Marcu 15:1-47
15 Rü jexguma jangunegu, rü nangutaque̱xegü ga ãẽ̱xgacügü ga taxü̃gü ga paigüarü ãẽ̱xgacügü rü ãẽ̱xgacügü ga jaguã̱xgü rü ngúexẽẽruü̃gü ga mugüwa ngu̱xẽẽtaegüxü̃ rü guxü̃ma ga togü ga jema ãẽ̱xgacügütanüwa ügüxü̃. Rü Ngechuchuxü̃ jana̱ĩ̱xgüchacüüãcüma ãẽ̱xgacü ga Piratuxü̃tawa nanagagü.
2 Rü nüma ga Piratu rü Ngechuchuna naca rü nhanagürü: —¿Cuma cuiĩxü̃ i Judéugüarü ãẽ̱xgacü ja tacü? —nhanagürü. Rü Ngechuchu nanangãxü̃, rü nhanagürü: —Ngü̃, jima nüxü̃ cuixucü chixĩ —nhanagürü.
3 15:3-4 Notürü jema paigüarü ãẽ̱xgacügü rü poraãcü ínanaxuaxü̃güama, rü jemaca̱x ga Piratu rü wenaxãrü Ngechuchuna naca, rü nhanagürü: —¿E̱xna taxuxü̃maãma cunangãxü̃? ¡Dücax i nhuxre i cuchiga i nüxü̃ jaxugüexü̃! —nhanagürü.
4 Nüü̃ nadau 15:3
5 Notürü ga Ngechuchu rü taxuxü̃maãma nanangãxü̃. Rü jemaca̱x ga Piratu rü poraãcü naḇaixãchiãẽ.
Piratu rü Ngechuchumaã nanaxuegu na najuxü̃ca̱x
6 Rü gucü ga taunecügu ga jexguma jema Üpetüchigaarü petawa nanguxgu rü Piratu ínananguxuchixẽẽxü̃ ga wüxi ga pocuxü̃ ga duü̃xü̃gü naxca̱x ícagüxü̃, jerü jema nixĩ ga nacüma.
7 Rü wüxi ga jatü ga Barabágu ãẽ́gaxü̃, rü pocupataü̃gu napocu wüxigu namaã ga togü ga natanüxü̃ ga máẽtagüxü̃ ga jexguma ãẽ̱xgacüxü̃ ínata̱xüchigüchaü̃gu.
8 Rü jema duü̃xü̃gü rü jéma Piratuxü̃tawa nangugü. Rü inanaxügüe ga Piratuna na nacagüexü̃ na naxca̱x jangéãxü̃ca̱x ga wüxi ga pocuxü̃ aixrügumarüü̃.
9 Rü Piratu nanangãxü̃, rü nhanagürü: —¿Penaxwa̱xexü̃ na pexca̱x chajangéxü̃ ja jima Ngechuchu ja duü̃xü̃gü Judéugüarü ãẽ̱xgacümaã naxugüãcü? —nhanagürü.
10 Rü jema nhanagürü ga Piratu jerü nüxü̃ nacua̱x ga na jema paigüarü ãẽ̱xgacügü rü na jaxauxãchiexü̃ca̱x jiĩxü̃ ga Ngechuchu nüxna jamugüãxü̃.
11 Notürü ga jema paigüarü ãẽ̱xgacügü rü duü̃xü̃güxü̃ namugü ga na tagaãcü naxca̱x ínacagüxü̃ ga na Barabáxü̃ jangéxü̃ca̱x.
12 Rü jexguma ga Piratu rü nüxna naca, rü nhanagürü: —¿Rü ṯacü nixĩ i penaxwa̱xexü̃ na chanaxüxü̃ namaã ja jima Judéugüarü Ãẽ̱xgacügu pexüégacü? —nhanagürü.
13 Rü nümagü ga duü̃xü̃gü rü tagaãcü nanangãxü̃gü, rü nhanagürügü: —¡Curuchawa japota! —nhanagürügü.
14 Rü jexguma ga Piratu rü nhanagürü nüxü̃: —¿Notürü ṯacü rü chixexü̃ naxü? —nhanagürü. Notürü ga nümagü rü wenaxãrü tagaãcü nhanagürügü: —¡Curuchawa japota! —nhanagürügü.
15 Rü jexguma ga Piratu rü Barabáxü̃ ínanguxuchixẽẽ, jerü duü̃xü̃güxü̃ nataãẽxẽẽchaü̃. Rü jexguma churaragüxü̃ Ngechuchuxü̃ nac̱uaixẽẽguwena ga Piratu, rü nhu̱xmachi nüxna nanamu na curuchawa janapotagüãxü̃ca̱x.
16 Rü jexguma ga nümagü ga churaragü rü ãẽ̱xgacüpataa̱xtüwa nanagagü. Rü jéma nanangutaque̱xexẽẽ ga guxü̃ma ga namücügü ga churaragü.
17 Rü nhu̱xmachi ga jema churaragü rü wüxi ga máxü̃ ga daucharaxü̃ ga naxchirugu najacu̱xẽẽgü. Rü naẽruwa najanga̱xcuchigü ga wüxi ga nga̱xcueruü̃ ga chuchuxü̃wa naxügüxü̃.
