Marcu 14:1-72
14 Rü taxre ga ngunexü̃ nataxu ga na nawa nanguxü̃ ga Judéugüarü peta ga Üpetüchiga ga nagu nangõ̱xgüãxü̃ ga põũ ga ngearü puxẽẽruü̃ã́xü̃. Rü ga paigüarü ãẽ̱xgacügü rü ngúexẽẽruü̃gü ga mugüwa ngu̱xẽẽtaegüxü̃ rü naxca̱x nadaugü ga nhuxãcü bexma duü̃xü̃güechita Ngechuchuxü̃ na jajauxgüxü̃ rü na jama̱xgüãxü̃ca̱x.
2 Jerü nümaxü̃ rü nhanagürügü: —Taxucürüwama nhu̱xma petagu tajajauxgü, erü duü̃xü̃gü rü tá tamaã nanuẽ —nhanagürügü.
Wüxi ga nge rü Ngechuchuerugu inaba ga pumara
3 Rü Ngechuchu rü Betániãwa naxũ napatawa ga Chimáũ ga rüchaxünecümaã naxugüãcü. Rü jexguma mechawa natojane, rü jéma ingu ga wüxi ga ngecü ga wüxiweü̃ ga pumara ga paacaxü̃chixü̃ ga tatanüxü̃chixü̃ jéma ngecü. Rü ijapojenagu ga jema pumarachixü̃ ga nuta ga mexẽchicünaxca̱x, rü Ngechuchuerugu inaba.
4 Notürü nhuxre ga jema jéma jexmagüxü̃ rü nanuẽ naxca̱x ga jema naxüxü̃ ga jema ngecü, rü nügümaã nhanagürügü: —¿Tü̱xcüü̃ ngẽxma inaxaijaxü̃ i ngẽma pumara?
5 —Rü narümemaẽ chi nixĩ i 300 tachinü i dĩẽrugu namaã itaxe, rü nhu̱xmachi ngẽma dĩẽrumaã nüxü̃ irüngü̃xẽẽ i ngẽma duü̃xü̃gü i ngearü dĩẽruã̱xgüxü̃ —nhanagürügü. Rü jemaãcü ngĩchiga nidexagü ga jema nge.
6 Notürü ga Ngechuchu rü nhanagürü nüxü̃: —¡Ngexrüma! ¿Tü̱xcüü̃ ngĩxü̃ pechixewe? Erü ngẽma chamaã naxüxü̃, rü wüxi i mexü̃ nixĩ.
7 —Rü ngẽma ngearü dĩẽruã̱xgüxü̃ rü guxü̃gutáma petanüwa nangẽxmagü, rü ngẽmaãcü pexü̃́ natauxcha na nüxü̃ perüngü̃xẽẽxü̃ i ngẽxguma penaxwa̱xegu. Notürü i chama rü tãũxü̃táma guxü̃gu petanüwa changẽxma.
8 —Rü nhaã nge rü inaxü i guxü̃ma i ngẽma ngĩxü̃́ tauxchaxü̃, rü ngẽmaca̱x joxni choxü̃ ipumaraxü̃ne naxü̃pa na ichatáxü̃.
9 —Rü aixcuma pemaã nüxü̃ chixu rü guxü̃ i naãnewa i ngextá duü̃xü̃gü nüxü̃ íixugügüxü̃wa i ore i maxẽxẽẽruü̃, rü nhaã ngecü chamaã üxü̃ rü tá ta nüxü̃ nixugügü. Rü ngẽmaãcü tá ngĩxna nacua̱xãchie i duü̃xü̃gü —nhanagürü ga Ngechuchu.
Juda rü ãẽ̱xgacügümaã nanamexẽẽ na nhuxãcü tá na Ngechuchuxü̃ jajauxgüxü̃ca̱x
10 Rü Juda Icarióti ga wüxi ga jema 12 ga ngúexü̃tanüxü̃ ixĩxü̃, rü Judéugüarü paigüarü ãẽ̱xgacügütanüwa naxũ na namaã jamexẽẽãxü̃ca̱x na nhuxãcü tá na Ngechuchuxü̃ jajauxgüxü̃ca̱x.
11 Rü jexguma jemaxü̃ naxĩnüẽgu, rü nümagü ga jema ãẽ̱xgacügü rü nataãẽgü. Rü dĩẽru Judana ngĩxü̃ naxuaxü̃gü. Rü jexgumama inanaxügü ga Juda ga naxca̱x na nadauxü̃ ga nhuxãcü nüxü̃́ na natauxchaxẽẽgüãxü̃ na duü̃xü̃güechita Ngechuchuxü̃ jajauxgüxü̃ca̱x.
