Marcu 8:1-38
8 Rü wüxi ga ngunexü̃gu wenaxãrü naxca̱x naxĩtaque̱xe ga muxü̃ma ga duü̃xü̃gü, rü nüxü̃́ nataxuma ga norü õnagü. Rü Ngechuchu rü norü ngúexü̃güca̱x naca, rü nhanagürü nüxü̃:
2 —Choxü̃́ nangechaü̃tümüü̃gü i nhaã duü̃xü̃gü, erü marü tamaẽ̱xpü̱x i ngunexü̃ nuã chauxü̃tawa nangẽxmagü, rü nüxü̃́ nataxuma i norü õna.
3 —Rü ngẽxguma chi ngẽmaãcümare íchajamugügu, rü chi ngürüãchi namagu tá najaturae, erü nümaxü̃gü rü jaxü̃wama ne naxĩ —nhanagürü.
4 Rü norü ngúexü̃gü rü nanangãxü̃gü, rü nhanagürügü: —¿Notürü nhuxãcü tá tanachibüexẽẽ i núma i ngextá taxúema íxãpataxü̃wa? —nhanagürügü.
5 Rü Ngechuchu nüxna naca, rü nhanagürü: —¿Nhuxre i põũ pexü̃́ nangẽxma i pemax? —nhanagürü. Rü nümagü nanangãxü̃gü, rü nhanagürügü: —Toxü̃́ nangẽxma i 7 i põũ —nhanagürügü.
6 Rü nhu̱xmachi ga Ngechuchu rü duü̃xü̃güxü̃ namu na nhaxtüanewa natogüxü̃ca̱x. Rü nanade ga jema 7 ga põũ, rü Tupanana moxẽ naxã. Rü nhu̱xmachi inanabücu, rü norü ngúexü̃güna nanana. Rü nümagü rü duü̃xü̃güxü̃ najanu.
7 Rü nüxü̃́ najexma ta ga nhuxre ga choxnixãcügü. Rü Ngechuchu rü Tupanana moxẽ naxã, rü nhu̱xmachi norü ngúexü̃güxü̃ namu na ijanuãxü̃ca̱x.
8 Rü guxü̃ma ga jema duü̃xü̃gü rü meãma nachibüe nhu̱xmata meã nüxü̃́ jangu. Rü jexguma rü ta 7 ga pexchi nanapagü namaã ga jema íjaxügüxü̃.
9 Rü jema duü̃xü̃gü ga jéma chibüexü̃ rü maneca 4000 nixĩ. Rü jemawena ga Ngechuchu rü duü̃xü̃güxü̃ ínimugü.
10 Rü nhu̱xmachi wüxi ga nguegu nixüe namaã ga norü ngúexü̃gü, rü Damanútaanewa naxũ.
Parichéugü naxca̱x ínacagü ga wüxi ga cua̱xruü̃ ga Tupanaãrü poramaã üxü̃
11 Rü Ngechuchuxü̃tawa nangugü ga Parichéugü, rü inanaxügüe ga na namaã japoragatanücüüxü̃. Rü nüxna nacagüe na nüxü̃ nüxü̃ nadauxẽẽxü̃ca̱x ga wüxi ga cua̱xruü̃ ga Tupanaãrü poramaã naxüxü̃, na jemaãcü nüxü̃ naxügüxü̃ca̱x, rü nüxü̃ nacua̱xgüxü̃ca̱x ngoxi aixcuma Tupana Nane jiĩxü̃.
12 Rü Ngechuchu rü poraãcü jaxna narüngü̃, rü nhanagürü: —¿Tü̱xcüü̃ i nhaã duü̃xü̃gü naxca̱x ínacagü i wüxi i cua̱xruü̃ i Tupanaãrü poramaã üxü̃? Rü aixcuma pemaã nüxü̃ chixu rü bai i wüxi i cua̱xruü̃ tá nüxü̃ chawe̱x —nhanagürü.
13 Rü jema nhaxguwena, rü nüxna jéma nixũ ga jema duü̃xü̃gü. Rü wenaxãrü nguegu nixüe rü naxtaxaarü tocutüwa naxũ.
Parichéuarü põũãrü puxẽẽruü̃chiga
14 Notürü ga norü ngúexü̃gü rü nüxü̃ inajarüngümaẽ ga norü õna na íjangegüxü̃, rü wüxixicatama ga põũ nüxü̃́ najexma ga nguewa.
15 Rü jexguma ga Ngechuchu rü najaxucu̱xẽgü, rü nhanagürü nüxü̃: —¡Dücax, pexuãẽgj naxca̱x i Parichéugüarü põü̃ãrü puxẽẽruü̃ rü Erudiarü põũãrü puxẽẽruü̃! —nhanagürü.