18 Rü jemawena inanaxügüe na tagaãcü nhagüxü̃: —¡Namaxü̃ ja Judéugüarü ãẽ̱xgacü! —nhagüxü̃.
19 Rü wüxi ga naĩxmena̱xãmaã naẽruwa nanac̱uaixcagü, rü nüxna nacuaixgüe. Rü nape̱xegu nacaxã́pü̱xügü rü nüxü̃ nicua̱xüü̃güneta.
20 Rü jexguma jemaãcü nagu jadauxcüraxü̃güguwena, rü ínanacu̱xuchigü ga jema naxchiru ga daucharaxü̃. Rü wenaxãrü naxchirugutama najacu̱xẽẽgü. Rü nhu̱xmachi ínanagaxüchigü na curuchawa janapotagüãxü̃ca̱x.
Ngechuchuxü̃ curuchawa nipotagü
21 Rü jéma naxüpetü ga wüxi ga jatü ga Chirenecü̱̃ã̱x ga Chimáũgu ãẽ́gacü ga Arejã́dre rü Rufu nanatü ixĩcü ga naãnewa ne ũcü. Rü jexguma jéma naxüpetügu rü jema churaragü rü guma jatüxü̃ ngĩxü̃ iningexẽẽgü ga Ngechuchuarü curucha.
22 Rü Ngechuchuxü̃ nawa nagagü ga wüxi ga nachica ga Górgutagu ãẽ́gaxü̃. Rü jema naẽ́ga rü: Duü̃xẽẽruchina̱xãchitaü̃, nhaxü̃chiga nixĩ.
23 Rü nüxna nanaxãgü ga wĩũ ga miramaã ãẽ́ü̃cü. Notürü nüma ga Ngechuchu rü tama najaxaxü.
24 Rü jemawena curuchawa najapotagü. Rü nümagü ga churaragü rü wüxi ga dĩẽru ngĩxü̃ nanhanagügü na jemawa nüxü̃ nacua̱xgüxü̃ca̱x na nhuxãcü tá nügümaã jatojeãxü̃ca̱x ga Ngechuchuchiru, rü ṯacü tá na jangexü̃ ga wüxichigü.
25 Rü meãma 9 arü ngoragu ga pa̱xmama nixĩ ga curuchawa japotagüãxü̃.
26 Rü jéma najapocuchi ga wüxi ga mürapewa ga ãẽ́gatachinüxü̃ ga nüxü̃ ixuxü̃ ga ṯacüca̱x curuchawa na japotagüãxü̃. Rü jema naẽ́ga ga mürapewagu üxü̃, rü nhanagürü: “Judéugüarü Ãẽ̱xgacü”, nhanagürü.
27 Rü naxrüü̃ curuchawa najapotagü ga taxre ga máẽtagüxü̃ rü wüxi ga norü tügünecüwawa rü to ga norü ṯoxwecüwawa.
28 Rü jemaãcü ningu ga Tupanaãrü ore ga ümatüxü̃ ga nhaxü̃:“Ngẽma chixexü̃ ügüxü̃tanüwaama nata̱x”,
nhaxü̃.
29 15:29-30 Rü jema duü̃xü̃gü ga jéma chopetüxü̃, rü Ngechuchumaã naguxchigagü, rü nanexãẽrugüãcüma nhanagürügü: —¡Dücax! Cuma cunangutaü̃xẽẽẽ́ga ja tupauca ja taxü̃ne, rü tamaẽ̱xpü̱x i ngunexü̃gu wenaxãrü ícunadaxẽẽẽ́ga. ¡Ẽcü! ¡Cugütama namaxẽẽ i nhu̱xmax, rü írüxĩ i curuchawa! —nhanagürügü.
30 Nüü̃ nadau 15:29
31 Rü jexgumarüü̃ ta Ngechuchuxü̃ nacugüecüraxü̃ ga paigüarü ãẽ̱xgacügü, rü ngúexẽẽruü̃gü ga ore ga mugüwa ngu̱xẽẽtaegüxü̃. Rü nhanagürügü: —Nüma rü togüxü̃ namaxẽxẽẽ, notürü taxucürüwama nügütama namaxẽẽ.
32 —¡Nhu̱xma rü ínaxĩ̱x i curuchawa i ngẽma Cristu i Iraéanecü̱̃ã̱xãrü Ãẽ̱xgacü na nüxü̃ idaugüxü̃ca̱x rü nüxü̃́ jaxõgüxü̃ca̱x! —nhanagürügü. Rü woo ga jema máẽtagüxü̃ ga naxrüü̃ curuchawa ipotagüxü̃, rü namaã naguxchigagü.
Naju ga Ngechuchu
33 Rü jexguma tocuchiwa nanguxgu, rü guxü̃ ga naãnewa naxẽãne nhu̱xmata jáuanecü tamaẽ̱xpü̱xarü ngorawa nangu.
34 Rü jematama ngoragu rü tagaãcü aita naxü ga Ngechuchu, rü nhanagürü: —Eríx, Eríx, ¿damá zabátani? —nhanagürü. Rü ngẽma rü nhaxü̃chiga nixĩ: “Pa Chorü Tupanax, Pa Chorü Tupanax ¿tü̱xcüü̃ choxü̃ nuã cuta̱x?” nhaxü̃chiga nixĩ.
