Mateu 22:1-46
22 Rü Ngechuchu rü wenaxãrü nanangúexẽẽ. Rü ore ga cua̱xruü̃gu namaã najaxu, rü nhanagürü nüxü̃:
2 —Rü ngẽma Tupana na ãẽ̱xgacü ixĩxü̃ rü nhama wüxi ga nachiü̃ãneãrü ãẽ̱xgacü ga naneãrü ngĩgü üchiücürüü̃ nixĩ.
3 —Rü norü duü̃xü̃güxü̃ namu na naxca̱x jac̱axü̃ca̱x ga jema duü̃xü̃gü ga marü ü̃paacü nüxna naxuxü̃. Notürü jema duü̃xü̃gü ga marü nüxna naxuchiréxü̃ rü tama jéma naxĩxchaü̃.
4 —Rü wenaxãrü togü ga norü duü̃xü̃güxü̃ jéma namugü. Rü nhanagürü nüxü̃:
“¡Ngẽ́ma pexĩ naxü̃tawa i ngẽma duü̃xü̃gü i nüxna chaxuchiréxü̃, rü namaã nüxü̃ pejarüxu rü marü íname i chorü õna i taxü̃. Rü marü chanadai i chorü wocagü i ingüexü̃ rü guxü̃ma marü ínamemare. Rü chanaxwa̱xe i paxa nuã naxĩ naxca̱x i nhaã chorü peta!” nhanagürü.
5 —Notürü jema duü̃xü̃gü ga nüxna naxuchiréxü̃ rü tama naga naxĩnüẽ. Rü wüxi rü naãnewa naxũ, rü ga to rü norü taxepataü̃wa naxũ.
6 —Rü ga togü rü jema ãẽ̱xgacüarü duü̃xü̃güxü̃ ínajauxü̃ rü najac̱uaixgü nhu̱xmata najuexẽẽã.
7 —Rü jexguma ga guma ãẽ̱xgacü rü poraãcü nanu. Rü norü churaragüxü̃ jéma namugü na jadaiãxü̃ca̱x ga jema duü̃xü̃gü ga máẽtagüxü̃, rü na jagugüãxü̃ca̱x ga guma norü ĩãne.
8 —Rü nhu̱xmachi nhanagürü nüxü̃ ga norü duü̃xü̃gü:
“Guxü̃ma i chorü peta rü marü ínamemare. Notürü ga jema duü̃xü̃gü ga noxri nüxna chaxuxü̃ rü taxuwama nime na nuã naxĩxü̃ca̱x.
9 —¡Rü jéa ĩãnemaü̃ i taxü̃wa pexĩ, rü nüxna pejaxu i guxü̃ i duü̃xü̃gü i ngẽ́ma nüxü̃ pedauxü̃, na núma chorü petawa naxĩxü̃ca̱x!” nhanagürü.
10 —Rü jema ãẽ̱xgacüarü duü̃xü̃gü rü jéma ĩãnemaü̃ i taxü̃wa naxĩ. Rü nüxna nixuetanü ga guxü̃ma ga duü̃xü̃gü ga mexü̃gü rü chixexü̃gü ga nüxü̃ ijangaugüxü̃. Rü jemaãcü duü̃xü̃gümaã nanapa ga guma ãẽ̱xgacüpata.
11 —Rü jexguma ga guma ãẽ̱xgacü rü nixücu nawa ga jema ucapu ga nawa peta naxüxü̃, jerü ínajadau ga jema duü̃xü̃gü ga nüxna naxuxü̃. Notürü jéma nüxü̃ nadau ga wüxi ga jatü ga tama norü nga̱xãẽchirugu icúxü̃.
12 —Rü nhanagürü nüxü̃:
“Pa Chamücüx ¿nhuxãcü i nuxã cuxücuxü̃ na tama curü nga̱xãẽchirugu cuicúxü̃?” nhanagürü. Notürü nüma ga jema jatü rü nangea̱xmare.