Üpetüchigaarü õnawa nachibü ga Cori
12 Rü nawa nangu ga ngunexü̃ ga nagu inaxügüxü̃ ga jema peta ga põũ ga ngearü puxẽẽruü̃ã́xü̃ nagu nangõ̱xgüxü̃. Rü jema nixĩ ga ngunexü̃ ga nagu carneruxacü naxca̱x jama̱xgüxü̃ ga Üpetüchigaarü peta. Rü jexguma ga norü ngúexü̃gü rü Ngechuchuna nacagüe, rü nhanagürügü: —¿Ngextá cunaxwa̱xe na tanamexẽẽxü̃ i õna i Üpetüchigaarü petagu ingṍxü̃? —nhanagürügü.
13 Rü jexguma ga nüma rü nanamu ga taxre ga norü ngúexü̃gü, rü nhanagürü nüxü̃: —¡Ẽcü, jéa ĩãnewa pexĩ! Rü ngẽxma tá nüxü̃ pejangau i wüxi i jatü i wüxi ja tü̃xü̃ ja dexámaã ããcuxe ngẽxma tüxü̃ ingexü̃. ¡Rü nawe perüxĩ!
14 —¡Rü jima ĩpata ja nagu jaxücune i ngẽma jatü, rü jima ĩãrü joramaã nüxü̃ peixu, rü nhapegügü nüxü̃:
“Torü ngúexẽẽruü̃ nüxü̃ nacuáxchaü̃ na ngẽxü̃ jiĩxü̃ i ngẽma ucapu i norü ngúexü̃gümaã tá nawa nachibüxü̃ i Üpetüchigaarü õnagu”, nhapegügü nüxü̃!
15 —Rü nüma tá pexü̃ nüxü̃ nadauxẽẽ i wüxi i ucapu i taxü̃ i marü meã mexẽẽxü̃ i norü dauxü̃chiü̃wa ngẽxmaxü̃. ¡Rü ngẽ́ma penamexẽẽ̱x i tórü õna i Üpetüchigaca̱x ixĩxü̃! —nhanagürü nüxü̃.
16 Rü inaxĩãchi ga jema taxre ga ngúexü̃gü, rü ĩãnewa naxĩ. Rü jexma nüxü̃ inajangaugü ga guxü̃ma jema Ngechuchu namaã nüxü̃ ixuxü̃rüü̃. Rü jéma nanamexẽẽ ga õna ga Üpetüchigaca̱x ixĩxü̃.
17 Rü jexguma marü nachütachaü̃gu, rü ínangu ga Ngechuchu namaã ga jema 12 ga norü ngúexü̃gü.
18 Rü jexguma mechawa ínachibüejane, rü Ngechuchu rü nhanagürü nüxü̃: —Aixcuma pemaã nüxü̃ chixu rü wüxie ja petanüwa i nhu̱xma chamaã nuã chibüxe tá tixĩ ja bexma choxü̃ íjaxuaxü̃xẽ —nhanagürü.
19 Rü jexguma ga nümagü ga norü ngúexü̃gü rü poraãcü nangechaü̃gü. Rü inanaxügüe ga na wüxichigü nüxna icachigüxü̃, rü nhanagürügü: —Pa Corix, ¿chama tá chiĩxü̃ i cuxü̃ íchajaxuaxü̃xü̃? —nhanagürügü.
20 Rü nüma ga Ngechuchu nanangãxü̃ rü nhanagürü nüxü̃: —Wüxi i pema i 12 tanüwa i daatama poratuwa norü põũ iwaixẽẽxü̃, rü ngẽma tá nixĩ i choxü̃ íjaxuaxü̃xü̃.
21 —Rü chama i Tupana Nane na duü̃xü̃xü̃ chiĩxü̃, rü tá chaju ngẽma Tupanaãrü ore i ümatüxü̃ nüxü̃ ixuxü̃rüü̃. Notürü wüxi i ngechaü̃xü̃chi nixĩ naxca̱x i ngẽma jatü i choxü̃ íjaxuaxü̃xü̃. Rü narümemaẽ chi nixĩ ga noxtacüma tau chima na nabuxü̃ —nhanagürü.
