Mateu 13:1-58
13 Rü jematama ngunexü̃gu ga Ngechuchu rü ínaxũxũ nawa ga guma ĩ ga nagu napexü̃ne. Rü naxtaxaãnacüwa najarüto.
2 Rü muxü̃ma ga duü̃xü̃gü rü jéma naxca̱x nangutaque̱xegü. Rü jemaca̱x düxwa wüxi ga nguegu nixüe ga Ngechuchu, rü guma nguewa narüto. Rü guxü̃ma ga duü̃xü̃gü rü jexma naxnecüte̱xegu nachigü.
3 Rü jexguma ga Ngechuchu rü muxü̃ma ga ore ga cua̱xruü̃wa nanangúexẽẽ ga duü̃xü̃gü. Rü norü ngu̱xẽẽtaewa rü nhanagürü: —Rü wüxi ga jatü ga toecü rü trigumaã nanagüane.
4 —Rü jexguma trigumaã nagüaneãgu, rü nhuxre ga guma trigu rü namacüwagu naji. Rü ínangugü ga werigü, rü nanawecu.
5 —Rü náĩgü ga trigu rü nutatanügu naji ga ngextá ínachixcaxü̃wa ga waixü̃mü. Rü paxa narüxügü ga guma trigu, jerü ga waixü̃mü rü tama najaxcü.
6 —Rü jexguma nangunagügu ga üa̱xcü, rü narüṉg̱ẽxgü ga guma trigu. Rü najue jerü tama poraãcü nixãma̱xã.
7 —Rü náĩgü ga trigu rü toranecügu naji. Rü jexguma najaegu ga toragü, rü guma triguxü̃ inawocu, rü nanadai.
8 —Notürü náĩgü ga trigu rü mexü̃ ga waixü̃mügu naji. Rü jexguma najaegu rü muxü̃ma ga trigu nawa ínanguxuchi. Rü nümaxü̃ rü wüxireewa rü 100 pü̱xü ínanguxuchi ga norü o, rü náĩreegüwa rü 60, rü náĩreegüwa rü 30.
9 —Rü jíxema ãchi̱xẽgüxe, ¡rü nagu tarüxĩnüẽ i ngẽma ore! —nhanagürü.
Ṯacüca̱x nixĩ ga jema ore ga cua̱xruü̃gügu ixuxü̃
10 Rü jexguma ga norü ngúexü̃gü rü Ngechuchuca̱x naxĩ, rü nüxna nacagüe, rü nhanagürügü: —Pa Corix, ¿Tü̱xcüü̃ i cua̱xruü̃gügu cujaxuãcüma cunangúexẽẽxü̃ i nhaã duü̃xü̃gü? —nhanagürügü.
11 Rü Ngechuchu nanangãxü̃, rü nhanagürü nüxü̃: —Tupana rü pexü̃xĩcatama nüxü̃ nacua̱xẽẽ i ngẽma ẽxü̃guxü̃ na nhuxãcü ãẽ̱xgacü jiĩxü̃ i nümax. Notürü nüma i togü i duü̃xü̃gü rü tama nüxü̃ nüxü̃ nacua̱xẽẽ i ngẽma.
12 —Rü texé ja aixcuma naga ĩnüxẽ i chorü ore, rü Tupana rü jexeraãcü tá tüxü̃ nüxü̃ nacua̱xẽẽ. Rü ngẽmaãcü tá tüxü̃́ nangẽxma i taxü̃ i cua̱x. Notürü texé ja tama naga ĩnüxẽ i nhaã ore rü Tupana tá tüxna nanajaxu i ngẽma íraxü̃ i cua̱x i tüxü̃́ ngẽxmachiréxü̃.
13 —Rü ngẽmaca̱x nixĩ i ore i cua̱xruü̃maã chanangúexẽẽxü̃ i ngẽma duü̃xü̃gü. Erü nümagü rü woo nüxü̃ nadaugügu, rü nhama tama nüxü̃ nadaugüxü̃rüü̃ nixĩgü. Rü woo nüxü̃ naxĩnüẽgu, rü nhama tama nüxü̃ naxĩnüẽxü̃rüü̃ nixĩgü. Rü tama nüxü̃ nacua̱xgüéga.
