Mateu 15:1-39
15 Rü Ngechuchuca̱x naxĩ ga nhuxre ga Parichéugü rü ngúexẽẽruü̃gü ga ore ga mugüwa ngu̱xẽẽtaegüxü̃ ga Jerucharéü̃wa ne ĩxü̃. Rü Ngechuchuna nacagü, rü nhanagürügü:
2 —¿Tü̱xcüü̃ i curü ngúexü̃gü rü tama nagu naxĩ i nuxcümaxü̃güxü̃ i tórü o̱xigücüma? ¿Rü tü̱xcüü̃ tama najanguxẽẽgü i ngẽma nacüma na Tupanaca̱x najaxme̱xgüxü̃ naxü̃pa na nachibüexü̃? —nhanagürügü.
3 Notürü ga Ngechuchu rü nüxna naca ga jema Parichéugü rü ngúexẽẽruü̃gü, rü nhanagürü nüxü̃: —¿Rü tü̱xcüü̃ i pema rü nüxü̃ pexo i Tupanaãrü mu na nagu pexĩxü̃ca̱x i pecümagütama?
4 Erü Tupana rü norü orewa rü nhanagürü:“¡Tüxü̃ nangechaü̃ ja cunatü rü cue!”
nhanagürü. Rü ngẽma orewa rü nhanagürü ta:“Rü texé ja tümanatümaã rü e̱xna tümaẽmaã guxchigaxe rü name nixĩ i noxtacüma ngẽmaca̱x tüxü̃ tajuxẽẽ”,
nhanagürü.
5 Notürü pema rü nhaperügügü:
“Marü name ega wüxi ja jatü nanatüxü̃ rü naẽxü̃ nhaxgu: ‘Taxucürüwa chorü ngẽmaxü̃maã cuxü̃ charüngü̃xẽẽ erü guxü̃ma i chorü ngẽmaxü̃ rü marü Tupanana chanaxã’,” nhaxgu.
6 Rü ngẽxguma texé ngẽma nhagügu rü pexca̱x rü marü namexü̃ na tama tümanatüxü̃ rü tümaẽxü̃ tarüngü̃xẽẽxü̃. Rü ngẽmaãcü ipejanaxoxẽẽ i Tupanaãrü mu na nagu pexĩxü̃ca̱x i pecümagütama.
7 Pema nixĩ i duü̃xü̃gü i togüpe̱xewa rü meã pemaxẽnetaxü̃, notürü peãẽwa rü chixexü̃gu perüxĩnüẽ. Rü aixcuma nixĩ ga jema ore ga nuxcümaxü̃cü ga Tupanaãrü orearü uruü̃ ga Ichaía pechiga ümatüxü̃ ga nhaxü̃:
8 “Nhaã duü̃xü̃gü rü naã̱xmaãmare choxü̃ nicua̱xüü̃gü. Notürü naãẽwa rü tama aixcuma chagu narüxĩnüẽ.
9 Rü taxuwama name na ngẽmaãcü notüca̱xma choxü̃ jacua̱xüü̃güxü̃. Rü guxü̃ma i norü ngu̱xẽẽtae rü jatügüarü mugümare nixĩ rü tama aixcuma chorü mu nixĩ”,
nhaxü̃.
10 Rü nhu̱xmachi ga Ngechuchu rü duü̃xü̃güca̱x naca, rü nhanagürü nüxü̃: —¡Meã iperüxĩnüẽ i nhaã chorü ore, rü nagu perüxĩnüẽ!
11 Ngẽma õna i duü̃xü̃gü ngṍxü̃ rü tama ngẽma nixĩ i napecaduã̱xẽẽgüxü̃. Notürü ngẽma ore i chixexü̃ i nüxü̃ jaxuxü̃, rü ngẽma waxi nixĩ i napecaduã̱xẽẽgüxü̃ —nhanagürü.
12 Rü nhu̱xmachi ga norü ngúexü̃gü rü naxca̱x naxĩ, rü nhanagürügü nüxü̃: —¿Pa Corix, tama e̱xna nüxü̃ cucua̱x na Parichéugüãẽwa nangúxü̃ i ngẽma ore i namaã nüxü̃ cuixuxü̃? —nhanagürügü.
13 Notürü nüma ga Ngechuchu rü nhanagürü nüxü̃: —Guxü̃ma i duü̃xü̃gü i tama Chaunatüarü ixĩgüxü̃, rü nüma rü tá nüxü̃ naxo.
