Mateu 18:1-35
18 Rü jexguma ga norü ngúexü̃gü rü Ngechuchuca̱x naxĩ rü nüxna nacagü, rü nhanagürügü: —¿Pa Corix, texé tá tixĩ ja guxü̃ãrü jexera ixĩxẽ i ngẽma Tupana ãẽ̱xgacü íixĩxü̃wa? —nhanagürügü.
2 Rü jexguma ga Ngechuchu rü wüxi ga buxü̃ca̱x naca, rü norü ngúexü̃güarü ngãxü̃tanügu nanachixẽẽ.
3 Rü nhu̱xmachi nhanagürü nüxü̃: —Dücax, Pa Chorü Ngúexü̃güx, aixcuma pemaã nüxü̃ chixu, rü ngẽxguma tama nüxü̃ perüxoegu i ngẽma na togüarü jexera pegü peixĩgüxẽẽchaü̃xü̃ rü nhu̱xmachi tama nhaã buxü̃rüü̃ pegü íperüxíragu, rü taxucürüwa peichocu i ngextá Tupana ãẽ̱xgacü íixĩxü̃wa.
4 —Rü aixcuma jíxema tügü írüxíraxe rü nhaã buxü̃rüü̃ ixĩxẽ, rü jíxema tá tixĩ ja guxü̃ãrü jexera ixĩxẽ i ngextá Tupana ãẽ̱xgacü íixĩxü̃wa.
5 —Rü texé ja chauégagu meã najaxúxe i wüxi i buxü̃ i nhaãrüü̃ ixĩxü̃ rü choxü̃ nixĩ i tajaxuxü̃.
Naxãũcüma nixĩ na pecadugu inguxü̃
6 —Rü texé ja pecadugu nanguxẽẽ́xẽ i wüxi i nhaã buxü̃gü i choxü̃́ jaxõgüxü̃ rü tümaca̱x rü narümemaẽ chi nixĩ na noxtacüma wüxi ja nuta tümanaãwa najangacuchixü̃, rü nhu̱xmachi ngẽmaãcü taxtüchiüwa tüxü̃ najarütáexü̃ na ngẽxma tajuxü̃ca̱x.
7 —Nhama i naãnecü̱̃ã̱x i duü̃xü̃güca̱x rü wüxi i taxü̃ i ngechaü̃ nixĩ na nangẽxmaxü̃ i muxũchixü̃ i ṯacü i pecadugu najixẽẽxü̃. Rü guxü̃guma tá nangẽxma i ngẽma chixexü̃gü, notürü wüxi i ngechaü̃xü̃chi tá nixĩ naxca̱x i ngẽma jatü i togüxü̃ pecadugu nguxẽẽxü̃.
8 —Rü ngẽmaca̱x i ngẽxguma chi cuxme̱x rü e̱xna cucutü pecadugu cuxü̃ nguxẽẽgu, rü name nixĩ i noxtacüma ícunadae rü jaxü̃gu cujanha. Erü narümemaẽ nixĩ i cuboxme̱xãcüma rü e̱xna cubocutüãcüma na cunajaxuxü̃ i curü maxü̃ na tama guxü̃ne ja cuxme̱xmaã rü e̱xna guxü̃ne ja cucutümaã üxü ja taguma ixoxü̃newa cuita̱xcuchixü̃ca̱x.
9 —Rü ngẽxguma chi cuxetü pecadugu cuxü̃ nguxẽẽgu, rü name nixĩ i cunajaxu rü jaxü̃gu cunanha. Erü narümemaẽ nixĩ i wüxixetümaã na cunajaxuxü̃ i curü maxü̃ na tama guxü̃ne ja cuxetümaã üxü ja ṉg̱oxogü nagu pocuenewa na cuita̱xcuchixü̃ca̱x. [Rü ngẽmaãcü woo cuxü̃́ naguxchagu, notürü name nixĩ i nüxna cuixũgachi i guxü̃ma i ngẽma chixexü̃gü i nagu cunguchaü̃xü̃.]
Cua̱xruü̃ ga carneru ga ijarütaxuxü̃gu ixuxü̃
10 —Rü tama name i nüxü̃ pexoo̱x i wüxi i buxü̃ i nhaãrüü̃ choxü̃́ jaxõxü̃. Erü ngẽma norü daruü̃gü i orearü ngeruü̃gü i dauxü̃cü̱̃ã̱x rü guxü̃guma Chaunatü ja dauxü̃gucüpe̱xewa nangẽxmagü na ngẽ́ma ngẽma buxü̃ẽ́tüwa nachogüxü̃ca̱x.
11 —Rü chama i Tupana Nane na duü̃xü̃xü̃ chiĩxü̃ rü núma chaxũ na chanamaxẽxẽẽxü̃ca̱x i duü̃xü̃gü ijarütauxexü̃.