22 Rü jexguma ínachibüejane, rü Ngechuchu nanajaxu ga põũ. Rü Tupanana moxẽ naxã, rü inanabücu, rü norü ngúexü̃güxü̃ najanu. Rü nhanagürü nüxü̃: —¡Penajau̱x i nhaã põũ! Rü ngẽma rü chaxunechiga nixĩ —nhanagürü.
23 Rü jemawena nanajaxu ga wüxi ga copu ga wĩũmaã ããcuxü̃. Rü jexgumarüü̃ ta Tupanana moxẽ naxca̱x naxãxĩra, rü nhu̱xmachi norü ngúexü̃güna nanaxã. Rü guxü̃ma nawa naxaxegü.
24 Rü nhanagürü nüxü̃: —Daa wĩũ ja chaugü i muxü̃ma i duü̃xü̃güca̱x ibacüchiga nixĩ. Rü jimawa Tupana meãma nanango̱xẽẽ na aixcuma jiĩxü̃ i norü uneta.
25 —Rü aixcuma pemaã nüxü̃ chixu rü tãũxü̃táma wena chajaxaxü ja daa wĩũ nhu̱xmatáta Tupana ãẽ̱xgacü íixĩxü̃wa wĩũ ja ngexwacaxü̃cü chajaxaüx —nhanagürü.
Ngechuchu nüxü̃ nixu na Pedru rü tá nügü ijacúxü̃ na norü ngúexü̃ jiĩxü̃
26 RÜ nhu̱xmachi nawijaegü nhuxre ga Tupanaãrü wijaegu. Rü jemawena rü Oriwéranecüarü Ma̱xpǘnewa naxĩ.
27 Rü jexguma ga Ngechuchu rü nhanagürü nüxü̃: —Guxãma i pema rü tá choxü̃ ípeta̱xgü. Erü ngẽmaãcü nüxü̃ nixu i Tupanaãrü ore i ümatüxü̃ i nhaxü̃:“Tá chajama̱x ja carneruarü daruü̃, rü tá nanaxüanemare i carnerugü”,
nhaxü̃.
28 —Notürü ngẽxguma marü juwa ícharüdaxguwena, rü chaxira tá pexü̃pa Gariréaanewa chaxũ —nhanagürü.
29 Rü jexguma ga Pedru rü nhanagürü nüxü̃: —Woo guxü̃ma i togü cuxü̃ íta̱xgu, rü chama rü tãũxü̃táma cuxü̃ íchata̱x —nhanagürü.
30 Rü Ngechuchu nanangãxü̃ rü nhanagürü nüxü̃: —Aixcuma cumaã nüxü̃ chixu rü nhamatama i chütaxü̃gu rü naxü̃pa na taxree̱xpü̱xcüna jac̱axü̃ i ota, rü tamaẽ̱xpü̱xcüna tá cugü icuicu̱x na chorü duü̃xü̃ cuiĩxü̃ —nhanagürü.
31 Notürü nüma ga Pedru rü nhanagürüama: —Woo wüxigu cumaã chaju̱xgu, rü tãũxü̃táma chaugü ichicu̱x na curü duü̃xü̃ chiĩxü̃ —nhanagürü. Rü guxü̃ma ga togü ga norü ngúexü̃gü rü ta jema nhanagürügü.
Ngechuchu rü Jechemaníwa najajumuxẽ
32 Rü jemawena rü Ngechuchu rü norü ngúexü̃gü rü nawa naxĩ ga wüxi ga nachica ga Jechemanígu ãẽ́gaxü̃. Rü Ngechuchu rü nhanagürü nüxü̃: —¡Nuã perütogü joxni paxa jéa chajajumuxẽ! —nhanagürü.
33 Rü nhu̱xmachi ínajagagü ga Pedru, rü Tiagu, rü Juã́ũ. Rü naxca̱x inaxügü ga na poraãcü nangechaü̃xü̃ rü naxi̱xãchiãẽxü̃.
34 Rü jexguma rü nhanagürü nüxü̃: —Poraãcü changechaü̃, rü nagu charüxĩnü na ngẽmamaã tá chajuxü̃. ¡Rü nuxa perücho i pemax, rü ipedaue! —nhanagürü.
35 Rü jexguma ga Ngechuchu rü jéaxüra naxũ. Rü nhaxtüanegu nanangücuchi. Rü Tupanana naxca̱x naca na nawa ínanguxuchixü̃ca̱x ga jema ngúxü̃ ga jexguma chi Tupanaãrü ngúchaü̃ jixĩgu.