13 —Rü jexguma ga guma ãẽ̱xgacü rü nhanagürü nüxü̃ ga jema norü duü̃xü̃gü:
“¡Meã pejana̱ĩ̱xpara rü pejana̱ĩ̱xchacüügü i nhaã jatü, rü jéama düxétüwa i poraãcü ínaxẽãnexü̃wa pejatá! Rü ngẽ́ma tá narüdoxü rü tá nixü̃́xchapüta erü poraãcü tá nüxü̃́ nangu̱x”, nhanagürü.
14 —Rü Tupana rü muxũchíena naxu, notürü noxretama tixĩ ja jíxema aixcuma Tupana tüxü̃ idexechixe —nhanagürü ga Ngechuchu.
Ãẽ̱xgacüaxü̃́ dĩẽrumaã naxütanüxü̃chiga
15 Rü jexguma ga Parichéugü rü nixĩgachi. Rü noxrüwama nügümaã najamexẽẽgü na ṯacü rü oremaã tá Ngechuchuna nacagüexü̃ca̱x na chixexü̃gu nanguxẽẽgüãxü̃ca̱x rü nhu̱xmachi ãẽ̱xgacüxü̃tawa na ínaxuaxü̃güãxü̃ca̱x.
16 Rü jemaca̱x Ngechuchuxü̃tawa nanamugü ga nhuxre ga norü duü̃xü̃gü namaã ga nhuxre ga Erudiarü duü̃xü̃gü na jema oremaã Ngechuchuna na jacagüexü̃ca̱x. Rü jexguma Ngechuchuxü̃tawa nangugügu rü nhanagürügü: —Pa Ngúexẽẽruü̃x, nüxü̃ tacua̱x rü aixcuma nixĩ i ngẽma nüxü̃ cuixuxü̃ i curü ore. Rü aixcuma cunangúexẽẽ i duü̃xü̃gü na Tupana naxwa̱xexü̃ãcüma namaxẽxü̃ca̱x. Rü tama duü̃xü̃gügamare cuxĩnü, erü tama norü düxétüxü̃negu cudawenü, notürü nacüma nixĩ i cungugüxü̃.
17 —¡Rü tomaã nüxü̃ ixu! rü ngẽma dĩẽru ja ãẽ̱xgacü ja tacü ja Romacü̱̃ã̱x totanüwa jajauxchaü̃xü̃, ¿rü namexü̃ jiĩxü̃ na nüxna ngĩxü̃ taxãxü̃ rü e̱xna tama? —nhanagürügü.
18 Notürü Ngechuchu nüxü̃ nacua̱xama na chixexü̃gu naxĩnüẽxü̃ ga jema duü̃xü̃gü, rü jemaca̱x nhanagürü nüxü̃: —Pema nixĩ i togüpe̱xewa meã pemaxẽnetaxü̃, notürü peãẽwa rü chixexü̃gu perüxĩnüẽ. ¿Rü tü̱xcüü̃ i chixexü̃gu choxü̃ penguxẽẽchaü̃xü̃?
19 —¡Choxü̃ ngĩxü̃ pewé i wüxi i dĩẽru i ngĩmaã ãẽ̱xgacüaxü̃́ penaxütanücü! —nhanagürü. Rü jéma naxü̃tawa ngĩxü̃ nangegü ga wüxitachinü ga jema dĩẽru.
20 Rü jexguma Ngechuchu ngĩxü̃ da̱xgu, rü nüxna naca, rü nhanagürü —¿Rü texéchicüna̱xã rü texééga nixĩ i ngĩgu üxü̃? —nhanagürü.
21 Rü nümagü nanangãxü̃gü, rü nhanagürügü: —Romacü̱̃ã̱x ja ãẽ̱xgacü ja tacüchicüna̱xã nixĩ —nhanagürügü. Rü jexguma ga Ngechuchu rü nhanagürü nüxü̃: —¡Ãẽ̱xgacüna ngĩxü̃ pexã i ngẽma ãẽ̱xgacüarü ixĩcü, rü Tupanana ngĩxü̃ pexã i ngẽma Tupanaãrü ixĩcü! —nhanagürü.
