Mateu 17:1-27
17 Rü 6 ga ngunexü̃guwena rü Ngechuchu ínajagagü ga Pedru rü Tiagu rü Juã́ũ ga Tiagueneẽ. Rü nüxĩcatama wüxi ga ma̱xpǘnewa noxrüwama namaã naxũ.
2 Rü jéma jema ngúexü̃güpe̱xewa rü naxüchicüü ga Ngechuchu. Rü üa̱xcürüü̃ nixĩ ga nachametüwa ga na jaj̱auracüüxü̃. Rü naxchiru rü ta üa̱xcüemarüü̃ nixĩ ga na nangóonexẽẽãxü̃.
3 Rü ngürüãchi jéma naxca̱x nango̱xgü ga Muĩsé rü Ería. Rü Ngechuchumaã jéma nidexagü.
4 Rü jexguma ga Pedru rü nhanagürü Ngechuchuxü̃: —Pa Corix, name nixĩ nuã tangẽxmagü. Rü ngẽxguma cunaxwa̱xegu rü tá tanaxü ja tamaẽ̱xpü̱x ja düxenü, rü wüxi ja cuxca̱x, rü náĩ ja Muĩséca̱x, rü náĩ ja Eríaca̱x —nhanagürü.
5 Rü jexguma íjadexajane ga Pedru rü wüxi ga caixanexü̃ ga nangóonexẽẽxü̃ rü natanügu najangaixema. Rü jema caixanexü̃wa inanaxũ ga wüxi ga naga ga nhaxü̃: —Daa nixĩ ja Chaune ja nüxü̃ changechaü̃xü̃chicü rü namaã chataãẽxü̃chicü. ¡Rü naga pexĩnüẽ! —nhanagürü.
6 Rü jexguma jemaxü̃ naxĩnüẽgu ga jema ngúexü̃gü, rü nhaxtüanegu nanangücuchiãchitanü, jerü poraãcü namuü̃ẽ.
7 Notürü ga Ngechuchu rü naxca̱x nixũ, rü nüxü̃ najarüngõgü, rü nhanagürü nüxü̃: —¡Ipechigü rü tãṹ ipemuü̃ẽxü̃! —nhanagürü.
8 Rü jexguma wenaxãrü nadaunagütanügu, rü Ngechuchuxü̃xĩcatama nadaugü rü taxúema ga toguexü̃ nadaugü.
9 Rü jexguma ijanachoü̃gu ga guma ma̱xpǘnewa, rü Ngechuchu najaxucu̱xẽgü ga taxúemaãma na nüxü̃ jaxugüexü̃ca̱x ga jema jéma nüxü̃ nadaugüxü̃, nhu̱xmatáta juwa ínadaxgu rü wena namaxü̃gu.
10 Rü nhu̱xmachi ga jema ngúexü̃gü rü Ngechuchuna nacagü, rü nhanagürügü: —¿Tü̱xcüü̃ i ngẽma ngúexẽẽruü̃gü i ore i mugüwa ngu̱xẽẽtaegüxü̃ rü nhanagürügü:
“Ería tá nixĩ ja nüxĩra cuxü̃pa nuã ũcü?” nhanagürügü.
11 Rü Ngechuchu nanangãxü̃, rü nhanagürü: —Aixcuma nixĩ i Ería na nüxĩra tá núma naxũxü̃ na chauxü̃pa Tupanaca̱x jamexẽẽãxü̃ca̱x i duü̃xü̃gü.
12 Notürü chama pemaã nüxü̃ chixu, rü Ería rü marü núma naxũ, notürü duü̃xü̃gü rü tama nüxü̃ nacua̱xgü na texe jiĩxü̃. Rü jemaca̱x chixri namaã nachopetü. Rü ngẽxgumarüü̃ tá ta nixĩ na chixri tá chamaã nachopetüxü̃ i duü̃xü̃gü —nhanagürü.
13 Rü jexguma ga jema ngúexü̃gü rü nüxü̃ nicua̱xãchitanü ga Juã́ũ ga baiü̃xẽẽruü̃chiga na jiĩxü̃ ga jema Ngechuchu namaã nüxü̃ ixuxü̃.
Ngechuchu rü nanamexẽẽ ga wüxi ga bucü ga ṉg̱oxo nawa jexmacü
14 Rü jexguma duü̃xü̃gü íjexmaxü̃wa nangugügu, rü wüxi ga jatü Ngechuchuca̱x nixũ. Rü nape̱xegu najacaxã́pü̱xü rü nhanagürü nüxü̃:
15 —Pa Corix, ¡nüxü̃ nangechaü̃ ja chaune rü naxca̱x jataanexẽẽ! Erü muẽ̱xpü̱xcüna rü naxãũãẽxü̃, rü poraãcü nüxü̃́ nangu̱x. Rü muẽ̱xpü̱xcüna rü üxüxetügu najanguxẽẽ, rü e̱xna dexágu.
16 —Rü nuã curü ngúexü̃güxü̃tawa chanaga, notürü nümagü rü tama nüxü̃ nacua̱xgü na namexẽẽgüãxü̃ —nhanagürü.