12 —¿Rü nhuxũ nhapegüxü̃ i pema ega wüxi ja jatü rü nüxü̃́ nangẽxmagu i 100 i carnerugü rü wüxi nüxü̃́ ijarütau̱xgu? ¿Taux e̱xna i naxpüü̃gu namugüãxü̃ i ngẽma 99, rü nhu̱xmachi naxca̱x jadauxü̃ i ngẽma nüxü̃́ ijarütaxuxü̃?
13 —Rü ngẽxguma nüxü̃ ijangaxgu, rü namaã nataãẽxü̃chi i ngẽma norü carneru. Rü woo guxü̃guma namaã nataãẽ i ngẽma 99 i tama ijarütauxexü̃, notürü jexeraãcüxü̃chi namaã nataãẽ i ngẽma wüxi i ijarütaxuxü̃, erü marü nüxü̃ inajangau.
14 —Rü ngẽxgumarüü̃ ta nixĩ ja Penatü ja dauxü̃gucü na tama nanaxwa̱xexü̃ na wüxi i nhaã buxü̃ na ijarütaxuxü̃.
Nhuxãcü tamücüxü̃ na ingechaü̃xü̃chiga
15 —Rü ngẽxguma cueneẽ chixexü̃ cumaã ü̱xgu, rü name nixĩ i nüxĩcatama namaã cuidexa, rü nüxna nüxü̃ cucua̱xãchixẽẽ i ngẽma norü chixexü̃ i cumaã naxüxü̃. Rü ngẽxguma cuga naxĩnügu, rü marü cuxü̃ nanguxü̃ i ngẽma cueneẽ.
16 —Notürü ngẽxguma tama cuga naxĩnügu i ngẽma cueneẽ, rü name nixĩ i naxca̱x cuca i wüxi rü e̱xna taxre i duü̃xü̃gü na nümagü rü ta namaã jadexagüxü̃ca̱x i ngẽma cueneẽ.
17 —Rü ngẽxguma rü ta tama nüxü̃́ inaxĩnügu i ngẽma taxre i duü̃xü̃güarü ore, rü name nixĩ i guxü̃ i jaxõgüxü̃maã nüxü̃ cuixu na ngẽma cueneẽmaã jadexagüxü̃ca̱x. Rü ngẽxguma rü ta tama nüxü̃́ inaxĩnügu i ngẽma jaxõgüxü̃ãrü ore, rü name nixĩ i wüxi i duü̃xü̃ i tama jaxõxü̃rüü̃gu namaã curüxĩnü.
18 —Rü aixcuma pemaã nüxü̃ chixu rü jíxema núma nhama i naãnewa tama pexü̃́ irüxĩnüxẽ i chorü ore rü tãũxü̃táma Tupana ãẽ̱xgacü íixĩxü̃gu tachocu. Notürü jíxema meã pexü̃́ irüxĩnüxẽ i ngẽma ore rü aixcuma ngẽ́ma tá tangu.
19 —Rü pemaã nüxü̃ chixu rü ngẽxguma chi taxre i pema i núma nhama i naãnewa rü wüxigu ṯacüca̱x ípecaxgu i Chaunatü ja dauxü̃gucüxü̃tawa, rü nüma ja Chaunatü rü tá pexna nanaxã.
20 —Erü ngẽma ngextá taxre rü e̱xna tamaẽ̱xpü̱x i duü̃xü̃gü chauégagu íngutaque̱xexü̃wa, rü chama rü ta norü ngãxü̃tanüwa changẽxma —nhanagürü.
21 Rü jexguma ga Pedru rü Ngechuchuca̱x nixũ, rü nüxna naca, rü nhanagürü: —¿Pa Corix, ngẽxguma chaueneẽ chixexü̃ chamaã ü̱xgu, rü nhuxree̱xpü̱xcüna i namexü̃ na nüxü̃́ nüxü̃ changechaü̃xü̃ naxca̱x i ngẽma chixexü̃ i chamaã naxüxü̃? ¿Rü marü namexü̃ i cuxca̱x ega 7 e̱xpü̱xcüna jixĩgu na nüxü̃́ nüxü̃ changechaü̃xü̃? —nhanagürü.
22 Rü Ngechuchu nanangãxü̃ rü nhanagürü: —Tama name i 7 e̱xpü̱xcünaxĩcatama nüxü̃́ nüxü̃ cungechaü̃. Notürü guxü̃gutáma nixĩ i nüxü̃́ nüxü̃ na cungechaü̃xü̃ woo 70 e̱xpü̱xcüna i 7 wa nangu —nhanagürü.
Cua̱xruü̃ ga ãẽ̱xgacüarü duü̃xü̃ ga tama namücüaxü̃́ nüxü̃ ngechaü̃xü̃
23 Rü Ngechuchu rü nhanagürü: —Rü ngẽma Tupana na ãẽ̱xgacü ixĩxü̃, rü nhama wüxi ga nachiü̃ãneãrü ãẽ̱xgacü ga norü duü̃xü̃gü ga nüxü̃́ nangetanügüxü̃maã namexẽẽchaü̃xü̃rüü̃ nixĩ.
