Mateu 12:1-50
12 Rü wüxi ga ngü̃xchigaarü ngunexü̃gu rü Ngechuchu rü norü ngúexü̃gümaã trigunecügu nixũ. Rü nataijae ga norü ngúexü̃gü, rü jemaca̱x inaxĩãcüma joxocüne triguta nicãũẽtanü, rü inajangṍẽtanü.
2 Rü jexguma jemaxü̃ nadaugügu ga Parichéugü rü nhanagürügü Ngechuchuxü̃: —Dücax i curü ngúexü̃gü rü chixexü̃ naxüe. Erü ngü̃xchigaarü ngunexü̃gu napuracüe, rü nachu̱xu nixĩ i ngẽma —nhanagürügü.
3 Rü Ngechuchu nanangãxü̃, rü nhanagürü: —¿Taguma e̱xna poperawa nüxü̃ pedau ga ṯacü na naxüxü̃ ga nuxcümaxü̃cü ga ãẽ̱xgacü ga Dawí ga jexguma nataija̱xgu ga nüma rü natanüxü̃gü?
4 —Rü Tupanapatagu naxücu rü nanangõ̱x ga jema põũ ga üünexü̃ ga Dawíca̱x rü natanüxü̃güca̱x chu̱xuxü̃ ga na nangõ̱xgüãxü̃. Jerü paigüca̱xicatama nixĩ ga jema põũ.
5 —Rü pemax, Pa Parichéugüx ¿taguma e̱xna nawa pengúe ga jema ore ga mugüpanegu Muĩsé ümatüxü̃ ga nhaxü̃ rü marü name i paigü rü ngü̃xchigaarü ngunexü̃gu napuracüe i tupauca ja taxü̃newa? Rü ngẽma rü tama wüxi i pecadu nixĩ naxca̱x i ngẽma paigü.
6 —Notürü pemaã nüxü̃ chixu rü nuã petanüwa nangẽxma i wüxi i duü̃xü̃ i tupauca ja taxü̃neãrü jexera ixĩxü̃ i Tupanape̱xewa.
7 —Notürü pema rü tama nüxü̃ pecua̱x i nhuxũ nhaxü̃chiga nixĩ i ngẽma Tupanaãrü ore i ümatüxü̃ i nhaxü̃:“Chama rü tama chanaxwa̱xe i chauxca̱x pejama̱x i carnerugü, notürü chanaxwa̱xe i togü pexü̃́ nangechaü̃tümüü̃gü”,
nhaxü̃. Rü ngẽxguma chi meã nüxü̃ pecua̱xgügu i ngẽma ore, rü tau chima chixri nachiga peidexagü i nhaã chorü ngúexü̃gü i taxuü̃ma i chixexü̃ ügüxü̃ i Tupanape̱xewa.
8 —Rü chama i Tupana Nane na duü̃xü̃xü̃ chiĩxü̃, rü aixcuma ngü̃xchigaarü jora chixĩ —nhanagürü ga Ngechuchu.
Wüxi ga jatü ga jumécüchiga
9 Rü jexguma jema nachicawa ínaxũũxgu ga Ngechuchu, rü guma ĩãneãrü ngutaque̱xepataü̃gu naxücu.
10 Rü jéma najexma ga wüxi ga jatü ga norü wüxichacüüwa jumécü. Rü nümagü ga Parichéugü rü naxca̱x nadaugü ga nhuxãcü norü ãẽ̱xgacügüxü̃tawa Ngechuchuxü̃ na ínaxuaxü̃güxü̃. Rü jemaca̱x Ngechuchuna nacagüe, rü nhanagürügü: —¿Namexü̃ jiĩxü̃ na texé naxca̱x jataanexẽẽxü̃ i wüxi i ḏaawexü̃ i ngü̃xchigaarü ngunexü̃gu? —nhanagürügü.
11 Rü Ngechuchu nanangãxü̃, rü nhanagürü: —¿Texé i petanüwa rü ngẽxguma chi ngü̃xchigaarü ngunexü̃gu wüxi i perü carneru puchugu nguxgu, rü taux e̱xna i ngẽxgumatama ípejadaugüxü̃ rü ípenatúãchixü̃ woo ngü̃xchigaarü ngunexü̃ jixĩgu?
