Mateu 21:1-46
21 Rü jexguma marü jangaicagügu ga Jerucharéü̃wa na nangugüxü̃, rü nawa nangugü ga guma ĩãne ga Bechagué ga Oriwéranecüarü ma̱xpǘneãrü ngaicamana jexmane. Rü Ngechuchu nanamu ga taxre ga norü ngúexü̃gü.
2 Rü nhanagürü nüxü̃: —¡Gua tórü to̱xma̱xtawa ngẽxmane ja ĩãnexãcüwa pexĩ! Rü ngẽxma tá nüxü̃ pejangau i wüxi i cowaru i ngexü̃ i ngẽxma ngaxü̃xü̃ namaã i wüxi i naxãcü i jatüxü̃ i naxü̃tagu irüxã́ũxü̃. ¡Rü pejawẽxü̃, rü nuã chauxca̱x penagagü!
3 Rü ngẽxguma texé pexna caxgu na ṯacüca̱x pejawẽxü̃xü̃, ¡rü tümamaã nüxü̃ peixu rü nhapegügü:
“Torü cori nanaxwa̱xegü, notürü paxa tá nanawoeguxẽẽ”, nhapegügü tüxü̃! —nhanagürü.
4 Rü jema naxüpetü jerü jemaãcü Tupana najanguxẽẽ ga norü ore ga nuxcümaxü̃xü̃ ga norü orearü uruü̃ ümatüxü̃ ga nhaxü̃:
5 “¡Jerucharéü̃cü̱̃ã̱xgümaã nüxü̃ peixu rü nhapegü: ‘¡Dücax ja perü ãẽ̱xgacü ja nuã pexü̃tawa ũcü! Rü nüma rü wüxi i ngẽxü̃rüüxü̃ i duü̃xü̃rüü̃ ínangu, rü wüxi i cowaruacüétügumare naxaunagü’!”
nhanagürü ga jema ore.
6 Rü jexguma ga jema taxre ga norü ngúexü̃gü rü jéma naxĩ, rü nanaxügü ga jema Ngechuchu namaã nüxü̃ ixuxü̃.
7 Rü Ngechuchuxü̃tawa nanagagü ga jema cowarugü. Rü jema norü ngúexü̃gü rü naxchirumaã nanac̱ẖatagü ga jema cowaruxacü, rü nhu̱xmachi ga Ngechuchu rü natagu naxaunagü.
8 Rü jema muxü̃ma ga duü̃xü̃gü ga nawe rüxĩxü̃ rü naxchirumaã najac̱ẖamatanü ga nama. Rü togü rü naĩxã́tü ta nadaü̃gü rü jemamaã najac̱ẖamatanü ga nama.
9 Rü jema duü̃xü̃gü ga nape̱xegu ãgüxü̃, rü jema togü ga wixweama ãgüxü̃, rü tagaãcü nhanagürügü: —¡Namexẽchi ja daa ãẽ̱xgacü ja Dawítanüxü̃! ¡Rü namexẽchi ja jima Tupanaẽ́gagu núma ũcü! ¡Rü cuxü̃ tataxẽẽgü, Pa Tonatü ja Dauxü̃gucüx! —nhanagürügü.
10 Rü jexguma Ngechuchu Jerucharéü̃wa ixücuxgu, rü guxü̃ma ga jema ĩãnecü̱̃ã̱x rü nanaxi̱xãchiãẽgü, rü nhanagürügü: —¿Texe nixĩ ja daa? —nhanagürügü.
11 Rü jema Ngechuchuwe rüxĩxü̃ ga duü̃xü̃gü rü nanangãxü̃gü rü nhanagürügü: —Daa nixĩ ja Tupanaãrü orearü uruü̃ ja Ngechuchu ja Gariréaanewa ngẽxmane ja ĩãne ja Nacharétucü̱̃ã̱x ixĩcü —nhanagürügü.
