Marcu 5:1-43
5 Rü naxtaxaarü tocutüwa nangugü ga Gadaraanewa.
2 5:2-3 Rü jexguma marü nguewa ínaxüegu ga Ngechuchu, rü jéma naxca̱x nixũ ga wüxi ga jatü ga ṉg̱oxo nawa jexmaxü̃. Rü jema jatü rü duü̃xẽgüchíque̱xewa ne naxũ, jerü jexma nixĩ ga janaxauchigünexü̃xü̃. Rü taxúexü̃ma nanguxü̃ na tajanáĩxü̃, woo curẽtigümaã.
3 Nüü̃ nadau 5:2
4 Rü woo muẽ̱xpü̱xcüna curẽtigümaã najana̱ĩ̱xparagü rü najana̱ĩ̱xchacüügü, notürü nüma rü guxü̃guma íraxü̃gu inanacauü̃güama, rü jemaãcü taxúexü̃ma nanguxü̃.
5 Rü ngunecü rü chütacü rü juetachique̱xetanügu rü naxpü̱xgügu nanaxauchigüane. Rü jexma nanacaeane, rü nutamaã nügügu napogü.
6 Notürü jexguma jaxü̃gutama Ngechuchuxü̃ nada̱xgu, rü naxca̱x inanhaãchi, rü nape̱xegu najacaxã́pü̱xü.
7 Rü aita naxüãcüma nhanagürü nüxü̃: —¿Tü̱xcüü̃ nuã choxü̃ cujachixewe, Pa Ngechuchux, Pa Tupanaxü̃chi Nanex? Rü Tupanaẽ́gagu cuxü̃ chaca̱a̱xü̃ na tama ngúxü̃ choxü̃ cuingexẽẽxü̃ca̱x —nhanagürü.
8 Rü jemaãcü nidexa ga jema ṉg̱oxo jerü Ngechuchu rü marü nhanagürü nüxü̃: —Pa Ṉg̱oxox, ¡ínaxũxü̃ nawa ja jima jatü! —nhanagürü.
9 Rü jexguma ga Ngechuchu rü nüxna naca, rü nhanagürü: —¿Ṯacü nixĩ i cuéga? —nhanagürü. Rü nüma ga ṉg̱oxo nanangãxü̃, rü nhanagürü: —Muxũchixü̃ nixĩ i chauéga, erü tamu i tomax —nhanagürü.
10 Rü poraãcü Ngechuchuxü̃ naca̱a̱xü̃gü na tama ínawoxü̃ãxü̃ca̱x ga jema naãnewa.
11 Rü jema nachicaarü ngaicamana ga naxpü̱xpechinüwa rü najexmagü ga muxü̃ma ga cuchigü ga jéma chibüexü̃.
12 Rü jemaca̱x ga jema ṉg̱oxogü rü Ngechuchuxü̃ naca̱a̱xü̃gü, rü nhanagürügü: —¡Ngẽ́ma cuchitanüwa toxü̃ namugü na nagu tachocuxü̃ca̱x! —nhanagürügü.
13 Rü Ngechuchu rü: —Ngü̃ —nhanagürü. Rü jexguma ga jema ṉg̱oxogü rü guma jatüwa ínachoxü̃, rü jema cuchigügu najachocu. Rü jema cuchigü ga maneca 2000 ixĩgüxü̃ rü inaxü̃ãchi, rü naxtaxacutüarü ma̱xpǘxü̃wa najarüjuxgü. Rü jexma naji.
14 Rü jema cuchigüarü daruü̃gü rü ĩãnewa nabuxmü. Rü ĩãnewa rü jema ĩãneãrü ngaicamana ipeagüxü̃ ga duü̃xü̃gütanüwa nüxü̃ najarüxugügü ga jema üpetüxü̃. Rü ga duü̃xü̃gü rü ínajadaugü.
15 Rü jexguma Ngechuchu íjexmaxü̃wa nangugügu, rü jéma nüxü̃ nadaugü ga guma jatü ga ṉg̱oxoã̱xchirécü. Rü jéma narüto, rü naxãxchiru, rü meãma naãẽxü̃ nacua̱x. Rü poraãcü naḇaixãchiãẽgü ga duü̃xü̃gü.
