Mateu 2:1-23
2 Rü Ngechuchu rü Judéaanewa jexmane ga ĩãne ga Beréü̃gu nabu ga jexguma Erudi ãẽ̱xgacü ixĩxgu ga jema nachiü̃ãnewa. Rü jexguma nixĩ ga ĩãne ga Jerucharéü̃wa nangugüxü̃ ga nhuxre ga jatügü ga nüxü̃ cua̱xü̃chigüxü̃ ga woramacuriwa ngúexü̃ ga jaxü̃wa ne ĩxü̃ ga üa̱xcü ne ũxü̃wa.
2 Rü duü̃xü̃güna nacagüe, rü nhanagürügü: —¿Ngextá nixĩ i nangẽxmaxü̃ ja jima Judéugüarü ãẽ̱xgacü ja ngexwacax bucü? Toma rü jéama tochiü̃ãnewa nüxü̃ tadau ja norü woramacuri rü ngẽmaca̱x núma taxĩ na nüxü̃ tajarücua̱xüü̃güxü̃ca̱x —nhanagürügü.
3 Rü jexguma jemachigaxü̃ nacua̱xgu ga ãẽ̱xgacü ga Erudi rü poraãcü naxoegaãẽ. Rü guxü̃ma ga duü̃xü̃gü ga Jerucharéü̃cü̱̃ã̱xgü rü ta naxoegaãẽgü.
4 Rü jexguma ga ãẽ̱xgacü ga Erudi rü naxca̱x nangema ga guxü̃ma ga paigüarü ãẽ̱xgacügü rü ngúexẽẽruü̃gü ga ore ga mugüwa ngu̱xẽẽtaegüxü̃. Rü nüxna naca, rü nhanagürü: —¿Ngexta nixĩ i nabuégaxü̃ ja Cristu? —nhanagürü.
5 Rü nümagü nanangãxü̃gü, rü nhanagürügü: —Nuã Judéaanewa ngẽxmane ja ĩãne ja Beréü̃gu tá nixĩ i nabuxü̃. Jerü nuxcümaxü̃cü ga Tupanaãrü orearü uruü̃ rü nachiga nanaxümatü, rü nhanagürü ga jema ore:
6 “Rü Beréü̃ ja ĩãne ja Judéaanewa ngẽxmane, rü jima rü tama wüxi ja ngexnerüǘne ja ĩãnemare nixĩ, erü nagu tá nabu i ngẽma ãẽ̱xgacü i taxü̃ i Cristu. Rü nüma tá nüxna nadau i guxü̃ma i Tupanaãrü duü̃xü̃gü i Judéugü”,
nhanagürü.
7 Rü jexguma ga ãẽ̱xgacü ga Erudi rü bexma naxca̱x naca ga jema jatügü ga nüxü̃ cua̱xü̃chigüxü̃ ga jaxü̃wa ne ĩxü̃. Rü nüxna naca ga ṯacü rü ngunexü̃ na nangóxü̃ ga noxri ga guma woramacuri.
8 Rü nhu̱xmachi ga Erudi rü Beréü̃wa nanamugü ga jema jatügü. Rü nhanagürü nüxü̃: —¡Rü ngẽ́ma pexĩ rü meã naxca̱x pejada̱x i ngẽma õxchana. Rü ngẽxguma nüxü̃ ipejangauxgu rü chamaã nüxü̃ peixu na chama rü ta ngẽ́ma chaxũxü̃ca̱x, na nüxü̃ chajarücua̱xüü̃xü̃ca̱x i ngẽma õxchana! —nhanagürü.
9 Rü jexguma jema orexü̃ naxĩnüẽguwena, rü inaxĩãchi ga jema jatügü. Rü guma woramacuri ga noxri nüxü̃ nadaugücü rü nape̱xegu nixũchigü rü nhu̱xmata jema õxchana ga Ngechuchu íjexmaxü̃ẽ́tüwa nangu. Rü jéma najachaxãchi.
10 Rü jexguma guma woramacurixü̃ nadaugügu ga jema jatügü, rü poraãcü nataãẽgü.
11 Rü nichocu ga guma ĩ ga nawa najexmanewa ga õxchana ga Ngechuchu. Rü õxchanaxü̃ nadaugü, rü naẽ ga Maríaxü̃ rü ta nadaugü. Rü õxchana ga Ngechuchupe̱xegu nacaxã́pü̱xügü, rü nüxü̃ nicua̱xüü̃gü. Rü nhu̱xmachi najawãxna ga norü baúxacügü, rü õxchanana nanaxãmaregü ga uiru rü pumaragü ga paacaxüchixü̃.
12 Rü jemawena, ga jexguma napeejane ga jema jatügü, rü nanegüwa Tupana najaxucu̱xẽgü na tama Erudica̱x nawoeguxü̃ca̱x. Rü jemaca̱x noxtacüma to ga namagu naxĩãcüma nachiü̃ãneca̱x nawoegu.
