Marcu 12:1-44
12 Rü Ngechuchu rü inanaxügü ga ore ga cua̱xruü̃gügu ixuxü̃maã na nangúexẽẽtaexü̃. Rü nhanagürü nüxü̃: —Najexma ga wüxi ga jatü ga norü naãnegu uwanecü ücü. Rü ínanapoxegu, rü nanaxü ga wüxi ga uwaarü jauxtüxü̃xü̃chica, rü wüxi ga dauxü̃taechica na meã nüxna nadauxü̃ca̱x ga guxü̃ma. Rü nhu̱xmachi nhuxre ga puracütanüxü̃na nüxü̃ nadauxẽẽ. Rü namaã nanamexẽẽ na ngãxü̃gu namaã ngĩxü̃ jatojexü̃ca̱x ga jema uwatanü. Rü nhu̱xmachi ga jema naãneãrü jora rü to ga nachiü̃ãnewa naxũ.
2 —Rü jexguma nawa nanguxgu ga na jadauxü̃ ga jema uwagü, rü guma jatü rü jéma puracütanüxü̃güxü̃tawa nanamu ga wüxi ga norü duü̃xü̃xü̃ na naxca̱x íjac̱axü̃ca̱x ga jema uwagü ga nüxna üxü̃.
3 —Notürü jema puracütanüxü̃gü rü najajauxgü, rü nanac̱uaixgü ga guma jatüarü duü̃xü̃. Rü taxuü̃ma ga uwagü nüxna naxãgü, rü jemaãcü ínajamugü.
4 —Rü jexguma ga guma jatü rü to ga norü duü̃xü̃xü̃ jéma namu. Notürü ga guma rü najama̱xẽrugü, rü namaã naguxchigagü.
5 —Rü jexguma rü to ga norü duü̃xü̃xü̃ jéma namu. Notürü najama̱xgü. Rü jemawena, rü jéma nanamugü ga muxü̃ma ga togü ga norü duü̃xü̃gü. Notürü ga jema puracütanüxü̃gü rü najac̱uaixgü ga nhuxre, rü togü rü nanadai.
6 —Rü jexguma rü nüxü̃́ ínajaxü ga nanexü̃chi ga poraãcü nüxü̃ nangechaü̃cü. Rü düxwa guma nanexü̃ jéma namu, jerü nüma nagu naxĩnügu rü chi nanega naxĩnüẽ ga jema puracütanüxü̃gü.
7 —Notürü jexguma guma cori nanexü̃ nadaugügu ga jema puracütanüxü̃gü, rü nügümaã nhanagürügü:
“Ngẽmaãrü tá nixĩ i nhaã naãne i jixcama. ¡Rü ngĩxã tajama̱xgü na tóxrü na jiĩxü̃ca̱x!” nhanagürügü.
8 —Rü jemaãcü najajauxgü, rü najama̱xgü. Rü jema uwanecüpechinüwa najata̱xgü ga naxü̃ne.
9 —Rü nhu̱xma rü pexna chaca, ¿pexca̱x rü ṯacü tá naxü ja jima uwanecüarü jora namaã i ngẽma puracütanüxü̃gü i chixexü̃gü? Rü dücax, rü ngẽ́ma tá naxũ, rü tá nanadai i ngẽma puracütanüxü̃gü, rü togüna tá nanaxã i ngẽma uwanecü.
10 —¿Taguma e̱xna nawa pengúe i Tupanaãrü ore i ümatüxü̃? Erü ngẽmawa rü nhanagürü:“Rü jima nuta ja mecü ja ĩãrü üruü̃gü nüxü̃ oechirécü, rü nhu̱xma rü jimatama nixĩ ja Tupana nüxĩra jaxücuchicü na namaã inaxügüãxü̃ca̱x ja ĩpata.
11 Rü tórü Cori ja Tupana nixĩ ga naxücü ga jema, rü nhu̱xma rü namexẽchi i taxca̱x”,
nhanagürü i ngẽma ore.
