Marcu 9:1-50
9 Rü jexgumarüü̃ ta ga Ngechuchu rü nhanagürü nüxü̃: —Aixcuma pemaã nüxü̃ chixu rü nhuxre i duü̃xü̃gü i nuã ngẽxmagüxü̃ rü tãũxü̃táma naju nhu̱xmatáta nüxü̃ nada̱x na nhuxãcü ãẽ̱xgacü ja poracü na jiĩxü̃ ja Tupana —nhanagürü.
Ngechuchu rü naxüchicüü
2 Rü 6 ga ngunexü̃guwena rü Ngechuchu rü wüxi ga ma̱xpǘnewa naxũ. Rü ínajagagü ga Pedru rü Tiagu rü Juã́ũxĩcatama. Rü jéma jema ngúexü̃güpe̱xewa naxüchicüü ga Ngechuchu.
3 Rü nij̱auracüü ga naxchiru rü nacómüxü̃chi. Rü nataxuma i jauxchiruxü̃ i nüxü̃ cuáxü̃ na ngẽmaãcü nacómüxẽẽãxü̃.
4 Rü nüxü̃ nadaugü ga Ería rü Muĩsé ga jéma Ngechuchumaã idexagüxü̃.
5 Rü jexguma ga Pedru rü nhanagürü Ngechuchuxü̃: —Pa Ngúexẽẽruü̃x, namexẽchi nixĩ na nuã ingẽxmagüxü̃. Rü tá tanaxü ja tamaẽ̱xpü̱x ja düxenü, rü wüxi ja cuxca̱x, rü naĩ ja Muĩséca̱x, rü naĩ ja Eríaca̱x —nhanagürü.
6 Rü jema na poraãcü naḇaixãchiãẽgüxü̃ca̱x ga jema ngúexü̃gü, rü jemaca̱x ga Pedru rü tama nüxü̃ nacua̱x ga na nhuxũ nhaxü̃.
7 Rü jexgumatama wüxi ga caixanexü̃ ínarüxĩ, rü natanügu najanga̱i̱xema. Rü jema caixanexü̃wa inanaxũ ga wüxi ga naga ga nhaxü̃: —Daa nixĩ ja Chaune ja nüxü̃ changechaü̃xü̃chicü. ¡Rü naga pexĩnüẽ! —nhaxü̃.
8 Rü jexgumatama nügücüwagu ínadaueguãchitanü, rü taxúexü̃ma ga toguexü̃ nadaugü, rü Ngechuchuxü̃xĩcatama.
9 Rü jexguma ínaxĩgügu nawa ga guma ma̱xpǘne, rü Ngechuchu nüxna naxãga ga taxúemaãma na nüxü̃ jaxugüexü̃ ga jema jéma nüxü̃ nadaugüxü̃, nhu̱xmatáta juwa ínadaxgu ga nümax.
10 Rü jemaca̱x ga jema ngúexü̃gü rü bexma nüxü̃ nacua̱xgü ga jema nüxü̃ nadaugüxü̃. Notürü nügüna nacagü ga ṯacüchiga na jiĩxü̃ ga:
“Juwa ínadaxgu”, nhaxü̃.
11 Rü nhu̱xmachi ga jema ngúexü̃gü rü Ngechuchuna nacagü, rü nhanagürügü: —¿Tü̱xcüü̃ i ngúexẽẽruü̃gü i ore i mugüwa ngu̱xẽẽtaegüxü̃ rü nhanagürügü:
“Ería tá nixĩ ja nüxĩra cuxü̃pa núma ũcü?” nhanagürügü.
12 Rü Ngechuchu nanangãxü̃, rü nhanagürü nüxü̃: —Aixcuma nixĩ i Ería na nüxĩra núma naxũxü̃ na chauxü̃pa namexẽẽãxü̃ca̱x i guxü̃ma. ¿Notürü tü̱xcüü̃ i ore i ümatüxü̃wa i nhaxü̃:“Rü Tupana Nane ja duü̃xü̃xü̃ ixĩcü rü tá ngúxü̃ ninge, rü duü̃xü̃gü rü tá nüxü̃ naxoe”,
nhaxü̃?
13 Notürü i chama rü pemaã nüxü̃ chixu, rü Ería rü marü núma naxũ. Notürü ga duü̃xü̃gü rü nümagü nanaxwa̱xegüxü̃ãcüma poraãcü chixri namaã nachopetü, jexgumarüü̃ ga ore ga ümatüxü̃wa nüxü̃ jaxuxü̃rüü̃ —nhanagürü.