36 Rü norü jumuxẽwa rü nhanagürü: —Pa Chaunatüx, cuxca̱x rü guxü̃ma natauxcha. ¡Rü nüxna choxü̃ ínanguxuchixẽẽ i nhaã ngúxü̃ i tá choxü̃ üpetüxü̃! Notürü chanaxwa̱xe i cunaxü i cuxrütama ngúchaü̃ rü tama i choxrü —nhanagürü.
37 Rü nhu̱xmachi nataegu ga norü ngúexü̃gü íjexmagüxü̃wa. Rü nüxü̃ inajangau ga na ínapeexü̃. Rü nhanagürü Pedruxü̃: —Pa Chimáũx, ¿ícupe? ¿Tama e̱xna namaã cupora na icudauxü̃, rü bai i wüxi i ngora?
38 —¡Rü ipedaue, rü Tupanana naxca̱x pec̱a na pexü̃ nangü̃xẽẽxü̃ca̱x na tama choxü̃ ípetáxü̃ca̱x i ngẽxguma ṯacü rü guxchaxü̃ pexü̃ üpetügu! Erü aixcuma peãẽwa rü ípememare, notürü pexene nixĩ i ngẽma turaxü̃ —nhanagürü.
39 Rü wenaxãrü ínixũ, rü noxrirüü̃tama najajumuxẽ.
40 Rü jexguma wenaxãrü norü ngúexü̃güca̱x nataegugu, rü nüxü̃ inajangau ga na wenaxãrü ínapeexü̃, jerü poraãcü najaxtaexü̃chi. Rü jemaca̱x ga nümagü rü tama nüxü̃ nacua̱xgü ga na ṯacümaã tá nangãxü̃güãxü̃.
41 Rü norü tamaẽ̱xpü̱xcüna wenaxãrü norü ngúexü̃güca̱x nataegu, rü nhanagürü nüxü̃: —¿Nhu̱xma rü ta e̱xna ípepeeama rü iperüngü̃ẽãma? ¡Rü marütama! Erü chama i Tupana Nane na duü̃xü̃xü̃ chiĩxü̃ rü marü nawa nangu i ngora na choxü̃ na jajauxgüxü̃ rü nüxna na choxü̃ namugüxü̃ca̱x i duü̃xü̃gü i chixexü̃ i pecaduã̱xgüxü̃.
42 —¡Rü ipechigü, rü ngĩxã ítixĩ! Erü marü nhamama nixĩ i ngẽma choxü̃ íjaxuaxü̃xü̃ —nhanagürü.
Ngechuchuxü̃ nijauxgü
43 Rü jexguma íjadexajane ga Ngechuchu, rü ínangu ga Juda ga norü ngúexü̃chire̱x ixĩxü̃. Rü nawe narüxĩ ga muxü̃ma ga duü̃xü̃gü ga taramaã rü naĩmaã ixãxnexü̃. Rü jema nixĩ ga duü̃xü̃gü ga jéma namugüxü̃ ga paigüarü ãẽ̱xgacügü rü ngúexẽẽruü̃gü ga mugüwa ngu̱xẽẽtaegüxü̃ rü togü ga ãẽ̱xgacügü ga jaguã̱xgü.
44 Rü Juda ga ínaxuaxü̃xü̃ rü marü jema duü̃xü̃gümaã nanamexẽẽ, rü nhanagürü:
“Ngẽma nüxü̃ chawãxĩxü̃ nixĩ i Ngechuchu. Rü ngẽma tá nixĩ i pejauxgüxü̃ rü meã pejanáĩãcüma pejagagüxü̃” —nhanagürü.
45 Rü jemaãcü Ngechuchuca̱x nixũ, rü nhanagürü nüxü̃: —Pa Ngúexẽẽruü̃x —nhanagürü. Rü nhu̱xmachi nanawãxĩ.
46 Rü jexgumatama Ngechuchuxü̃ nijauxgü.
47 Notürü wüxi ga Ngechuchutanüxü̃ nanawe̱xechi ga norü tara, rü jemamaã paigüarü ãẽ̱xgacüarü duü̃xü̃xü̃ ínadaechinü.
48 Rü jexguma ga Ngechuchu rü jema duü̃xü̃güna naca, rü nhanagürü nüxü̃: —¿Tü̱xcüü̃ taragü rü naĩxmena̱xãgümaã chauxca̱x nuã pexĩ na choxü̃ pejarüjauxgüxü̃ca̱x nhama wüxi i ngĩ́ta̱xáxü̃ chiĩxü̃rüü̃?