22 Rü jexguma jema orexü̃ naxĩnüẽgu, rü naḇaixãchiãẽgü. Rü Ngechuchuna ínixĩ.
Ngechuchuna nacagüe rü ngoxi wena táxarü namaxẽ i duü̃xü̃gü
23 Rü jematama ngunexü̃gu rü nhuxre ga Chaduchéugü rü Ngechuchuxü̃tawa naxĩ. Rü nümagü nixĩ ga nagu naxĩnüẽxü̃ na juexü̃ rü tagutáma wena namaxẽxü̃. Rü jemaca̱x Ngechuchuna nacagüe, rü nhanagürügü:
24 —Pa Ngúexẽẽruü̃x, Muĩsé nüxü̃ ixuxgu rü ngẽxguma wüxi ja jatü naxãma̱x rü nangexacüjane naju̱xgu, rü name nixĩ i naẽneẽtama ngĩmaã naxãma̱x i ngẽma jutecü i naxü̃ma̱x, na ngẽmaãcü naxãxãcüxü̃ca̱x nüxü̃́ ja jima naẽneẽ ja marü jucü —nhanagürü ga jema ore.
25 Rü nhanagürügü ta ga Chaduchéugü: —Najexma ga totanüwa ga 7 ga nügüeneẽ. Rü naxãma̱x ga guma jacü, notürü taũta naxãxãcüjane naju. Rü jexguma ga naĩ ga naẽneẽ nüxĩ ngĩmaã naxãma̱x ga jema ngecü.
26 —Rü guma rü ta naju, rü nangexacü. Rü jexguma rü naĩ ga naẽneẽ nüxĩ ngĩmaã naxãma̱x. Rü jemaãcü gucüma ga guma 7 ga nügüeneẽ rü ngĩmaã naxãma̱x ga jema nge. Rü gucüma najue taũta naxãxãcüjane.
27 —Rü jemawena rü ngĩma rü ta iju ga jema nge.
28 —Rü ngẽxguma juexü̃ wena maxẽgu, ¿rü ngexcürüücü ga guma 7 ga nügüeneẽ naxma̱x tá ijixĩ i ngẽma nge? Jerü gucüma ga guma 7 ga nügüeneẽ ngĩmaã naxãma̱x —nhanagürügü.
29 Rü jexguma ga Ngechuchu rü nanangãxü̃, rü nhanagürü: —Pema rü ípetüe erü tama nüxü̃ pecua̱x i Tupanaãrü ore i ümatüxü̃, rü tama nüxü̃ pecua̱x i nhuxãcü ãẽ̱xgacü na jiĩxü̃ ja Tupana.
30 —Rü ngẽxguma juexü̃ wena maxẽgu rü taxúetáma tixãma̱xgü rü e̱xna tixãtegü. Erü dauxü̃cü̱̃ã̱x i Tupanaãrü orearü ngeruü̃gürüü̃ tá tixĩgü i ngẽxguma.
31 —Pema choxna peca i juexü̃ãrü dagüchiga. ¿Notürü tama e̱xna nawa pengúe i Tupanaãrü ore i ümatüxü̃ i ngextá Tupanatama ngẽmachigaxü̃ pemaã íjaxuxü̃wa? Erü ngẽ́ma rü nhanagürü ja Tupana:
32 “Chama nixĩ i Abrã́ũãrü Tupana, rü Isaquiarü Tupana, rü Jacúarü Tupana”,
nhanagürü. Rü ngẽma orewa nüxü̃ tacua̱x rü woo nhama i naãnewa najuegu i duü̃xü̃gü, notürü Tupana nüxü̃ da̱xgu rü guxü̃guma namaxẽ —nhanagürü ga Ngechuchu.
33 Rü jexguma jemaxü̃ naxĩnüẽgu ga duü̃xü̃gü, rü guxü̃ma naḇaixãchiãẽgü namaã ga norü ngu̱xẽẽtae ga Ngechuchu.
Ngẽma Tupanaãrü mu i guxü̃ i norü mugüarü jexera ixĩxü̃
34 Rü nangutague̱xegü ga Parichéugü ga jexguma nüxü̃ naxĩnüẽgu ga nhuxãcü Ngechuchu rü jema Chaduchéugüxü̃ na ijanangea̱xgüxẽẽxü̃.