14 —Rü aixcuma ngẽma duü̃xü̃güchiga nixĩ ga jema Tupanaãrü ore ga nuxcümaxü̃cü ga norü orearü uruü̃ ga Ichaía nüxü̃ ixuxü̃ ga nhaxü̃:“Rü ngẽma duü̃xü̃gü rü tá aixcuma nüxü̃ naxĩnüẽ, notürü tãũxü̃táma nüxü̃ nacua̱xgüéga i ṯacüchiga na jiĩxü̃ i ngẽma nüxü̃ naxĩnüẽxü̃. Rü aixcuma tá nüxü̃ nadaugü, notürü tãũxü̃táma nüxü̃ nacua̱xgü na ṯacüchiga jiĩxü̃ i ngẽma nüxü̃ nadaugüxü̃.
15 Erü ngẽma duü̃xü̃gü rü tãũxü̃táma nüxü̃ nacua̱xgüchaü̃ i chorü ore, rü naxchaxwa tá nügü narütütamachi̱xẽgü rü tá naxchaxwa napexetügü. Rü ngẽmaãcü tá nanaxügü na tama nüxü̃ nadaugüxü̃ca̱x i ngẽma mexü̃ i naxca̱x chaxüxü̃, rü tama nüxü̃ naxĩnüẽxü̃ca̱x i chorü ore, rü tama nüxü̃ nacua̱xgüxü̃ca̱x na nhuxãcü chama chanaxwa̱xexü̃ãcüma na namaxẽxü̃, rü tama chauxca̱x nadaugüxü̃ca̱x na chanamaxẽxẽẽxü̃ca̱x”,
nhanagürü.
16 Rü nhanagürü ta ga Ngechuchu: —Notürü pemax, Pa Chorü Ngúexü̃güx, rü petaãẽgü erü pexetügümaãtama nüxü̃ pedaugü i ngẽma chaxüxü̃ rü pexmachi̱xẽmaãtama nüxü̃ pexĩnüẽ i chorü ore.
17 —Rü aixcuma pemaã nüxü̃ chixu rü muxũchixü̃ ga nuxcümaxü̃güxü̃ ga Tupanaãrü orearü uruü̃gü rü muxũchixü̃ ga duü̃xü̃gü ga imecümaxü̃, rü nüxü̃ nadaugüchaü̃ i ngẽma nhu̱xma chauxü̃tawa nüxü̃ pedaugüxü̃. Notürü tama nüxü̃ nadaugü. Rü nüxü̃ naxĩnüẽchaü̃ i ngẽma ore i nhu̱xma chauxü̃tawa nüxü̃ pexĩnüẽxü̃. Notürü tama nüxü̃ naxĩnüẽ —nhanagürü.
Ngechuchu rü meã nanango̱xẽẽ ga jema ore ga toecüchigagu jaxuxü̃
18 Rü nhanagürü ta ga Ngechuchu: —¡Dücax, iperüxĩnüẽ na nhuxũ nhaxü̃chiga jiĩxü̃ i ngẽma ore i cua̱xruü̃ i toecüchiga!
19 —Rü guma trigu ga namagu j̱ixü̃nerüü̃ tixĩgü ja jíxema nüxü̃ ĩnüẽxẽ i ore i mexü̃ na nhuxãcü ãẽ̱xgacü jiĩxü̃ ja Tupana notürü tama nüxü̃ cua̱xgüxe i nhuxũ nhaxü̃chiga na jiĩxü̃ i ngẽma ore. Rü tümaxü̃tawa nangu i Chataná, rü tüxü̃ nüxü̃ inajarüngümaẽxẽẽ i ngẽma ore i tümaãẽwa ngẽxmachiréxü̃.
20 —Rü guma trigu ga nutatanügu j̱ixü̃nerüü̃ nixĩ i ngẽma duü̃xü̃gü i nüxü̃ ĩnüẽxü̃ i Tupanaãrü ore rü taãẽãcüma najauxgüxü̃.
21 —Notürü ngẽma na tama aixcuma nagu naxĩnüẽxü̃ i ngẽma ore, rü paxaãchitama najaxõgü, rü jixcüra ngẽxguma ngẽma oregagu guxchaxü̃gü nüxü̃ üpetügu rü e̱xna duü̃xü̃gü nachi aiegu, rü ínanata̱xgü i ngẽma ore.
