Marcu 16:1-20
16 Rü chawüruarü ngunexü̃guwena, rü María ga Magadácü̱̃ã̱x, rü Charumé, rü María ga Tiagu naẽ naxca̱x itaxegü ga pumara na namaã nachaãxü̃ca̱x ga Ngechuchuxü̃ne.
2 Rü pa̱xmamaxü̃chi ga noxri üa̱xcü ijarügoxgu ga jüxüarü ngunexü̃gu, rü jema ngecügü rü íijadaugü ga jema naxmaxü̃ ga nagu janaxücuchigüãxü̃wa.
3 Rü ngĩgü ngĩgürügügü: —¿Texé tá taxca̱x ítanaxügachi ja jima nuta ja namaã nangũxtaü̃cü? —ngĩgürügügü.
4 Notürü jexguma meãma nüxü̃ nadaunügu, rü nüxü̃ idaugü ga marü na ínaxügachixü̃ ga guma nuta ga tacü ga namaã nangũxtaü̃cü ga jema naxmaxü̃.
5 Rü jexguma nagu nadaugügu ga jema naxmaxü̃, rü nüxü̃ idaugü ga wüxi ga ngextü̱xücü ga ma̱xchiruxü̃ ga cómüchiruxü̃ ga jéma naxmaxü̃ãrü tügünecüwawa rütoxü̃. Rü poraãcü iḇaixãchiãẽgü ga jema ngecügü.
6 Notürü nüma rü nhanagürü ngĩxü̃: —¡Tãṹ i peḇaixãchiexü̃! Pema rü naxca̱x pedaugü ja Ngechuchu ja Nacharétucü̱̃ã̱x ga guma curuchawa japotagüãcü. Marü wena namaxü̃, rü nataxuma i nuã. ¡Dücax, meã nüxü̃ peda̱x i nhaã nachica ga nagu naxügüãxü̃!
7 —¡Rü paxa ípeixĩ rü Pedrumaã rü ngẽma togü i ngúexü̃gümaã nüxü̃ pejarüxugüe, rü nhapegügü nüxü̃:
“Nüma ja Ngechuchu rü marü nüxĩra pexü̃pa Gariréaanewa naxũ. Rü ngẽ́ma tá nüxü̃ pejadaugü ngẽma pemaã nüxü̃ jaxuxü̃rüü̃”, nhapegügü nüxü̃! —nhanagürü.
8 Rü jexguma ga jema ngecügü rü nüxna íijabuxmü ga jema naxmaxü̃, jerü ngĩrü muü̃ẽmaã poraãcü ijadu̱ru̱xe. Rü taxúemaãma nüxü̃ ijaxugügü, jerü poraãcü imuü̃ẽ.
Ngechuchu rü ngĩxca̱x nango̱x ga María ga Magadácü̱̃ã̱x
9 Rü jexguma Ngechuchu juwa írüdaxguwena ga noxri jangunegu ga jüxüarü ngunexü̃gu, rü ngĩxca̱xira nango̱x ga María ga Magadácü̱̃ã̱x ga ngĩwa ínawoxü̃ãcü ga 7 ga ṉg̱oxogü.
10 Rü ngĩma rü íijaxũ, rü namaã nüxü̃ ijarüxu ga jema Ngechuchumücügü ga íngechaü̃güxü̃ rü íxauxexü̃.
11 Notürü ga nümagü rü tama najaxõgüchaü̃ ga jexguma nüxü̃ naxĩnüẽgu ga na namaxü̃xü̃ ga Ngechuchu rü na nüxü̃ nadauxü̃ ga ngĩmax.
Ngechuchu rü taxre ga norü ngúexü̃güca̱x nango̱x
12 Rü jemawena ga Ngechuchu rü tõõcü nango̱x naxca̱x ga taxre ga norü ngúexü̃gü ga jexguma nama ga naãnewaama nadaxü̃gu naxĩxgu.
13 Rü nümagü rü nawoegu, rü jema togü ga ngúexü̃gümaã nüxü̃ najarüxugü. Notürü jemagüaxü̃́ rü ta tama najaxõgü.
Ngechuchu nanamu ga norü ngúexü̃gü
14 Rü jemawena ga Ngechuchu rü naxca̱x nango̱x ga jema 11 ga norü ngúexü̃gü ga jexguma mechawa ínachibüejane. Rü najangagü naxca̱x ga tama aixcuma na jaxõgüãxü̃ rü tama na inaxĩnüẽxü̃. Jerü ga nümagü rü tama nüxü̃́ najaxõgüchaü̃ ga jema nüxü̃ daugüxü̃ ga marü wena na namaxü̃xü̃.
15 Rü nhanagürü nüxü̃: —¡Guxü̃ i naãnewa pexĩ rü guxü̃ i duü̃xü̃gümaã nüxü̃ pejarüxu i ore i mexü̃!
16 —Rü jíxema jaxṍxẽ rü íbaiexe rü tá tüxü̃́ nangẽxma i maxü̃ i taguma gúxü̃. Notürü jíxema tama jaxṍxẽ rü tá tapocu.
17 —Rü nhaã tá nixĩ i cua̱xruü̃gü i nawa nüxü̃ icuáxü̃ i ngẽma jaxõgüxü̃. Rü chauégagu tá ínanawoxü̃ i ṉg̱oxogü. Rü ngexwacaxü̃xü̃ i nagagüwa tá nidexagü.
18 —Rü naxme̱xmaã tá nüxü̃ najajauxãchi i ãxtapegü. Rü ngẽxguma jaxaxgüãgu i ṯacü i nawa ijuxü̃, rü tãũxü̃táma nanachixexẽẽ. Rü tá tüxü̃ ningõgügü ja iḏaaweexe rü tá tümaca̱x nitaanegü —nhanagürü.
Ngechuchu rü dauxü̃guxü̃ ga naãnewa naxũ
19 Rü nüma ga Cori ga Ngechuchu rü jexguma norü ngúexü̃gümaã jadexaguwena, rü Tupana rü dauxü̃guxü̃ ga naãnewa nanaga. Rü Tupanaãrü tügünecüwawa najarüto.
20 Rü nümagü ga norü ngúexü̃gü rü inaxĩãchi na guxü̃wama nüxü̃ janaxugüexü̃ ga ore i mexü̃. Rü nüma ga Cori rü nüxü̃ narüngü̃xẽẽ, rü nanango̱xẽẽ na aixcuma jiĩxü̃ ga jema ore, jerü wüxigu namaã napuracü na naxügüãxü̃ca̱x ga mexü̃ ga taxü̃gü ga Tupanaãrü poramaã naxügüxü̃.