Ngechuchu rü tupauca ga taxü̃newa ínanawoxü̃ ga duü̃xü̃gü ga jéma taxegüxü̃
12 Rü tupauca ga taxü̃negu naxücu ga Ngechuchu, rü ínanawoxü̃ ga jema jéma ṯacümaã taxegüxü̃ rü naxca̱x taxegüxü̃. Rü nanawoegu ga norü mechagü ga jema duü̃xü̃gü ga jéma dĩẽrumaã taxegüxü̃ rü muxtucugümaã taxegüxü̃.
13 Rü nhanagürü nüxü̃ ga jema duü̃xü̃gü: —Tupanaãrü ore i ümatüxü̃wa rü nhanagürü:“Chapata rü jumuxẽpataü̃ nixĩ”.
Notürü pema rü ngĩ́ta̱a̱xgüxü̃pataü̃ pejaxĩxẽẽ —nhanagürü.
14 Rü jéma tupauca ga taxü̃newa rü Ngechuchuca̱x naxĩ ga nhuxre ga ingexetügüxü̃ rü ichixeparagüxü̃. Rü Ngechuchu nanameẽxẽẽ.
15 Notürü ga paigüarü ãẽ̱xgacügü rü ngúexẽẽruü̃gü ga ore ga mugüwa ngu̱xẽẽtaegüxü̃, rü nüxü̃ nadaugü ga jema mexü̃gü ga taxü̃gü ga Tupanaãrü poramaã naxüxü̃ ga Ngechuchu rü buxü̃güxü̃ naxĩnüẽ ga na nhagüxü̃: —¡Namexẽchi ja daa ãẽ̱xgacü ja Ngechuchu ja Dawítanüxü̃! —nhagüxü̃. Rü jemaca̱x ga jema ãẽ̱xgacügü rü nanuẽ.
16 Rü nhanagürügü Ngechuchuxü̃: —¿Nüxü̃ cuxĩnüxü̃ i ngẽma buxü̃gü namaã idexagüxü̃? —nhanagürügü. Rü Ngechuchu nanangãxü̃, rü nhanagürü: —Ngü̃, nüxü̃ chaxĩnü. ¿Notürü taguma e̱xna nawa pengúe i Tupanaãrü ore i ümatüxü̃ i nhaxü̃:“Rü ngẽma buxü̃gü i íraxü̃chixü̃ rü õxchanagü rü tá ta cuxü̃ nicua̱xüü̃gü”,
nhaxü̃? —nhanagürü.
17 Rü jexguma ga Ngechuchu rü nüxna jéma nixũ, rü nhu̱xmachi ínaxũxũ ga guma ĩãnewa. Rü ĩãne ga Betániãwa naxũ, rü jexma najape.
Ngechuchu rü ori ga figuera ga ngearü oṍxü̃maã chixexü̃ naxuegu
18 Rü moxü̃ãcü ga pa̱xmama rü jexguma wenaxãrü Jerucharéü̃ca̱x nataegugu ga Ngechuchu rü nataija.
19 Rü namacüwawa nüxü̃ nadau ga wüxi ga ori ga figuera. Rü naxca̱x nixũ, notürü taxuü̃ma ga norü oxü̃ inajangau, rü naã́tüxü̃xĩcatama inajangau. Rü jemaca̱x nhanagürü nüxü̃ ga jema ori: —Rü tagutáma wena cuxo̱x, —nhanagürü. Rü jexgumatama narüṉẖexẽ ga jema ori.
20 Rü jexguma jemaxü̃ nadaugügu ga norü ngúexü̃gü, rü naḇaixãchiãẽgü. Rü Ngechuchuna nacagüe rü nhanagürügü: —¿Rü nhuxãcü i nhaã ori i paxama naṉẖexẽxü̃? —nhanagürügü.
21 Rü Ngechuchu nanangãxü̃ rü nhanagürü: —Aixcuma pemaã nüxü̃ chixu rü ngẽxguma chi meã pejaxõgügu rü tama ngẽma figueramaã chaxüxü̃xĩca chi pexü. Notürü jexeraxü̃ chi pexü. Rü ngẽxguma chi daa ma̱xpǘnemaã nüxü̃ peixuxgu na jaxũgachixü̃ca̱x rü taxtü i taxü̃chiüwa naxũxü̃ca̱x, rü pega chi naxĩnü.