17 Rü jexguma Ngechuchu nanangãxü̃, rü nhanagürü nüxü̃ ga jema duü̃xü̃gü ga jéma jexmagüxü̃: —Pa Duü̃xü̃gü i Tama Jaxõgüxü̃ rü Chixexü̃güx, ¿nhuxguratáta i pemaã chanuxmaxü̃ rü jaxna pemaã chaxĩnüxü̃? ¡Nuã penaga ja jima bucü! —nhanagürü.
18 Rü Ngechuchu nananga ga jema ṉg̱oxo ga guma bucüwa jexmaxü̃. Rü jemaãcü ínanata̱xüchi ga jema ṉg̱oxo. Rü jexgumatama naxca̱x nitaane ga guma bucü.
19 Rü jemawena ga norü ngúexü̃gü rü noxrüwama Ngechuchumaã nidexagü. Rü nüxna nacagüe, rü nhanagürügü nüxü̃: —Pa Corix, ¿tü̱xcüü̃ i toma rü taxuacüma ítanata̱xüchi i ngẽma ṉg̱oxo? —nhanagürügü.
20 Rü Ngechuchu nanangãxü̃, rü nhanagürü nüxü̃: —Pema rü taxuacüma ípenata̱xüchi erü tama aixcuma pejaxõgü. Rü aixcuma pemaã nüxü̃ chixu, rü ngẽxguma chi woo íraruwatama pejaxõgügu, rü chi daa ma̱xpǘnemaã nüxü̃ peixuxgu na jaxũgachixü̃ca̱x, rü chi pega naxĩnü. Rü taxuxü̃ chima pexü̃́ naguxcha ega aixcuma pejaxõgügu.
21 —Notürü nhaãrüü̃ i ṉg̱oxo rü tama ínaxũxü̃ ega tama ixaureãcüma ijumuxẽgu —nhanagürü.
Ngechuchu rü wenaxãrü nanaxunagü ga norü juxchiga
22 Rü jexguma norü ngúexü̃gümaã Gariréaarü naãnegu jaxũxgu ga Ngechuchu, rü norü ngúexü̃gümaã nüxü̃ nixu, rü nhanagürü: —Chama ja Tupana Nane na duü̃xü̃xü̃ chiĩxü̃, rü chixri tá chamaã nachopetü rü ãẽ̱xgacügüna tá choxü̃ namugü i duü̃xü̃gü.
23 —Rü tá choxü̃ nima̱xgü, notürü tamaẽ̱xpü̱x i ngunexü̃guwena rü wena táxarü chamaxü̃ —nhanagürü. Rü jexguma jema orexü̃ naxĩnüẽgu ga norü ngúexü̃gü, rü poraãcü nangechaü̃gü.
Ngechuchu ngĩxü̃ naxütanü ga jema dĩẽru ga tupauca ga taxü̃neca̱x ngĩxü̃ najauxgücü
24 Ngechuchu rü norü ngúexü̃gümaã Caparnáũãrü ĩãnewa naxĩ. Rü jexguma jéma nangugügu rü Pedruxü̃ ínajadaugü ga jema jatügü ga tupauca ga taxü̃neca̱x dĩẽru ngĩxü̃ jauxgüxü̃. Rü Pedruna nacagüe rü nhanagürügü: —¿Jima curü Cori rü tama e̱xna ngĩxü̃ naxütanü i ngẽma dĩẽru i tupauca ja taxü̃neãrü ixĩcü? —nhanagürügü.
25 Rü Pedru nanangãxü̃, rü nhanagürü: —Ngẽmáãcü nanaxütanü —nhanagürü. Rü jixcama ga jexguma ĩxgu naxücuxgu ga Pedru, rü Ngechuchuxira Pedrumaã nidexa, rü nhanagürü nüxü̃: —¿Nhuxũ nhacuxü̃ i cumax, Pa Pedrux, rü ngextá nixĩ i najauxgüãxü̃ i norü dĩẽru i guxü̃ i nachiü̃ãneãrü ãẽ̱xgacügü? ¿Cuxca̱x i nügütanüwatama rü e̱xna togü i duü̃xü̃gütanüwa? —nhanagürü.
26 Rü Pedru nanangãxü̃, rü nhanagürü: —Maneca togü i duü̃xü̃gütanüwa nixĩ i najauxgüãxü̃ —nhanagürü. Rü nhu̱xmachi Ngechuchu nanangãxü̃ rü nhanagürü: —Rü ngẽxguma ngẽmaãcü jixĩgu, rü jixema na Tupanaãrü ixĩgüxü̃ rü taxuü̃ca̱xma tanaxütanügü.
27 —Notürü ngẽma na taxúema tamaã nuxü̃ca̱x, rü chanaxwa̱xe i cujaxütanü i ngẽma dĩẽru. ¡Rü jéa naxtaawa naxũ, rü ngẽ́ma japoxwaxe! ¡Rü ngẽma nüxĩraü̃xü̃ i choxni i cunapoochiü̃ rü naã̱xwa tá nüxü̃ icujangau i wüxi i dĩẽru i nagu mexü̃ na jangutanüxẽẽxü̃ca̱x i chauxca̱x rü cuxca̱x rü ta! ¡Rü tupauca ja taxü̃newa nange i ngẽma dĩẽru, rü jaxütanü! —nhanagürü.