12 —Notürü Tupanape̱xewa rü wüxi i duü̃xü̃ rü poraãcüxü̃chima wüxi i carneruarü jexera nixĩ. Rü ngẽmaca̱x name nixĩ i mexü̃ taxü i woo ngü̃xchigaarü ngunexü̃ jixĩgu —nhanagürü.
13 Rü nhu̱xmachi ga Ngechuchu rü nhanagürü nüxü̃ ga guma jatü ga jumécü: —¡Ijarüwe̱xãchime̱xẽ! —nhanagürü. Rü guma jatü rü inajarüwe̱xãchime̱xẽ, rü jexgumatama narümeme̱x, rü naĩ ga naxme̱x ga mexü̃nerüü̃ nixĩ.
14 Rü jexguma jemaxü̃ nadaugügu ga Parichéugü, rü ínachoxü̃ ga jéma. Rü inanaxügüe na naxca̱x nadaugüxü̃ ga nhuxãcü tá na Ngechuchuxü̃ jama̱xgüxü̃.
Ore ga Ngechuchuchigaxü̃ nixu ga nuxcümaü̃cü ga orearü uruü̃
15 Rü jexguma Ngechuchu nüxü̃ cuáchigagu na Parichéugü na jama̱xgüchaü̃xü̃, rü ínaxũxũ ga guma ĩãnewa. Rü muxü̃ma ga duü̃xü̃gü rü nawe narüxĩ. Rü nüma ga Ngechuchu rü nanameẽxẽẽ ga guxü̃ma ga jema duü̃xü̃gü ga iḏaaweexü̃.
16 Rü duü̃xü̃güna naxãga na tama nüxü̃ jaxugüexü̃ca̱x na texe na jiĩxü̃ ga nümax.
17 Rü jemaãcü nanaxü ga Ngechuchu na janguxẽẽãxü̃ca̱x ga jema ore ga nuxcümaxü̃cü ga Tupanaãrü orearü uruü̃ ga Ichaía nüxü̃ ixuxü̃ ga nhaxü̃:
18 “Daa nixĩ ja chorü duü̃xü̃ ja chamatama nüxü̃ chaxunetacü rü nüxü̃ changechaü̃cü rü namaã chataãẽxü̃chicü. Rü Chauãẽ i Üünexü̃ rü nüxna tá chanamu. Rü nüma tá guxü̃ i duü̃xü̃gü i tama Judéugü ixĩgüxü̃maã nüxü̃ nixu i ore i mexü̃ i aixcuma ixĩxü̃.
19 Rü tagutáma ngextá texémaã niporagacüü rü taxúemaãtáma ngextá nipura. Rü tagutáma texé namagüwa nüxü̃ taxĩnü na natagaxü̃.
20 Rü nüma rü tãũxü̃táma nanadai i ngẽma duü̃xü̃gü i norü õwa turaexü̃, rü tãũxü̃táma inajanaxoxẽẽ i ngẽma duü̃xü̃gü i íraruwatama jaxõgüxü̃. Rü ngẽmaãcü tá nixĩ nhu̱xmatáta guxü̃ i naãnewa nangu i ngẽma norü ore i aixcuma ixĩxü̃.
21 Rü guxü̃ i duü̃xü̃gü i tama Judéugü ixĩgüxü̃ rü tá naxca̱x naxĩ na ngẽmaãcü naxü̃tawa najauxgüãxü̃ca̱x i norü maxü̃ i taguma gúxü̃”,
nhanagürü ga Ichaía.
Parichéugü rü Ngechuchuxü̃ ṉg̱oxoarü poramaã puracüxü̃ nawogüe
22 Rü Ngechuchuxü̃tawa nanagagü ga wüxi ga jatü ga ṉg̱oxoã́cü ga ngexetücü rü tama idexacü. Rü Ngechuchu nanamexẽẽ. Rü guma jatü rü jexgumatama nidauchi rü nidexa.
23 Rü guxü̃ma ga duü̃xü̃gü rü naḇaixãchiãẽgü ga jexguma jemaxü̃ nadaugügu. Rü nhanagürügü: —¿Taux e̱xna daa jiĩxü̃ ja Dawí nane ja Cristu? —nhanagürügü.
