rü marü Jerucharéü̃ãrü ngaicamana nangugü ga Oriwéraarü Ma̱xpǘneãrü ngaicamana jexmagüne ga ĩãnexãcügü ga Bechagué rü Betániã. Rü jexguma jéma nangugügu, rü Ngechuchu nanamu ga taxre ga norü ngúexü̃gü.
2 Rü nhanagürü nüxü̃: —¡Gua tórü to̱xma̱xtawa ngẽxmane ja ĩãnexãcüwa pexĩ! Rü ngẽxguma nawa pengugügu, rü ngẽxma tá nüxü̃ pejangau i wüxi i cowaruxacü i ngẽxma ngaxü̃xü̃ i taguma texé natagu aunagüxü̃. ¡Rü pejawẽxü̃ rü nuã penaga!
3 —Rü ngẽxguma texé pexna caxgu na ṯacüca̱x pejawẽxü̃xü̃ i ngẽma cowaruxacü, ¡rü tümamaã nüxü̃ peixu rü nhapegügü:
“Torü Cori nanaxwa̱xe, rü nhu̱xma tátama nanataeguxẽẽ”, nhapegügü!
4 Rü jéma naxĩ. Rü jexma namacüwagu nüxü̃ najangaugü ga jema cowaruxacü ga wüxi ga ĩpataa̱xü̃tagu ngaxü̃xü̃.
5 Rü nhuxre ga duü̃xü̃gü ga jéma jexmagüxü̃ rü nüxna nacagüe, rü nhanagürügü: —¿Ṯacü ípexüe? ¿Rü tü̱xcüü̃ pejawẽxü̃ i ngẽma cowaruxacü? —nhanagürügü.
6 Rü nümagü ga jema ngúexü̃gü, rü jema ore ga Ngechuchu namaã nüxü̃ ixuxü̃ãcü nanangãxü̃gü. Rü jemaca̱x tama nüxna nanachu̱xgü.
7 Rü natagu nanac̱ẖagümü ga naxchirugü. Rü jemaãcü Ngechuchuxü̃tawa nanagagü. Rü nüma ga Ngechuchu rü natagu naxaunagü.
8 Rü muxü̃ma ga duü̃xü̃gü rü naxchirumaãtama nanac̱ẖamagü. Rü togü rü naĩxã́tügü ga naãnewa nadaü̃xü̃maã najac̱ẖamagü.
9 Rü jema duü̃xü̃gü ga nape̱xegu ãgüxü̃ rü jema togü ga wixweama ãgüxü̃, rü tagaãcü nhanagürügü: —¡Cuxü̃ tataxẽẽgü! ¡Rü namexẽchi ja jima Tupanaẽ́gagu núma ũcü!
10 ¡Rü namexẽchi ja jima ãẽ̱xgacü ja núma ngucü jexgumarüü̃ ga nuxcümaü̃cü ga tanatü ga Dawí ãẽ̱xgacü ixĩxgurüü̃! ¡Rü cuxü̃ tataxẽẽgü, Pa Tonatü ja Dauxü̃gucü! —nhanagürügü.
11 Rü Jerucharéü̃gu naxücu ga Ngechuchu, rü tupauca ga taxü̃neca̱x nixũ. Rü meãma guxü̃wama inanadauaxü̃ne. Rü nhu̱xmachi jema norü 12 ga ngúexü̃gümaã Betániããrü ĩãneca̱x nataegu, jerü marü najáuane.
Ngechuchu rü ori ga figuera ga ngearü oõxü̃maã chixexü̃ naxuegu
12 Rü moxü̃ãcü jexguma Betániãwa inaxĩãchigu ga Ngechuchu rü nataija.
13 Rü jaxü̃gu nüxü̃ nadau ga wüxi ga ori ga figuera ga ãã́tüxü̃. Rü nüma ga Ngechuchu rü naxca̱x nixũ na íjadauãxü̃ca̱x rü ngoxi najexma̱x ga norü o. Notürü jexguma naxü̃tawa nanguxgu, rü taxuü̃ma inajangau, rü naã́tüxü̃xĩcatama, jerü taũta norü owa nangu.