22 Rü guxü̃ma i ṯacü i naxca̱x ípec̱axü̃ i perü jumuxẽwa, rü tá penajauxgü ega aixcuma pejaxõgüãcüma naxca̱x ípecaxgu.
Ngechuchuna nacagüe na texéarü oregagu tupauca ga taxü̃newa nangu̱xẽẽtaexü̃
23 Rü Ngechuchu rü tupauca ga taxü̃negu naxücu. Rü jexguma jéma ínangu̱xẽẽtaejane rü naxca̱x naxĩ ga paigüarü ãẽ̱xgacügü rü togü ga ãẽ̱xgacügü ga jaguã̱xgü. Rü Ngechuchuna nacagüe rü nhanagürügü: —¿Rü texéarü mugagu nixĩ i cunaxüxü̃ i ngẽma núma cuxüxü̃? ¿Rü texé cuxü̃ tamu na cunaxüxü̃ca̱x i ngẽma? —nhanagürügü.
24 21:24-25 Rü Ngechuchu nanangãxü̃ rü nhanagürü: —Chama rü tá ta pexna chaca, rü ngẽxguma choxü̃ pengãxü̃gu i ngẽma pexna naxca̱x chac̱axü̃, rü chama rü tá ta pemaã nüxü̃ chixu na ngẽxü̃rüüxü̃ i ãẽ̱xgacü na choxü̃ muxü̃ na nuã changu̱xẽẽtaexü̃. ¿Rü texé tanamu ga Juã́ũ na duü̃xü̃güxü̃ ínabaiü̃xẽẽxü̃ca̱x? ¿Pexca̱x rü Tupana jiĩxü̃ ga namucü rü e̱xna duü̃xü̃gümare? —nhanagürü. Rü jexguma ga jema ãẽ̱xgacügü rü inanaxügüe ga nügümaã na japoragatanücüüxü̃. Rü nügümaãtama nhanagürügü: —¿Nhuxũ nhagügüxü̃ tá? Erü ngẽxguma chi nüxü̃ ixuxgu na Tupana núma namuxü̃ rü nüma rü tá nhanagürü tüxü̃:“¿Rü tü̱xcüü̃ ga tama nüxü̃́ pejaxõgüxü̃?” nhanagürü tá.
25 Nüü̃ nadau 21:24
26 —Rü ngẽxguma chi nüxü̃ ixuxgu na jatügümare núma namuxü̃ rü taxca̱x rü tá naxãũcüma, erü duü̃xü̃gü tá tüxü̃ nadai. Erü nümagü i duü̃xü̃gü rü nagu narüxĩnüẽ na Tupana jiĩxü̃ ga Juã́ũxü̃ núma mucü —nhanagürügü.
27 Rü jemaca̱x Ngechuchuxü̃ nangãxü̃gü rü nhanagürügü: —Tama nüxü̃ tacua̱x ga texé núma na namuxü̃ ga Juã́ũ ga baiü̃xẽẽruü̃ —nhanagürügü. Rü jexguma ga Ngechuchu rü nhanagürü nüxü̃: —Chama rü tá ta tãũxü̃táma pemaã nüxü̃ chixu na texé choxü̃ muxü̃ na chanaxüxü̃ i ngẽma choxna naxca̱x pec̱axü̃ —nhanagürü.
Cua̱xruü̃ ga taxre ga nanegügu ixuxü̃
28 Rü nhanagürü ta ga Ngechuchu —¿Nhuxũ nhapegüxü̃ naxca̱x i nhaã ore i tá pemaã nüxü̃ chixuxü̃? Rü wüxi ga jatü rü nüxü̃́ najexma ga taxre ga nane. Rü wüxi ga guma nanemaã nüxü̃ nixu rü nhanagürü nüxü̃:
“Pa Chaunex, chanaxwa̱xe i jéa chorü uwaarü buxgüwa cujapuracü”, nhanagürü.
