Marcu 4:1-41
4 Rü wenaxãrü inanaxügü ga Ngechuchu ga na nangúexẽẽãxü̃ ga duü̃xü̃gü ga guma naxtaxaãnacüwa. Rü muxü̃ma ga duü̃xü̃gü jéma naxca̱x nangutaque̱xegü. Rü jemaca̱x düxwa wüxi ga ngue ga jéma naxtaxawa jexmanegu nixüe ga Ngechuchu, rü gumawa narüto. Rü jema duü̃xü̃gü rü naxtaxaãnacügu narücho.
2 4:2-3 Rü jexguma ga Ngechuchu rü inanaxügü ga muxü̃ma ga ore ga cua̱xruü̃wa na nangúexẽẽãxü̃ ga duü̃xü̃gü. Rü norü ngu̱xẽẽtaewa rü nhanagürü: —¡Dücax, iperüxĩnüẽ i nhaã ore! Wüxi ga jatü ga toecü rü triguarü towa naxũ.
3 Nüü̃ nadau 4:2
4 —Rü jexguma triguchiremaã nagüaneãgu, rü nhuxre ga triguchire rü namagu naji. Rü ínangugü ga werigü, rü nanawecu.
5 —Rü náĩgü ga triguchire rü nutatanügu naji ga ngextá ínachicaxü̃wa ga waixü̃mü. Rü paxa narüxügü ga guma triguchire, jerü ga waixü̃mü rü tama najaxcü.
6 —Notürü jexguma nangunagügu ga üa̱xcü, rü ínanagu ga guma trigu rü narüṉẖexgü. Rü najue, jerü tama poraãcü nixãmaxã.
7 —Rü náĩgü ga triguchire rü toranecügu naji. Rü jexguma najaegu ga tora, rü guma triguxü̃ inawocu, rü jemaca̱x tama nixo.
8 —Notürü náĩgü ga triguchire rü mexü̃ ga waixü̃mügu naji. Rü meãma najae, rü muxü̃ma ga trigu nawa ínanguxuchi. Rü nümaxü̃reewa rü 30 pü̱xü ínanguxuchi ga norü o, rü náĩgüwa rü 60, rü náĩgüwa rü 100 —nhanagürü.
9 Rü nhu̱xmachi nhanagürü ta: —Rü jíxema ãchi̱xẽgüxe, ¡rü nüxü̃ taxĩnüẽ i nhaã ore! —nhanagürü.
Ṯacüca̱x nixĩ ga jema ore ga cua̱xruü̃gügu ixuxü̃
10 Rü jemawena ga jexguma nanüxĩca̱xgu ga Ngechuchu, rü jema naxü̃tagugüxü̃ wüxigu namaã ga jema 12 ga norü ngúexü̃gü, rü nüxna nacagüe ga na ṯacüchiga jiĩxü̃ ga jema ore ga cua̱xruü̃gu ixuxü̃.
11 4:11-12 Rü nüma nanangãxü̃ rü nhanagürü nüxü̃: —Tupana rü pexü̃ nüxü̃ nacua̱xẽẽ i ngẽma ẽxü̃guxü̃ i taxuü̃ma i togü nüxü̃ cuáxü̃ na nhuxãcü ãẽ̱xgacü na jiĩxü̃ i nümax. Notürü ngẽma togü i tama tatanüxü̃ ixĩxü̃ca̱x rü cua̱xruü̃gu chajaxuãcüma namaã nüxü̃ chixu i ore na woo nüxü̃ nadaunügu rü nhama tama nüxü̃ nadaugüxü̃rüü̃ na jiĩxü̃ca̱x, rü woo nüxü̃ naxĩnüẽgu rü tama nüxü̃ na nacua̱xgüxü̃ca̱x. Rü ngẽmaãcü namaã nüxü̃ chixu na tama nüxü̃ naxoexü̃ca̱x i nacüma i chixexü̃ rü tama Tupana nüxü̃́ nüxü̃ ngechaü̃xü̃ca̱x i norü pecadugü —nhanagürü.
12 Nüü̃ nadau 4:11
Ngechuchu rü meã nanango̱xẽẽ ga jema ore ga cua̱xruü̃ ga toecüchigagu jaxuxü̃
13 Rü Ngechuchu nhanagürü nüxü̃: —¿Pema rü ta e̱xna tama nüxü̃ pecua̱xgü na ṯacüchiga jiĩxü̃ i ngẽma cua̱xruü̃ i nüxü̃ chixuxü̃? ¿Rü nhuxũcürüwa tá nüxü̃ nacua̱xgü i ngẽma togü?
14 —Rü jíxema toexe, rü jíxema tixĩ ja ore i mexü̃ unagüxe.
15 —Rü nangẽxma i duü̃xü̃gü i guma triguchire ga namagu j̱ixü̃nerüü̃ ixĩgüxü̃. Rü nümagü rü nüxü̃ naxĩnüẽ i ore i mexü̃, notürü jixcama marü nüxü̃ naxĩnüẽguwena, ngẽ́ma nangu i Chataná rü nüxna nanapu i ngẽma ore i mexü̃ ga noxri jaxõgüxü̃.