49 —Rü guxü̃ ga ngunexü̃gu rü petanüwa chajexma ga jexguma tupauca ga taxü̃newa changu̱xẽẽtaegu, rü taguma choxü̃ pejauxgü. Notürü nhaã nhu̱xma ngupetüxü̃, rü nangupetü na janguxü̃ca̱x i Tupanaãrü ore i ümatüxü̃ —nhanagürü.
50 Rü jexguma ga guxü̃ma ga norü ngúexü̃gü rü nüxna nibuxmü. Rü nüxĩcatama jéma nanata̱xgü ga Ngechuchu.
51 Notürü wüxi ga ngextü̱xücü ga düxruü̃maãxĩca nügü nuquecü nawe nixũchigü. Rü jema duü̃xü̃gü rü najajauxgü.
52 Notürü nüma rü nüxü̃ ninge̱x ga jema düxruü̃, rü jemaãcü ngexchiruãcüma ninha.
Ãẽ̱xgacügütanüpe̱xewa Ngechuchuxü̃ nagagü
53 Rü jexguma ga jema duü̃xü̃gü rü paigüarü ãẽ̱xgacüpe̱xewa nanagagü ga Ngechuchu. Rü jéma nangutaque̱xegü ga guxü̃ma ga togü ga paigü ga ãẽ̱xgacügü ixĩgüxü̃, rü ngúexẽẽruü̃gü ga mugüwa ngu̱xẽẽtaegüxü̃, rü jema togü ga ãẽ̱xgacügü ga jaguã̱xgü.
54 Notürü ga Pedru rü jaxü̃gu nawe nixãchigü nhu̱xmata guma paigüarü ãẽ̱xgacüpataa̱xtüwa nangu. Rü purichíagü ga tupauca ga taxü̃neãrü daruü̃gümaã jéma ĩã̱xtüwa narüto. Rü nügü jéma nanaĩxü̃ üxüxü̃tawa.
55 Rü jema paigüarü ãẽ̱xgacügü rü guxü̃ma ga jema togü ga ãẽ̱xgacügü ga itaxü̃ rü naxca̱x nadaugü ga nhuxãcü Ngechuchuxü̃ na ínaxuaxü̃güxü̃ rü na jama̱xgüãxü̃ca̱x. Notürü taxucürüwa nüxü̃ inajangaugü ga ṯacüca̱x tá na jama̱xgüãxü̃.
56 Jerü woo muxü̃ma ga duü̃xü̃gü rü nüxü̃ nixugüe ga doramare ga nachiga, notürü nügütanüwatama rü tama nawüxigu ga norü ore.
57 14:57-58 Rü nhuxre ga togü inachigü rü nüxü̃ nixugüe ga doramare ga Ngechuchuchiga. Rü nhanagürügü: —Toma nüxü̃ taxĩnüẽ ga na nhaxü̃:“Tá chanangutaxü̃xẽẽ ja daa tupauca ja taxü̃ne ja duü̃xü̃gü üxü̃ne. Rü tamaẽ̱xpü̱x i ngunexü̃gu tá chanaxü ja náĩ ja tama duü̃xü̃gü üxü̃ne”, nhaxü̃ —nhanagürügü.
58 Nüü̃ nadau 14:57
59 Notürü woo jema oremaã, rü tama nawüxiguéga ga norü ore.
60 Rü jexguma ga guma paigüarü ãẽ̱xgacü rü guxü̃pe̱xewa inachi. Rü Ngechuchuna naca, rü nhanagürü: —¿E̱xna taxuxü̃maãma cunangãxü̃ i nhu̱xmax? ¿Rü ṯacü nixĩ i ngẽma nüxü̃ jaxugüxü̃ i cuchiga? —nhanagürü.
61 Notürü ga Ngechuchu rü nangea̱xmare, rü taxuxü̃maãma nanangãxü̃. Rü jemaca̱x ga nüma ga paigüarü ãẽ̱xgacü rü wenaxãrü nüxna naca, rü nhanagürü: —¿Rü cuma cuiĩxü̃ ja Cristu ja Tupana ja mecü Nane? —nhanagürü.