14 Rü nüẽ́tama i ngẽma Parichéugü, erü namaãrü cua̱xruü̃gü i ngexetüxü̃rüü̃ nixĩgü. Rü ngẽxguma wüxi i ngexetüxü̃ rü naxrüü̃ ngexetüxü̃maã inacua̱xgu rü ngürüãchi ngẽma taxre rü wüxi i ãxmaxü̃gu tá nügümaã najajicu —nhanagürü.
15 Rü nhu̱xmachi ga Pedru rü Ngechuchuna naca, rü nhanagürü: —¡Tomaã meã nango̱xẽẽ na nhuxũ nhaxü̃chiga jiĩxü̃ i ngẽma ore i tomaã nüxü̃ cuixuxü̃! —nhanagürü.
16 Rü Ngechuchu nanangãxü̃ rü nhanagürü: —¿E̱xna pema rü ta tama nüxü̃ pecua̱xgüéga i ngẽma ore?
17 ¿Tama e̱xna nüxü̃ pecua̱x rü guxü̃ma i ngẽma õna i duü̃xü̃gü ngṍxü̃ rü naãnüwa naxũ, rü jixcaama rü nhu̱xmachi ínaxũxũ?
18 Notürü guxü̃ma i ngẽma ore i duü̃xü̃gü nüxü̃ ixuxü̃ rü naãẽwa nixĩ i ne naxũxü̃. Rü ngẽma ore i chixexü̃ waxi nixĩ i napecaduã̱xẽẽgüxü̃ i ngẽma duü̃xü̃gü.
19 Erü naãẽwa nixĩ i chixexü̃gu naxĩnüẽxü̃ i duü̃xü̃gü. Rü ngẽ́ma ne naxũ na namáẽtaxü̃, rü to i ngexü̃ i ãtexü̃maã na inapexü̃, rü na nangẽãẽmarexü̃, rü na nangĩ́xü̃, rü na jadorata̱xáxü̃, rü na naguxchigawa̱xexü̃.
20 Rü guxü̃ma i ngẽma chixexü̃ waxi nixĩ i duü̃xü̃güxü̃ pecaduã̱xẽẽxü̃. Notürü ngẽma na tama najaxme̱xgüxü̃ naxü̃pa na nachibüexü̃, rü ngẽma rü tama nanapecaduã̱xẽẽ i duü̃xü̃gü —nhanagürü.
Wüxi ga ngecü ga to ga nachiü̃ãnecü̱̃ã̱x ga Ngechuchuaxü̃́ jaxõ̱xcüchiga
21 Rü jexguma jéma inaxũãchigu ga Ngechuchu, rü Tiruane rü Chidã́ũãneãrü ĩãnegüwa naxũ.
22 Rü Ngechuchuxü̃tawa ingu ga wüxi ga ngecü ga Canácü̱̃ã̱x ga Tiruanegu ãchiü̃cü. Rü tagaãcü ngĩgürügü nüxü̃: —Pa Cori Pa Dawítanüxü̃x, ¡cuxü̃́ changechaü̃tümüü̃! Erü chauxacü rü wüxi i ṉg̱oxo ngĩwa nangẽxma i poraãcü ngĩxü̃ chixewexü̃ —ngĩgürügü.
23 Notürü ga Ngechuchu rü tama ngĩxü̃ nangãxü̃. Rü düxwa ga norü ngúexü̃gü rü naxca̱x naxĩ, rü Ngechuchuxü̃ naca̱a̱xü̃gü, rü nhanagürügü: —Pa Corix ¡Ngĩmaã nüxü̃ ixu i ngẽma nge rü íjaxũ, erü tawe ijacaechigü! —nhanagürügü.
24 Rü jexguma ga Ngechuchu rü nhanagürü: —Tupana núma choxü̃ namu na Judéugü i pecaduã̱xgüxü̃ca̱xicatama na chadauxü̃ca̱x —nhanagürü.
25 Notürü ngĩma ga jema nge ga tama Judéu ixĩcü rü Ngechuchuca̱x ijaxũ. Rü nape̱xegu ijacaxã́pü̱xü, rü ngĩgürügü nüxü̃: —Pa Corix ¡choxü̃ rüngü̃xẽẽ! —ngĩgürügü.
26 Notürü Ngechuchu rü nhanagürü: —Tama name i taxacügüna tanapu i norü õna na airugüna naxãxü̃ca̱x —nhanagürü. [Rü jema nhanagürü jerü nümagü ga Judéugü rü nügü nixugüe na Tupanaxãcügüxü̃chi jiĩgüxü̃ rü jema togü rü nhama airugürüü̃ na jixĩgüxü̃.]