Ngechuchu rü nanamexẽẽ ga wüxi ga buxü̃ ga ṉg̱oxo nawa jexmaxü̃
14 Rü jexguma jema togü ga norü ngúexü̃gütanüwa nangugügu, rü jéma nüxü̃ nadaugü ga muxü̃ma ga duü̃xü̃gü ga jema ngúexü̃güxü̃ íchomaẽguãchixü̃. Rü nhuxre ga ngúexẽẽruü̃gü ga Muĩséarü mugüwa ngu̱xẽẽtaegüxü̃, rü jéma niporagatanücüü namaã ga jema ngúexü̃gü.
15 Rü jexguma Ngechuchuxü̃ nadaugügu ga jema muxü̃ma ga duü̃xü̃gü, rü poraãcü naḇaixãchiãẽgü. Rü guxü̃ma naxca̱x nibuxmü na nüxü̃ janamoxẽgüxü̃ca̱x.
16 Rü nüma ga Ngechuchu rü nüxna naca, rü nhanagürü nüxü̃: —¿Ṯacü nixĩ i pema namaã naxca̱x ípeiporagatanücüüxü̃? —nhanagürü.
17 Rü wüxi ga jema duü̃xü̃gü ga jéma jexmagüxü̃ rü nanangãxü̃, rü nhanagürü: —Pa Ngúexẽẽruü̃x, nuã cuxca̱x tüxü̃ chaga ja chaune, erü tümawa nangẽxma i wüxi i ṉg̱oxo i tüxü̃ ngegaxẽẽxü̃.
18 —Rü ngextá ítangẽxmaxü̃wa rü ngẽxma tüxü̃ jaxüxgu rü waixü̃müãnegu tüxü̃ nanha. Rü tarüchia̱x, rü tixü̃́xchapüta, rü ngẽxma tijuãchi. Rü marü nüxü̃ chaca̱a̱xü̃ i curü ngúexü̃gü na tümawa ínata̱xüchiãxü̃ca̱x i ngẽma ṉg̱oxo, notürü tama nüxü̃́ inaxĩnü —nhanagürü.
19 Rü Ngechuchu nanangãxü̃, rü nhanagürü: —Pa Duü̃xü̃gü i Tama Jaxõgüxü̃, ¿nhuxguratáta i pemaã chanuxmaxü̃ rü jaxna pemaã chaxĩnüxü̃? ¡Nuã penaga ja jima bucü! —nhanagürü.
20 Rü Ngechuchuxü̃tawa nanagagü ga guma bucü. Notürü jexguma Ngechuchuxü̃ nada̱xgu ga jema ṉg̱oxo, rü guma bucüxü̃ naxü ga na jajuãchixẽẽãxü̃. Rü jexma nhaxtüanegu najangu. Rü jexma nidixegugü, rü narüchia̱x.
21 Rü Ngechuchu rü guma bucünatüna naca, rü nhanagürü: —¿Rü nhuxgumama nixĩ ga naxca̱x inaxügüxü̃ ga jema? —nhanagürü. Rü guma bucünatü nanangãxü̃ rü nhanagürü: —Nabuxgumamatama.
22 Rü muẽ̱xpü̱xcüna i ngẽma ṉg̱oxo rü üxüxetügu rü dexágu nananhaü̃xü̃ na ngẽmaãcü jamáãxü̃ca̱x. Rü ngẽmaca̱x ega cumaã nanguxü̃gu na ṯacü toxca̱x cuxüxü̃, ¡rü cuxü̃́ tangechaü̃tümüü̃gü, rü toxü̃ rüngü̃xẽẽ! —nhanagürü.
23 Rü jexguma ga Ngechuchu rü nhanagürü nüxü̃: —¿Rü tü̱xcüü̃ “ega chamaã nanguxü̃gu”, nhacurügü? Erü guxü̃ma natauxcha tümaca̱x ja jíxema jaxṍxẽ —nhanagürü.
24 Rü jexguma ga guma bucünatü rü tagaãcü nhatarügü: —Chajaxõ. ¡Choxü̃ rüngü̃xẽẽ na jexeraãcü chajaxõxü̃ca̱x! —nhatarügü.
