Marcu 7:1-37
7 Rü Ngechuchuca̱x naxĩ ga Parichéugü namaã ga nhuxre ga ngúexẽẽruü̃gü ga mugüwa ngu̱xẽẽtaegüxü̃ ga Jerucharéü̃wa ne ĩxü̃.
2 Rü jexguma nhuxre ga Ngechuchuarü ngúexü̃güxü̃ nadaugügu ga tama Judéugücüma na janguxẽẽgüxü̃, rü tama jema Judéugürüü̃ Tupanaca̱x najaxme̱xgüxü̃ naxü̃pa na nachibüexü̃, rü chixri nachiga nidexagü.
3 Jerü nümagü ga Parichéugü rü guxü̃ma ga togü ga Judéugü rü nagu naxĩ ga norü o̱xigücüma na najaxme̱xiraxü̃ na jemaãcü Tupanape̱xewa nügü jamexẽẽgüxü̃ naxü̃pa ga na nachibüexü̃.
4 Rü ngẽxguma taxepataü̃wa ne naxĩxgu ga nümagü rü tama nachibüe ega tama ngẽmaãcü nügü najaxme̱xiragu. Rü nangẽxma i muxü̃ma i togü i nuxcümaü̃xü̃ i nacümagü. Rü ngẽmaca̱x nagu naxĩ i ngẽma nacümagü na Tupanaca̱x najauxgüãxü̃ i norü copugü rü jarugü rü paneragü rü pechicaxü̃gü.
5 Rü jemaca̱x ga jema Parichéugü rü ngúexẽẽruü̃gü rü Ngechuchuna nacagü, rü nhanagürügü: —¿Tü̱xcüü̃ i curü ngúexü̃gü i tama nagu naxĩxü̃ i ngẽma tórü o̱xigücüma rü tama toma tajaxme̱xgüxü̃rüü̃ najaxme̱xgüxü̃ naxü̃pa na nachibüexü̃? —nhanagürügü.
6 Notürü Ngechuchu nanangãxü̃ rü nhanagürü: —Pa Duü̃xü̃gü ja Pegü Naxaixcumaraü̃güxe, rü aixcuma pechiga nixĩ ga jema ore ga nuxcümaü̃cü ga Tupanaãrü orearü uruü̃ ga Ichaía ümatüxü̃ ga nhaxü̃:“Nhaã duü̃xü̃gü rü naã̱xmaãmare choxü̃ nicua̱xüü̃gü, notürü naãẽwa rü tama chagu narüxĩnüẽ.
7 Rü taxuwama name na ngẽmaãcü notüca̱xma choxü̃ jacua̱xüü̃güxü̃. Erü guxü̃ma i ngẽma norü ngu̱xẽẽtae rü jatügüarü mugümare nixĩ, rü tama aixcuma chorü mu nixĩ”,
nhaxü̃.
8 —Rü pema i nhu̱xma rü aixcuma nüxü̃ perüxoe i Tupanaãrü mugü na nagu pexĩxü̃ca̱x i ngẽma duü̃xü̃gücümamare ixĩxü̃ —nhanagürü.
9 Rü jexgumarüü̃ ta nhanagürü nüxü̃: —Pema rü penangexrü i Tupanaãrü mugü na pecümagügutama pexĩxü̃ca̱x.
10 —Jerü ga Muĩsé rü nhanagürü:“¡Tüxü̃ nangechaü̃ ja cunatü rü cue!”
nhanagürü. Rü nhanagürü ta:“Texé ja tümanatümaã rü e̱xna tümaẽmaã chixexü̃ ixugüxe, rü ãẽ̱xgacü tá tümamaã nanaxuegu na tajuxü̃ca̱x”,
nhanagürü.
11 —Notürü pema rü nhaperügügü:
“Marü name ega wüxi ja jatü nanatüxü̃ rü naẽxü̃ nhaxgu: ‘Taxucürüwama chorü ngẽmaxü̃maã cuxü̃ charüngü̃xẽẽ, erü guxü̃ma i chorü ngẽmaxü̃ rü marü Tupanana chanaxã’,” nhaxgu.
12 —Rü ngẽxguma texé ngẽma nhagügu, rü pexca̱x rü marü namexü̃ na tama tümanatüxü̃ rü tümaẽxü̃ tarüngü̃xẽẽxü̃.