22 —Rü guma trigu ga toranecügu j̱ixü̃nerüü̃ nixĩ i ngẽma duü̃xü̃gü i Tupanaãrü orexü̃ ĩnüẽxü̃ rü jaxõgüxü̃. Notürü nhama i naãneãrü ngẽmaxü̃güca̱x oegaãẽgüxü̃, rü ngẽmaguama rüxĩnüẽxü̃, rü düxwa nüxü̃ inajarüngümaẽxü̃ i ngẽma ore. Rü guxü̃ma i ngẽma rü Tupanaãrü orexü̃ nüxü̃ narüxoxẽẽ na tama aixcuma meã Tupanawe naxĩxü̃ca̱x i ngẽma duü̃xü̃gü.
23 —Notürü guma trigu ga mexü̃ ga waixü̃mügu j̱ixü̃nerüü̃ nixĩ i ngẽma duü̃xü̃gü i nüxü̃ ĩnüẽxü̃ i Tupanaãrü ore, rü nüxü̃ cua̱xgüxü̃ i ṯacüchiga na jiĩxü̃, rü naga ĩnüẽxü̃ rü meã naxca̱x maxẽxü̃. Rü tümáxẽ rü guma trigu ga 100 pü̱xü nawa ínguxuchinerüü̃ tixĩ. Rü tümáxẽ rü guma 60 pü̱xü nawa ínguxuchinerüü̃ tixĩ. Rü tümáxẽ rü guma 30 pü̱xü nawa ínguxuchinerüü̃ tixĩ —nhanagürü ga Ngechuchu.
Cua̱xruü̃ ga chixexü̃ ga natüane ga trigutanügu toxü̃chigagu ixuxü̃
24 Rü Ngechuchu rü to ga ore ga cua̱xruü̃xü̃ duü̃xü̃gümaã nixu, rü nhanagürü: —Rü ngẽma Tupana na ãẽ̱xgacü ixĩxü̃, rü wüxi ga jatü ga mexü̃ ga trigu naãnegu tocürüü̃ nixĩ.
25 —Notürü jexguma ínapejane rü wüxi ga norü uwanü ga nachi aixü̃ rü jéma naxũ. Rü naẽchita jexma trigunecügu najatogü ga chixexü̃ ga natüane. Rü nhu̱xmachi ínixũ.
26 —Rü jexguma naxügügu ga trigu rü najaegu rü jexwacax jaxo̱xgu, rü jema natüane rü ta nango̱x.
27 —Rü jexguma ga jema jatüarü duü̃xü̃gü, rü namaã nüxü̃ najarüxugü, rü nhanagürügü:
“Pa Corix, cuma rü cuanegu rü triguxicachire̱x ngẽxma cuto. ¿Notürü nhuxãcü i nhu̱xma rü chixexü̃ i natüane rü ta ngẽ́ma naxügüxü̃?” nhanagürügü.
28 —Rü jexguma ga jema naãneãrü jora, rü nhanagürü nüxü̃:
“Maneca wüxi i chorü uwanü i chauchi aixü̃ nixĩ i ngẽ́ma ngexü̃ wagüxü̃” nhanagürü. Rü jexguma ga norü duü̃xü̃gü rü nüxna nacagü, rü nhanagürügü:
“Pa Corix, ¿cunaxwa̱xexü̃ na tanaw̱oxü̃xü̃ i ngẽma chixexü̃ i natüane?” nhanagürügü.
29 —Notürü nüma ga norü cori rü nhanagürü nüxü̃ ga jema norü duü̃xü̃gü:
“¡Nüẽ́tama ngẽ́ma nangẽxmagü! Erü ngẽxguma chi penaw̱oxü̃xgu, rü ngürüãchi trigumaã chi ta penangauxẽẽ na penaw̱oxü̃xü̃.
30 —Rü narümemaẽ nixĩ i nüẽ́tama ngẽ́ma najae nhu̱xmatáta triguarü buxgüwa nangu. Rü ngẽxguma rü ngẽ́ma tá chanamugü i chorü puracütanüxü̃, rü tá nanaw̱oxü̃xira i ngẽma chixexü̃ i natüane. Rü tá ínanagoxü̃cüta, rü nhu̱xmachi tá ínanagu. Rü ngẽmawena tá najabuxgü i trigu, rü naxchiü̃gu tá choxü̃́ namaã nanguxü̃gü” nhanagürü.