16 Rü jema cuchigüarü daruü̃gü ga nüxü̃ daugüxü̃ ga ṯacü na nüxü̃ ngupetüxü̃ ga guma jatü ga ṉg̱oxoã̱xchirécü rü ṯacü nüxü̃ na ngupetüxü̃ ga jema cuchigü, rü jema nixĩ ga togü ga duü̃xü̃gümaã nüxü̃ ixugüexü̃ ga guxü̃ma ga jema ngupetüxü̃.
17 Rü jexguma jemaxü̃ naxĩnüẽgu ga duü̃xü̃gü, rü inanaxügüe ga Ngechuchuxü̃ na naca̱a̱xü̃güxü̃ ga na ínaxũxü̃xü̃ca̱x ga jema naãnewa.
18 Rü jexguma wenaxãrü nguegu jaxüegu ga Ngechuchu, rü guma jatü ga ṉg̱oxoã̱xchirécü, rü nüxü̃ naca̱a̱xü̃ na Ngechuchuwe naxũxü̃ca̱x.
19 Notürü ga Ngechuchu rü tama nanaxwa̱xe, rü nhanagürü nüxü̃: —¡Cuchiü̃wa naxũ rü cutanüxü̃maã nüxü̃ jarüxu i guxü̃ma i ngẽma cuxca̱x naxüxü̃ ja Cori ja Tupana, rü nhuxãcü nüxü̃́ na cungechaü̃tümüü̃xü̃! —nhanagürü.
20 Rü nüma ga guma jatü rü ínixũ. Rü inanaxügü ga guxü̃ma ga Decaporíchiuanewa jexmagüne ga ĩãnegüwa nüxü̃ na jaxuxü̃ ga jema Ngechuchu naxca̱x üxü̃. Rü guxü̃ma ga duü̃xü̃gü rü naḇaixãchiãẽgü.
Jáiruxacüchiga rü jema nge ga Ngechuchuchirugu ingõgücüchiga
21 Rü jexguma nguegu naxtaxaarü tocutüwa nataegugu ga Ngechuchu, rü muxü̃ma ga duü̃xü̃gü rü naxca̱x jéma nangutaque̱xegü. Rü nüma rü naxtaapechinüwa najexma.
22 Rü jexguma jéma najexmajane, rü jéma naxü̃tawa nangu ga ngutaque̱xepataü̃ãrü ãẽ̱xgacü ga Jáirugu ãẽ́gacü. Rü jexguma Ngechuchuxü̃ nada̱xgu, rü nape̱xegu nanangücuchi.
23 Rü poraãcü nüxü̃ naca̱a̱xü̃, rü nhanagürü nüxü̃: —Chauxacü rü ituraxü̃chi. Rü chanaxwa̱xe i ngẽ́ma cuxũ na ngĩxü̃ cujarüngõgüxü̃ca̱x na ngĩxca̱x jataanexü̃ca̱x rü namaxü̃xü̃ca̱x —nhanagürü.
24 Rü jexguma ga Ngechuchu rü nawe narüxũ. Rü muxü̃ma ga duü̃xü̃gü ínajaxümücügü. Rü jéma najaxãũxtügü.
25 Rü jema muxü̃ ga duü̃xü̃gütanüwa ijexma ga wüxi ga nge ga 12 ga taunecü iḏaawecü namaã ga na naxãgüechaxü̃.
26 Rü muxü̃ma ga duturugü ngĩxü̃ naxüxü̃gü rü poraãcü ngúxü̃ ngĩxü̃ ningexẽẽgü. Rü jemaãcü notüca̱xma ngĩxü̃ igu̱xẽẽ ga gu̱xcü ga ngĩrü dĩẽru. Notürü tama ngĩxca̱x nitaaneẽ́ga, rü nijexeraguchigüama ga ngĩrü ḏaawe.
27 Rü ü̃paacü togüa̱xwa Ngechuchuchigaxü̃ ixĩnü. Rü jemaca̱x jéma ixũ. Rü natanüwa ga jema muxü̃ma ga duü̃xü̃gü rü Ngechuchuweama ne ixũ rü naxchirugu ijangõgü.
28 Jerü nhaxü̃gu irüxĩnü: —Ngẽxguma chi naxchiruxü̃mare chingõgügu, rü chi chauxca̱x nitaane —nhaxü̃gu iruxĩnü.
29 Rü jexgumatama ínajachaxãchi ga ngĩgü, rü nüxü̃ ijacua̱xãchi ga ngĩxĩnewa ga marü na namexü̃ ga jema na jaḏaawexü̃.
30 Notürü ga Ngechuchu rü nüxü̃ nicua̱xãchi ga na nawa ínaxũxü̃xü̃ ga pora. Rü naxca̱x nadauegu ga jema muxü̃ma ga duü̃xü̃gü, rü nüxna naca, rü nhanagürü: —¿Texé tixĩ ja chauxchirugu ingõgüxe? —nhanagürü.
