Marcu 2:1-28
2 2:1-2 Rü jixcama ga nhuxre ga ngunexü̃wena rü wenaxãrü Caparnáũãrü ĩãnegu naxücu ga Ngechuchu. Rü jexguma duü̃xü̃gü nüxü̃ cuáchigagügu na ĩpatawa najexmaxü̃, rü jéma nangutaque̱xegü ga muxü̃ma ga duü̃xü̃gü. Rü düxwa ga ĩã̱xtüwa rü nanapá. Rü nüma ga Ngechuchu rü namaã nüxü̃ nixu ga ore i mexü̃.
2 Nüü̃ nadau 2:1
3 Rü jéma nangugü ga ãgümücü ga jatügü ga jéma nangetaü̃güxü̃ ga wüxi ga jatü ga naw̱ãĩxãchicü.
4 Notürü jema na namuxũchixü̃ ga duü̃xü̃gü, rü taxucürüwama Ngechuchuxü̃tawa nangugü. Rü jemaca̱x ínanapogüétü ga Ngechuchu íjexmaxü̃wa ga guma ĩpata. Rü jéma norü caruü̃gu ínanac̱ẖüxüetaü̃gü ga guma naw̱ãĩxãchicü.
5 Rü jexguma Ngechuchu nüxü̃ da̱xgu ga nhuxãcü aixcuma na jaxõgüãxü̃ ga jema duü̃xü̃gü, rü nhanagürü nüxü̃ ga guma naw̱ãĩxãchicü: —Pa Chaunex, curü pecadugü rü marü cuxü̃́ nüxü̃ changechaü̃ —nhanagürü.
6 2:6-7 Notürü nhuxre ga ngúexẽẽruü̃gü ga Muĩséarü mugüwa ngu̱xẽẽtaegüxü̃ rü jéma narütogü. Rü naãẽwa nhaxü̃gu narüxĩnüẽ: —¿Nhuxãcü tama namuü̃ na ngẽmaãcü jadexaxü̃? ¿Rü ṯacü Tupanamaã jaxugüxü̃? Erü Tupanaxĩcatama nixĩ ja duü̃xü̃güarü pecaduxü̃ ngechaü̃cü —nhaxü̃gu narüxĩnüẽ.
7 Nüü̃ nadau 2:6
8 Notürü jexgumatama ga Ngechuchu rü nüxü̃ nicua̱xãchi ga jema nagu naxĩnüẽxü̃, rü jemaca̱x nüxna naca rü nhanagürü nüxü̃: —¿Tü̱xcüü̃ ngẽmagu perüxĩnüẽ i pemax?
9 —¿Ṯacü nixĩ i rütauchamaẽxü̃ na namaã nüxü̃ ixuxü̃ ja daa naw̱ãĩxãchicü:
“Curü pecadugü rü marü cuxü̃́ nüxü̃ changechaü̃”, rü e̱xna:
“¡Inachi, rü najaxu i curü caruü̃, rü íixũ!” nhaxü̃?
10 2:10-11 —Notürü nhu̱xma rü tá pexü̃ nüxü̃ chadauxẽẽ na Chaunatü núma choxü̃ muxü̃ na duü̃xü̃güaxü̃́ nüxü̃ changechaü̃xü̃ca̱x i norü pecadugü —nhanagürü. Rü jexguma jema nhaxguwena rü guma naw̱ãĩxãchicüxü̃ nhanagürü: —Cumaã nüxü̃ chixu rü ¡inachi, rü najaxu i curü caruü̃, rü cupatawa naxũ! —nhanagürü.
11 Nüü̃ nadau 2:10
12 Rü jexgumatama inachi ga guma iḏaawecü. Rü nanajaxu ga norü caruü̃, rü ínaxũxũ nape̱xewa ga guxü̃ma ga jema duü̃xü̃gü ga jéma jexmagüxü̃. Rü jemaca̱x ga jema duü̃xü̃gü rü naḇaixãchiãẽgü, rü Tupanaxü̃ nicua̱xüü̃gü, rü nhanagürügü: —Taguma nüxü̃ tadau i ṯacü i nhaãrüü̃ ixĩxü̃ —nhanagürügü.