Cua̱xruü̃ ga motachachiregu ixuxü̃
31 Rü Ngechuchu rü to ga ore ga cua̱xruü̃xü̃ duü̃xü̃gümaã nixu, rü nhanagürü: —Rü ngẽma Tupana na ãẽ̱xgacü ixĩxü̃, rü wüxi ja motachachire ja wüxi ja jatü naãnegu toxü̃nerüü̃ nitachigü.
32 —Rü woo naxíraxü̃chichire̱x ja jima naxchire, notürü ngẽxguma naxüxgu rü naja̱xgu, rü wüxi i nanetü i taetaxü̃ nixĩ. Rü ngẽmaca̱x i werigü rü natanüwa naxĩ, rü ngẽxma najarüxüxchiãü̃gü —nhanagürü.
Cua̱xruü̃ ga põũãrü puxẽẽruü̃gu ixuxü̃
33 Rü Ngechuchu rü to ga ore ga cua̱xruü̃xü̃ duü̃xü̃gümaã nüxü̃ nixu, rü nhanagürü: —Rü ngẽma Tupana na ãẽ̱xgacü ixĩxü̃, rü nhama põũãrü puxẽẽruü̃ i íraxü̃rüü̃ nixĩ na guxü̃wama nanguxü̃. Rü ngẽxguma wüxi i ngecü rü taxüraxü̃ i ngĩrü põũchara namaã üéü̃gu, rü ngẽma põũãrü puxẽẽruü̃ rü woo naxíra rü najapuxẽẽ i guxü̃ma i ngĩrü põũchara —nhanagürü ga Ngechuchu.
Cua̱xruü̃gu ixuxü̃ ga oremaã nidexa ga Ngechuchu na janguxẽẽãxü̃ca̱x ga Tupanaãrü ore
34 Rü guxü̃ma ga jema ore ga Ngechuchu duü̃xü̃gümaã nüxü̃ ixuxü̃, rü cua̱xruü̃gu jaxuãcüma namaã nüxü̃ nixu. Rü jemaãcüxicatama nixĩ ga namaã nüxü̃ jaxuxü̃.
35 Rü jemaãcü nanaxü ga Ngechuchu na janguxẽẽãxü̃ca̱x ga jema Tupanaãrü ore ga nuxcümaxü̃cü ga norü orearü uruü̃ ga Ichaía ümatüxü̃ ga nhaxü̃:“Chama rü cua̱xruü̃gu ixuxü̃ i oremaã tá duü̃xü̃gümaã chidexa. Rü tá namaã chanango̱xẽẽ i ngẽma cua̱x i ẽxü̃guxü̃ ga jexguma noxri naãne ixügügumama iicúxü̃”,
nhaxü̃.
Ngechuchu nanango̱xẽẽ na ṯacüchiga jiĩxü̃ ga jema cua̱xruü̃ ga chixexü̃ ga natüane ga trigutanügu toxü̃chigagu ixuxü̃
36 Rü Ngechuchu ínajamugü ga duü̃xü̃gü, rü guma ĩ ga nagu napexü̃negu naxücu. Rü norü ngúexü̃gü rü jéma naxca̱x naxĩ, rü nhanagürügü nüxü̃: —Pa Corix, ¡tomaã nango̱xẽẽ na ṯacüchiga jiĩxü̃ i ngẽma chixexü̃ i natüanegu ixuxü̃ i ore! —nhanagürügü.
37 Rü jexguma ga Ngechuchu rü nhanagürü nüxü̃: —Rü jima mexü̃ i trigumaã toecü, rü nüma nixĩ ja Tupana Nane ja duü̃xü̃xü̃ ixĩcü.
38 —Rü ngẽma naãne i nagu natoexü̃, rü nhama i naãne nixĩ. Rü ngẽma mexü̃ i trigu rü ngẽma nixĩ i duü̃xü̃gü i Tupanaãrü duü̃xü̃gü ixĩgüxü̃. Rü ngẽma chixexü̃ i natüane, rü ngẽma nixĩ i duü̃xü̃gü i Chatanáãrü ixĩgüxü̃.
39 —Rü ngẽma norü uwanü i chixexü̃ i natüanemaã naẽchita naãnegu jatoexü̃, rü ngẽma nixĩ i Chataná. Rü ngẽma ngunexü̃ i nagu nabuxuxü̃ i trigu rü naãneãrü gúxchiga nixĩ. Rü ngẽma puracütanüxü̃ i triguarü buxwa puracüexü̃, rü Tupanaãrü orearü ngeruü̃gü i dauxü̃cü̱̃ã̱x nixĩgü.