25 Rü jexguma Ngechuchu nüxü̃ da̱xgu na muxü̃ma ga duü̃xü̃gü marü jexma ngutaque̱xexü̃, rü nananga ga jema ṉg̱oxo. Rü nhanagürü nüxü̃: —Pa Ṉg̱oxo i Ngegaxẽẽruü̃ rü Ngauchi̱xẽxẽẽruü̃x, ¡chama cuxü̃ chamu na nawa ícuxũxũxü̃ ja daa bucü, rü tagutáma wena nagu cujaxücuxü̃! —nhanagürü.
26 Rü jexguma ga jema ṉg̱oxo rü aita naxü, rü wenaxãrü guma bucüxü̃ nijuãchixẽẽ. Rü nhu̱xmachi nawa ínaxũxũ, rü nhama najuxuchixü̃rüü̃ jéma nanata̱x. Rü jemaca̱x ga muxü̃ma ga duü̃xü̃gü rü nhanagürügü: —Marü najuxuchi nixĩ —nhanagürügü.
27 Notürü ga Ngechuchu rü naxme̱xgu najajauxãchi, rü ínanadaxẽẽ. Rü nüma ga guma bucü rü inachi.
28 Rü jemawena ga Ngechuchu rü wüxi ga ĩpatagu najaxücu namaã ga norü ngúexü̃gü. Rü jéma nüxĩca nüxna nacagü, rü nhanagürügü nüxü̃: —Pa Corix, ¿tü̱xcüü̃ i toma rü taxuacüma ítanata̱xüchi i ngẽma ṉg̱oxo? —nhanagürügü.
29 Rü Ngechuchu nanangãxü̃ rü nhanagürü: —Tama ngẽmaãcümare ítanata̱xüchi i ngẽmarüü̃ ixĩxü̃ i ṉg̱oxo. Notürü tanaxwa̱xe i Tupanana tanaxuaxü̃ na nüma ínata̱xüchiãxü̃ca̱x. Rü ngẽmaãcüxicatama nixĩ i ínaxũxũxü̃ —nhanagürü.
Ngechuchu ru wenaxãrü nanaxunagü ga norü juchiga
30 9:30-31 Rü jéma inaxĩãchi rü Gariréaanewa nachopetü. Notürü ga Ngechuchu rü tama nanaxwa̱xe ga texé nüxü̃ na cuáxü̃ ga na jéma najexmaxü̃, jerü norü ngúexü̃güxü̃ ínangúexẽẽ. Rü nhanagürü nüxü̃: —Tupana Nane ja duü̃xü̃xü̃ ixĩcü, rü duü̃xü̃gü tá najajauxgü rü tá najama̱xgü. Notürü tamaẽ̱xpü̱x i ngunexü̃guwena rü táxarü namaxü̃ —nhanagürü.
31 Nüü̃ nadau 9:30
32 Notürü ga nümagü rü tama meã nüxü̃ nacua̱xgü ga ṯacüchiga na jiĩxü̃ ga jema ore, rü namuü̃ẽ ga nüxna na nacagüexü̃.
¿Texé tá tixĩ ja guxããrü jexera ixĩxẽ?
33 Rü Caparnáũãrü ĩãnewa nangugü. Rü jexguma ĩxwa najexmagügu, rü Ngechuchu nüxna naca, rü nhanagürü: —¿Rü ṯacü nixĩ ga pegümaã naxca̱x peiporagaetanüxü̃ ga namawa? —nhanagürü.
34 Notürü ga nümagü rü nangea̱xgümare, jerü ga namawa rü nachigagu nügümaã niporagaetanü ga texé tiĩxü̃ ga natanüwa rüjexeramaẽxẽ.
35 Rü jexguma ga Ngechuchu rü ínarüto, rü nügüxü̃tawa naxca̱x naca ga jema 12 ga norü ngúexü̃gü, rü nhanagürü nüxü̃: —Rü ngẽxguma texé naxwa̱xegu na guxãẽ́tüwa na taxüxü̃, rü name nixĩ i noxri rü guxããrü nhaxtümaẽwa tügü taxüxẽẽ na guxããrü ngü̃xẽẽruü̃ tiĩxü̃ —nhanagürü.