27 Notürü ngĩma ga jema nge rü ngĩgürügü: —Rü aixcuma nixĩ i curü ore, Pa Corix, notürü airugü rü ta norü joraarü õnatüchi nangõ̱x —ngĩgürügü.
28 Rü jexguma ga Ngechuchu rü nhanagürü ngĩxü̃: —Pa Ngecüx, aixcumaxü̃chi cujaxõ. Marü tá chanaxü i ngẽma cuma cunaxwa̱xexü̃ —nhanagürü. Rü jexgumatama ngĩxca̱x nitaane ga ngĩxãcü.
Ngechuchu rü nanameẽxẽẽ ga muxü̃ma ga iḏaaweexü̃
29 Rü jemawena ga Ngechuchu rü inaxũãchi ga jema naãnewa, rü naxtaxa ga Gariréacutüwa naxũ. Rü nhu̱xmachi wüxi ga ma̱xpǘnewa ínaxü̃ãchi, rü jéma najarüto.
30 Rü muxü̃ma ga duü̃xü̃gü naxü̃tawa nangugü. Rü jéma naxü̃tawa nanagagü ga duü̃xü̃gü ga ichixeparagüxü̃, rü ngexetügüxü̃, rü tama idexagüxü̃, rü chixechacüügüxü̃, rü muxü̃ma ga togü ga iḏaaweexü̃. Rü Ngechuchupe̱xegu najamugü, rü nüma ga Ngechuchu rü nanameẽxẽẽ.
31 Rü ga duü̃xü̃gü rü poraãcü naḇaixãchiãẽgü ga jexguma nüxü̃ nadaugügu ga nhuxãcü jema noxri tama idexagüxü̃ rü marü na jadexagüxü̃, rü jema noxri chixechacüügüxü̃ rü marü naxca̱x na jataanegüxü̃, rü jema noxri chixeparagüxü̃ rü marü na nameparagüxü̃, rü jema noxri ngexetügüxü̃ rü marü na jadauchigüxü̃. Rü jemaca̱x ga duü̃xü̃gü rü Tupanaxü̃ nicua̱xüü̃gü.
Ngechuchu rü nanachibüexẽẽ ga 4000 ga jatügü
32 Rü nhu̱xmachi ga Ngechuchu rü norü ngúexü̃güca̱x naca, rü nhanagürü nüxü̃: —Choxü̃́ nangechaü̃tümüü̃gü i nhaã duü̃xü̃gü, erü marü tamaẽ̱xpü̱x i ngunexü̃ nuã chauxü̃tawa nangẽxmagü, rü nüxü̃́ nataxuma i norü õna. Rü taxuacüma ngẽmaãcümare nachiü̃wa chanamugü, erü ngürüãchi namagu tá najaturae —nhanagürü.
33 Rü norü ngúexü̃gü rü nhanagürügü nüxü̃: —¿Notürü ngextá tá tanajaxu i õna naxca̱x i guxü̃ma i nhaã duü̃xü̃gü? Erü taxúema nuxma taxãpata i nuã —nhanagürügü.
34 Rü Ngechuchu nüxna naca, rü nhanagürü: —¿Nhuxre i põũ pexü̃́ nangẽxma i pemax? —nhanagürü. Rü nanangãxü̃gü, rü nhanagürügü: —Toxü̃́ nangẽxma i 7 i põũ rü noxretama i choxnixãcügüxicatama —nhanagürügü.
35 Rü nhu̱xmachi ga Ngechuchu rü duü̃xü̃güxü̃ namu na nhaxtüanewa natogüxü̃ca̱x.
36 Rü nanade ga jema 7 ga põũ rü jema choxnigü. Rü Tupanana moxẽ naxã. Rü nhu̱xmachi inanabücu. Rü norü ngúexü̃güna nanana na duü̃xü̃güxü̃ januãxü̃ca̱x.
37 Rü guxü̃ma ga duü̃xü̃gü rü meãma nachibüe. Rü jemawena rü 7 ga pexchigü nanapaxẽẽgü namaã ga jema põũ rü choxnichipe̱xegü ga íjaxügüxü̃.
38 Rü jema jéma chibüexü̃ rü 4,000 ga jatügü nixĩ, notürü ga ngexü̃gü rü buxü̃gü rü tama najaxugü.
39 Rü jemawena ga Ngechuchu rü duü̃xü̃güxü̃ ínimugü. Rü nhu̱xmachi wüxi ga nguegu nixüe, rü Magadáarü naãnewa naxũ.