16 —Rü togü rü ngẽma triguchire ga nutatanügu j̱ixü̃nerüü̃ nixĩgü. Rü ngẽmagü nixĩ i nüxü̃ ĩnüẽxü̃ i ore i mexü̃, rü taãẽãcüma najauxgüxü̃.
17 —Notürü ngẽma na tama aixcuma nagu naxĩnüẽxü̃ i ngẽma ore, rü paxaãchitama najaxõgü. Rü ngẽmaca̱x i jixcama ngẽxguma ngẽma oregagu guxchaxü̃gü nüxü̃ üpetügu rü e̱xna duü̃xü̃gü nachi aiegu, rü nüxü̃ narüxoe i ngẽma ore ga noxri jaxõgüxü̃.
18 4:18-19 —Rü togü rü guma triguchire ga toranecügu j̱ixü̃nerüü̃ nixĩgü. Nümagü rü nüxü̃ naxĩnüẽ i ngẽma ore i mexü̃, notürü nhama i naãneãrü ngẽmaxü̃güca̱x naxoegaãẽgü rü norü dĩẽruguama narüxĩnüẽ, rü nanaxwa̱xegü i nüxü̃́ na nangẽxmaxü̃ i muxü̃ma i to i norü ngẽmaxü̃gü. Rü guxü̃ma i ngẽma rü nüxü̃ nüxü̃ inajarüngümaẽxẽẽ i ngẽma ore i mexü̃ rü nüxü̃ nüxü̃ narüxoexẽẽ na tama naxügüãxü̃ca̱x i ngẽma mexü̃ i Tupana nüxü̃́ naxwa̱xexü̃.
19 Nüü̃ nadau 4:18
20 —Rü togü rü guma triguchire ga mexü̃ ga waixü̃mügu j̱ixü̃nerüü̃ nixĩgü. Ngẽmagü nixĩ i nüxü̃ ĩnüẽxü̃ i ore i mexü̃ rü najauxgüxü̃ rü meã Tupana naxwa̱xexü̃ãcüma maxẽxü̃. Rü nümaxü̃ rü guma trigu ga 30 pü̱xü nawa ínguxuchinerüü̃ nixĩgü. Rü nümaxü̃ rü guma 60 pü̱xü nawa ínguxuchinerüü̃ nixĩgü. Rü nümaxü̃ rü guma 100 pü̱xü nawa ínguxuchinerüü̃ nixĩgü —nhanagürü.
Ore ga cua̱xruü̃ ga omügu ixuxü̃
21 Rü jexgumarüü̃ ta nhanagürü nüxü̃: —¿E̱xna nuã tanange i wüxi i omü na wüxi i caichã́ũtüü̃gu rü e̱xna wüxi i pechicatüü̃gu na jaxücuchixü̃ca̱x? Tama ngẽmaãcü nixĩ, erü wüxi i omü rü dauxnagu tanaxünagü na ngẽ́ma inabaxixü̃ca̱x.
22 —Rü ngẽxgumarüü̃ ta i guxü̃ma i ṯacü iicúxü̃, rü jixcüra rü duü̃xü̃gü rü tá nüxü̃ nacua̱xgüama. Rü guxü̃ma i ngẽma nhu̱xma duü̃xü̃güca̱x ẽxü̃guxü̃ rü tá nango̱xoma i jixcüra.
23 —Rü jíxema ãchi̱xẽgüxe, ¡rü nüxü̃ taxĩnüẽ i ngẽma ore! —nhanagürü.
24 Rü jexgumarüü̃ ta nhanagürü nüxü̃: —¡Meã naga pexĩnüẽ i ngẽma nüxü̃ pexĩnüẽxü̃! Rü ngẽma pema naga na pexĩnüẽxü̃rüü̃ tá nixĩ i Tupana i pexna naxããxü̃ i cua̱x. Rü naẽ́tü tá poraãcü pexü̃ narüngü̃xẽẽ.
25 —Rü pemaã nüxü̃ chixu, rü texé ja aixcuma naga ĩnüxẽ i nhaã ore i mexü̃ rü Tupana rü jexeraãcü tá tüxü̃ nüxü̃ nacua̱xẽẽ. Notürü jíxema tama naga ĩnüxẽ i nhaã ore rü Tupana tá tüxna nanajaxu i ngẽma íraxü̃ i cua̱x i tüxü̃́ ngẽxmachiréxü̃ —nhanagürü.
Ore ga cua̱xruü̃ ga triguchire i rüxüxü̃gu ixuxü̃
26 Rü Ngechuchu rü nhanagürü ta: —Pemaã tá nüxü̃ chixu i wüxi i ore i cua̱xruü̃ na nüxü̃ pecuáxü̃ca̱x na nhuxãcü ãẽ̱xgacü na jiĩxü̃ ja Tupana. Rü wüxi ja jatü rü waixü̃mügu nanato ja triguchire.
