Mateu 19:1-30
19 Rü jema nhaxguwena ga Ngechuchu rü inaxũãchi ga Gariréaarü naãnewa. Rü natü ga Judã́ũãrü tocutüwa naxũ ga Judéaarü naãnewa.
2 Rü muxü̃ma ga duü̃xü̃gü nawe narüxĩ, rü nüma ga Ngechuchu rü jéma nanameẽxẽẽ ga jema iḏaaweexü̃.
3 Rü Ngechuchuca̱x naxĩ ga nhuxre ga Parichéugü, rü nüxna nacagü rü nhanagürügü: —¿Cuxca̱x namexü̃ i wüxi i jatü na ínatáxma̱xmarexü̃ ega ṯacü rü chixexü̃ taxü̱xgu ja naxma̱x? —nhanagürügü. Rü jemaãcü nüxna nacagü jerü Ngechuchuxü̃ chixexü̃gu nanguxẽẽgüchaü̃.
4 Rü Ngechuchu nanangãxü̃ rü nhanagürü: —¿Taguma e̱xna nawa pengúe i ngẽma Tupanaãrü ore i ümatüxü̃ i nüxü̃ ixuxü̃ ga noxri Tupana naxü̱xgu ga duü̃xü̃gü, rü jatüxü̃ rü ngecüxü̃ na naxüxü̃?
5 —Rü nhanagürü ga Tupana:“Rü ngẽmaca̱x ja jatü rü tá nanatü rü naẽna nixũgachi na nama̱xmaã inaxã́ũxü̃ca̱x. Rü ngẽmaãcü i ngẽma taxre rü nhama wüxitama i duü̃xü̃rüü̃ tá nixĩgü”.
6 —Rü nhu̱xmachi tama taxre nixĩ, rü wüxitama nixĩ. Rü ngẽmaca̱x taxucürüwa texé nügüna tajaxĩgachitanüxẽẽ i ngẽma taxre i Tupana nügüna mugüxü̃ —nhanagürü.
7 Rü jexguma Ngechuchuna nacagü rü nhanagürügü: —¿Tü̱xcüü̃ nixĩ ga Muĩsé ga duü̃xü̃gümaã nüxü̃ jaxuxü̃ rü ngẽxguma texé tümama̱xü̃ ítáxchaü̃gu rü name nixĩ i wüxi i popera i ta̱xgüpane ngĩxna taxã, rü nhu̱xmachi ngĩxü̃ ítata̱x? nhaxü̃ —nhanagürügü.
8 Rü Ngechuchu nanangãxü̃, rü nhanagürü nüxü̃: —Pegagu nixĩ ga Muĩsé ga tama pexna nachúxãxü̃ na pexma̱xü̃ ípetáxü̃. Jerü nüma nüxü̃ nacua̱x na tama aixcuma pejaxõgüxü̃. Notürü noxriarü ügügu rü tama jemaãcü nixĩ.
9 —Rü chama pemaã nüxü̃ chixu rü tama name na texé tümama̱xü̃ ítáxü̃ ega tama naĩ ja jatümaã nangẽãẽxü̃gagu jixĩgu. Rü ngẽxguma chi jima jatü rü nhu̱xmachi naĩ i ngemaã naxãxma̱xgu, rü chixexü̃ naxü, rü nhama naĩ i ngemaãmare nangẽãẽxü̃rüü̃ nixĩ. Rü texé ja ngĩmaã ãmaxẽ i ngẽma nge i ngĩte ngĩxü̃ íta̱xcü, rü nhama naĩ i ngemaãmare itapexü̃rüü̃ tixĩ —nhanagürü ga Ngechuchu.
10 Rü nhu̱xmachi ga norü ngúexü̃gü rü nhanagürügü nüxü̃: —Ega ngẽmaãcü jixĩgu rü name nixĩ i noxtacüma tama naxãma̱x ja jatü rü tama ixãte i nge —nhanagürügü.
11 Rü Ngechuchu norü ngúexü̃güxü̃ nangãxü̃ rü nhanagürü: —Taxucürüwa guxü̃ma i duü̃xü̃gü nüxü̃ nacua̱x i ṯacüchiga na jiĩxü̃ i ngẽma ngu̱xẽẽtae. Notürü jíxema Tupana tüxü̃ nüxü̃ cua̱xẽẽ́xẽxĩcatama tixĩ ja nüxü̃ cua̱xgüxe.
