Mateu 11:1-30
11 Rü jexguma nüxü̃ nachaxgu ga Ngechuchu ga na jaxucu̱xẽgüãxü̃ ga jema 12 ga norü ngúexü̃gü, rü inaxũãchi ga jéma na duü̃xü̃güxü̃ nangúexẽẽxü̃ca̱x rü naxunagüãxü̃ca̱x ga ore ga mexü̃ ga guxü̃ne ga ĩãnegü ga jema naãnewa jexmagünewa.
2 11:2-3 Rü Juã́ũ ga baiü̃xẽẽruü̃ rü napocu. Notürü nüxü̃ nacuáchiga ga jema Ngechuchu üxü̃. Rü jemaca̱x ga Juã́ũ rü Ngechuchuxü̃tawa nanamugü ga nhuxre ga norü duü̃xü̃gü na nüxna jacagüxü̃ca̱x rü aixcuma Cristu ga nüxü̃ ínaṉg̱uxẽẽgücü jiĩxü̃, rü e̱xna to tá jiĩxü̃ ja Cristu.
3 Nüü̃ nadau 11:2
4 Rü Ngechuchu nanangãxü̃ rü nhanagürü nüxü̃ ga jema duü̃xü̃gü: —¡Pewoegu rü Juã́ũmaã nüxü̃ pejarüxu i ngẽma pematama nüxü̃ pedaugüxü̃ rü nüxü̃ pexĩnüẽxü̃!
5 —¡Rü namaã nüxü̃ peixu rü ngẽma ngexetügüxü̃ rü marü nidauchigü, rü ngẽma ichixeparaxü̃ rü marü inachigü, rü ngẽma chaxüneã̱xgüxü̃ rü marü naxca̱x nitaanegü, rü ngẽma ngauchi̱xẽgüxü̃ rü marü ningo̱xnamachi̱xẽgü, rü ngẽma juexü̃ rü wenaxãrü namaxẽ, rü ngẽma ngearü ngẽmaxü̃ã̱xgüxü̃ rü marü namaã nüxü̃ tixu i Tupanaãrü ore i mexü̃!
6 Rü tataãẽ ja jíxema texé ja tama choxü̃ rüxoxe —nhanagürü ga Ngechuchu.
7 Rü jexguma nawoegu̱xgu ga jema Juã́ũ ga baiü̃xẽẽruü̃ãrü duü̃xü̃gü, rü Ngechuchu inanaxügü ga guma Juã́ũchiga na jadexaxü̃. Rü nhanagürü nüxü̃ ga duü̃xü̃gü: —¿Ṯacü nixĩ ga pema ípejadaugüxü̃ ga dauxchitawa ga ngextá taxúema íxãpataxü̃wa? —¿E̱xna wüxi ga ngẽxü̃rüüxü̃mare ga jatü ga nhama dexne ga buanecü jaxĩã̱xtanücüüxẽẽcürüü̃ ixĩxü̃ nixĩ ga ípejadaugüxü̃?
8 —Rü e̱xna ega tama guma ípejadaugügu, ¿rü ṯacü nixĩ ga ípejadaugüxü̃? ¿E̱xna wüxi ga jatü ga poraãcü nügü nga̱xãẽxü̃ jiĩxü̃ ga ípejadaugüxü̃? Pema nüxü̃ pecua̱x i ngẽma poraãcü nügü nga̱xãẽgüxü̃ rü ãẽ̱xgacügü ja tacügüpatawa nangẽxmagü.
9 —¿Ṯacü e̱xna nixĩ ga ípejadaugüxü̃? ¿E̱xna wüxi ga Tupanaãrü orearü uruü̃xü̃? Ngẽmáãcü aixcuma jema nixĩ ga ípejadaugüxü̃. Rü pemaã nüxü̃ chixu rü Juã́ũ ja baiü̃xẽẽruü̃ rü tama wüxi i ngẽxü̃rüüxü̃mare i Tupanaãrü orearü uruü̃ nixĩ.
10 —Rü Juã́ũchiga nixĩ ga naxümatüxü̃ ga jema Tupanaãrü ore ga nhaxü̃:“Cupe̱xegu chajamu i chorü orearü ngeruü̃ na cuxca̱x namexẽẽãxü̃ca̱x i duü̃xü̃güarü maxü̃”,
nhaxü̃.
11 —Rü aixcuma pemaã nüxü̃ chixu rü guxü̃ i duü̃xü̃gütanüwa rü nataxuma i Tupanaãrü orearü uruü̃ i Juã́ũ ja baiü̃xẽẽruü̃ãrü jexera ixĩxü̃. Notürü jíxema Tupana ãẽ̱xgacü íixĩxü̃wa wixwexü̃chi üxe, rü Juã́ũãrü jexera tixĩ.