35 Rü nümaxü̃ ga duü̃xü̃gü ga jéma jexmagüxü̃, rü nüxü̃ naxĩnüẽ rü nhanagürügü: —¡Dücax, nüxü̃ pexĩnüẽ! Nuxcümaü̃cü ga Tupanaãrü orearü uruü̃ ga Eríaca̱x naca —nhanagürügü.
36 Rü jexguma rü wüxi ga jema duü̃xü̃gü ga jéma jexmagüxü̃, rü inanhaãchi rü wüxi ga tüaxmü niwaixẽẽ namaã ga wĩũ ga marü ngúchia̱xü̃chicü. Rü wüxi ga dexnewa najana̱ĩ̱x, rü nhu̱xmachi Ngechuchua̱xgu nanawe̱x na nüxü̃ natuxuxü̃ca̱x. Rü jema togüxü̃ nhanagürügü: —¡Jixrüma! ¡Ngĩxã rü itarüdaunü ngoxita Ería nuã ũ na curuchawa ínaxĩxẽẽãxü̃ca̱x! —nhanagürügü.
37 Notürü nüma ga Ngechuchu rü tagaãcü aita naxü, rü nhu̱xmachi naju.
38 Rü jexguma ga tupauca ga taxü̃neãrü tüjemachiãxü̃ rü taxregu narügaute. Rü dauxü̃wa inaxügü ga na nagautexü̃ rü nhu̱xmata nhaxtüwa nangu.
39 Rü guma churaragüarü ãẽ̱xgacü ga Romacü̱̃ã̱x ga Ngechuchupe̱xewa jexmacü, rü jexguma nüxü̃ nada̱xgu ga na najuxü̃, rü nhanagürü: —Aixcuma nixĩ ja daa jatü i Tupana Nane na jiĩxü̃ —nhanagürü.
40 Rü ijexmagü ta ga nhuxre ga ngecügü ga jéma jaxü̃wa nüxü̃ rüdaunücü. Rü jematanüwa ijexmagü ga María ga Magadácü̱̃ã̱x, rü Charumé, rü María ga Juche rü Tiagu ga rübumaẽcü naẽ.
41 Rü jema ngecügü ijixĩ ga Ngechuchuxü̃ íixümücügücü rü nüxü̃ rüngü̃xẽẽgücü ga jexguma Gariréaanewa najexmagu. Rü jexgumarüü̃ ta jéma ijexmagü ga mucüma ga naĩgü ga ngecügü ga Ngechuchuwe rüxĩcü ga jexguma Jerucharéü̃wa naxũxgu.
Ngechuchu rü naxmaxü̃gu najanaxücuchigü
42 15:42-43 Rü jexguma marü nachütachaü̃gu ga jema ngunexü̃ ga Judéugü nagu nügü imexẽẽgüxü̃ naxca̱x ga ngü̃xchigaarü ngunexü̃, rü noxtacüma Piratuxü̃tawa naxũ ga Juche ga Arimatéacü̱̃ã̱x. Rü nüma ga guma Juche rü Judéugüarü ãẽ̱xgacügü ga tacütanüwa naxü, rü wüxi ga ãẽ̱xgacü ga poraãcü nüxü̃ nangechaü̃gücü nixĩ. Rü nüma rü ta ínanaṉg̱uxẽẽ na Tupana norü ãẽ̱xgacü jiĩxü̃ca̱x. Rü Piratuxü̃tawa naxca̱x ínajaca ga Ngechuchuxü̃ne.
43 Nüü̃ nadau 15:42
44 Rü naḇaixãchiãẽ ga Piratu ga marü na najuxü̃. Rü jemaca̱x norü churaragüarü ãẽ̱xgacüca̱x nangema na nüxna nac̱axü̃ca̱x na nhuxgumama jiĩxü̃ ga marü na najuxü̃.
45 Rü jexguma norü churaragüarü ãẽ̱xgacü namaã nüxü̃ ixuxgu ga marü na najuxü̃, rü nüma ga Piratu rü Juchena nanaxã ga naxü̃ne.
46 Rü jexguma ga Juche rü naxca̱x nataxe ga wüxi ga naxchápenüü̃ ga mexẽchixü̃. Rü curuchawa nanajaxu ga Ngechuchuxü̃ne, rü jema naxchápenüü̃maã nananuque. Rü wüxi ga ma̱xpǘne ga nutanaxca̱xgu ü̃paacü jacaxmaü̃güxü̃ ga naxmaxü̃gu najanaxücuchi. Rü nhu̱xmachi wüxi ga nuta ga tacümaã nanangũxtaü̃.
47 Rü María ga Magadácü̱̃ã̱x rü María ga Juche naẽ rü nüxü̃ irüdaunü ga ngexta na janaxücuchigüãxü̃.