12 Rü jexguma ga jema paigüarü ãẽ̱xgacügü, rü ngúexẽẽruü̃gü ga Muĩséarü mugüwa ngu̱xẽẽtaegüxü̃, rü togü ga ãẽ̱xgacügü ga jaguã̱xgü, rü Ngechuchuxü̃ nijauxgüchaü̃. Jerü nüxü̃ nacua̱xgü ga nachiga na jiĩxü̃ ga jema ore ga cua̱xruü̃gu jaxuxü̃. Notürü duü̃xü̃güxü̃ namuü̃ẽ rü jemaca̱x taxuü̃ma namaã naxüe. Rü nüxna jéma ínixĩmare.
Ãẽ̱xgacüaxü̃́ dĩẽrumaã naxütanüxü̃chiga
13 Rü jexguma ga jema ãẽ̱xgacügü rü Ngechuchuxü̃tawa nanamugü ga nhuxre ga norü duü̃xü̃gü ga Parichéugü rü Eruditanüxü̃gü na nüxna jacagüexü̃ca̱x, rü ngoxi ṯacü rü chixexü̃ ga dexamaã nüxü̃ nangãxü̃ na jemaãcü ãẽ̱xgacügüxü̃tawa na íjaxuaxü̃güãxü̃ca̱x.
14 Rü nümagü rü naxü̃tawa naxĩ, rü nhanagürügü nüxü̃: —Pa Ngúexẽẽruü̃x, nüxü̃ tacua̱x rü aixcuma nixĩ i ngẽma nüxü̃ cuixuxü̃ i ore. Rü tama duü̃xü̃gügamare cuxĩnü, erü tama norü düxétüxü̃negu cudawenü, notürü nacüma nixĩ i cungugüxü̃. Rü aixcuma cunangúexẽẽ i duü̃xü̃gü na Tupana naxwa̱xexü̃ãcüma namaxẽxü̃ca̱x. ¡Tomaã nüxü̃ ixu! Rü ngẽma dĩẽru ja ãẽ̱xgacü ja tacü ja Romacü̱̃ã̱x totanüwa ngĩxü̃ jauxchaü̃cü ¿rü namexü̃ jiĩxü̃ na nüxna ngĩxü̃ taxãxü̃, rü e̱xna tama? —nhanagürügü.
15 Notürü ga Ngechuchu rü nüxü̃ nacua̱xama ga na chixexü̃gu namaã naxĩnüẽxü̃ ga jema duü̃xü̃gü woo meã namaã na janadexagüxü̃. Rü jemaca̱x nhanagürü nüxü̃: —¿Tü̱xcüü̃ chixexü̃gu choxü̃ penguxẽẽchaü̃xü̃? ¡Nuã ngĩxü̃ peinge i wüxitachinü i dĩẽru na ngĩxü̃ chadauxü̃ca̱x! —nhanagürü.
16 Rü jéma naxü̃tawa ngĩxü̃ nangegü ga wüxitachinü ga dĩẽru. Rü Ngechuchu rü nhanagürü nüxü̃: —¿Texéchicüna̱xã rü texééga nixĩ i ngĩgu üxü̃? —nhanagürü. Rü nümagü nanangãxü̃gü, rü nhanagürügü: —Romacü̱̃ã̱x ja ãẽ̱xgacü ja tacüchicüna̱xã nixĩ —nhanagürügü.
17 Rü jexguma ga Ngechuchu rü nhanagürü nüxü̃: —¡Ãẽ̱xgacüna ngĩxü̃ pexã i ngẽma ãẽ̱xgacüarü ixĩcü, rü Tupanana ngĩxü̃ pexã i ngẽma Tupanaãrü ixĩcü! —nhanagürü. Rü jexguma jema orexü̃ naxĩnüẽgu, rü namaã naḇaixãchiãẽgü.