12 —Rü jexguma noxri ínanguxgu ga Juã́ũ ga baiü̃xẽẽruü̃, rü inaxügü ga duü̃xü̃güaxü̃́ na poraãcü nangúchaü̃xü̃ na jachocuxü̃ca̱x i ngextá Tupana ãẽ̱xgacü íixĩxü̃wa. Rü nhu̱xma rü muxü̃ma i duü̃xü̃gü rü poraãcüxü̃chima nüxü̃́ nangúchaü̃ na ngẽ́ma jachocuxü̃ca̱x.
13 —Rü guxü̃ma ga Tupanaãrü orearü uruü̃güarü orewa, rü ore ga mugü ga Muĩsé ümatüxü̃wa rü nüxü̃ nixuchigagü na ínanguégaxü̃ ja Cristu na ãẽ̱xgacü na jiĩxü̃ca̱x. Rü jemaãcü nixĩ nhu̱xmata ínangu ga Juã́ũ.
14 —Rü ngẽxguma chi pejaxõgüchaü̃gu i nhaã chorü ore, rü pemaã nüxü̃ chixu rü Juã́ũ ja baiü̃xẽẽruü̃ nixĩ ja jima janguxẽẽcü ga jema ore ga guma nuxcümaxü̃cü ga orearü uruü̃ ga Ería ga ípenaṉg̱uxẽẽcüchiga ümatüxü̃.
15 —Rü jíxema ãchi̱xẽgüxe, ¡rü naga taxĩnüẽ i ngẽma ore! —nhanagürü.
16 Rü nhanagürü ta ga Ngechuchu: —¿Ṯacügu tá chanangu i nhaã duü̃xü̃gü i nhu̱xma maxẽxü̃? Maneca nhaã duü̃xü̃gü rü taxuxü̃maãma nataãẽgü ngẽxgumarüü̃ i nhuxre i buxü̃gü i nügümaã ĩã̱xtüwa rütogüxü̃, rü íxixãẽwa̱xegüxü̃, rü tagaãcü namücügüxü̃ nhagüxü̃:
17 “Marü wowerumaã pexca̱x tapaxetagü, notürü tama ípexü̃ãchitanüxü̃. Rü marü ngechaü̃ i wijaegu pexca̱x tawijaegü, notürü tama pexauxe”, nhagüxü̃. Rü ngẽma buxü̃gürüü̃ nixĩ i nhaã duü̃xü̃gü.
18 —Jerü núma naxũ ga Juã́ũ ga baiü̃xẽẽruü̃ rü tama põũ nangõ̱x rü tama wĩũ najaxaxü. Rü jexguma ga nümagü rü: “Naṉg̱oxoã̱x” nhanagürügü nüxü̃.
19 —Rü nhu̱xmachi núma chaxũ i chama ja Tupana Nane na duü̃xü̃xü̃ chiĩxü̃. Rü chama rü õna changõ̱x rü wĩũ chajaxaxü. Rü ngẽxguma i nümagü rü taanüxü̃chixü̃ rü ngãxwa̱xexü̃ choxü̃ nawogüe. Rü nüxü̃ nixugüe rü pecaduã̱xgüxü̃maã chaxãmücü, rü namaã chaxãmücü i ngẽma duü̃xü̃gü i Romaãrü ãẽ̱xgacüca̱x dĩẽru ngĩxü̃ ideetanüxü̃. Notürü Tupanaãrü cua̱x rü meãma nango̱x tümawa ja jíxema aixcuma nawe rüxĩxẽ —nhanagürü ga Ngechuchu.
Ĩãnegü ga tama Tupanaga ĩnüẽne
20 Rü jexguma ga Ngechuchu rü inanaxügü ga na jangagüãxü̃ ga jema duü̃xü̃gü ga guma ĩãnegücü̱̃ã̱x ga ngextá jexeraãcü ínaxüaxü̃wa ga taxü̃ ga mexü̃gü ga Tupanaãrü poramaã naxüxü̃. Rü poraãcü najangagü, jerü jema duü̃xü̃gü rü tama nüxü̃ narüxoe ga norü chixexü̃.