62 Rü Ngechuchu rü nhanagürü nüxü̃: —Ngü̃. Ngẽma nüxü̃ cuixuxü̃ chixĩ. Rü tá choxü̃ pedaugü i ngẽxguma Tupana ja poracüarü tügünecüwawa charüto̱xgu rü ngẽxguma caixanexü̃gu wenaxãrü núma chaxũxgu —nhanagürü.
63 Rü jexguma ga guma paigüarü ãẽ̱xgacü rü norü numaã nügüchirugu nagaugü. Rü nhanagürü: —¿Tü̱xcüü̃ marü tanaxwa̱xe i to i duü̃xü̃ i nüxü̃ ixugüxü̃ i nachiga?
64 —Rü pematama marü nüxü̃ pexĩnüẽ na nhuxãcü Tupanamaã naguxchigaxü̃. ¿Rü nhuxũ nhapegüxü̃ i nhu̱xmax? —nhanagürü. Rü guxü̃ma wüxigu narüxĩnüẽ rü: —Aixcuma nixĩ na chixexü̃ naxüxü̃ rü namexü̃ na najuxü̃ —nhanagürügü.
65 Rü nhuxre ga nümagü rü inanaxügüe ga nüxna na nac̱uaixgüexü̃. Rü nanatüxetügü rü nhu̱xmachi nüxü̃ nidagügü nhaxü̃maã: —¡Nüxü̃ nacua̱x na texé cuxü̃ idagüxü̃! —nhanagürügü. Rü jema tupauca ga taxü̃neãrü daruü̃gü ga purichíagü rü nanapechametügü.
Pedru inajacu̱x na Ngechuchuxü̃ nacuáxü̃
66 Rü joxni ga Pedru rü nhaxtüwa ãẽ̱xgacüpataa̱xtüwa najexma. Rü jexgumajane jéma ingu ga wüxi ga pacü ga guma ãẽ̱xgacüarü duü̃xü̃ ixĩcü.
67 Rü jexguma Pedruxü̃ nada̱xgu ga jéma üxüxü̃tawa nügü na nanaĩxü̃xü̃, rü meã nüxü̃ idawenü, rü ngĩgürügü nüxü̃: —Cuma rü ta namücü cuixĩ i ngẽma Ngechuchu i Nacharétucü̱̃ã̱x —ngĩgürügü.
68 Notürü ga Pedru rü nügü inicu̱x na Ngechuchuarü duü̃xü̃ jiĩxü̃, rü nhanagürü: —Chama rü tama nüxü̃ chacua̱x ja jima. Rü tama nüxü̃ chacua̱x i ṯacüchiga nixĩ i ngẽma nüxü̃ cuixuxü̃ —nhanagürü. Rü jexguma ga nüma rü ĩpataa̱xtüarü düxétüwa naxũ. Rü jexgumatama nica ga ota.
69 Notürü ga jema pacü rü wenaxãrü Pedruxü̃ idau, rü inaxügü ga jema togümaã nüxü̃ na jaxuxü̃, rü ngĩgürügü: —Nhaã rü wüxi i natanüxü̃ nixĩ —ngĩgürügü.
70 Notürü nüma ga Pedru rü wena nügü inicu̱x. Rü jixcamaxü̃ra rü jema duü̃xü̃gü ga jéma jexmagüxü̃ rü wenaxãrü nhanagürügü nüxü̃: —Aixcuma nixĩ na cuma rü ta ngẽma Ngechuchutanüxü̃ na cuiĩxü̃, erü wüxi i Gariréaanecü̱̃ã̱x cuixĩ —nhanagürügü.
71 Rü jexguma ga Pedru rü poraãcü nügü inicu̱x, rü nhanagürü nüxü̃: —Rü aixcuma tama nüxü̃ chacua̱x i ngẽma jatü i nachiga peidexagüxü̃. Rü ngẽxguma doraxü̃ chixuxgu rü ¡cü Tupana choxü̃ pocux! —nhanagürü.
72 Rü jexgumatama norü taxree̱xpü̱xcüna nica ga ota. Rü jexguma ga Pedru rü nüxna nacua̱xãchi ga jema ore ga ü̃paacü Ngechuchu namaã nüxü̃ ixuxü̃ ga nhaxü̃:
“Rü naxü̃pa na taxree̱xpü̱xcüna ota ic̱axü̃, rü cuma rü tá tamaẽ̱xpü̱xcüna cugü cuicu̱x na chorü duü̃xü̃ cuiĩxü̃”, nhaxü̃. Rü jexguma ga Pedru rü poraãcüxü̃chima naxaxu.