24 Notürü jexguma jemaxü̃ naxĩnüẽgu ga Parichéugü, rü nhanagürügü: —Nhaã jatü i Ngechuchu, rü ṉg̱oxogünatü i Beuchebúarü poramaã nixĩ i ínawoxü̃ãxü̃ i ṉg̱oxogü —nhanagürügü.
25 Notürü nüma ga Ngechuchu rü nüxü̃ nacua̱xama ga ṯacügu na naxĩnüẽxü̃. Rü jemaca̱x nhanagürü nüxü̃: —Ngẽxguma chi wüxi i nachiü̃ãnecü̱̃ã̱x i duü̃xü̃gü nügü itojegu rü nügütanüwa chitama nügü nadaixgu, rü nügü chitama nagu̱xẽẽ. Rü ngẽxguma chi wüxi ja ĩãnecü̱̃ã̱x rü e̱xna wüxi ja ĩcü̱̃ã̱x nügümaã nuẽẽchagu rü nügü nadaixgu, rü nügü chitama nagu̱xẽẽ.
26 —Rü ngẽxguma chi Beuchebú nügütama íta̱xüchigu rü nügütama jama̱xgu, ¿rü nhuxãcü chi ãẽ̱xgacüecha jiĩxü̃?
27 —Rü pemax, Pa Parichéugüx, rü choxü̃ peixuxgu rü Beuchebúarü poramaã íchanawoxü̃ i ṉg̱oxogü. Notürü ngẽxguma chi Beuchebúarü poramaã íchanawoü̃xgu i ṉg̱oxogü, ¿rü texéarü poramaã nixĩ i perü ngúexü̃gü rü ínawoxü̃ãxü̃ i ṉg̱oxogü? Rü dücax, rü ngẽma perü ngúexü̃gütama nixĩ i pexca̱x nango̱xẽẽxü̃ na ípetüexü̃.
28 —Notürü pemaã nüxü̃ chixu rü aixcuma Tupanaãẽ i Üünexü̃ãrü poramaã nixĩ i íchanawoxü̃xü̃ i ṉg̱oxogü. Rü ngẽmawa pexü̃ nüxü̃ chacua̱xẽẽ na marü núma petanüwa nanguxü̃ ja Tupana, na perü ãẽ̱xgacü jiĩxü̃ca̱x.
29 —¿Rü nhuxãcü texé wüxi ja jatü ja poracüpatagu taxücu na tanapuxü̃xü̃ca̱x i norü ngẽmaxü̃gü, ega tama tajana̱ĩ̱xiragu i noxrix? Rü ngẽxguma tajana̱ĩ̱xiraguxicatama nixĩ i nüxna tanapuxü̃xü̃ i norü ngẽmaxü̃gü ja jima jatü ja poracü.
30 —Rü jíxema tama choxü̃ ngechaü̃xẽ rü chauchi taxai. Rü jíxema tama choxü̃ rüngü̃xẽẽ́xẽ na Tupanaca̱x tananutaque̱xexü̃ i duü̃xü̃gü rü chauxchawa tanangianexẽẽ.
31 —Rü ngẽmaca̱x pemaã nüxü̃ chixu rü Tupana tá nüxü̃́ nüxü̃ nangechaü̃ i guxü̃ma i pecadugü i duü̃xü̃gü ügüxü̃ rü guxü̃ma i norü dexagü i chixexü̃. Notürü jíxema Tupanaãẽ i Üünexü̃maã ṯacü ixugüxe, rü Tupana rü tagutáma tüxü̃́ nüxü̃ nangechaü̃ i ngẽma chixexü̃.
32 —Rü guxãma ja texé ja ṯacü chamaã ixugüxe rü Tupana tá tüxü̃́ nüxü̃ nangechaü̃ i ngẽma. Notürü texé ja Tupanaãẽ i Üünexü̃maã ṯacü ixugüxe, rü Tupana rü tagutáma tüxü̃́ nüxü̃ nangechaü̃ i ngẽma, rü bai i nhama i naãnewa, rü bai i dauxü̃guxü̃ i naãnewa.