21 Rü nhanagürü ga Ngechuchu: —Rü wüxi i ngechaü̃ nixĩ i pexca̱x, Pa Corachĩ́ũcü̱̃ã̱xgü rü Pa Bechaídacü̱̃ã̱xgüx, jerü jexguma chi Tiruarü ĩãnewa rü Chidã́ũãrü ĩãnewa chanaxü̱xgu ga jema mexü̃gü ga cua̱xruü̃gü ga Tupanaãrü poramaã petanüwa chaxüxü̃, rü woo ga na poraãcü jachixexü̃ ga jema duü̃xü̃gü rü nuxcümama chitama nüxü̃ narüxoe ga jema nacüma ga chixexü̃, rü poraãcüxü̃chi chima nügümaã nangechaü̃gü rü naxauxe, jerü chi nügü nicua̱xãchitanü ga na japecaduã̱xgüxü̃.
22 —Notürü pemaã nüxü̃ chixu rü ngẽma ngunexü̃ i Tupana nagu napocuexü̃ i pecaduã̱xgüxü̃, rü ngẽma ngunexü̃gu rü Tirucü̱̃ã̱xgü rü Chidã́ũcü̱̃ã̱xgüarü jexera tá pexü̃ napocue i pemax, Pa Corachĩ́ũcü̱̃ã̱xgü rü Bechaídacü̱̃ã̱xgüx.
23 —Rü pemax, Pa Caparnáũcü̱̃ã̱xgü i Duü̃xü̃güx, ¿rü pema nagu perüxĩnüẽgu rü dauxü̃guxü̃ i naãnewa tá ipexĩxü̃? Pemaã nüxü̃ chixu rü naãnetüü̃wa i ngextá Tupana Chatanáxü̃ ípocuxü̃wa tá nixĩ i pewogüxü̃. Rü jexguma chi Chodomaãrü ĩãnewa chanaxü̱xgu ga jema mexü̃gü ga cua̱xruü̃gü ga Tupanaãrü poramaã petanüwa chaxüxü̃, rü guma ĩãne ga nuxcüma norü pecadugagu ijarüxoxü̃ne rü nhu̱xma rü chi nangẽxma.
24 —Notürü pemaã nüxü̃ chixu rü ngẽma ngunexü̃ i Tupana nagu napocuexü̃ i pecaduã̱xgüxü̃, rü ngẽma ngunexü̃gu rü Chodomacü̱̃ã̱xgüarü jexera tá pexü̃ napocue i pemax, Pa Caparnáũcü̱̃ã̱xgüx —nhanagürü.
Chauxca̱x pexĩ na chauxü̃tagu perüngü̃ẽxü̃ca̱x
25 Rü jexguma rü nhaãcü najumuxẽ ga Ngechuchu, rü nhanagürü: —Pa Chaunatü ja Dauxü̃guxü̃ i Naãne rü Nhama i Naãneãrü Jorax, cuxü̃ chicua̱xüü̃, erü nhaã chorü ngúexü̃güxü̃ nüxü̃ cucua̱xẽẽ i nhaã ore i naxchaxwa icuicúxü̃ i duü̃xü̃gü i nhama i naãnewa nüxü̃ cua̱xü̃chigüxü̃.
26 —Rü moxẽ cuxna chaxã, Pa Chaunatüx, erü cuma cunaxwa̱xe na ngẽmaãcü cunaxüxü̃ —nhanagürü.
27 Rü nhanagürü ta ga Ngechuchu: —Chaunatü choxna nanaxã i guxü̃ma i ṯacü i ngẽxmaxü̃. Rü Chaunatüxicatama choxü̃ nacua̱x na texé chiĩxü̃ i chama i Nane. Rü tama guxü̃ma i duü̃xü̃gü aixcuma nüxü̃ nacua̱x na texé jiĩxü̃ ja Chaunatü. Rü chama ja Nane, rü ngẽma duü̃xü̃gü i Chaunatüxü̃ nüxü̃ chadauxẽẽchaü̃xü̃xĩcatama nixĩ i aixcuma nüxü̃ cua̱xgüxü̃ na texé jiĩxü̃ ja Chaunatü.
28 —¡Rü nuã chauxü̃tawa pexĩ i guxãma i pema i ngẽma nuxcümaü̃xü̃ i mugüarü auregu ipaexe rü guxãma i pema ja ngechaü̃güxe! Rü chama tá pexü̃ icharüngü̃ẽxẽẽ.
29 —¡Rü penajau̱x i ngẽma pemaã nüxü̃ chixuxü̃ rü chauxü̃tawa naxca̱x pengúe! Erü chama rü jaxna pemaã chaxĩnü rü taguma chaugü ícharüta. Rü chauxü̃tawa tá nüxü̃ ipejangau i perü taãẽ i aixcuma ixĩxü̃.
30 —Erü ngẽma pexü̃ chamuxü̃ rü natauxcha na naga pexĩnüẽxü̃. Rü ngẽma naxca̱x pexna chaca̱xü̃ rü tama naguxcha na penaxüxü̃ —nhanagürü ga Ngechuchu.