Lewíca̱x naca ga Ngechuchu
13 Rü jemawena rü wenaxãrü naxtaacutüwa naxũ ga Ngechuchu. Rü jema muxü̃ma ga duü̃xü̃gü rü naxca̱x naxĩ. Rü nüma rü nanangúexẽẽ.
14 Rü jexguma jéma naxüpetügu ga Ngechuchu, rü jéma nüxü̃ nadau ga Lewí ga Arupéu nane. Rü nüma ga Lewí rü jéma narüto nawa ga jema nachica ga duü̃xü̃güna dĩẽru ngĩxü̃ ínajaxuxü̃wa naxca̱x ga Romacü̱̃ã̱xãrü ãẽ̱xgacü jerü woetama jema nixĩ ga norü puracü. Rü Ngechuchu rü nhanagürü nüxü̃: —¡Chawe rüxũ! —nhanagürü. Rü inachi ga Lewí, rü nawe narüxũ.
15 Rü jéma Lewípatawa nachibü ga Ngechuchu. Rü jéma nachibüe ga muxü̃ma ga duü̃xü̃gü ga Lewírüü̃ Romaãrü ãẽ̱xgacüca̱x dĩẽru ngĩxü̃ jauxgüxü̃. Rü najexmagü ta ga togü ga duü̃xü̃gü ga taxúema nacümamaã taãẽgüxü̃ ga jéma mechawa rütogüxü̃ namaã ga Ngechuchu rü norü ngúexü̃gü. Jerü namu ga jema nawe rüxĩxü̃.
16 Rü jéma najexmagü ta ga nhuxre ga Parichéugü rü ngúexẽẽruü̃gü ga Muĩséarü mugüwa ngu̱xẽẽtaegüxü̃. Rü jexguma nüxü̃ nadaugügu ga jema togümaã na nachibüxü̃ ga Ngechuchu, rü norü ngúexü̃güna nacagü, rü nhanagürügü: —¿Nhuxãcü i perü ngúexẽẽruü̃ rü namaã nachibü i ãẽ̱xgacüarü duü̃xü̃gü i dĩẽruarü jauxwa puracüexü̃ rü duü̃xü̃gü i pecaduã̱xgüxü̃? —nhanagürügü.
17 Rü jexguma jemaxü̃ naxĩnügu ga Ngechuchu rü nhanagürü nüxü̃: —Ngẽma poraexü̃ rü tama nanaxwa̱xe ja duturu, notürü ngẽma iḏaaweexü̃ waxi nixĩ i naxwa̱xexü̃ ja duturu. Chama rü tama mexü̃güna na chaxuxü̃ca̱x nixĩ ga núma chaxũxü̃, notürü núma chaxũ na nüxna chaxuxü̃ca̱x i pecaduã̱xgüxü̃ —nhanagürü.
Ngechuchuna aurechigaca̱x nacagüe
18 Rü wüxi ga ngunexü̃gu rü tama nachibüe jerü Tupanaca̱x naxauree ga Juã́ũ ga baiü̃xẽẽruü̃ãrü ngúexü̃gü rü Parichéugüarü ngúexü̃gü. Rü jemaxü̃ nadaugügu ga nhuxre ga duü̃xü̃gü, rü Ngechuchuxü̃tawa naxĩ rü nüxna najacagüe, rü nhanagürügü: —Ngẽma Juã́ũãrü ngúexü̃gü rü Parichéugüarü ngúexü̃gü rü naxauree. ¿Rü tü̱xcüü̃ i curü ngúexü̃gü i tama naxaureexü̃? —nhanagürügü.
19 Rü Ngechuchu nanangãxü̃ rü nhanagürü nüxü̃: —¿E̱xna wüxi i ngĩgüarü petawa rü pexca̱x namexü̃ na naxaureexü̃ i ngẽma nüxna naxugüxü̃ ega natanüwa nangẽxmagu i ngẽma jatü i ngexwacax ãmaxü̃? Pemaã nüxü̃ chixu rü ngẽxguma natanüwa nangẽxmajane i ngẽma jatü i ngexwacax ãmaxü̃ rü taxucürüwama naxauree i ngẽma nüxna naxugüxü̃.
