Mateu 14:1-36
14 Rü jema ngunexü̃gügu nixĩ ga Gariréaaneãrü ãẽ̱xgacü, ga Erudi rü Ngechuchuxü̃ nacuáchigaxü̃.
2 Rü Erudi rü norü duü̃xü̃gümaã nhanagürü: —Jima nixĩ ja Juã́ũ ga baiü̃xẽẽruü̃ rü marü wena namaxü̃. Rü ngẽmaca̱x nüxü̃́ nangẽxma i pora na naxüãxü̃ i ngẽma mexü̃gü i taxü̃gü i Tupanaãrü poramaã naxüxü̃ —nhanagürü.
3 Rü jema nhanagürü, jerü nümatama ga Erudi rü ü̃paacü norü churaragüxü̃ namu na Juã́ũxü̃ jajauxgüxü̃ca̱x rü curẽtimaã jana̱ĩ̱xgüãcüma pocupataü̃wa nagagüãxü̃ca̱x. Rü jemaãcü nanaxü ga Erudi, jerü jemaãcü naxca̱x íica ga naxma̱x ga Erudía ga naẽneẽ ga Piripi naxma̱xchire̱x ixĩcü.
4 Rü Erudi rü Juã́ũmaã nanu jerü ga Juã́ũ rü nhanagürü nüxü̃: —Tama name na cuxuma̱xmaã cuxãmaxü̃ —nhanagürü.
5 Rü Erudi rü Juã́ũxü̃ nimáxchaü̃, notürü duü̃xü̃güxü̃ namuü̃ jerü guxü̃ma ga duü̃xü̃gü rü nagu narüxĩnüẽ rü aixcuma Tupanaãrü orearü uruü̃ nixĩ ga Juã́ũ.
6 Notürü jexguma norü taunecüarü ngunexü̃wa nanguxgu ga Erudi rü wüxi ga peta naxü. Rü jema petawa rü Erudíaxacü rü íjajüxparachigüxü̃ nape̱xewa ga jema petatanüxü̃. Rü nüma ga ãẽ̱xgacü ga Erudi rü poraãcü norü me nixĩ ga jema naxüxü̃ ga naxãcürücü.
7 Rü jemaca̱x ngĩmaã inaxuneta rü nhanagürü ngĩxü̃: —¡Choxna naxca̱x naca i ṯacü i cunaxwa̱xexü̃, rü aixcuma tá cuxna chanaxã! —nhanagürü.
8 Rü jexguma ga ngĩma rü ngĩẽxü̃tawa ixũ, rü ngĩẽna ijaca, rü ngĩgürügü: —Pa Ma, ¿ṯacü i cunaxwa̱xexü̃ na naxca̱x íchac̱axü̃? —ngĩgürügü. Rü ngĩẽ ngĩxü̃ ingãxü̃, rü ngĩgürügü: —¡Naxca̱x ínaca i Juã́ũ ja baiü̃xẽẽruü̃ẽru! —ngĩgürügü ga ngĩẽ. Rü jexguma ga jema pacü rü ngĩgürügü nüxü̃ ga Erudi: —Chanaxwa̱xe i wüxi ja poratugu choxna cunaxã i Juã́ũ ja baiü̃xẽẽruü̃ẽru —ngĩgürügü.
9 Rü jexguma ga ãẽ̱xgacü ga Erudi rü inajarümaãchi namaã ga jema ore, notürü norü unetaca̱x rü norü petatanüxü̃ca̱x rü tama ngĩxü̃ nawomüxẽẽchaü̃. Rü nanamu ga nhuxre ga norü churaragü na ngĩxna naxãgüãxü̃ca̱x ga jema naxca̱x ínac̱axü̃.
10 Rü jemaãcü pocupataü̃wa nanamu na jéma Juã́ũxü̃ janadaenaãxü̃ca̱x.
11 Rü jemawena wüxi ga poratugu ngĩxü̃tawa nanange ga Juã́ũẽru, rü jema pacüna najaxã. Rü ngĩma rü nhu̱xmachi ngĩẽna ijaxã.