14 Rü jexguma rü nhanagürü figueraxü̃: —¡Tagutáma texé wena cuxü̃ tamúãrü oõx! —nhanagürü. Rü norü ngúexü̃gü rü nüxü̃ naxĩnüẽ ga jema.
Ngechuchu ínanawoxü̃ ga jema tupauca ga taxü̃newa taxegüxü̃ ga duü̃xü̃gü
15 Rü jexguma Jerucharéü̃wa nangugügu, rü Ngechuchu rü tupauca ga taxü̃negu naxücu. Rü inanaxügü ga na ínawoxü̃ãxü̃ ga jema jéma ṯacümaã taxegüxü̃ rü naxca̱x taxegüxü̃. Rü nanawoegu ga norü mechagü ga jema duü̃xü̃gü ga jéma dĩẽrumaã taxegüxü̃ rü muxtucumaã taxegüxü̃.
16 Rü nanachu̱xu ga texé ṯacü na jéma ngepetüxü̃ tupauca ga taxü̃nemachiawa.
17 Rü inanaxügü ga na nangúexẽẽtaexü̃, rü nhanagürü: —Tupanaãrü ore i ümatüxü̃wa rü nhanagürü:“Chapata rü guxü̃ma i nachiü̃ãnecü̱̃ã̱xgüarü jumuxẽpataü̃gu tá naxãẽ́ga”,
nhanagürü. Notürü pema rü ngĩ́ta̱a̱xgüxü̃pataü̃ pejaxĩxẽẽ —nhanagürü.
18 Notürü jexguma jemaxü̃ naxĩnüẽgu ga paigüarü ãẽ̱xgacügü rü ngúexẽẽruü̃gü ga Muĩséarü mugüwa ngu̱xẽẽtaegüxü̃, rü inanaxügüe ga naxca̱x na nadaugüxü̃ ga nhuxãcü Ngechuchuxü̃ na jama̱xgüxü̃. Jerü nüxü̃ namuü̃ẽ, jerü guxü̃ma ga duü̃xü̃gü rü jema norü ngu̱xẽẽtaemaã nataãẽgü.
19 Notürü jexguma marü najáuanegu, ga Ngechuchu rü norü ngúexü̃gümaã nüxna ínixĩ ga guma ĩãne.
Narüṉẖexẽ ga jema figuera ga ngearü oṍxü̃
20 Rü moxü̃ãcü pa̱xmama rü figueraxü̃tawa nachopetü. Rü jéma nüxü̃ nadaugü ga na naṉẖexẽxü̃ nhu̱xmata naxchúma̱xãwa nangu.
21 Rü jexguma ga Pedru rü nüxna nacua̱xãchi ga jema ĩneãcü ngupetüxü̃, rü nhanagürü Ngechuchuxü̃: —Pa Ngúexẽẽruü̃x, dücax i figuera ga chixexü̃ namaã cuxueguxü̃, rü marü narüṉẖexẽ —nhanagürü.
22 Rü Ngechuchu nanangãxü̃, rü nhanagürü: —¡Nüxü̃́ pejaxõgü ja Tupana!
23 —Rü aixcuma pemaã nüxü̃ chixu rü ngẽxguma chi wüxie daa ma̱xpǘnexü̃ tamuxgu na jaxũgachixü̃ca̱x rü taxtü i taxü̃chiüwa nügü na jatáexü̃ca̱x, rü chi pega naxĩnü, ega aixcuma pejaxõgüãcüma nüxü̃ ngẽma nhapegügu.
24 —Rü ngẽmaca̱x pemaã nüxü̃ chixu rü guxü̃ma i ṯacü i naxca̱x ípec̱axü̃ i perü jumuxẽwa, rü name nixĩ na pejaxõgüxü̃ na marü penajaxuxü̃, rü aixcuma tá penajaxuxü̃.
