Mateu 16:1-28
16 Rü ga Parichéugü rü Chaduchéugü rü Ngechuchuxü̃ ínajadaugü. Rü Ngechuchuna nacagüe na nüxü̃ nüxü̃ nadauxẽẽgüxü̃ca̱x ga wüxi ga cua̱xruü̃ ga Tupanaãrü poramaã naxüxü̃, jerü nüxü̃ naxügüchaü̃mare.
2 Notürü nüma ga Ngechuchu rü nanangãxü̃, rü nhanagürü nüxü̃: —Pema rü jáuanecü rü nhaperügügü:
“Name tá nixĩ i moxü̃ãrü ngunexü̃, erü nadautüweane”, nhaperügügü.
3 Rü ngẽxguma pa̱xmama nadautüweanegu rü poraãcü nacaixanegu, rü:
“Nachixe tá nixĩ i ngunexü̃” nhaperügügü. Pema nixĩ i duü̃xü̃gü i togüpe̱xewa meã pemaxẽnetaxü̃, notürü chixexü̃gu perüxĩnüẽ. Rü pema nüxü̃ pecua̱x na penangugüxü̃ i nhuxgu tá nameãnexü̃ rü nhuxgu tá nachixeanexü̃. Notürü nhu̱xma na janguxü̃ i ngẽma cua̱xruü̃gü ga nuxcüma Tupana pemaã ixunetaxü̃ rü tama nüxü̃ pecua̱xgüéga na ṯacüchiga jiĩxü̃ —nhanagürü.
4 Rü nhanagürü ta ga Ngechuchu: —Nhaã duü̃xü̃gü i chixecümagüxü̃ rü tama jaxõgüxü̃ rü naxca̱x ínacagü i wüxi i cua̱xruü̃ i Tupanaãrü poramaã üxü̃. Notürü jema cua̱xruü̃ ga nuxcümaxü̃cü ga Tupanaãrü orearü uruü̃ ga Jonaxü̃ ngupetüxü̃rüü̃xicatátama nadaugü. Rü jexgumarüü̃ na barejaãnüwa na ínaxũxũxü̃, rü chama rü ichatáxü̃wa tá íchaxũxũ. Rü taxuxü̃táma i to i cua̱xruü̃xü̃ nüxü̃ chadauxẽẽ i nhaã duü̃xü̃gü —nhanagürü. Rü nhu̱xmachi nüxna jéma nixũ ga Ngechuchu, rü inaxũãchi.
Parichéugüarü põũãrü puxẽẽruü̃chiga
5 Rü jexguma naxtaxaarü tocutüwa naxĩxgu ga norü ngúexü̃gü, rü nüxü̃ inajarüngümaẽ na nawemü ta íjangegüxü̃.
6 Rü jexguma ga Ngechuchu rü nhanagürü nüxü̃: —¡Dücax, ipexuãẽgü naxca̱x i Parichéugü rü Chaduchéugüarü põũãrü puxẽẽruü̃! —nhanagürü.
7 Rü jema norü ngúexü̃gü rü inanaxügüe ga nügü na nhagüxü̃: —Ngẽma nhanagürü tüxü̃, erü tama tawemüta ítingegü —nhanagürügü.
8 Notürü ga Ngechuchu rü nüxü̃ nacua̱xama ga nhuxãcü na jadexagüxü̃ ga norü ngúexü̃gü. Rü jemaca̱x nhanagürü nüxü̃: —¿Tü̱xcüü̃,
“Tüxü̃́ nataxu i tawemü” nhaperügügü? Pema rü tama aixcuma pejaxõgü.
9 —¿Tama e̱xna nüxü̃ pecua̱xgüéga rü nüxna pecua̱xãchie ga jema wüxime̱ẽ̱xpü̱x ga põũ ga jema 5,000 ga jatügüca̱x ichabücuxü̃? ¿Rü nhuxre ga pexchi penaxüãcuxü̃ namaã ga jema naxchipe̱xegü ga íjaxügüxü̃?
10 —¿Rü tama e̱xna nüxna pecua̱xãchie ga jema 7 ga põũ ga jema 4,000 ga jatügüca̱x ichabücuxü̃? ¿Rü nhuxre ga pexchi penaxüãcuxü̃ namaã ga jema naxchipe̱xegü ga íjaxügüxü̃?