20 —Notürü wüxi i ngunexü̃ rü ngẽma jatü i ngexwacax ãmaxü̃ rü tá namücügüna nixũgachi. Rü ngẽma ngunexü̃gu tá nixĩ i naxaureexü̃. [Rü chorü ngúexü̃gü rü taxucürüwama naxauree i nhu̱xma erü natanüwa changẽxma. Notürü ínangu tá i ngẽma ngunexü̃ na nüxna chixũgachixü̃, rü ngẽxguma tá nixĩ i naxaureexü̃.]
21 —Rü taxúema wüxi i naxchirutüchi i ngexwacaxü̃xü̃maã tanapaita i wüxi i naxchiru i ṉg̱auxü̃. Erü ngẽxguma nanhaãchimügu i ngẽma natüchi i ngexwacaxü̃xü̃, rü tá nanagáuxẽẽ i ngẽma ṉg̱auxü̃ i naxchiru. Rü noxriarü jexera tá narügáu.
22 —Rü ngẽxgumarüü̃ ta taxúema ngexwacaxü̃cü ja wĩũ rü wüxi i marü ṉg̱auxü̃ i naxchiü̃ i naxcha̱xmünaxca̱xgu tajabacuchi. Erü ngẽxguma ngẽmaãcü naxü̱xgu rü jima wĩũ ja ngexwacaxü̃cü rü narüngu, rü tá najawã̱ĩ̱xẽẽ i ngẽma naxchiü̃ i ṉg̱auxü̃ i naxcha̱xmünaxca̱x. Rü ngẽxma tá inajarüxo ja wĩũ rü naxchiü̃ rü ta. Rü ngẽmaca̱x tanaxwa̱xe ja ngexwacaxü̃cü ja wĩũ rü ngexwacaxü̃xü̃ i naxchiü̃gu tajabacuchi. [Rü chorü ngu̱xẽẽtae i ngexwacaxü̃xü̃ rü ngẽxgumarüü̃ ta nixĩ na taxucürüwama namaã nawüxiguxü̃ i ngẽma nuxcümaü̃xü̃ i pecümagü —nhanagürü ga Ngechuchu.]
Ngechuchuarü ngúexü̃gü rü trigu nibuxetanü ga ngü̃xchigaarü ngunexü̃gu
23 Wüxi ga ngü̃xchigaarü ngunexü̃gu ga Ngechuchu rü norü ngúexü̃gümaã trigunecüwa nachopetü. Rü nümagü ga norü ngúexü̃gü rü inaxĩãcüma inanaxügüe ga trigu na jabuxetanüxü̃.
24 Rü jema Parichéugü rü Ngechuchuna nacagü rü nhanagürügü: —Dücax ¿rü tü̱xcüü̃ i curü ngúexü̃gü rü nanaxügü i ngẽma tama mexü̃ i ngü̃xchigaarü ngunexü̃gu na naxüxü? —nhanagürügü.
25 Notürü nüma ga Ngechuchu rü nhanagürü nüxü̃: —¿Taguma e̱xna poperawa nüxü̃ pedau ga ṯacü na naxüxü̃ ga nuxcümaü̃cü ga ãẽ̱xgacü ga Dawí rü natanüxü̃gü ga jexguma õna nüxü̃́ tau̱xgu rü nataijaegu?
26 Rü jexguma paigüarü ãẽ̱xgacü jixĩgu ga Abiatáru, rü Dawí rü Tupanapatagu naxücu. Rü nanangõ̱x ga jema põũ ga üünexü̃ ga paigüca̱xicatama ixĩxü̃. Rü nüma ga Dawí rü natanüxü̃maã rü ta nangau ga jema põũ —nhanagürü.
27 Rü nhanagürü ta ga Ngechuchu: —Ngẽma ngü̃xchigaarü ngunexü̃ rü duü̃xü̃güca̱x nixĩ ga naxüxü̃. Rü tama ngü̃xchigaarü ngunexü̃ca̱x nixĩ ga naxüxü̃ ga duü̃xü̃gü.
28 —Rü ngẽmaca̱x ja Tupana Nane ja duü̃xü̃xü̃ ixĩcü rü namaã inacua̱x ta i ngü̃xchigaarü ngunexü̃ —nhanagürü.