Wüxi i nanetü rü norü owa nixĩ i nüxü̃ icuáxü̃ na ṯacü rü nanetü jiĩxü̃
33 —Rü ngẽxguma wüxi i nanetü rü namexgu, rü norü o rü ta name. Notürü ngẽxguma wüxi i nanetü rü nachixe̱xgu, rü norü o rü ta nachixe. Rü wüxi i nanetü rü norü owa nixĩ i nüxü̃ icuáxü̃ ngoxi name rü e̱xna tama.
34 —Pa Ãxtapearü Duü̃xü̃güx, ¿nhuxãcü i mexü̃ i orexü̃ peixuxü̃ ega pematama rü pechixecümagu? Erü ngẽma ore i pea̱xmaã nüxü̃ peixuxü̃ rü peãẽwa nixĩ i ne naxũxü̃.
35 —Wüxi ja mecü ja jatü rü mexü̃ i orexü̃ nixu, erü naãẽwa rü aixcuma mexü̃gu narüxĩnü. Notürü wüxi i jatü i chixecümaxü̃ rü chixexü̃ i orexü̃ nixu, erü naãẽwa rü chixexü̃gu narüxĩnü.
36 —Rü chama pemaã nüxü̃ chixu rü ngẽma ngunexü̃ i nagu nagúxü̃ i naãne, rü Tupana rü tá nüxna naca i guxü̃ i duü̃xü̃gü naxca̱x i guxü̃ma i ore i chixexü̃ i nüxü̃ jaxuxü̃ i nhama i naãnewa.
37 —Erü ngẽma curü dexagüwa rü Tupana tá cuxü̃ nangugü, rü tá cumaã nüxü̃ nixu ngoxita cume i nape̱xewa rü e̱xna tama —nhanagürü ga Ngechuchu.
Duü̃xü̃gü ga tama jaxõgüchaü̃xü̃ rü naxca̱x ínacagü ga to ga cua̱xruü̃ ga Tupanaãrü poramaã üxü̃
38 Rü jexguma rü nhuxre ga Parichéugü rü Judéugüarü ngúexẽẽruü̃gü ga ore ga mugüwa ngu̱xẽẽtaegüxü̃ rü nhanagürügü Ngechuchuxü̃: —Pa Ngúexẽẽruü̃x, cuxü̃ tadauxchaü̃ na cunaxüxü̃ i wüxi i cua̱xruü̃ i mexü̃ i Tupanaãrü poramaã cuxüxü̃ —nhanagürügü.
39 Rü Ngechuchu nanangãxü̃, rü nhanagürü: —Nhaã duü̃xü̃gü i chixecümagüxü̃ rü tama jaxõgüxü̃ rü naxca̱x ínacagü i wüxi i cua̱xruü̃ i mexü̃ i Tupanaãrü poramaã üxü̃. Notürü jema cua̱xruü̃ ga nuxcümaxü̃cü ga Tupanaãrü orearü uruü̃ ga Jonaxü̃ ngupetüxü̃xü̃xĩca tátama nadaugü. Rü taxuü̃táma i to i cua̱xruü̃ nüxü̃ tadauxẽẽ i nhaã duü̃xü̃gü.
40 —Rü jexgumarüü̃ ga Jona ga tamaẽ̱xpü̱x ga ngunexü̃ rü tamaẽ̱xpü̱x ga chütaxü̃ choxni ga taxü̃ ga barejaãnüwa na najexmaxü̃ rü wenaxãrü na nangóxü̃, rü ngẽxgumarüü̃ tá ta nixĩ i chama i tamaẽ̱xpü̱x i ngunexü̃ rü tamaẽ̱xpü̱x i chütaxü̃ i chatáxü̃wa changẽxmaxü̃. Notürü wena táxarü chango̱x.