Ngechuchuna nacagüe rü ngoxi wena namaxẽ i duü̃xü̃gü
18 Rü jemawena rü Ngechuchuxü̃tawa ínajadaugü ga nhuxre ga Chaduchéugü. Rü nümagü nixĩ i nüxü̃ jaxugüexü̃ na tagutáma wena namaxẽxü̃ i juexü̃. Rü jemaca̱x Ngechuchuna najacagüe, rü nhanagürügü:
19 —Pa Ngúexẽẽruü̃x, Muĩséarü mugüwa rü nhanagürü:“Rü ngẽxguma wüxi ja jatü naxma̱x ngexacüjane naju̱xgu, rü name nixĩ i naẽneẽtama ngĩmaã naxãma̱x i ngẽma jutecü i naxü̃ma̱x, na ngẽmaãcü naxãxãcüxü̃ca̱x ja naẽneẽ ga marü jucü”,
nhanagürü ga jema ore.
20 —Dücax, najexma ga 7 ga nügüeneẽgü. Rü naxãma̱x ga guma jacü, notürü taũta naxãxãcüjane naju.
21 12:21-22 —Rü jexguma ga naĩ ga naẽneẽ nüxĩ ngĩmaã naxãma̱x ga jema ngecü, notürü guma rü ta naju rü nangexacü. Rü jexguma ga guma norü tamaẽ̱xpü̱x ga naẽneẽ nüxĩ ngĩmaã naxãma̱x, notürü jexgumarüü̃tama nüxü̃ nangupetü. Rü jemaãcü, gucüma ga guma 7 ga nügüeneẽ rü ngĩmaã naxãma̱x ga jema nge. Rü gucüma najue taũta naxãxãcüjane. Rü düxwa ngĩma rü ta iju ga jema nge.
22 Nüü̃ nadau 12:21
23 —Rü dücax, ngẽxguma juexü̃ wena maxẽgu, ¿rü ngexcürüücü naxma̱x tá ijixĩ i ngẽma nge? Jerü gucüma ga guma 7 ga nügüeneẽgü ngĩmaã naxãma̱x —nhanagürügü.
24 Rü jexguma ga Ngechuchu rü nanangãxü̃, rü nhanagürü nüxü̃: —Pema rü ípetüe erü tama nüxü̃ pecua̱x i Tupanaãrü ore i ümatüxü̃, rü tama nüxü̃ pecua̱x i nhuxãcü na naporaxü̃ ja Tupana.
25 —Rü ngẽxguma juexü̃ wena maxẽgu, rü taxúetáma tixãma̱xgü rü e̱xna tixãtegü. Erü dauxü̃cü̱̃ã̱x i Tupanaãrü orearü ngeruü̃gürüü̃ tá tixĩgü i ngẽxguma.
26 —Pema choxna peca i juexü̃ãrü dagüchiga. ¿Notürü tama e̱xna nawa pengúe i Tupanaãrü ore ga Muĩsé ümatüxü̃ ga naĩxãcü ga íij̱auxratanünechigaxü̃ íjaxuxü̃wa? Erü jema orewa rü Muĩséxü̃ nhanagürü ga Tupana:“Chama nixĩ i Abrã́ũãrü Tupana, rü Isaquiarü Tupana, rü Jacúarü Tupana”,
nhanagürü.
27 —Rü ngẽma orewa nüxü̃ tacua̱x rü Tupana rü maxẽxü̃ãrü Tupana nixĩ rü tama juexü̃ãrü nixĩ, erü nape̱xewa rü taxúema taju. Rü ngẽmaãcü i pema rü poraãcü ípetüe —nhanagürü.
Ngẽma Tupanaãrü mu i guxü̃ i norü mugüarü jexera ixĩxü̃
28 Rü wüxi ga ngúexẽẽruü̃ ga Muĩséarü mugüwa ngu̱xẽẽtaexü̃, rü nüxü̃ naxĩnü ga jema togü ga namücügü ga Ngechuchumaã na íjaporagatanücüüxü̃. Rü nüma rü nüxü̃ nicua̱xãchi ga meãma na nangãxü̃ãxü̃. Rü jemaca̱x Ngechuchuca̱x nixũ, rü nüxna naca, rü nhanagürü nüxü̃: —Pa Ngúexẽẽruü̃x, ¿ngẽxü̃rüüxü̃ i Tupanaãrü mu nixĩ i guxü̃ i norü mugüarü jexera ixĩxü̃? —nhanagürü.
