Marcu 3:1-35
3 Rü wenaxãrü ngutaque̱xepataü̃gu naxücu ga Ngechuchu. Rü jéma najexma ga wüxi ga jatü ga norü wüxichacüüwa jumécü.
2 Rü jema Parichéugü, rü Ngechuchuxü̃ nangugügü ngoxi tá namexẽẽã ga ngü̃xchigaarü ngunexü̃gu, na jemaãcü nüxü̃́ najexmaxü̃ca̱x ga ṯacüca̱x na ínaxuaxü̃güãxü̃.
3 Rü jexguma ga Ngechuchu rü nhanagürü nüxü̃ ga guma jumécü: —¡Írüda, rü nuxã ngãxü̃tanügu jachi! —nhanagürü.
4 Rü jexguma ga Ngechuchu rü jema togü ga jéma jexmagüxü̃na naca, rü nhanagürü nüxü̃: —¿Ṯacü nixĩ i mexü̃ na naxüxü̃ i ngü̃xchigaarü ngunexü̃gu? ¿Namexü̃ na naxüxü̃ i mexü̃ rü e̱xna chixexü̃? ¿Rü namexü̃ na namaxẽẽxü̃ rü e̱xna jamáxü̃? —nhanagürü. Notürü ga nümagü rü jexma najarüngea̱xgümare.
5 Rü nüma ga Ngechuchu rü nuchametüãcüma nüxü̃ nidaugüãchi ga jema nüxü̃ íchomaẽguãchixü̃. Rü nangechaü̃ jerü tama inaxĩnüẽchaü̃ ga jema duü̃xü̃gü. Rü guma jatüxü̃ nhanagürü: —¡Ijanawe̱xãchixẽẽ ja cuxme̱x! —nhanagürü. Rü jexguma ga guma jatü rü nügü inajarüwe̱xãchime̱xẽxẽẽ. Rü jexgumatama rü narümexme̱x.
6 Notürü jexguma jemaxü̃ nadaugügu ga Parichéugü, rü ínachoxü̃ ga jéma. Rü Eruditanüxü̃maã inanaxügüe ga na naxca̱x nadaugüxü̃ ga nhuxãcü tá na Ngechuchuxü̃ jama̱xgüxü̃.
Naxtaacutüwa Ngechuchuca̱x nangutaque̱xegü ga muxü̃ma ga duü̃xü̃gü
7 Rü Ngechuchu rü norü ngúexü̃gümaã naxtaacutüwa naxũ. Rü muxü̃ma ga duü̃xü̃gü ga Gariréaanecü̱̃ã̱x rü nawe narüxĩ.
8 Rü jexguma nüxü̃ nacuáchigagügu ga guxü̃ma ga jema mexü̃gü ga naxüxü̃ ga Ngechuchu, rü naxca̱x naxĩtaque̱xe ga muxü̃ma ga duü̃xü̃gü ga Judéaanecü̱̃ã̱x, rü Jerucharéü̃cü̱̃ã̱x, rü Iduméããnecü̱̃ã̱x, rü Judã́ũãrü tocutücü̱̃ã̱x rü jema naãne ga Tiru rü Chidã́ũãrü ĩãnegü nawa jexmaxü̃cü̱̃ã̱x.
9 Rü jemaca̱x ga Ngechuchu rü norü ngúexü̃güxü̃ namu na wüxi ja ngue naxca̱x namexẽẽgüxü̃ca̱x na tama jéma jaxũxtügüãxü̃ca̱x ga jema muxü̃ma ga duü̃xü̃gü.
10 Jerü nüma rü nanameẽxẽẽ ga muxü̃ma, rü jemaca̱x guxü̃ma ga jema iḏaaweexü̃ rü naxca̱x naxĩ na nüxü̃ jangõgügüxü̃ca̱x.
11 Rü jexguma jema ṉg̱oxoã̱xgüxü̃ ga duü̃xü̃gü nüxü̃ daugügu, rü nape̱xegu nacaxã́pü̱xügü rü tagaãcü nhanagürügü: —Cuma nixĩ ja Tupana Nane cuiĩxü̃ —nhanagürügü.
12 Notürü nüma ga Ngechuchu rü poraãcü najaxucu̱xẽgü na tama duü̃xü̃gümaã nüxü̃ jaxugüexü̃ca̱x ga nachiga.
Ngechuchu nanade ga 12 ga norü ngúexü̃gü na toxnamana namugüãxü̃ca̱x
13 Rü jemawena ga Ngechuchu rü wüxi ga ma̱xpǘnewa ínaxü̃ãchi. Rü jéma naxca̱x naca ga jema ngúexü̃gü ga nüma nanaxwa̱xexü̃. Rü naxü̃tagu naxĩtaque̱xegü.
14 Rü jematanüwa najadexechi ga 12 ga norü ngúexü̃gü na namücügüxü̃chi jiĩxü̃ca̱x, rü na jamugüãxü̃ca̱x ga norü orearü unagüwa. Rü jemagü rü Imugüxü̃gu nanaxüéga.
15 Rü pora nüxna naxã na Tupanaãrü poramaã ínawoxü̃ãxü̃ca̱x ga ṉg̱oxogü.
16 Rü nhaãgü nixĩ ga naẽ́ga ga jema 12 ga norü ngúexü̃gü ga jadexechixü̃. Rü wüxi nixĩ ga Chimáũ ga Pedrugu naxüégaxü̃.
17 Rü togü nixĩ ga Tiagu rü naẽneẽ ga Juã́ũ. Rü nümagü rü Zebedéu nanegü nixĩ. Rü Ngechuchu rü Boanéregu nanaxüéga. Rü ngẽma nixĩ i Duruanexü̃ Nanegü —nhaxü̃chiga.
