Mateu 20:1-34
20 —Rü ngẽma Tupana ãẽ̱xgacü íixĩxü̃wa rü nhama wüxi ga uwanecüarü jora ga pa̱xmama norü puracütanüxü̃ ta jadaucürüü̃ nixĩ.
2 Rü jema puracütanüxü̃maã nanamexẽẽ na wüxitachinü ga dĩẽrugu nüxü̃́ na naxütanüãxü̃ca̱x ga wüxichigü ga ngunexü̃gu. Rü nhu̱xmachi naãnewa nanamugü na jéma japuracüexü̃ca̱x.
3 —Rü jixcama ga 9 arü ngoragu rü ínajadau ga ngextá jatügü ga puracüca̱x daugüxü̃ íngutaque̱xegüxü̃xü̃wa. Rü jexma nüxü̃ najangau ga nhuxre ga jatügü ga ngearü puracüã̱xgüxü̃.
4 —Rü nhanagürü nüxü̃:
“¡Ngẽ́ma chorü uwanecüwa pejapuracüe! Rü meã tá pexü̃́ chanaxütanü”, nhanagürü. Rü nümagü rü jéma naxĩ.
5 —Rü jema uwanecüarü jora rü tocuchigu rü wenaxãrü togü ga puracütanüxü̃ ta najadau. Rü tamaẽ̱xpü̱xarü ngoragu ga jáuanecü rü wenaxãrü jexgumarüü̃ ta najadau.
6 —Rü jixcama ga wüxime̱ẽ̱xpü̱xarü ngoragu ga jáuanecü rü wenaxãrü ínajadau ga ngextá jatügü ga puracüca̱x daugüxü̃ íngutaque̱xegüxü̃xü̃wa. Rü jexma nüxü̃ najangau ga nhuxre ga togü ga jatügü ga ngearü puracüã̱xgüxü̃. Rü nhanagürü nüxü̃:
“¿Tü̱xcüü̃ i pema rü nuxã perüchomare i guxü̃ i nhama i ngunexü̃gu, rü tama pepuracüe?” nhanagürü.
7 —Rü nümagü nanangãxü̃gü, rü nhanagürügü nüxü̃:
“Tama tapuracüe erü taxúema toxca̱x tadau na tüxü̃́ tapuracüexü̃ca̱x”, nhanagürügü. Rü jexguma ga jema naãneãrü jora rü nhanagürü nüxü̃:
“¡Pema rü ta ngẽ́ma chorü uwanecüwa pexĩ rü pejapuracüe! Rü meã tá pexü̃́ chanaxütanü”, nhanagürü.
8 —Rü jexguma marü nachütagu rü jema naãneãrü jora, rü naxca̱x naca ga norü puracütanüxü̃ãrü daruü̃, rü nhanagürü nüxü̃:
“¡Naxca̱x naca i ngẽma puracütanüxü̃. Rü nüxĩra nüxü̃́ naxütanü i ngẽma wixwenaxü̃chima ngẽ́ma ĩxü̃, rü nawa tá icujacua̱xẽẽ i ngẽma nüxĩra ngẽ́ma puracüexü̃!” nhanagürü.
9 —Rü jéma naxĩ ga jema puracütanüxü̃ ga wüxime̱ẽ̱xpü̱xarü ngoragu ga jáuanecü puracüwa ĩxü̃. Rü wüxichigü ngĩxü̃ najauxgü ga wüxitachinü ga dĩẽru.
10 —Rü jemawena rü jéma naxĩ ga jema nüxĩrama puracüexü̃ ga puracütanüxü̃. Rü nümagü nagu naxĩnüẽgu rü jexera tá ngĩxü̃ najauxgü ga dĩẽru, notürü nümagü rü ta ngĩxü̃ najauxgü ga wüxitachinütama ga dĩẽru ga wüxichigü.
11 —Rü jexguma ngĩxü̃ najauxgügu rü inanaxügüe ga chixri na jadexagüxü̃ nachigagu ga jema naãneãrü jora.
12 —Rü nhanagürügü:
“Jixema rü guxü̃ i ngunexü̃gu üa̱xcüxetüwa tapuracüe, notürü i nhaã puracütanüxü̃ i wixwenaxü̃chi íngugüxü̃ rü wüxi i ngoratama napuracüe. Notürü ngẽma tüxü̃́ naxütanüãxü̃́ẽ̱xpü̱xtama nüxü̃́ nanaxütanü”, nhanagürügü.