40 —Rü ngẽxgumarüü̃ i ngẽma chixexü̃ i natüane rü na naw̱oxü̃xü̃ rü nhu̱xmachi na ínaguxü̃, rü ngẽxgumarüü̃ tá ta nixĩ i naãneãrü gu̱xgu.
41 —Rü chama i Tupana Nane na duü̃xü̃xü̃ chiĩxü̃, rü tá chanamu i chorü orearü ngeruü̃gü i dauxü̃cü̱̃ã̱x na nadeãxü̃ca̱x i ngẽma duü̃xü̃gü i chixexü̃ ügüxü̃ rü ngẽma duü̃xü̃gü i ṯoguã̱xü̃ chixexü̃ ügüxẽẽxü̃. Rü tá ínanawoxü̃.
42 —Rü tá üxüxetüwa najawocu. Rü ngẽ́ma tá naxauxe rü tá nixü̃́xchapütagü.
43 —Notürü guxü̃ma i ngẽma duü̃xü̃gü i Tupanaga ĩnüẽxü̃, rü tá üa̱xcürüü̃ inabaixgü i ngextá Tanatü ja Tupana ãẽ̱xgacü íixĩxü̃wa. Rü jíxema ãchi̱xẽgüxe, ¡rü nüxü̃ taxĩnüẽ i ngẽma ore! —nhanagürü.
Cua̱xruü̃ ga taxü̃ ga dĩẽru ga icúxü̃gu ixuxü̃
44 Rü Ngechuchu rü to ga ore ga cua̱xruü̃xü̃ duü̃xü̃gümaã nixu, rü nhanagürü: —Rü ngẽma na norü ãẽ̱xgacü na jiĩxü̃ ja Tupana rü nhama wüxi i uiru i wüxi i naãnegu icúxü̃rüü̃ duü̃xü̃güca̱x namexẽchi. Rü wüxi ja jatü rü ngẽxguma nüxü̃ ijangauxgu i ngẽma uiru, rü paxa wena ngẽma naãnegu najacu̱x. Rü taãẽãcüma namaã nataxe i guxü̃ma i norü ngẽmaxü̃gü na naxca̱x nataxexü̃ca̱x i ngẽma naãne na noxrü jiĩxü̃ca̱x i ngẽma uiru —nhanagürü.
Cua̱xruü̃ ga nuta ga nga̱xãẽruü̃ ga tatanücügu ixuxü̃
45 Rü nhanagürü ta ga Ngechuchu: —Rü duü̃xü̃gü rü nhama wüxi i taxetanüxü̃ i nutagü ja nga̱xãẽruü̃ca̱x dauxü̃rüü̃ nixĩgü na poraãcü naxca̱x nadaugüxü̃ na norü ãẽ̱xgacü jiĩxü̃ ja Tupana.
46 —Rü ngẽma taxetanüxü̃ rü ngẽxguma düxwa nüxü̃ ijangauxgu ja wüxi ja nuta ja nga̱xãẽruü̃ ja guxü̃ãrü jexera mexẽchicü, rü namaã nataxe i guxü̃ma i norü ngẽmaxü̃gü na naxca̱x nataxexü̃ca̱x ja jima nuta ja mexẽchicü, na noxrü jiĩxü̃ca̱x.
Cua̱xruü̃ ga püchagu ixuxü̃
47 —Rü ngẽma Tupana na ãẽ̱xgacü ixĩxü̃ rü wüxi i pücha i naxtaachiüwa namaã ipüchaexü̃ rü nagúxü̃raü̃xü̃ i choxni namaã ijaxuxü̃xü̃rüü̃ nixĩ.
48 —Rü ngẽxguma naxããcuxgu i ngẽma pücha, rü ngẽma püchaetanüxü̃ rü naxnecüpechinügu ínanatúãchigü. Rü ngẽ́ma narütogü rü najadexechi i ngẽma mexü̃ i choxni, rü pexchigu nananucu. Rü ngẽma tama ingṍxü̃ i choxni rü ínanawogü.