18 Rü togü nixĩ ga Ãdré, rü Piripi, rü Baturuméũ, rü Mateu, rü Tumé, rü Tiagu ga Arupéu nane, rü Tadéu, rü Chimáũ ga iporaãẽcüücü.
19 Rü to nixĩ ga Juda ga Icarióti ga jixcama bexma Ngechuchuxü̃ íxuaxü̃xü̃.
“Ngechuchu rü ṉg̱oxoarü poramaã napuracü” nhanagürügü
20 Rü jemawena rü wüxi ga ĩpatagu naxücu ga Ngechuchu. Rü wenaxãrü naxca̱x nangutaque̱xegü ga muxü̃ma ga duü̃xü̃gü. Rü jemaca̱x woo na nachibüexü̃ca̱x rü nangechicagü ga nüma rü norü ngúexü̃gü.
21 Rü jexguma jemaxü̃ taxĩnüẽgu ga guxema natanüxü̃gü ga Ngechuchu, rü ítajadaugü na tajagagüxü̃ca̱x, jerü nüxü̃ tixugügü rü: —Naxãũãẽmare —nhatagürügü.
22 Rü jexgumarüü̃ ta ga jema ngúexẽẽruü̃gü ga Muĩséarü mugüwa ngu̱xẽẽtaegüxü̃ ga Jerucharéü̃wa ne ĩxü̃, rü nhanagürügü: —Nhaã jatü i Ngechuchu, rü ṉg̱oxogünatü i Beuchebúarü poramaã nixĩ i ínawoxü̃ãxü̃ i ṉg̱oxogü —nhanagürügü.
23 Notürü ga Ngechuchu rü naxca̱x naca ga jema ngúexẽẽruü̃gü. Rü wüxi ga cua̱xruü̃xü̃ namaã nixu, rü nhanagürü: —¿Rü nhuxãcü i Chataná i nügütama ínata̱xüchixü̃?
24 —Rü ngẽxguma chi wüxi i nachiü̃ãnecü̱̃ã̱x i duü̃xü̃gü rü nügütanüxü̃watama nügü nadaixgu, rü taxuacüma natai i ngẽma nachiü̃ãne.
25 —Rü ngẽxguma chi wüxi ja ĩpatacü̱̃ã̱x nügü itojegu, rü taxuacüma natai ja jima ĩpata.
26 —Rü ngẽxgumarüü̃ chi ta nixĩ i Chataná ega nügümaã nanuxgu rü nügü jama̱xgu, rü taxuacü chima natai i ngẽxguma. Rü chi ngẽxma nagu̱x.
27 —Rü taxuacüma texé wüxi ja jatü ja poracüpatagu taxücu na nüxna tanapuxü̃xü̃ca̱x i norü ngẽmaxü̃gü, ega tama tajana̱ĩ̱xiragu. Erü ngẽmaãcüxca tá nixĩ i tüxü̃ nanguxü̃xü̃ na tanapuxü̃xü̃ i norü ngẽmaxü̃gü.
28 —Rü aixcuma pemaã nüxü̃ chixu rü Tupana tá nüxü̃́ nüxü̃ nangechaü̃ i duü̃xü̃gü i guxü̃ma i norü pecadugü rü guxü̃ma i ṯacü i chixexü̃ i namaã jadexagüxü̃.
29 —Notürü texé ja chixexü̃ namaã ixugüxe i Tupanaãẽ i Üünexü̃, rü tagutáma tüxü̃́ nüxü̃ nangechaü̃ ja Tupana. Rü guxü̃gutáma chixexü̃wa tüxü̃ nata̱x —nhanagürü.
30 Rü jema nhanagürü ga Ngechuchu, jerü jema ngúexẽẽruü̃gü ga Muĩséarü mugüwa ngu̱xẽẽtaegüxü̃ rü: “Naṉg̱oxoã̱x” nhanagürügü nüxü̃.
Ngechuchuarü mama rü naẽneẽgü rü ítangugü
31 Rü jexgumajane rü ítangugü ga Ngechuchuarü mama rü naẽneẽgü. Notürü ĩpataarü düxétügu tarücho, rü naxca̱x jéma tangemagü.
32 Rü jema duü̃xü̃gü ga Ngechuchuxü̃ íchomaẽguãchixü̃, rü nhanagürügü nüxü̃: —Curü mama rü cueneẽgü rü cueja̱xgü, rü jéa düxétüwa tangẽxmagü, rü cuxca̱x tadaugü —nhanagürügü.
33 Rü nüma nanangãxü̃, rü nhanagürü: —¿Texé tixĩ ja chaue rü chaueneẽgü? —nhanagürü.
34 Rü jema nüxü̃ íchomaẽguãchixü̃xü̃ nidaugüãchi, rü nhanagürü: —Rü daxegü tixĩ ja chaue rü chaueneẽgü.
35 —Erü guxãma ja texé ja naxǘxe i Tupanaãrü ngúchaü̃, rü jíxema tixĩ ja chaueneẽ rü chaueja̱x rü chaue —nhanagürü.