36 Rü jemawena rü norü ngãxü̃tanügu najachixẽẽ ga wüxi ga buxü̃. Rü nhu̱xmachi nachacüügu jajauxãchiãcüma nhanagürü:
37 —Rü texé ja chauégagu meã najaxúxe i wüxi i buxü̃ i nhaãrüü̃, rü choxü̃ nixĩ i tajaxuxü̃. Rü texé ja choxü̃ jaxúxe, rü tama choxü̃xĩcatama tajaxu, notürü jima núma choxü̃ mucü ja Chaunatüxü̃ rü ta nixĩ i tajaxuxü̃ —nhanagürü.
Texé ja tama tachi aixe rü torü ngü̃xẽẽruü̃ tixĩ
38 Rü jexguma ga Juã́ũ rü nhanagürü nüxü̃: —Pa Ngúexẽẽruü̃x, nüxü̃ tadau ga wüxi ga jatü ga cuégagu ṉg̱oxogü íwoxü̃xü̃. Notürü toma nüxna tanachu̱xu ga jema, jerü tama tatanüxü̃ nixĩ ga nümax —nhanagürü.
39 Notürü Ngechuchu nanangãxü̃, rü nhanagürü: —Tama name i nüxna na penachu̱xuxü̃. Erü texé ja chauégagu naxǘxe i wüxi i mexü̃ i Tupanaãrü poramaã üxü̃, rü taxucürüwama jixcama chixri chauchiga tidexa.
40 Erü texé ja tama tachi aixe, rü tórü ngü̃xẽẽruü̃ tixĩ.
41 Rü texé ja woo wüxitama i copuãcu i dexá pexna ãxẽ naxca̱x na chorü duü̃xü̃gü peixĩgüxü̃, rü aixcuma pemaã nüxü̃ chixu rü tá tüxü̃́ nangẽxma i tümaãrü ãmare —nhanagürü.
Naxãũcüma nixĩ na pecadugu inguxü̃
42 Rü nhanagürü ta: —Texé ja pecadugu nanguxẽẽ́xẽ i wüxi i nhaã buxü̃gü i choxü̃́ jaxõgüxü̃, rü tümaca̱x rü narümemaẽ chi nixĩ i noxtacüma wüxi ja nuta ja tacü tümanaxãwa tajangacuchixü̃, rü ngẽmaãcü taxtüchiüwa tüxü̃ tajatáe.
43 9:43-44 —Rü ngẽxguma chi wüxi ja cuxme̱x pecadugu cuxü̃ nguxẽẽgu, rü name nixĩ i noxtacüma ícunadae. Erü narümemaẽ nixĩ i cuboxme̱xãcüma cunajaxu i curü maxü̃ na tama guxü̃ne ja cuxme̱x ja mexü̃nemaã nawa cuita̱xcuchixü̃ca̱x ja jima üxü ja ṉg̱oxogü nagu pocuene ja taguma ixoxü̃ne.
44 Nüü̃ nadau 9:43
45 9:45-46 —Rü ngẽxguma chi wüxi ja cucutü pecadugu cuxü̃ nguxẽẽgu, rü name nixĩ i noxtacüma ícunadae. Erü narümemaẽ nixĩ i cubocutüãcüma cunajaxu i curü maxü̃ na tama guxü̃ne ja cucutü ja mexü̃nemaã nawa cuita̱xcuchixü̃ca̱x ja jima üxü ja ṉg̱oxogü nagu pocuene.
46 Nüü̃ nadau 9:45
47 9:47-48 —Rü ngẽxguma chi wüxi ja cuxetü pecadugu cuxü̃ nguxẽẽgu, rü name nixĩ i noxtacüma cunajaxu. Erü narümemaẽ nixĩ i wüxitama ja cuxetümaã Tupana ãẽ̱xgacü íixĩxü̃wa cuixücu, na tama guxü̃ne ja cuxetü ja mexü̃nemaã nawa cuita̱xcuchixü̃ca̱x ja jima üxü ja taguma ixoxü̃ne ja ṉg̱oxogü nagu pocuene i ngextá õxmigü taguma íjuexü̃wa.
48 Nüü̃ nadau 9:47
49 —Rü aixcuma nhama õnawa jucüra nagüxü̃rüü̃ tá nixĩ na guxãtáma guxchaxü̃wa chopetüxü̃.
50 —Name ja jucüra. Notürü ngẽxguma chi nangeacagu, ¿rü nhuxãcü tá wenaxãrü naxããca? ¡Rü meã pegüna pedaugü na nhama jucüra ja taguma ijarüngeacacürüü̃ na namexü̃ca̱x i perü maxü̃! ¡Rü meã pegümaã pemaxẽ! —nhanagürü.