12 Rü jexguma ga Juã́ũãrü ngúexü̃gü rü jéma naxĩ, rü najangegü ga naxü̃ne, rü inajata̱xgü. Rü jemawena rü Ngechuchumaã nüxü̃ najarüxugüe.
Ngechuchu rü nanachibüexẽẽ ga 5000 ga jatügü
13 Rü jexguma jemaxü̃ nacuáchigagu ga Ngechuchu, rü nüxĩcatama wüxi ga nguegu nixüe, rü ínaxũxũ ga jéma. Rü wüxi ga nachica ga taxúema íxãpataxü̃wa naxũ. Notürü ga duü̃xü̃gü rü nüxü̃ nacua̱xgüama ga ngextá na naxũxü̃. Rü ínachoxü̃ ga norü ĩãnegüwa, rü dauxchitagu nawe narüxĩ.
14 Rü jexguma nguewa ínaxüegu ga Ngechuchu rü nüxü̃ nadau ga jema muxü̃ma ga duü̃xü̃gü. Rü nüxü̃́ nangechaü̃tümüü̃gü. Rü nanameẽxẽẽ ga jema duü̃xü̃gü ga iḏaaweexü̃ ga naxca̱x jéma nagagüxü̃.
15 Rü jexguma marü nachütachaü̃gu rü Ngechuchuca̱x naxĩ ga norü ngúexü̃gü, rü nhanagürügü nüxü̃: —Marü nachütachaü̃, rü nhu̱xmachi taxúema nuxma taxãpata i nuã. Rü name nixĩ ícujamugü i nhaã duü̃xü̃gü na ĩãnexãcügü ja ngaicamana ngẽxmagünewa naxĩxü̃ca̱x, rü ngẽ́ma norü õnata̱a̱x jataxegüxü̃ca̱x —nhanagürügü.
16 Notürü ga Ngechuchu rü nhanagürü nüxü̃: —Taxuacüma nawoegu. ¡Rü pematama penachibüexẽẽx! —nhanagürü.
17 Rü nümagü nanangãxü̃gü, rü nhanagürügü: —Notürü nuã rü wüxime̱ẽ̱xpü̱x i põũ rü taxre i choxnixĩcatama toxü̃́ nangẽxma —nhanagürügü.
18 Rü Ngechuchu nanangãxü̃ rü nhanagürü: —¡Nuã chauxü̃tawa penana! —nhanagürü.
19 Rü jexguma ga Ngechuchu rü duü̃xü̃güxü̃ namu na maxẽte̱xewa natogüxü̃ca̱x. Rü nhu̱xmachi nanade ga jema wüxime̱ẽ̱xpü̱x ga põũ rü jema taxre ga choxnigü. Rü dauxü̃gu nadawenüãcüma Tupanana moxẽ naxã, rü nhu̱xmachi inanabücu ga jema põũgü. Rü norü ngúexü̃güna nanana, rü jema duü̃xü̃güxü̃ najanu.
20 Rü guxü̃ma ga jema duü̃xü̃gü rü meãma nachibüe. Rü jemawena rü 12 ga pexchigü nanapaxẽẽgü namaã ga jema põũ rü choxnichipe̱xegü ga íjaxügüxü̃.
21 Rü jema jéma chibüexü̃ rü 5000 ga jatügü nixĩ, notürü ga ngexü̃gü rü buxü̃gü rü tama najaxugü.
Dexáétügu nixũ ga Ngechuchu
22 Rü jemawena ga Ngechuchu rü duü̃xü̃güxü̃ íjamugüjane rü wüxi ga nguegu najachoü̃xẽẽ ga norü ngúexü̃gü na joxni naxtaxaarü tocutüwa naxĩxü̃ca̱x.
23 Rü jexguma duü̃xü̃güxü̃ íjamugüguwena rü guma ma̱xpǘnewa ínaxü̃ãchi ga Ngechuchu na nüxĩca jéma jajumuxẽxü̃ca̱x. Rü jexma nüxĩcatama nachütaü̃.