31 Rü norü ngúexü̃gü nanangãxü̃gü, rü nhanagürügü: —Cuma nüxü̃ cudau i nhuxre i duü̃xü̃gü ngẽ́ma cuxü̃ na jaxãũtügüxü̃ rü ngẽxguma rü ta:
“¿Texé ja choxü̃ ingõgüxe?” nhacuxü̃ —nhanagürügü.
32 Notürü ga Ngechuchu rü nüxü̃ nidaugüãchiama na tüxü̃ nadauxü̃ca̱x ga na texé na tiĩxü̃ ga guxema nüxü̃ ingõgüxe.
33 Rü jexguma ga jema nge rü ngĩrü muü̃maã jadu̱ru̱xãcüma naxü̃tawa ingu, jerü nüxü̃ icua̱x ga ṯacü na ngĩxü̃ ngupetüxü̃. Rü nape̱xegu ijacaxã́pü̱xü, rü aixcumaxü̃chi namaã nüxü̃ ijaxu ga guxü̃ma.
34 Rü nüma ga Ngechuchu rü nhanagürü ngĩxü̃: —Pa Chauxacüx, curüme erü cujaxõ. ¡Rü taãẽãcüma íixũ, erü marü naxüxü̃ i curü ḏaawe! —nhanagürü.
35 Rü jexguma íjadexajane, jéma nangugü ga nhuxre ga natanüxü̃gü ga guma ngutaque̱xepataü̃ãrü ãẽ̱xgacü rü nhanagürügü nüxü̃: —Cuxacü rü marü iju. ¿Tü̱xcüü̃ nüxü̃ cuchixeweecha ja Ngúexẽẽruü̃? —nhanagürügü.
36 Notürü ga Ngechuchu rü tama nüxü̃ nacuáxchaü̃ ga jema duü̃xü̃güarü dexa. Rü jemaca̱x guma ngutaque̱xepataü̃ãrü ãẽ̱xgacüxü̃ nhanagürü: —¡Tãṹ i cumuü̃xü̃, rü jaxõmare! —nhanagürü.
37 Rü jexguma ga Ngechuchu rü ínajagagü ga Pedru rü Tiagu rü Juã́ũ ga Tiagueneẽ. Notürü tama nanaxwa̱xe na texé ga togue nawe rüxĩxü̃.
38 Rü jexguma guma ngutaque̱xepataü̃ãrü ãẽ̱xgacüpatawa nangugügu, rü Ngechuchu nüxü̃ nadau ga na íjacuxcuxü̃ rü poraãcü aita naxüeãcüma na naxauxexü̃ ga duü̃xü̃gü.
39 Rü guma ĩpatagu naxücu ga Ngechuchu, rü nhanagürü: —¿Tü̱xcüü̃ ípecuxcu rü ngẽmaãcü pexauxe? Ngẽma bucü rü tama iju. Rü ipemare —nhanagürü.
40 Rü nüxü̃ nacugüecüraxü̃ãma ga duü̃xü̃gü. Notürü nüma ga Ngechuchu rü ĩã̱xtüwa nanamugü ga guxü̃ma. Rü naxca̱x naca ga jema bucü ngĩnatü, rü ngĩẽ, rü jema namücügü, rü namaã nixücu ga ínajexmaxü̃wa ga jema bucü.
41 Rü ngĩxme̱xgu najajauxãchi, rü nhanagürü ngĩxü̃: —Tarita cumi —nhanagürü. Rü ngẽma ore rü nhaxü̃chiga nixĩ:
“¡Inachi, Pa Bucü, nhacharügü cuxü̃!” nhaxü̃chiga nixĩ.
42 Rü jexgumatama ga jema bucü ga 12 ga taunecü ngĩxü̃́ jexma̱xcü, rü íirüda rü ijaxũ. Rü poraãcü naḇaixãchiãẽgü ga duü̃xü̃gü.
43 Notürü ga Ngechuchu rü poraãcü nüxna nanachu̱xu na taxúemaãma nüxü̃ jaxugüexü̃ca̱x ga jema ngupetüxü̃. Rü nhu̱xmachi nanamu na ngĩxü̃ naxüwemügüxü̃ca̱x ga jema bucü.