29 —Rü guma nane nanangãxü̃ rü nhanagürü:
“Choxü̃́ nawa̱xtümüü̃ na ngẽ́ma chaxũxü̃”, nhanagürü. Notürü ga jixcamaxü̃ra rü nagu narüxĩnü rü düxwa jéma najapuracü.
30 —Rü jixcüra ga guma nanatü rü naĩ ga nanexü̃tawa naxũ, rü jexgumarüü̃ ta nüxü̃ jema nhanagürü. Rü guma nane nanangãxü̃ rü nhanagürü:
“Marü name, Pa Pa, rü ngẽ́ma tá chaxũ”, nhanagürü. Notürü tama aixcuma jéma naxũ.
31 —Rü nhu̱xma chanaxwa̱xe i chamaã nüxü̃ peixu rü ngexcürüücü ga guma taxre ga nane ga aixcuma naxücü ga jema nanatü naxwa̱xexü̃ —nhanagürü. Rü nümagü nanangãxü̃gü rü nhanagürügü: —Ga guma nüxĩra namuãcü nixĩ ga naga ĩnücü —nhanagürügü. Rü jexguma ga Ngechuchu rü nhanagürü nüxü̃: —Aixcuma pemaã nüxü̃ chixu rü ngẽma jatügü i Romaãrü ãẽ̱xgacüca̱x dĩẽru ngĩxü̃ dexü̃ rü ngẽma ngexü̃gü i chixri maxẽxü̃ tá nixĩ i pexü̃pa nüxĩra ichocuxü̃ i ngextá Tupana ãẽ̱xgacü íixĩxü̃wa.
32 —Jerü Juã́ũ ga baiü̃xẽẽruü̃ rü núma naxũ na pemaã nüxü̃ jaxuxü̃ca̱x na nhuxãcü tá na pemaxẽxü̃, notürü ga pema rü tama nüxü̃́ pejaxõgü. Notürü ga jema jatügü ga Romaãrü ãẽ̱xgacüca̱x dĩẽru ngĩxü̃ dexü̃ rü jema ngexü̃gü ga chixri maxẽxü̃ rü Juã́ũãxü̃́ najaxõgü. Notürü ga pema rü woo nüxü̃ na pedaugüxü̃ ga nhuxãcü na jaxõgüãxü̃, rü tama nüxü̃ perüxoechaü̃ i pecüma i chixexü̃ na pejaxõgüxü̃ca̱x —nhanagürü.
Cua̱xruü̃ ga chixexü̃ ga puracütanüxü̃gu ixuxü̃
33 Rü nhanagürü ta ga Ngechuchu: —Rü chanaxwa̱xe i iperüxĩnüẽ i nhaã to i ore i cua̱xruü̃ i tá pemaã nüxü̃ chixuxü̃. Rü najexma ga wüxi ga jatü ga nüxü̃́ najexmacü ga wüxi ga norü naãne. Rü jexma nanato ga muxü̃ma ga ori ga uwa. Rü nhu̱xmachi ínanapoxegu, rü nanaxü ga wüxi ga uwaarü jauxtüü̃xü̃chica rü wüxi ga dauxü̃taechica. Rü nhu̱xmachi nhuxre ga puracütanüxü̃na nüxü̃ nadauxẽẽ. Rü namaã nanamexẽẽ na ngãxü̃gu namaã ngĩxü̃ jatojexü̃ca̱x ga jema uwatanü. Rü nhu̱xmachi ga jema naãneãrü jora rü wüxi ga to ga nachiü̃ãne ga jaxü̃guxü̃wa naxũ.
34 —Rü jexguma norü uwaarü buxgüwa nanguxgu, rü jema naãneãrü jora rü jéma nanamugü ga nhuxre ga norü duü̃xü̃gü na jema puracütanüxü̃na ngĩxca̱x jac̱axü̃ca̱x ga jema uwatanü ga nüxna ücü.
35 Notürü ga jema puracütanüxü̃gü rü ínanajauxü̃ ga jema coriarü duü̃xü̃gü. Rü nanac̱uaixgü ga wüxi, rü ga to rü najama̱xü̃chigü, rü ga jema to rü nutamaã ínanamuxũchigü.