29 Rü Ngechuchu nanangãxü̃, rü nhanagürü: —Ngẽma Tupanaãrü mu i guxü̃ i norü mugüarü jexera ixĩxü̃, rü nhaã nixĩ, nhanagürü:“¡Iperüxĩnüẽ, Pa Iraéanecü̱̃ã̱xgü! Rü nüma ja Cori ja tórü Tupana, rü jixicatama nixĩ ja tórü Cori.
30 ¡Rü nüxü̃ nangechaü̃ ja Cori ja curü Tupana guxü̃ne ja curü maxü̃nemaã, rü guxü̃ i cuãẽmaã, rü guxü̃ i nagu curüxĩnüxü̃maã, rü guxü̃ i curü poramaã!”
nhanagürü.
31 —Rü ngẽma norü taxre i Tupanaãrü mu, rü nhanagürü:“¡Rü nüxü̃ nangechaü̃ i cumücü na cugü cungechaü̃xü̃rüü̃!”
nhanagürü. Rü nataxuma i to i Tupanaãrü mu i ngẽmagüarü jexera ixĩxü̃ —nhanagürü.
32 Rü jexguma ga jema ngúexẽẽruü̃ ga mugüwa ngu̱xẽẽtaexü̃, rü nhanagürü Ngechuchuxü̃: —Marü name, Pa Ngúexẽẽruü̃x, erü aixcuma nixĩ i ngẽma nüxü̃ cuixuxü̃ na wüxixicatama na jiĩxü̃ ja Tupana, rü nataxuma ja naĩ.
33 —Rü ngẽma Tupanaxü̃ na ingechaü̃xü̃ guxü̃ne ja tórü maxü̃nemaã, rü guxü̃ i nagu rüxĩnüxü̃maã, rü guxü̃ i tórü poramaã, rü nüxü̃ na ingechaü̃xü̃ i tamücü i jigü na ingechaü̃xü̃rüü̃, rü ngẽma nixĩ i guxü̃ma i naxü̃nagü i Tupanaca̱x naḏaixü̃ i tupaucaarü artaruwa ínagugüxü̃ãrü jexera ixĩxü̃ —nhanagürü.
34 Rü jexguma Ngechuchu nüxü̃ da̱xgu ga mexü̃gu na naxĩnüãcüma na nangãxü̃ãxü̃ ga jema ngúexẽẽruü̃ ga mugüwa ngu̱xẽẽtaexü̃, rü nhanagürü nüxü̃: —Marü tama taxü̃ cuxü̃́ nataxu na cunajaxuxü̃ ja Tupana na curü ãẽ̱xgacü jiĩxü̃ca̱x —nhanagürü. Rü jemawena rü marü taxuü̃ma nügü naporaxẽẽ na nüxna jacachigüxü̃ca̱x.
¿Texé nane nixĩ ja Cristu?
35 Rü jexguma tupauca ga taxü̃newa ínangúexẽẽtaejane ga Ngechuchu, rü duü̃xü̃güna naca, rü nhanagürü: —¿Tü̱xcüü̃ nixĩ i ngẽma ngúexẽẽruü̃gü i mugüwa ngu̱xẽẽtaegüxü̃ i nhagüxü̃:
“Jima Cristu ja Tupana nüxü̃ unetacü rü nuxcümaü̃cü ga ãẽ̱xgacü ga Dawítaa nixĩ”, nhagüxü̃?
36 —¿Rü nhuxãcü i ngẽmaãcü jadexagüxü̃? Jerü nümatama ga Dawí, rü jexguma Tupanaãẽ i Üünexü̃ naãẽwa idexagu rü nhanagürü:“Cori ja Tupana rü chorü Corixü̃ nhanagürü: ‘¡Nuã chorü tügünecüwawa rüto nhu̱xmatáta nüxü̃ charüporamaẽ i curü uwanügü na cuga naxĩnüẽxü̃ca̱x!’ ”
nhanagürü ga jema orewa.