12 —Rü nangẽxma i nagúxü̃raü̃xü̃ i guxchaxü̃ na tama naxãma̱xü̃ca̱x ja jatü. Erü nümaxü̃ i jatü rü woetama taxucürüwa naxãma̱x erü norü bucüma nangepü̱xüchare. Rü nümaxü̃ i jatü rü taxucürüwa naxãma̱x erü najaxpü̱xücharee. Rü togü tama naxãma̱x erü Tupanaãrü ngúchaü̃xĩcatama naxügüchaü̃. Rü texé ja ngẽmaãcü maxchaü̃xẽ rü marü name i ngẽmaãcü tamaxü̃ —nhanagürü ga Ngechuchu.
Ngechuchu rü meã buxü̃güxü̃ najaxu
13 Rü duü̃xü̃gü rü Ngechuchuxü̃tawa nanagagü ga nhuxre ga buxü̃gü na Ngechuchu nüxü̃ ingõgüxü̃ca̱x rü namaã najumuxẽxü̃ca̱x. Notürü ga Ngechuchuarü ngúexü̃gü rü inanaxügüe ga na jangagüãxü̃ ga jema duü̃xü̃gü ga Ngechuchuxü̃tawa buxü̃güxü̃ gagüxü̃.
14 Notürü ga Ngechuchu rü nhanagürü nüxü̃ ga norü ngúexü̃gü: —Marü name i chauxü̃tawa naxĩ i buxü̃gü. ¡Rü tãṹ i nüxna penachu̱xuxü̃! Erü Tupana ãẽ̱xgacü íixĩxü̃wa rü tümaca̱x nixĩ ja jíxema nhaã buxü̃gürüü̃ meã jaxõgüxe —nhanagürü.
15 Rü nhu̱xmachi ga Ngechuchu rü jema buxü̃güétü naxüme̱x. Rü jemawena inaxũãchi ga jéma.
Wüxi ga ngextü̱xücü ga dĩẽruã̱xü̃chicü Ngechuchumaã nidexa
16 Rü wüxi ga ngextü̱xücü rü Ngechuchuxü̃tawa nangu, rü nüxna naca, rü nhanagürü: —Pa Ngúexẽẽruü̃ ja Mecüx, ¿ṯacü tá chaxüxü̃ na chanajaxuxü̃ca̱x i maxü̃ i taguma gúxü̃? —nhanagürü.
17 Rü Ngechuchu nanangãxü̃ rü nhanagürü nüxü̃: —¿Tü̱xcüü̃ “Mecü” nhacurügü choxü̃? Erü Tupanaxĩcatama nixĩ ja mecü ixĩcü, rü nataxuma i to i mecü ixĩxü̃. Notürü ngẽxguma cunajauxchaü̃gu i maxü̃ i taguma gúxü̃, rü ¡naga naxĩnü i Tupanaãrü mugü! —nhanagürü.
18 Rü jexguma ga guma ngextü̱xücü rü nhanagürü: —¿Ngẽxü̃rüüxü̃ tá nixĩ i Tupanaãrü mugü i naga chaxĩnüxü̃? —nhanagürü. Rü Ngechuchu nanangãxü̃ rü nhanagürü nüxü̃: —¡Tãũxü̃táma cumáẽta, rü tãũxü̃táma naĩ i ngemaã icupe, rü tãũxü̃táma cungĩ́ta̱a̱x, rü tãũxü̃táma doraxü̃ cuixu i togüchiga!
19 —¡Rü tümaga naxĩnü ja cunatü rü cue, rü nüxü̃ nangechaü̃ i cumücügü ngẽma na cugü cungechaü̃xü̃rüü̃! —nhanagürü.
20 Rü jexguma ga guma ngextü̱xücü rü nhanagürü: —Guxü̃ma i ngẽma mugü i nüxü̃ cuixuxü̃ rü woetama chorü bucüma meã chajanguxẽẽ. ¿Rü ṯacü rü to tá chaxü na choxü̃́ nangẽxmaxü̃ca̱x i maxü̃ i taguma gúxü̃? —nhanagürü.