36 —Rü jema naãneãrü jora rü wenaxãrü noxriarü jexera rümumaẽxü̃ ga norü duü̃xü̃gü jéma namugü. Notürü ga jema puracütanüxü̃gü rü jema togürüü̃tama chixri namaã nachopetü.
37 —Rü düxwa ga jema naãneãrü jora rü jéma nanexü̃chixü̃ namu jerü nüma nagu naxĩnügu rü chi nanega naxĩnüẽ ga jema puracütanüxü̃gü.
38 —Notürü jexguma jema cori nanexü̃ nadaugügu ga jema puracütanüxü̃gü, rü nügümaã nhanagürügü:
“Ngẽmaãrü tá nixĩ i nhaã naãne i jixcama. ¡Rü ngĩxã tajama̱xgü na tóxrü jiĩxü̃ca̱x!” nhanagürügü.
39 —Rü najajauxgü, rü toxnamana nanagagü, rü jexma najama̱xgü —nhanagürü.
40 Rü jexguma ga Ngechuchu rü jema paigüarü ãẽ̱xgacügüna naca rü nhanagürü: —¿Rü ngẽxguma ínanguxgu i ngẽma naãneãrü jora, rü ṯacü tá jema puracütanüxü̃maã naxü? —nhanagürü.
41 Rü jema ãẽ̱xgacügü rü Ngechuchuxü̃ nangãxü̃gü, rü nhanagürügü: —Ngẽma naãneãrü jora rü tama nüxü̃́ nangechaü̃tümüü̃ãcüma tá nanadai i ngẽma puracütanüxü̃gü i chixri maxẽxü̃. Rü nhu̱xmachi togü i puracütanüxü̃gü i meã namaã ngĩxü̃ itojexü̃ i dĩẽruna tá nüxü̃ nadauxẽẽ —nhanagürügü.
42 Rü Ngechuchu rü nhanagürü nüxü̃: —¿Taguma e̱xna nawa pengúe i Tupanaãrü ore i ümatüxü̃? Erü ngẽmawa rü nhanagürü:“Rü jima nuta ja mecü ja ĩãrü üruü̃gü nüxü̃ oechirécü rü nhu̱xma rü jimatama nixĩ ja Tupana nüxĩra jaxücuchicü na namaã inaxügüãxü̃ca̱x ja ĩpata. Rü tórü Cori ja Tupana nixĩ ga naxücü ga jema, rü nhu̱xma rü namexẽchi i taxca̱x”,
nhanagürü i ngẽma ore.
43 —Rü ngẽmaca̱x pemaã nüxü̃ chixu rü woo pexca̱xchire̱x na jiĩxü̃ i ngẽma naãne i ngextá Tupana ãẽ̱xgacü íixĩxü̃wa, notürü pexna tá nanapu. Rü togü i duü̃xü̃gü i aixcuma Tupanaga ĩnüẽxü̃na tá nanaxã.
44 —Rü jima nuta ega texé namaã jarünhaxgu rü tá itapoü̃gü. Rü jíxema tümaẽ́tügu nanguxe ja jima nuta, rü tá tüxü̃ ninhaĩxmü —nhanagürü ga Ngechuchu.
45 Rü jexguma ga paigüarü ãẽ̱xgacügü rü Parichéugü nüxü̃ ĩnüẽgu ga jema ore ga cua̱xruü̃ ga Ngechuchu namaã nüxü̃ ixuxü̃, rü nüxü̃ nicua̱xãchitanü ga nachiga na jiĩxü̃ ga jema ore.
46 Rü jexgumatama ga jema ãẽ̱xgacügü rü Ngechuchuxü̃ nijauxgüéga. Notürü taxucürüwama najajauxgü jerü duü̃xü̃güxü̃ namuü̃ẽ, jerü nümagü ga duü̃xü̃gü rü najaxõgü ga aixcuma Tupanaãrü orearü uruü̃ na jiĩxü̃ ga Ngechuchu.