24 —Rü jexguma inaxügüãgu ga meã nüxü̃ na jadaugüxü̃ ga jema nüxü̃́ nangetanügüxü̃pane, rü naxü̃tawa nanagagü ga wüxi ga norü duü̃xü̃ ga taxüchicü ga dĩẽru nüxü̃́ ngĩxü̃ ngetanüxü̃.
25 —Notürü ga jema norü duü̃xü̃ rü nangearü dĩẽruã̱x, rü taxuacüma norü cori ga ãẽ̱xgacüaxü̃́ nanaxütanüẽ́ga. Rü jemaca̱x ga jema ãẽ̱xgacü rü norü churaragüxü̃ namu na to ga corixü̃ namaã nataxegüxü̃ca̱x ga jema jatü, wüxigu tümamaã ga naxma̱x rü naxãcügü rü norü jemaxü̃gü, na jema natanü ga dĩẽrumaã naxütanüãxü̃ca̱x ga norü ngetanü.
26 —Rü jexguma ga jema norü duü̃xü̃ rü norü ãẽ̱xgacüpe̱xegu nacaxã́pü̱xü, rü nüxü̃ naca̱a̱xü̃, rü nhanagürü:
“Pa Corix ¡choxü̃ nangechaü̃! Rü marü tá chapuracü, rü tá cuxü̃́ chanaxütanü i guxü̃ma”, nhanagürü.
27 —Rü jema norü ãẽ̱xgacüaxü̃́ nangechaü̃tümüü̃, rü jemaca̱x namaã nüxü̃ nixu ga marü tama nüxü̃́ na naxütanüãxü̃ca̱x ga jema norü ngetanü. Rü nhu̱xmachi ínananguxuchixẽẽ.
28 —Notürü jexgumatama jéma ãẽ̱xgacüxü̃tawa ínaxũũxgu ga jema jatü, rü nüxü̃ inajangau ga wüxi ga namücü ga íraruwatama nüxü̃́ nangetanüxü̃. Rü jema jatü rü nüxna natüxüe, rü nananu̱xnaxã, rü nhanagürü nüxü̃:
“¡Choxü̃́ ngĩxü̃ naxütanü i ngẽma dĩẽru i ngĩxü̃ cungetanücü!” nhanagürü.
29 —Rü jexguma ga jema namücü rü jema jatüpe̱xegu nacaxã́pü̱xü, rü nüxü̃ naca̱a̱xü̃, rü nhanagürü:
“Pa Chamücüx, ¡choxü̃ nangechaü̃! Rü marü tá chapuracü, rü tá cuxü̃́ chanaxütanü i guxü̃ma”, nhanagürü.
30 —Notürü ga jema jatü rü tama nüxü̃ nacuáxchaü̃ ga jema ore. Rü pocupataü̃gu tüxü̃ napocuama nhu̱xmata nüxü̃́ tanaxütanü ga jema tümaãrü ngetanü.
31 —Rü jexguma togü ga jema ãẽ̱xgacüarü duü̃xü̃gü nüxü̃ daugügu ga jema ngupetüxü̃, rü poraãcü naãẽwa nangu̱x ga jema naxüxü̃ ga jema jatü. Rü norü corixü̃tawa naxĩ rü nüxü̃ najarüxugüe ga guxü̃ma ga jema ngupetüxü̃.
32 —Rü jexguma ga jema ãẽ̱xgacü rü nanamu ga norü churaragü na naxü̃tawa nagagüãxü̃ca̱x ga jema jatü. Rü jexguma naxü̃tawa nanguxgu, rü nhanagürü nüxü̃:
“Wüxi i chixexü̃ i chorü duü̃xü̃ cuixĩ. Chama rü cuxü̃́ nüxü̃ changechaü̃ ga jema choxü̃́ cungetanüxü̃, erü choxü̃ cuca̱a̱xü̃ na tama cuxü̃ chapocuxü̃ca̱x.
33 —Rü cuma rü chita nüxü̃́ nüxü̃ cungechaü̃ i ngẽma cumücü i cuxü̃́ nangetanüxü̃, jexgumarüü̃ ga chama rü cuxü̃́ nüxü̃ na changechaü̃xü̃rüü̃ ga jema choxü̃́ cungetanüxü̃”, nhanagürü nüxü̃.
34 —Rü poraãcü nanuxũchi ga jema ãẽ̱xgacü. Rü norü churaragüxü̃ namu na napocugüãxü̃ca̱x ga jema jatü nhu̱xmata guxü̃ nüxü̃́ naxütanü ga jema nüxü̃́ nangetanüxü̃ —nhanagürü ga Ngechuchu.
35 Rü nhu̱xmachi nhanagürü ta: —Rü ngẽxgumarüü̃ tá pemaã nanaxü ja Chaunatü ja dauxü̃gucü i ngẽxguma tama wüxichigü aixcuma pemücügüaxü̃́ nüxü̃ pengechaü̃gügu —nhanagürü.