13 —Rü ngẽmaãcü ipejanaxoxẽẽ i Tupanaãrü mugü, na nagu pexĩxü̃ca̱x i pecümagütama i togüwa pexüexẽẽxü̃. Rü ngẽxgumarüü̃ ta muxü̃ma i to i pecümagü i ngẽmarüü̃ ixĩxü̃gu pexĩ —nhanagürü.
14 Rü jexgumawena duü̃xü̃güca̱x naca ga Ngechuchu, rü nhanagürü nüxü̃: —¡Meã choxü̃́ iperüxĩnüẽ, rü nüxü̃ pecuá i nhaã chorü ore!
15 —Rü taxuü̃ma i ṯacü i düxétüwa ne ũxü̃ rü taa̱xwa ixücuxü̃ nixĩ i Tupanape̱xewa tüxü̃ chixexẽẽxü̃. Notürü ngẽma taãẽwa ne ũxü̃, rü ngẽma waxi nixĩ i tüxü̃ chixexẽẽxü̃ i Tupanape̱xewa.
16 —Rü ngẽxguma peixãchi̱xẽgu, ¡rü nüxü̃ pexĩnüẽ i ngẽma ore! —nhanagürü.
17 Rü jexguma Ngechuchu duü̃xü̃güna ixũgachigu rü ĩpatagu naxücuxgu, rü norü ngúexü̃gü nüxna nacagü nachiga ga jema ngu̱xẽẽtae.
18 Rü nüma rü nhanagürü nüxü̃: —¿Pema rü ta e̱xna tama nüxü̃ pecua̱xéga i ngẽma? ¿E̱xna tama i nüxü̃ pecuáxü̃ na taxuü̃ma i ṯacü i düxétüwa ne ũxü̃ rü taa̱xwa ixücuxü̃ jiĩxü̃ i Tupanape̱xewa tüxü̃ chixexẽẽxü̃?
19 —Erü guxü̃ma i ngẽma düxétüwa ne ũxü̃ rü taa̱xwa ixücuxü̃, rü tama taãẽwa nangu. Notürü taanüwa naxũmare na jixcama taxünewa ínaxũxü̃xü̃ca̱x —nhanagürü. Rü jemaãcü nüxü̃ nixu na guxü̃ma i õna rü namexü̃ na nangṍxü̃.
20 Rü jexgumarüü̃ ta nhanagürü: —Rü ngẽma duü̃xü̃ãẽwa ne ũxü̃, rü ngẽma waxi nixĩ i Tupanape̱xewa nachixexẽẽxü̃.
21 7:21-22 —Erü norü aixepewa i naãẽwa nixĩ i ne naxũxü̃ i muxü̃ma i chixexü̃gü. Rü ngẽma nixĩ i chixexü̃gu na naxĩnüxü̃, rü naxü̃neãrü ngúchaü̃we na naxũxü̃, rü na nangĩ́xü̃, rü na namáẽtaxü̃, rü naĩ i ngemaã na inapexü̃, rü togüarü ngẽmaxü̃ na nüxü̃́ nanguchaü̃xü̃, rü chixexü̃ na naxüxü̃, rü na jadorata̱xáxü̃, rü chixexü̃ i nacümagügu na naxã́ũxü̃, rü na jaxauxãchiwa̱xexü̃, rü na naxoregüta̱xáxü̃, rü nügü na jacua̱xüü̃xü̃, rü tama meã naãẽxü̃ na nacuáxü̃.
22 Nüü̃ nadau 7:21
23 —Rü guxü̃ma i ngẽma chixexü̃gü rü duü̃xü̃ãrü aixepewa nixĩ i ne naxĩxü̃, rü ngẽma nixĩ i Tupanape̱xewa nachixexẽẽxü̃ —nhanagürü.
Wüxi ga ngecü ga to ga nachiü̃ãnecü̱̃ã̱x ga Ngechuchuaxü̃́ jaxõcüchiga
24 Rü jemawena rü ĩãne ga Tiru nawa jexmaxü̃ ga naãnewa naxũ ga Ngechuchu. Rü jéma wüxi ga ĩpatawa nangu, notürü tama nanaxwa̱xe na texé nüxü̃ cuáxü̃ ga jéma na nanguxü̃. Notürü taxuacüma nügü inicu̱x.