16 Rü jema norü ngúexü̃gü rü inanaxügüe na nügümaã nhagüxü̃: —Ngẽma nhanagürü tüxü̃ erü tama tawemü ta ítingegü —nhanagürügü.
17 Notürü ga Ngechuchu rü nüxü̃ nacua̱xama na jema nhagüxü̃, rü jemaca̱x nhanagürü nüxü̃: —¿Tü̱xcüü̃ “Tangearü õnaã̱x”, nhaperügügü? ¿E̱xna nhu̱xma rü ta tama nüxü̃ pecua̱xgüéga rü tama nüxü̃ peicua̱xãchitanü i ngẽmachiga? ¿E̱xna pexca̱x naxẽ i ngẽma?
18 Pema rü peixãxẽtügüchire̱x, ¿rü nhuxãcü i tama nüxü̃ pedauxü̃? Rü pexãxmachi̱xẽgüchire̱x, ¿rü nhuxãcü i tama nüxü̃ pexĩnüẽxü̃? ¿Rü e̱xna tama nüxna pecua̱xãchie ga jexguma chajamuxẽẽgu ga jema põũ rü choxni?
19 —Rü jexguma jema 5000 ga duü̃xü̃güxü̃ chajanuxgu ga jema wüxime̱ẽ̱xpü̱x ga põũ, ¿rü nhuxre ga pexchigü jiĩxü̃ ga napagücü ga jexguma penadexgu ga jema íjaxügüxü̃? —nhanagürü. Rü nümagü nanangãxü̃gü rü nhanagürügü: —Rü 12 ga pexchigü —nhanagürügü.
20 Rü nhu̱xmachi nhanagürü ta ga Ngechuchu: —Rü jexguma jema 4000 ga duü̃xü̃güxü̃ chajanuxgu ga jema 7 ga põũ, ¿rü nhuxre ga pexchigü jiĩxü̃ ga napagücü ga jexguma penadexgu ga jema íjaxügüxü̃? —nhanagürü. Rü nanangãxü̃gü rü nhanagürügü: —7 ga pexchigü —nhanagürügü.
21 Rü jexguma rü nhanagürü nüxü̃: —¿Rü nhu̱xma rü ta taũtama nüxü̃ pecua̱xgüégaxü̃ na Parichéugücüma rü Erudicüma i chixexü̃chiga jiĩxü̃ i ngẽma põũãrü puxẽẽruü̃gu pemaã chixuxü̃? —nhanagürü.
Ngechuchu rü Bechaídawa nanamexẽẽ ga wüxi ga ngexetücü
22 Rü jemawena rü Bechaídaarü ĩãnewa nangugü. Rü jéma Ngechuchuxü̃tawa nanagagü ga wüxi ga ngexetücü. Rü nüxü̃ naca̱a̱xü̃gü na nüxü̃ jangõgüxü̃ca̱x.
23 Rü Ngechuchu rü guma ngexetücüme̱xẽgu najajauxãchi, rü ĩãneãrü jéamaxü̃ra nanaga. Rü jéma naxbü̱xágümaã najawaixetüxẽẽ, rü nhu̱xmachi naxẽtügu ningõgü, rü nüxna naca ngoxi marü ṯacüxü̃ nadau.
24 Rü jexguma ga guma ngexetücü rü inanaxügü ga na jadauchixü̃. Rü nhanagürü: —Nüxü̃ chadau i duü̃xü̃gü i nhama naĩgü i ixĩxü̃nerüü̃ ixĩgüxü̃ —nhanagürü.
25 Rü jexguma ga Ngechuchu rü wenaxãrü naxẽtügu ningõgü. Rü nüma ga guma jatü rü meãma inadawenü. Rü jemaãcü naxca̱x nitaane rü meãma naxca̱x nango̱x ga guxü̃ma.
26 Rü jemawena ga Ngechuchu rü napatawa nanamu. Rü namaã nüxü̃ nixu na tama ĩãneca̱x nataeguxü̃.
Pedru nanango̱xẽẽ na Tupana nüxü̃ unetacü ga ãẽ̱xgacü na jiĩxü̃ ga Ngechuchu
27 Rü jemawena rü Checharéa ga Piripuanewa jexmane ga ĩãnexãcügüwa naxũ ga Ngechuchu norü ngúexü̃gümaã. Rü namawa rü Ngechuchu rü norü ngúexü̃güna naca, rü nhanagürü nüxü̃: —¿Nhuxũ nhagüxü̃ i duü̃xü̃gü i chauchiga na texé chiĩxü̃ i chamax? —nhanagürü.