21 Rü Ngechuchu nanangãxü̃ rü nhanagürü nüxü̃: —Ega aixcuma Tupanape̱xewa mecü cuixĩxchaü̃gu, rü name nixĩ i namaã cutaxe i guxü̃ma i curü ngẽmaxü̃gü rü togü i ngearü ngẽmaxü̃ã̱xgüxü̃na cunaxã i ngẽma curü natanü. Rü ngẽxguma tá cuxü̃́ nangẽxma i cuchica i dauxü̃guxü̃ i naãnewa. Rü nhu̱xmachi marü name i chawe curüxũ —nhanagürü.
22 Notürü jexguma jemaxü̃ naxĩnügu ga guma ngextü̱xücü rü poraãcü nangechaü̃, jerü namuãrü dĩẽruã̱xü̃chi.
23 Rü jexguma ga Ngechuchu rü norü ngúexü̃güxü̃ nhanagürü: —Aixcuma pemaã nüxü̃ chixu rü naguxchaxü̃chi nixĩ na wüxi i duü̃xü̃ i dĩẽruã̱xü̃chixü̃ rü Tupana ãẽ̱xgacü íixĩxü̃wa na nanguxü̃.
24 —Rü aixcuma pemaã nüxü̃ chixu rü nhama wüxi i cameru na taxucürüwama wüxi ja ucumaxẽtüwa naxüpetüxü̃ãrü jexera narüguxchamaẽ naxca̱x i wüxi i duü̃xü̃ i dĩẽruã̱xü̃chixü̃ na jaxücuxü̃ i ngextá Tupana ãẽ̱xgacü íixĩxü̃wa —nhanagürü.
25 Rü jexguma jemaxü̃ naxĩnüẽgu ga norü ngúexü̃gü rü poraãcü naḇaixãchiãẽgü. Rü nügüna nacagüe rü nhanagürügü: —¿Rü texé tá e̱xna tixĩ ja najaxúxe i maxü̃ i taguma gúxü̃? —nhanagürügü.
26 Rü Ngechuchu nüxü̃ nadawenü rü nhanagürü nüxü̃: —Duü̃xü̃gü rü taxuacüma nügü namaxẽẽ, notürü Tupanaãxü̃́ rü natauxcha na namaxẽxẽẽãxü̃ —nhanagürü.
27 Rü jexguma ga Pedru rü nhanagürü nüxü̃: —Pa Corix, toma rü marü ítanawogü ga guxü̃ma ga torü jemaxü̃gü na cuwe tarüxĩxü̃ca̱x. ¿Rü ṯacü tá nixĩ i torü natanü i nhu̱xmax? —nhanagürü.
28 Rü Ngechuchu nanangãxü̃ rü nhanagürü nüxü̃: —Aixcuma pemaã nüxü̃ chixu rü ngẽma ngunexü̃ i Tupana nagu nangexwacaxü̃xẽẽxü̃ i guxü̃ma, rü chama rü ãẽ̱xgacü ja tacü tá chixĩ. Rü chorü tochica i mexẽchixü̃wa tá charüto. Rü pema i 12 i chorü ngúexü̃gü na chawe perüxĩxü̃ rü pema rü tá ta pexü̃́ nangẽxma i perü tochicaxü̃ i mexẽchixü̃ i chauxü̃tawa. Rü ngẽ́ma tá perütogü na norü maxü̃chigaca̱x nüxü̃ peicagüxü̃ i guxü̃ma i Judéugü.
29 Rü guxãma ja jíxema tümapata chauxca̱x ítáxe, rü e̱xna tümaẽneẽgü rü tümaẽja̱xgüxü̃ chauxca̱x ítáxe, rü e̱xna tümanatü rü tümaẽxü̃ chauxca̱x ítáxe, rü e̱xna tümama̱x rü tümaxãcügüxü̃ rü tümaãrü naãne chauxca̱x ítáxe, rü 100 e̱xpü̱xcüna i ngẽma noxri tüxü̃́ ngẽxmaxü̃ãrü jexera tá tajaxu. Rü naẽ́tü tá tanajaxu i maxü̃ i taguma gúxü̃.
30 —Notürü muxü̃ma i nümaxü̃ i nhama i naãnewa duü̃xü̃gü wixpe̱xewa ügüxẽẽxü̃, rü dauxü̃guxü̃ i naãnewa rü Tupana tá wixweama nanaxügüxẽẽ. Rü muxü̃ma i nümaxü̃ i nhama i naãnewa duü̃xü̃gü wixweama ügüxẽẽxü̃, rü dauxü̃guxü̃ i naãnewa rü Tupana tá wixpe̱xewa nanaxügüxẽẽ.