25 Rü paxama nüxü̃ icuáchiga ga wüxi ga nge ga ngĩxãcüwa ṉg̱oxo jexma̱xcü. Rü jéma ixũ, rü Ngechuchupe̱xegu ijacaxã́pü̱xü.
26 Rü jema nge rü to ga nachiü̃ãnecü̱̃ã̱x ga Chiropeníchiucü̱̃ã̱x ijixĩ. Rü Ngechuchuca̱x ijaxũ, rü nüxü̃ ica̱a̱xü̃ na ngĩxãcüwa ínata̱xüchiãxü̃ca̱x ga jema ṉg̱oxo.
27 Notürü ga Ngechuchu rü nhanagürü ngĩxü̃: —Name nixĩ i taxacügüxü̃xĩra tachibüexẽẽ. Erü tama name i taxacügüna tanajaxu i norü õna na airugüna naxãxü̃ca̱x —nhanagürü. [Rü jema nhanagürü jerü nümagü ga Judéugü rü nügü nixugüe na Tupanaxãcügüxüchi jixĩgüxü̃ rü jema togü rü nhama airugürüü̃ na jixĩgüxü̃.]
28 Notürü ngĩma ga jema nge rü inangãxü̃, rü ngĩgürügü: —Aixcuma nixĩ i curü ore, Pa Corix, notürü woo airugü rü ta nanangõ̱x i ngẽma õnatüchi i mechatüü̃gu najixẽẽxü̃ i ngẽma ĩpataarü joraxacügü —ngĩgürügü.
29 Rü jexguma ga Ngechuchu rü nhanagürü ngĩxü̃: —Aixcuma name nixĩ i ngẽma nüxü̃ cuixuxü̃. Rü marü name i cutaegu, erü ngẽma ṉg̱oxo rü marü ínaxũxũ ngĩwa i cuxacü —nhanagürü.
30 Rü jexguma ngĩpatawa nanguxgu ga jema ngecü, rü jéma ngĩrü ngürücarewa ngĩxü̃ ijanguéü̃ ga ngĩrü bucü. Notürü marü ngĩxna ínaxũxũ ga jema ṉg̱oxo.
Ngechuchu nanamexẽẽ ga wüxi ga jatü ga ngauchi̱xẽcü rü moxü̃cü
31 Rü Tiruanewa nataegu ga Ngechuchu. Rü Chidã́ũãrü ĩãnewa naxüpetü, rü nhu̱xmachi Decaporíchiuaneãrü ĩãnegüwa rü ta naxüpetü rü nhu̱xmata Gariréaaneãrü naxtaawa nangu.
32 Rü jéma naxü̃tawa nanagagü ga wüxi ga jatü ga ngauchi̱xẽcü rü moxü̃cü, rü nüxna naxca̱x nacagü ga nüxü̃ na jangõgüxü̃ca̱x.
33 Rü jexguma ga Ngechuchu rü noxrüwama duü̃xü̃güna nanaga. Rü naxmachi̱xẽgu nixuxme̱x, rü naxbü̱xágümaã nügü jawaixme̱xẽẽãcüma norü conügu ningõgü.
34 Rü jemawena rü dauxü̃ nadawenüãcüma jaxna narüngü̃, rü guma jatüxü̃ nhanagürü: —Epéta —nhanagürü. Rü ngẽma rü: “¡Ingoxna!” nhaxü̃chiga nixĩ.
35 Rü jexgumatama ningo̱xnamachi̱xẽ ga guma ngauchi̱xẽcü, rü norü conü rü marü narüme rü meã nidexa.
36 Rü Ngechuchu rü duü̃xü̃güxü̃ namu na taxúemaãma nüxü̃ jaxugüexü̃ca̱x. Notürü jexguma jexeraãcü duü̃xü̃güna nachúxãgu ga na taxúemaãma nüxü̃ jaxugüexü̃ca̱x ga nachiga rü jexeraãcü nüxü̃ nixugüeama.
37 Rü poraãcü naḇaixãchiãẽgü ga duü̃xü̃gü, rü nhanagürügü: —Meãma nanaxü i guxü̃ma rü woo ngauchi̱xẽgüxü̃ rü najango̱xnamachi̱xẽgüxẽẽ, rü ngea̱xgüxü̃ rü najadexagüxẽẽ —nhanagürügü.