28 Rü norü ngúexü̃ nanangãxü̃gü rü nhanagürügü: —Nangẽxma i duü̃xü̃gü rü:
“Juã́ũ ja baiü̃xẽẽruü̃ cuixĩ”, nhagüxü̃, rü togü i:
“Ería cuixĩ”, nhagüxü̃, rü togü rü:
“Wüxi ga nuxcümaü̃cü ga Tupanaãrü orearü uruü̃ cuixĩ”, nhagüxü̃ —nhanagürügü.
29 Rü jexguma Ngechuchu rü nüxna naca rü nhanagürü: —¿Rü pema i nhuxũ nhapegügüxü̃ choxü̃ na texé chiĩxü̃? —nhanagürü. Rü Pedru nanangãxü̃ rü nhanagürü: —Cuma nixĩ i Cristu i Tupana cuxü̃ unetacü cuiĩxü̃ —nhanagürü.
30 Rü jexguma ga Ngechuchu rü norü ngúexü̃güxü̃ namu na taxúemaãma nüxü̃ jaxugüexü̃ca̱x ga jema ore ga nachiga.
Ngechuchu nanaxunagü ga norü juchiga
31 Rü jemawena rü Ngechuchu inanaxügü ga norü ngúexü̃gümaã nüxü̃ na jaxuxü̃ ga ṯacü tá nüxü̃ na üpetüxü̃. Rü nhanagürü nüxü̃: —Chama i Tupana Nane na duü̃xü̃xü̃ chiĩxü̃, rü poraãcü ngúxü̃ tá chinge. Rü choxü̃ tá naxoxgü i Judéugüarü ãẽ̱xgacügü i jaguã̱xgü, rü paigüarü ãẽ̱xgacügü, rü ngẽma ngúexẽẽruü̃gü i Muĩséarü mugüwa ngu̱xẽẽtaegüxü̃. Rü tá choxü̃ nima̱xgü, notürü tamaẽ̱xpü̱x i ngunexü̃gu rü wena táxarü chamaxü̃ —nhanagürü.
32 Rü jema ore rü meãma namaã nanango̱xẽẽ. Notürü jexguma ga Pedru rü nüxĩca noxrüwama Ngechuchuxü̃ naga, rü inanaxügü ga na naxucu̱xẽãxü̃ na tama jemaãcü jadexaxü̃ca̱x.
33 Notürü ga Ngechuchu rü nadauegu, rü norü ngúexü̃güxü̃ nadawenü. Rü Pedruxü̃ nanga, rü nhanagürü: —¡Choxna ixũgachi, Pa Chatanáx! Cuma rü tama Tupana nagu rüxĩnüxü̃gu curüxĩnü, erü jatügü nagu rüxĩnüxü̃gumare nixĩ i curüxĩnüxü̃ —nhanagürü.
34 Rü jexguma ga Ngechuchu rü norü ngúexü̃güca̱x rü duü̃xü̃güca̱x naca. Rü nhanagürü nüxü̃: —Rü ngẽxguma texé chawe rüxũxchaü̃gu, ¡ẽcü nüxü̃ tarüxo i tümaãrü ngúchaü̃, rü nhama wüxi i curucha ngĩxü̃ tajaxuxü̃rüü̃ namaã tapora i guxü̃ma i ngúxü̃ i chauxca̱x tingexü̃, rü chawe tarüxũ!
35 —Erü jíxema tügü maxẽchaxẽẽchaü̃xẽ rü tá taju. Notürü jíxema chaugagu rü ore i mexü̃gagu juxe, rü aixcuma tá tamaxü̃.
36 —¿Rü ṯacüwa nüxü̃́ namexü̃ ja jatü ega ngẽxguma najauxãgu i guxü̃ma i nhama i naãneãrü ngẽmaxü̃gü, notürü norü maxü̃ ijanatauxẽẽgu?
37 —Rü ngẽxgumarüü̃ ta, ¿rü nhuxre i dĩẽru ijangu na ngẽmamaã naxca̱x nataxexü̃ i norü maxü̃ i wüxi ja jatü?
38 —Rü ngẽxguma texé i nhaã duü̃xü̃gü i pecaduã̱xgüxü̃ i tama jaxõgüxü̃pe̱xewa chauxca̱x taxãnegu rü naxca̱x taxãnegu i chorü ore, rü chama i Tupana Nane i duü̃xü̃xü̃ na chiĩxü̃ rü tá ta tümaca̱x chaxãne i ngẽxguma Chaunatüarü poramaã rü norü orearü ngeruü̃gü i dauxü̃cü̱̃ã̱x i üünegüxü̃maã wenaxãrü núma chaxũxgu.