11 —¿Rü nhuxãcü nixĩ i tama nüxü̃ pecuáxü̃ i tama põũchiga na chidexaxü̃ i ngẽxguma nhachagu:
“¡Ipexuãẽgü naxca̱x i Parichéugü rü Chaduchéugüarü põũãrü puxẽẽruü̃!” nhachagu? —nhanagürü ga Ngechuchu.
12 Rü jexguma ga norü ngúexü̃gü rü nüxü̃ nacua̱xgü ga tama põũãrü puxẽẽruü̃chiga na jadexaxü̃ ga Ngechuchu, notürü Parichéugü rü Chaduchéugüarü ngu̱xẽẽtaechiga na jiĩxü̃ ga na jadexaxü̃.
Pedru nanango̱xẽẽ na Cristu na jiĩxü̃ ga Ngechuchu
13 Rü jexguma Checharéa ga Piripuaneãrü ngaicamana nanguxgu ga Ngechuchu, rü norü ngúexü̃güna naca, rü nhanagürü: —¿Nhuxũ nhaxü̃ i duü̃xü̃gü i chauchiga na texé chiĩxü̃ i chamax? —nhanagürü.
14 Rü nüma ga norü ngúexü̃gü rü nanangãxü̃ rü nhanagürügü: —Nangẽxma i duü̃xü̃gü rü:
“Juã́ũ ja baiü̃xẽẽruü̃ cuixĩ” nhagüxü̃. Rü togü i:
“Ería cuixĩ” nhagüxü̃. Rü togü i:
“Jeremíã cuixĩ” nhagüxü̃. Rü togü rü:
“Wüxi ga nuxcümaxü̃cü ga Tupanaãrü orearü uruü̃ cuixĩ” nhagüxü̃ —nhanagürügü.
15 Rü jexguma ga Ngechuchu rü nüxna naca rü nhanagürü: —¿Rü pema i nhuxũ nhapegüxü̃ choxü̃ na texé chiĩxü̃? —nhanagürü.
16 Rü Chimáũ ga Pedru nanangãxü̃, rü nhanagürü nüxü̃: —Cuma nixĩ i Cristu ja Tupana ja maxü̃cü Nane cuiĩxü̃ —nhanagürü.
17 Rü Ngechuchu nanangãxü̃ rü nhanagürü nüxü̃: —Cuma rü aixcuma cutaãẽ, Pa Chimáũx, Pa Jona Nanex, erü taxuü̃ma i duü̃xü̃ nixĩ i cuxü̃ nüxü̃ cua̱xẽẽxü̃ i ngẽma, notürü Chaunatü ja dauxü̃gucü nixĩ ja cuxü̃ nüxü̃ cua̱xẽẽcü na Nane chiĩxü̃.
18 —Rü chama cumaã nüxü̃ chixu rü cuma rü Pedru cuixĩ. Rü ngẽma cuéga rü “nuta” nhaxü̃chiga nixĩ. Rü cuma tá nixĩ i chorü duü̃xü̃güarü daruü̃ cuiĩxü̃. Rü Chataná rü tãũxü̃táma nüxü̃ narüjexera i ngẽma chorü duü̃xü̃gü.
19 —Rü chama rü tá cuxna chanaxã i chorü ore na duü̃xü̃gümaã nüxü̃ cuixuxü̃ca̱x na nüxü̃ nacua̱xgüxü̃ca̱x na nhuxãcü dauxü̃guxü̃ i naãnewa nangugüxü̃ i ngextá Tupana ãẽ̱xgacü íixĩxü̃wa. Rü jíxema tama cuxü̃́ irüxĩnüẽxẽ i ngẽma ore rü tãũxü̃táma ngẽ́ma tichocu. Notürü jíxema meã cuxü̃́ irüxĩnüẽxẽ i ngẽma ore rü aixcuma ngẽ́ma Tupana ãẽ̱xgacü íixĩxü̃wa tá tangugü —nhanagürü.