25 —Rü ngẽxguma pejumuxẽgügu, notürü nangẽxmagu i ṯacüca̱x texémaã na penuẽxü̃, ¡rü tüxü̃́ nüxü̃ pengechaü̃! na Penatü ja dauxü̃gucü rü ta pexü̃́ nüxü̃ nangechaü̃xü̃ca̱x i perü pecadugü.
26 —Notürü ngẽxguma pema tama tüxü̃́ nüxü̃ pengechaü̃gügu, rü Penatü ja dauxü̃gucü rü tá ta tãũxü̃táma pexü̃́ nüxü̃ nangechaü̃ —nhanagürü.
Ngechuchuna nacagüe na texéarü oregagu tupauca ga taxü̃newa nangu̱xẽẽtaexü̃
27 Rü jemawena rü Jerucharéü̃ca̱x nawoegu. Rü jexguma Ngechuchu rü tupauca ga taxü̃negu jaxũgüchigüjane, rü naxca̱x naxĩ ga paigüarü ãẽ̱xgacügü, rü ngúexẽẽruü̃gü ga Muĩséarü mugüwa ngu̱xẽẽtaegüxü̃, rü togü ga ãẽ̱xgacügü ga jaguã̱xgü.
28 Rü nüxna nacagüe, rü nhanagürügü: —¿Texéarü mugagu nixĩ i cunaxüxü̃ i ngẽma núma cuxüxü̃? ¿Rü texé cuxü̃ tamu na cunaxüxü̃ca̱x i ngẽma? —nhanagürügü.
29 11:29-30 Rü jexguma ga Ngechuchu rü nanangãxü̃, rü nhanagürü nüxü̃: —Chama rü tá ta pexna chaca, rü ngẽxguma choxü̃ pengãxü̃gu i ngẽma pexna naxca̱x chac̱axü̃, rü chama rü tá ta pemaã nüxü̃ chixu na texé choxü̃ muxü̃ na chanaxüxü̃ca̱x i ngẽma. ¿Rü texé tanamu ga Juã́ũ na duü̃xü̃güxü̃ ínabaiü̃xẽẽxü̃ca̱x? ¿Rü Tupana jiĩxü̃ ga namucü rü e̱xna duü̃xü̃gümare? —nhanagürü.
30 Nüü̃ nadau 11:29
31 Rü jexguma ga nümagü rü inanaxügüe ga nügümaã na japoragatanücüüxü̃, rü nhanagürügü: —Rü ngẽxguma chi:
“Tupana núma nanamu”, nhagügügu, rü nüma rü chi nhanagürü tüxü̃:
“¿Tü̱xcüü̃ ga tama nüxü̃́ pejaxõgüxü̃?” nhanagürü chi tüxü̃.
32 ¿Rü nhuxũcürüwa rü:
“Jatügümare núma nanamu”, nhatarügügü tá? Rü jema nhanagürügü jerü duü̃xü̃güxü̃ namuü̃ẽ. Jerü guxü̃ma ga duü̃xü̃gü rü najaxõgü rü aixcuma Tupana nanamu ga Juã́ũ na nüxü̃ jaxuxü̃ca̱x ga norü ore.
33 Rü jemaca̱x Ngechuchuxü̃ nangãxü̃gü, rü nhanagürügü: —Tama nüxü̃ tacua̱x ga texé núma na namuxü̃ ga Juã́ũ ga baiü̃xẽẽruü̃ —nhanagürügü. Rü jexguma ga Ngechuchu rü nanangãxü̃ rü nhanagürü nüxü̃: —Chama rü ta tãũxü̃táma pemaã nüxü̃ chixu na texé choxü̃ muxü̃ na chanaxüxü̃ i ngẽma choxna naxca̱x pec̱axü̃ —nhanagürü.