35 Rü wüxi ga jema Parichéugü ga ore ga mugüwa ngu̱xẽẽtaexü̃ rü Ngechuchuxü̃ chixexü̃gu nanguxẽẽchaü̃. Rü jemaca̱x Ngechuchuna naca rü nhanagürü:
36 —Pa Ngúexẽẽruü̃x, ¿ngẽxü̃rüüxü̃ i Tupanaãrü mu nixĩ i guxü̃ i norü mugüarü jexera ixĩxü̃? —nhanagürü.
37 Rü Ngechuchu nanangãxü̃ rü nhanagürü: —Ngẽma Tupanaãrü mu i guxü̃ i norü mugüarü jexera ixĩxü̃, rü nhanagürü:“¡Rü nüxü̃ nangechaü̃ ja Cori ja curü Tupana i guxü̃ne ja curü maxü̃nemaã, rü guxü̃ i cuãẽmaã, rü guxü̃ i nagu curüxĩnüxü̃maã!”
nhanagürü.
38 —Rü ngẽma nixĩ i Tupanaãrü mu i guxü̃ i norü mugüarü jexera ixĩxü̃. Rü ngẽma nixĩ i nüxĩraü̃xü̃ i norü mu ga duü̃xü̃güna naxãxü̃ ga Tupana.
39 —Rü ngẽma norü taxre i Tupanaãrü mu, rü ngẽma nüxĩraü̃xü̃ i norü murüü̃tama nixĩ, rü nhanagürü:
“¡Nüxü̃ nangechaü̃ i cumücü ngẽma na cugü cungechaü̃xü̃rüü̃!” nhanagürü.
40 —Rü ngẽma taxre i Tupanaãrü mugüwa nixĩ inaxügüxü̃ i guxü̃ma i Tupanaãrü mugü ga Muĩsé ümatüxü̃ rü nuxcümaxü̃güxü̃ ga Tupanaãrü orearü uruü̃gü namaã ngu̱xẽẽtaegüxü̃ —nhanagürü.
¿Texétaa jiĩxü̃ ja Cristu?
41 22:41-42 Rü joxni ga Parichéugü rü jéma nangutaque̱xegü, rü Ngechuchu nüxna naca, rü nhanagürü: —¿Rü nhuxũ nhapegüxü̃ i pema nüxü̃ ja Cristu? ¿Rü texétaa jiĩxü̃? —nhanagürü. Rü nümagü ga Parichéugü rü nanangãxü̃gü rü nhanagürügü: —Cristu rü nuxcümaxü̃cü ga ãẽ̱xgacü ga Dawítaa nixĩ —nhanagürügü.
42 Nüü̃ nadau 22:41
43 Rü jexguma ga Ngechuchu rü nhanagürü: —¿Tü̱xcüü̃ ga Dawí ga norü Corimaã naxuaxü̃ ga Cristu ga jexguma Tupanaãẽ ga Üünexü̃ Dawíxü̃ idexaxẽẽgu? Jerü ga Dawí rü nhanagürü:
44 “Tupana rü chorü Cori ja Cristuxü̃ nhanagürü: ‘¡Nuã chorü tügünecüwawa rüto nhu̱xmatáta nüxü̃ charüporamaẽ i curü uwanügü na cuga naxĩnüẽxü̃ca̱x!’ ”
45 —Notürü ¿nhuxũcürüwa i Dawítaa jiĩxü̃ ja Cristu ega nümatama ga Dawí rü norü Corimaã naxuãgu? —nhanagürü ga Ngechuchu.
46 Rü taxuxü̃maãma nanangãxü̃güéga ga jema Parichéugü, rü bai ga wüxi ga oremaã. Rü jemawena rü guxü̃ma namuü̃ẽ na ṯacüca̱x Ngechuchuna nacagüexü̃.