13 —Notürü ga jema uwanecüarü jora nanangãxü̃, rü nhanagürü nüxü̃ ga wüxi ga jema puracütanüxü̃:
“Pa Chamücüx, tama cuxü̃́ changĩ̱x. ¿Tama e̱xna i wüxitachinügu jiĩxü̃ ga chamaã cunamexẽẽxü̃ na cuxü̃́ chanaxütanüxü̃ i ngẽma puracü?
14 —¡Nhaã i curü dĩẽru, rü íixũ! Rü ngẽma puracütanüxü̃ i wüxi i ngoratama puracüexü̃, rü chama nüxna ngĩxü̃ chaxãxchaü̃ i ngẽma cuxna ngĩxü̃ chaxãcüe̱xpü̱x.
15 —¿Tama e̱xna name i ngẽma chama chanaxwa̱xexü̃ãcüma ngĩmaã na chaxüxü̃ i chorü dĩẽru? ¿Rü e̱xna cuixãũxãchi erü ngẽmaãcü chamecüma?” nhanagürü.
16 —Rü jíxema nhu̱xma duü̃xü̃gü wixweama tüxü̃ ügüxẽẽ́xẽ, rü dauxü̃guxü̃ i naãnewa rü Tupana tá wixpe̱xewa tüxü̃ naxügüxẽẽ. Rü jíxema nhu̱xma duü̃xü̃gü wixpe̱xewa tüxü̃ ügüxẽẽ́xẽ rü dauxü̃guxü̃ i naãnewa rü Tupana tá wixweama tüxü̃ naxügüxẽẽ. Erü Tupana rü muxũchiena naxu, notürü noxretama tixĩ ja jíxema tüxü̃ jadexechixe —nhanagürü ga Ngechuchu.
Ngechuchu rü wenaxãrü nanaxunagü ga norü juxchiga
17 Rü jexguma namagu jaxũxgu ga Ngechuchu ga Jerucharéü̃wa na naxũxü̃ rü noxrüwama naxca̱x naca ga jema 12 ga norü ngúexü̃gü, rü nhanagürü nüxü̃:
18 —Pema nüxü̃ pecua̱x na marü ingaicaxü̃ na Jerucharéü̃wa ingugüxü̃. Rü ngẽ́ma rü duü̃xü̃gü rü tá chixri chamaã nachopetü. Rü tá paigüarü ãẽ̱xgacügü rü ngúexẽẽruü̃gü i ore i mugüwa ngu̱xẽẽtaegüxü̃na tá choxü̃ namugü. Rü nümagü rü tá chamaã nanaxuegugü na chajuxü̃ca̱x.
19 —Rü tá to i nachiü̃ãnecü̱̃ã̱xna choxü̃ namugü. Rü ngẽmagü tá nixĩ i chagu idauxcüraü̃güxü̃ rü choxü̃ c̱uaixgüxü̃, rü nhu̱xmachi tá curuchawa choxü̃ nipotagü na ngẽxma chajuxü̃ca̱x. Notürü tamaẽ̱xpü̱x i ngunexü̃guwena rü tá wenaxãrü chamaxü̃ —nhanagürü.
Wüxi ga ngü̃xẽẽca̱x íica ga Tiagu rü Juã́ũãrü mama
20 Rü jéma ijexma ga naẽ ga Tiagu rü Juã́ũ. Rü jema taxre rü Zebedéu nanegü nixĩgü. Rü ngĩma rü Ngechuchuca̱x ijaxũ namaã ga jema taxre ga ngĩnegü. Rü Ngechuchupe̱xegu ijacaxã́pü̱xü, rü wüxi ga ngü̃xẽẽca̱x nüxna ijaca.
21 Rü nüma ngĩxna naca, rü nhanagürü: —¿Ṯacü nixĩ i cunaxwa̱xexü̃? —nhanagürü. Rü ngĩma inangãxü̃ rü ngĩgürügü: —Pa Corix, ngẽxguma ãẽ̱xgacüxü̃ cuingucuchigu rü chanaxwa̱xe i cunamu na wüxi i nhaã chaune rü curü tügünecüwawa na natoxü̃, rü ngẽma to i curü ṯoxwecüwawa na natoxü̃ —ngĩgürügü.
22 Notürü Ngechuchu ngĩxü̃ nangãxü̃ rü nhanagürü: —Pema rü tama nüxü̃ pecua̱x na ṯacüca̱x ípec̱axü̃. ¿Namaxã chi peporaexü̃ i ngẽma ngúxü̃ i tá choxü̃ üpetüxü̃? —nhanagürü. Rü nümagü nanangãxü̃gü rü nhanagürügü: —Ngẽmáãcü namaã tá taporae —nhanagürügü.