20 Rü jexguma ga Ngechuchu rü norü ngúexü̃gümaã nüxü̃ nixu, rü nhanagürü: —¡Taxúemaãtáma nüxü̃ peixu na chama rü Cristu chiĩxü̃! —nhanagürü.
Ngechuchu nanaxunagü ga norü juxchiga
21 Rü jemawena inanaxügü ga norü ngúexü̃gümaã nüxü̃ na jaxuxü̃ ga ṯacü tá nüxü̃ na üpetüxü̃. Rü nhanagürü: —Chama rü Jerucharéü̃wa tá chaxũ, rü ngẽ́ma poraãcü ngúxü̃ tá choxü̃ ningexẽẽgü. Rü choxü̃ tá nima̱xgü i Judéugüarü ãẽ̱xgacügü i jaguã̱xgü rü paigüarü ãẽ̱xgacügü rü ngúexẽẽruü̃gü i ore i mugüwa ngu̱xẽẽtaegüxü̃. Notürü tamaẽ̱xpü̱x i ngunexü̃ ngupetügu rü wena táxarü chamaxü̃ —nhanagürü.
22 Rü jexguma ga Pedru rü nüxĩca noxrüwama Ngechuchuxü̃ naga, rü inanaxügü ga na naxucu̱xẽãxü̃, rü nhanagürü: —Pa Corix, Tupana rü tama nanaxwa̱xe na ngẽmaãcü cuidexaxü̃. Rü tãũxü̃táma ngẽmaãcü cuxü̃ nangupetü i cumax —nhanagürü.
23 Notürü ga Ngechuchu rü Pedruca̱x nadaueguãchi, rü nhanagürü nüxü̃: —¡Choxna ixũgachi, Pa Chatanáx, erü chixexü̃gu choxü̃ cunguxẽẽchaü̃! Rü tama Tupana nagu rüxĩnüxü̃gu curüxĩnü, rü jatügü nagu rüxĩnüxü̃gumare curüxĩnü i cumax —nhanagürü.
24 Rü jexguma ga Ngechuchu rü norü ngúexü̃güxü̃ nhanagürü: —Rü ngẽxguma texé chawe rüxũxchaü̃gu, ¡ẽcü nüxü̃ tarüxo i tümaãrü ngúchaü̃, rü namaã tapora i ngẽma guxchaxü̃gü i tümaca̱x ínguxü̃ i nhama curuchawa tipotaxü̃rüü̃ tüxü̃ ixĩxẽẽxü̃, rü ngẽmaẽ́tüwa chawe tarüxũãma!
25 Erü jíxema tügü maxẽchaxẽẽchaü̃xẽ rü tá taju. Notürü jíxema chauxca̱x júxe rü aixcuma tá tüxü̃́ nangẽxma i maxü̃ i taguma gúxü̃.
26 Rü ¿Ṯacüwa i nüxü̃́ namexü̃ ja wüxi ja jatü ega najauã̱xgu i guxü̃ma i nhama i naãneãrü ngẽmaxü̃gü, notürü ijanatauxẽẽãgu i norü maxü̃? Erü taxucürüwama wüxi ja jatü rü norü dĩẽrumaã naxca̱x nataxe i norü maxü̃.
27 Erü chama i Tupana Nane na duü̃xü̃xü̃ chiĩxü̃ rü wena táxarü núma chaxũ. Rü ngẽxguma rü Chaunatü ja Tupanarüü̃ tá ãẽ̱xgacü chixĩ, rü dauxü̃cü̱̃ã̱x i orearü ngeruü̃gümaã tá íchangu. Rü ngẽxguma tá nixĩ i nüxü̃́ chanaxütanüxü̃ i wüxichigü i duü̃xü̃gü i ngẽma nhuxãcü chauxca̱x na namaxẽxü̃rüü̃ãcüma maxẽxü̃.
28 Rü aixcuma pemaã nüxü̃ chixu rü nangẽxma i nhuxre i duü̃xü̃gü i núma ngẽxmagüxü̃ rü tãũxü̃táma naju nhu̱xmatáta choxü̃ nadaugü na juwa ícharüdaxü̃ rü aixcuma ãẽ̱xgacü ja poracü na chiĩxü̃ —nhanagürü ga Ngechuchu.