27 —Rü nüma ja jatü rü chütacü nape rü moxü̃ãcü ínarüda, rü joxni ja jima triguchire rü narüxü rü nijachigü. Notürü nüma ja jatü rü tama nüxü̃ nacua̱x na nhuxãcü na naxüxü̃ rü na najaxü̃.
28 —Rü ngẽmaãcü i ngẽma waixü̃mü rü nüẽchamatama nanaxüxẽẽ ja jima triguchire. Rü naã́tügüxira narüxü rü jixcama i nachacu rü ngẽmawena nachacuwa nanguxü̃ i norü o.
29 —Rü ngẽxguma marü jadaxgu i ngẽma norü o, rü nanabuxu erü marü nawa nangu i norü buxgü —nhanagürü.
Cua̱xruü̃ ga motachachiregu ixuxü̃
30 Rü nhanagürü ta ga Ngechuchu: —¿Nhuxãcü nixĩ i ãẽ̱xgacü na jiĩxü̃ ja Tupana, rü nananhuxraxü̃ i nüma ãẽ̱xgacü íjiĩxü̃wa? ¿Rü ṯacügu tá tanangu?
31 4:31-32 —Rü wüxi ja motachachire ja waixü̃mügu itoxü̃nerüü̃ nixĩ. Rü woo guxü̃nema ja nanetüchirexü̃ narüxíramaẽ, notürü ngẽxguma inatoxgu, rü narüxü rü naja nhu̱xmata guxü̃ma i togü i nanetüxü̃ najexera. Rü nachacüü rü nita, rü woo werigü rü natanügu nixüachiãü̃ —nhanagürü.
32 Nüü̃ nadau 4:31
Cua̱xruü̃gu ixuxü̃ ga oremaã nidexa ga Ngechuchu
33 Rü jemaãcü ga Ngechuchu rü muxü̃ma ga najexgumaãchiraü̃xü̃ ga cua̱xruü̃gümaã nanangúexẽẽ ga duü̃xü̃gü. Notürü jema cua̱xruü̃gü rü tama jema duü̃xü̃güarü cua̱xü̃ nangupetü.
34 Rü cua̱xruü̃gu ixuxü̃xĩcatama nixĩ ga norü ngu̱xẽẽtae. Rü jixcama ga jexguma nanüxĩca̱xgügu, rü norü ngúexü̃güca̱x meãma nanango̱xẽẽ ga guxü̃ma.
Ngechuchu rü buanecüxü̃ rü juãpexü̃ ínajachaxãchixẽẽ
35 Rü jematama ngunexü̃gu ga marü nachütachaü̃gu, rü Ngechuchu rü nhanagürü nüxü̃ ga norü ngúexü̃gü: —¡Ngĩxã rü naxtaxaarü tocutüwa taxĩ! —nhanagürü.
36 Rü jexguma duü̃xü̃güna jéma inaxĩãchi. Rü norü ngúexü̃gü rü Ngechuchuxü̃ nigagü nagu ga guma ngue ga marü nawa najexmane. Rü jexgumarüü̃ ta ga togü ga duü̃xü̃gü rü náĩgü ga nguegügu ínajaxümücügü.
37 Rü jexguma jaxãü̃jane rü inaxü ga wüxi ga buanecü ga taxüchicü. Rü jema na nataxüchixü̃ ga buanecü, rü guma nguegu nijaxcuchichigü ga juãpe, rü jemaca̱x inabaxü̃güchaü̃.
38 Notürü ga Ngechuchu rü guma nguechinüwa wüxi ga cüxeruü̃gu naca, rü jéma nape. Rü ínanaḇaixgügü, rü nhanagürügü nüxü̃: —Pa Ngúexẽẽruü̃x, ¿e̱xna curü me nixĩ na nuxma ibaxü̃güxü̃? —nhanagürügü.
39 Rü jexguma ínarüda ga Ngechuchu. Rü buanecüna nachogü rü nhanagürü nüxü̃ ga guma naxtaxa: —¡Ijarüchiane rü íjachaxãchi! —nhanagürü. Rü ínajachaxãchi ga buanecü rü guxü̃wama ínachaxanemare.
40 Rü jemawena ga Ngechuchu rü norü ngúexü̃güxü̃ nhanagürü: —¿Tü̱xcüü̃ ngẽmaãcü poraãcü pemuü̃ẽ? ¿Nhu̱xma rü ta e̱xna tama aixcuma pejaxõgü? —nhanagürü.
41 Notürü nümagü ga norü ngúexü̃gü rü poraãcü namuü̃ẽ. Rü nügüna nacagüe rü nhanagürügü: —¿Texe e̱xna nixĩ ja daa rü a̱i̱xrücü ja buanecü rü juãpe rü naga naxĩnüẽxü̃? —nhanagürügü.