41 —Rü ngẽxguma naãneãrü gu̱xgu rü Tupana rü nhaã duü̃xü̃güna nacaxgu i norü pecaduchiga, rü nuxcümaxü̃güxü̃ ga Níniwecü̱̃ã̱x ga duü̃xü̃gü rü tá inachigü. Rü Tupanape̱xewa tá ínanaxuaxü̃gü i nhaã duü̃xü̃gü i nhu̱xma maxẽxü̃. Jerü nümagü ga Níniwecü̱̃ã̱x rü nüxü̃ narüxoe ga nacümagü ga chixexü̃ ga jexguma Jona namaã nüxü̃ ixuxgu ga Tupanaãrü ore. Notürü nhu̱xma nuã petanüwa nangẽxma i wüxi i Jonaãrü jexera ixĩxü̃.
42 —Rü ngẽxguma naãneãrü gu̱xgu rü Tupana rü nhaã duü̃xü̃güna nacaxgu i norü pecaduchiga, rü ngĩma ga nuxcümaxü̃cü ga Chabáaneãrü ãẽ̱xgacü rü tá iichi. Rü tá íinaxuaxü̃ i nhaã duü̃xü̃gü i nhu̱xma maxẽxü̃. Jerü ngĩma rü jaxü̃waxüchi ne ixũ na ãẽ̱xgacü ga Charumáũxü̃ naxĩnüxü̃ca̱x ga nhuxãcü poraãcü nüxü̃ na nacua̱xüchixü̃. Notürü nhu̱xma nuã petanüwa nangẽxma i wüxi i Charumáũãrü jexera ixĩxü̃.
Ṉg̱oxo ga taeguxü̃chiga
43 12:43-44 —Rü ngẽxguma wüxi i ṉg̱oxo rü wüxi ja jatüwa ínaxũũxgu, rü dauxchitawa i ngextá taxúema íxãpataxü̃wa rü nu ne nanaxũmare. Rü naxca̱x nadau na ngexta na nangü̃xü̃ca̱x. Rü ngẽxguma taxuxguma nüxü̃ ijangauxgu na ngexta nangü̃ẽ́gaxü̃, rü nagu narüxĩnü na wena nataeguxü̃ naxca̱x ja jima jatü ga noxri nawa ínaxũxũchirécü. Rü ngẽxguma nataegugu, rü nüxü̃ inajangau ja jima jatü na wüxi ja ĩ ja ngẽãcúne rü mexẽẽ́ne rü meã nabixichinerüü̃ na jiĩxü̃.
44 Nüü̃ nadau 12:43
45 —Rü ngẽma ṉg̱oxo rü ínixũ rü naxca̱x najadau i to i 7 i ṉg̱oxogü i norü jexera i chixexü̃. Rü guxü̃ma i ngẽma rü jima jatügu najachocu, rü ngẽxma naxãchiü̃gü. Rü ngẽxguma ja jima jatü rü noxriarü jexera nachixe. Rü ngẽxgumarüü̃ tá ta nüxü̃ naxüpetü i nhaã duü̃xü̃gü i chixecümagüxü̃ —nhanagürü ga Ngechuchu.
Ítangugü ga Ngechuchuarü mama rü naẽneẽgü
46 Rü jexguma duü̃xü̃gümaã íjadexajane ga Ngechuchu, rü jéma tangu ga naẽ rü naẽneẽgü. Rü ĩpataarü düxétügu tarücho, rü Ngechuchumaã tidexagüchaü̃.
47 Rü wüxi ga duü̃xü̃ Ngechuchumaã nüxü̃ nixu, rü nhanagürü: —Jéa düxétüwa tangẽxma ja cue rü cueneẽgü, rü cumaã tidexagüchaü̃ —nhanagürü nüxü̃.
48 Notürü Ngechuchu nanangãxü̃ ga jema duü̃xü̃ ga namaã nüxü̃ ixuxü̃ ga jema ore, rü nhanagürü nüxü̃: —¿Texé tixĩ ja chaue? ¿Rü texé tixĩ ja chaueneẽgü? —nhanagürü.
49 Rü jexguma ga Ngechuchu rü norü ngúexü̃güxü̃ naxuneta, rü nhanagürü: —Dücax, daxe tixĩ ja chaue, rü daagü nixĩ ja chaueneẽgü.
50 —Erü guxãma ja texé ja naxǘxe i Chaunatüarü ngúchaü̃, rü jíxema tixĩ ja chaueneẽ rü chaueja̱x rü chaue —nhanagürü ga Ngechuchu.