24 Notürü ga norü ngúexü̃gü rü naxtaxaarü ngãxü̃tüchiügu nixãgü ga jexguma. Rü tacü ga buanecü jexma nüxü̃ naxü, rü poraãcü najuãpe.
25 Rü jexguma marü jangunechaü̃gu rü norü ngúexü̃güwe inaxũãchi ga Ngechuchu. Rü dexáchiüétügu nixũ naxca̱x ga norü ngúexü̃gü.
26 Rü jexguma norü ngúexü̃gü nüxü̃ daugügu ga dexáchiüétügu na jaxũxü̃, rü poraãcü naḇaixãchiãẽgü. Rü norü muü̃maã aita naxüe, rü nhanagürügü: —Wüxi i naxchi̱ximare nixĩ —nhanagürügü.
27 Notürü ga Ngechuchu rü namaã nidexa rü nhanagürü nüxü̃: —¡Peporae! rü chama chixĩ. ¡Rü tãṹ ipemuü̃ẽxü̃! —nhanagürü.
28 Rü jexguma ga Pedru rü Ngechuchumaã nidexa rü nhanagürü: —Pa Corix, ega chi cuma cuixĩgu, ¡rü choxü̃ namu na chama rü ta dexáétügu chixũxü̃ca̱x rü cuxü̃tawa na chaxũxü̃ca̱x! —nhanagürü.
29 Rü Ngechuchu nhanagürü nüxü̃: —Ẽcü ¡nuã naxũ! —nhanagürü. Rü jexguma ga Pedru rü ínaxüe ga nguewa. Rü inanaxügü ga dexáétügu na jaxũxü̃ na Ngechuchuxü̃tawa naxũxü̃ca̱x.
30 Notürü jexguma nüxü̃ jacua̱xãchigu ga na naporaxü̃ ga buanecü rü namuü̃, rü inanaxügü ga na dexáchiügu nanguxü̃. Rü aita naxü rü nhanagürü: —Pa Corix, ¡choxü̃ rüngü̃xẽẽ! —nhanagürü.
31 Rü jexgumatama ga Ngechuchu rü Pedrume̱xẽgu najajauxãchi, rü nhanagürü nüxü̃: —Cuma rü íraruwatama cujaxõ. ¿Rü tü̱xcüü̃ tama aixcuma cujaxõxõchi? —nhanagürü.
32 Rü jexguma nguegu jachoü̃gu ga Ngechuchu rü Pedru, rü nangupetü ga guma buanecü.
33 Rü guxü̃ma ga norü ngúexü̃gü ga nguewa jexmagüxü̃ rü Ngechuchupe̱xegu nacaxã́pü̱xügü rü nüxü̃ nicua̱xüü̃gü, rü nhanagürügü nüxü̃: —Aixcumaxü̃chi cuma nixĩ i Tupana Nane cuiĩxü̃ —nhanagürügü.
Jenecharétuanewa Ngechuchu nanameẽxẽẽ ga iḏaaweexü̃
34 Rü jexguma marü janguü̃gu ga naxtaawa, rü Jenecharétuanewa nangugü rü jéma ínachoü̃.
35 Rü jexguma jema duü̃xü̃gü ga jémacü̱̃ã̱x nüxü̃ icua̱xãchitanügu ga Ngechuchu na jiĩxü̃ ga guma, rü guxü̃ma ga jema naãnewa nanguchiga ga jéma na najexmaxü̃ ga Ngechuchu. Rü jemaca̱x naxü̃tawa nanagagü ga jema duü̃xü̃gü ga iḏaaweexü̃.
36 Rü Ngechuchuxü̃ naca̱a̱xü̃gü na naxchirupechinügumare jangõgügüxü̃ca̱x. Rü guxü̃ma ga jema naxchirupechinügu ingõgüexü̃ rü narümeẽ.