49 13:49-50 —Rü ngẽxgumarüü̃ tá nixĩ i ngẽxguma nagu̱xgu i naãne. Erü Tupanaãrü orearü ngeruü̃gü i dauxü̃cü̱̃ã̱x, rü núma tá naxĩ. Rü tá najadexechi i ngẽma mexü̃ i duü̃xü̃gü nüxna i ngẽma ichixexü̃, rü tá üxüxetüwa najawocu i ngẽma duü̃xü̃gü i chixexü̃. Rü ngẽ́ma tá naxauxe, rü tá nixü̃́xchapütagü —nhanagürü ga Ngechuchu.
50 Nüü̃ nadau 13:49
Ngexwacaxü̃güxü̃ rü nuxcümaü̃güxü̃ i ngẽmaxü̃güchiga
51 Rü jexguma ga Ngechuchu rü norü ngúexü̃güna naca, rü nhanagürü: —¿Nüxü̃ pecuáxü̃ jiĩxü̃ na ṯacüchiga jiĩxü̃ i ngẽma pemaã nüxü̃ chixuxü̃? —nhanagürü. Rü nümagü nanangãxü̃gü rü nhanagürügü: —Ngẽmáãcü, Pa Corix, nüxü̃ tacua̱x —nhanagürügü.
52 Rü jexguma ga Ngechuchu rü nhanagürü nüxü̃: —Rü ngẽxguma wüxi i ngúexẽẽruü̃ i ore i mugüwa ngu̱xẽẽtaexü̃ aixcuma nüxü̃ cua̱xgu na nhuxãcü ãẽ̱xgacü jiĩxü̃ ja Tupana, rü nanaxwa̱xe na meã nüxü̃ nacuáxü̃ i ngẽma nuxcümaxü̃xü̃ i Tupanaãrü ore rü nhaã ngexwacaxü̃xü̃ i chorü ore rü ta, ngẽxgumarüü̃ i wüxi i cori i norü taxepatawa duü̃xü̃güca̱x inawéxü̃ i norü ngẽmaxü̃gü i ngexwacaxü̃güxü̃ rü norü ngẽmaxü̃gü i nuxcümaxü̃güxü̃ ta —nhanagürü ga Ngechuchu.
Ngechuchu rü Nacharétuwa najexma
53 Rü jexguma Ngechuchu nüxü̃ rüchaxgu ga jema ore ga cua̱xruü̃güxü̃ na jaxuxü̃, rü inaxũãchi ga jéma.
54 Rü guma ĩãne ga nawa najaxü̃ne ga Nacharétuwa naxũ. Rü guma ĩãneãrü ngutaque̱xepataü̃gu naxücu rü jéma nanangúexẽẽ ga duü̃xü̃gü. Rü jema duü̃xü̃gü rü naḇaixãchiãẽgü namaã ga norü ore. Rü nhanagürügü: —¿Ngextá nüxü̃ nacua̱x i ngẽma ngu̱xẽẽtae? ¿Rü nhuxãcü nüxü̃ nacua̱x na naxüãxü̃ i ngẽma mexü̃gü i taxü̃gü i Tupanaãrü poramaã naxüxü̃?
55 —¿Taux e̱xna i daa jiĩxü̃ ja carpinteru ja Juche nane ja María ngĩne, ja Tiagu rü Juche rü Chimáũ rü Juda naẽneẽ ixĩcü?
56 —¿Rü taux e̱xna i naẽja̱xgü rü nuxma tatanügu naxãchiü̃güxü̃? ¿Rü ngẽxguma i ngextá jiĩxü̃ i najauxãxü̃ i ngẽma nüxü̃ nacuáxü̃? —nhanagürügü.
57 Rü jemaca̱x ga duü̃xü̃gü rü tama nüxü̃́ inarüxĩnüẽchaü̃. Notürü Ngechuchu rü nhanagürü nüxü̃: —Guxü̃ma i togü i duü̃xü̃gü rü namaã nataãẽgü i wüxi i Tupanaãrü orearü uruü̃. Notürü ngẽma orearü uruü̃chiü̃ãnewatama rü duü̃xü̃gü rü tama namaã nataãẽgü —nhanagürü.
58 Rü jema duü̃xü̃gütanüwa rü tama poraãcü nanaxü ga mexü̃gü ga taxü̃gü ga Tupanaãrü poramaã naxüxü̃, jerü tama nüxü̃́ najaxõgüchaü̃ ga jema duü̃xü̃gü.