37 —¿Notürü nhuxũcürüwa i Dawítaa jiĩxü̃ ja Cristu, ega nümatama ga Dawí, rü norü Corimaã naxuãgu? —nhanagürü. Rü jema muxü̃ma ga duü̃xü̃gü ga jéma jexmagüxü̃, rü taãẽãcüma Ngechuchuaxü̃́ inarüxĩnüẽ.
Ngechuchu rü nüxü̃ nixu na tama jameãrü maxü̃ã̱xgüxü̃ ga jema ngúexẽẽruü̃gü ga Muĩséarü mugüwa ngu̱xẽẽtaegüxü̃
38 Ngechuchu rü norü ngu̱xẽẽtaewa rü nhanagürü: —¡Pexuãẽgü naxca̱x i ngẽma ngúexẽẽruü̃gü i Muĩséarü mugüwa ngu̱xẽẽtaegüxü̃! Erü nümagü rü norü me nixĩ i mexü̃ i naxchirumaã na naxĩãneãxü̃. Rü nanaxwa̱xegü na ĩanemaü̃wa duü̃xü̃gü meã nüxü̃ na rümoxẽgüxü̃.
39 —Rü ngutaque̱xepataü̃güwa rü norü me nixĩ i ãẽ̱xgacügüma̱xwe̱xewa na natogüxü̃. Rü õnagü i taxü̃wa rü ngẽma õnaãrü joraxü̃tawa ügüxü̃ i nachicaca̱x nadaugü.
40 —Notürü tüxna nanapuxü̃ ja tümapatagü ja jíxema jutegüxe. Rü nhu̱xmachi nanama̱xẽẽ i norü jumuxẽgü na ngẽmagu nügü jacu̱xgüxü̃ca̱x rü duü̃xü̃gü nagu rüxĩnüẽxü̃ca̱x na aixcuma mexü̃gü na jixĩgüxü̃. Notürü nümagü tá nixĩ i jexeraãcü napocuexü̃ —nhanagürü.
Jutecü ga ngearü dĩẽruã̱xcü ga Tupanaca̱x dĩẽru ngĩxü̃ ixãcü
41 Wüxicana ga Ngechuchu rü tupauca ga taxü̃neãrü dĩẽruchiü̃ãrü to̱xma̱xtawa narüto. Rü jéma inadawenü ga nhuxãcü duü̃xü̃gü jexma ngĩxü̃ na janaxücuchigüxü̃ ga norü dĩẽrugü. Rü muxü̃ma ga duü̃xü̃gü ga idĩẽruã̱xgüxü̃chixü̃ rü jexma ngĩxü̃ najarünucuchi ga muxũchicü ga norü dĩẽru.
42 Rü ngürü jéma ingu ga wüxi ga jutecü ga ngearü dĩẽruã̱xcü. Rü ngĩma rü wüxi ga jema dĩẽruchiü̃gu ngĩxü̃ ijarüxücuchi ga taxretachinü ga dĩẽruxacü ga ítanücü.
43 Rü jexguma ga Ngechuchu rü norü ngúexü̃güca̱x naca, rü nhanagürü nüxü̃: —Aixcuma pemaã nüxü̃ chixu rü nhaã ngecü i jutecü i ngearü dĩẽruã̱xcü, rü guxü̃ i ngẽma togü i dĩẽruchiü̃gu dĩẽru ngĩxü̃ ixücuchigüxü̃ãrü jexera ngĩxü̃ ixã.
44 Erü guxü̃ma i togü rü ngĩxü̃ inaxãgü i ngẽma nüxü̃́ íjaxügücü. Notürü ngĩma ngĩxü̃́ natauxjane ngĩxü̃ ixã i gu̱xcüma i ngĩxü̃́ ngẽxma̱xcü i ngĩrü õnatanü —nhanagürü.