Ejituanewa nabuxmü
13 Rü jexguma marü íjaxĩxguwena ga jema jatügü rü wüxi ga dauxü̃cü̱̃ã̱x ga Tupanaãrü orearü ngeruü̃, rü nanegüwa Jucheca̱x nango̱x, rü nhanagürü nüxü̃: —¡Naḇaixãchi rü írüda! ¡Rü ípechoxü̃ i nuã namaã i õxchana i Ngechuchu rü naẽ! ¡Rü Ejituanewa pexĩ! ¡Rü ngẽ́ma pengẽxmagü nhu̱xmatáta chama cumaã nüxü̃ chixu na nhuxgu tá cutaeguxü̃! Erü ãẽ̱xgacü i Erudi rü õxchanaca̱x tá nadau na jamáãxü̃ca̱x —nhanagürü nüxü̃.
14 Rü jexguma ga Juche rü naḇaixãchi rü ínarüda. Rü jexgumatama chütacü namaã inaxũãchi ga õxchana ga Ngechuchu rü naẽ. Rü Ejituanewa naxĩ.
15 Rü Ejituanewa najexmagü nhu̱xmata naju̱x ga ãẽ̱xgacü ga Erudi. Rü jemaãcü nangupetü na janguxü̃ca̱x ga Tupanaãrü ore ga nuxcümaxü̃cü ga norü orearü uruü̃ nüxü̃ ixuxü̃ ga nhaxü̃:“Naxca̱x changema ja Chaune rü Ejituanena chanataeguxẽẽ”,
nhaxü̃ ga jema ore.
Erudi nanamu na tüxü̃ naḏaixü̃ca̱x ga õxchanagü
16 Rü jexguma ga ãẽ̱xgacü ga Erudi nüxü̃ cua̱xgu ga to ga namagu na nawoeguxü̃ ga jema jatügü ga nüxü̃ cua̱xü̃chigüxü̃ ga jaxü̃wa ne ĩxü̃, rü poraãcü nanu. Rü Beréü̃wa nanamugü ga norü churaragü na guxü̃ ga jema naãnewa tüxü̃ naḏaixü̃ca̱x ga guxãma ga guxema õxchanagü ga i jatüxe ga jexwacax buexe rü nhu̱xmata taxre ga taunecü tüxü̃́ jexmagüxewa nangu. Jerü jema jatügü ga jaxü̃wa ne ĩxü̃ rü marü nüxü̃ nixugügü rü taxre ga taunecü nixĩ ga noxri na nangóxü̃ ga guma woramacuri.
17 Rü jemaãcü ningu ga ore ga nuxcümaxü̃xü̃ ga Tupanaãrü orearü uruü̃ ga Jeremíã ümatüxü̃ ga nhaxü̃:
18 “Rü Ramáwa nüxü̃ taxĩnüẽ i wüxi i naga i poraãcü ngechaü̃gaãcüma auxexü̃. Rü Raquera ijixĩ i ngĩxãcügüca̱x poraãcü auxcü. Rü taxuacüma ngĩxü̃ tataãẽxẽẽẽ́ga, erü najue i ngĩxãcügü”,
nhanagürü ga jema ore.
19 Notürü jexguma marü naju̱xguwena ga ãẽ̱xgacü ga Erudi, rü Ejituanewa rü wüxi ga dauxü̃cü̱̃ã̱x ga Tupanaãrü orearü ngeruü̃ rü nanegüwa Jucheca̱x nango̱x. Rü nhanagürü nüxü̃:
20 —Pa Juchex, ¡írüda, rü pechiü̃ãneca̱x namaã pewoegu i õxchana i Ngechuchu! Erü marü najue ga jema õxchanaxü̃ ima̱xgüchaü̃xü̃ —nhanagürü.
21 Rü jexguma ga Juche rü ínarüda rü nachiü̃ãneca̱x namaã nataegu ga õxchana rü naẽ.
22 Notürü jexguma Juche nüxü̃ cuáchigagu na Aqueránu ãẽ̱xgacüxü̃ ingucuchixü̃ nanatü ga Erudichicüü ga Judéaanewa, rü namuü̃ ga Juche ga jéma na naxũxü̃. Jerü wüxi ga dauxü̃cü̱̃ã̱x ga Tupanaãrü orearü ngeruü̃ nanegüwa nanaxucu̱xẽ na tama jéma Judéaanewa na naxũxü̃ca̱x. Rü jemaca̱x Gariréaanewa naxũ.
23 Rü jexguma Gariréaanewa nangugügu, rü ĩãne ga Nacharétuwa naxĩ, rü jexma naxãchiü̃gü. Rü jemaãcü nangupetü na janguxü̃ca̱x ga jema ore ga nuxcümaxü̃güxü̃ ga Tupanaãrü orearü uruü̃gü nüxü̃ ixugüxü̃ ga nhaxü̃:“Ngechuchu ja Cristu rü Nacharétucü̱̃ã̱xmaã tá nanaxugü”,
nhaxü̃.