23 Rü Ngechuchu nanangãxü̃ rü nhanagürü nüxü̃: —Aixcuma tá nixĩ i chauxrüü̃ ngúxü̃ peingegüxü̃. Notürü ngẽma chorü tügünecüwawa rü chorü ṯoxwecüwawa na perütogüxü̃ca̱x, rü tama cha̱xme̱xwa nangẽxma na pexna chanaxãxü̃. Rü Chaunatüme̱xẽwa nixĩ na nangẽxmaxü̃ i ngẽma, rü nüma tá tüxna nanaxã ja jíxema tümaca̱x íjiĩxẽ —nhanagürü.
24 Rü jexguma jemaxü̃ naxĩnüẽgu ga jema togü ga 10 ga Ngechuchuarü ngúexü̃gü, rü Tiagumaã rü Juã́ũmaã nanuẽ.
25 Notürü Ngechuchu naxca̱x naca rü nhanagürü nüxü̃: —Pema nüxü̃ pecua̱x rü guxü̃ i nachiü̃ãnegüarü ãẽ̱xgacügü rü poraãcü nanamu i norü duü̃xü̃gü. Rü ngẽma ãẽ̱xgacügü i taxü̃gü rü norü duü̃xü̃güarü jora nügü nixĩgüxẽẽ.
26 —Notürü tãũxü̃táma ngẽmaãcü nixĩ i petanüwa. Rü ngẽxguma texé naxwa̱xegu na ãẽ̱xgacü tiĩxü̃ i petanüwa, rü name nixĩ i noxri rü guxããrü ngü̃xẽẽruü̃ tixĩ.
27 —Rü ngẽxguma chi texé i petanüwa naxwa̱xegu na tümamücügüeru na tiĩxü̃, rü name nixĩ i noxri rü guxü̃ma i tümamücügüarü ngü̃xẽẽruü̃ tixĩ.
28 —Jerü chamatama i Tupana Nane na duü̃xü̃xü̃ chiĩxü̃ rü tama togü choxü̃ rüngü̃xẽẽxü̃ca̱x nixĩ i núma chaxũxü̃. Notürü núma chaxũxü̃ na duü̃xü̃güxü̃ charüngü̃xẽẽxü̃ca̱x rü naxca̱x na chajuxü̃ca̱x rü ngẽmaãcü chanaxütanüxü̃ca̱x na muxü̃ma i nümagü rü nüxü̃́ nangẽxmaxü̃ca̱x i maxü̃ i taguma gúxü̃ —nhanagürü.
Ngechuchu nanameẽxẽẽ ga taxre ga ngexetüxü̃
29 Rü jexguma Ngechuchu norü ngúexü̃gümaã Jericúarü ĩãnewa ínachoxü̃gu, rü muxü̃ma ga duü̃xü̃gü nawe narüxĩ.
30 Rü jéma namacüwawa narütogü ga taxre ga ingexetüxü̃. Rü jexguma nüxü̃ naxĩnüẽgu na Ngechuchu jéma üpetüxü̃, rü tagaãcü Ngechuchuna nacagüe, rü nhanagürügü: —Pa Corix, Pa Dawítanüxü̃x, ¡Cuxü̃́ tangechaü̃tümüü̃gü! —nhanagürügü.
31 Rü jema duü̃xü̃gü ga Ngechuchuwe rüxĩxü̃ rü najangagü na ijanangea̱xgüxü̃ca̱x. Notürü nümagü ga jema ingexetüxü̃ rü jexeraãcü Ngechuchuna nacagüe, rü nhanagürügü: —Pa Corix, Pa Dawítanüxü̃x, ¡cuxü̃́ tangechaü̃tümüü̃gü! —nhanagürügü.
32 Rü jexguma ga Ngechuchu rü jexma najachiãchi rü naxca̱x naca ga jema ingexetüxü̃. Rü nüxna naca rü nhanagürü: —¿Ṯacü i penaxwa̱xexü̃ na pexca̱x chanaxüxü̃? —nhanagürü.
33 Rü nümagü nanangãxü̃gü rü nhanagürügü: —Pa Corix, tanaxwa̱xe na toxü̃ cuidauchitanügüxẽẽxü̃ —nhanagürügü.
34 Rü jexguma ga Ngechuchu rü nüxü̃́ nangechaü̃tümüü̃gü, rü naxẽtügügu ningõgü. Rü jexgumatama nidauchigü, rü Ngechuchuwe narüxĩ.
