Mateu 23:1-39
23 Rü jemawena ga Ngechuchu rü duü̃xü̃güxü̃ rü norü ngúexü̃güxü̃ nhanagürü:
2 —Ngẽma ngúexẽẽruü̃gü i ore i mugüwa ngu̱xẽẽtaegüxü̃ rü Parichéugü, rü meãma nüxü̃ nacua̱xgü ga Tupanaãrü ore ga Muĩsé ümatüxü̃.
3 —Rü ngẽmaca̱x name i naga pexĩnüẽ i guxü̃ma i ngẽma pemaã nüxü̃ jaxugüxü̃. Notürü tama name i nüma namaxẽxü̃ãcüma pemaxẽ, erü nüma nüxü̃ nixugü i mexü̃ i ore notürü chixri namaxẽ.
4 —Erü nüma rü poraãcü pexü̃ namu na naga pexĩnüẽxü̃ca̱x i norü mugü i guxchaxü̃ i taxucürüwama texé aurexü̃. Notürü nümagütama rü bai i íraruwa naga na naxĩnüẽxü̃ i ngẽma nawa pexü̃ namuxü̃.
5 —Rü guxü̃ma i ngẽma naxügüxü̃, rü nanaxügü na duü̃xü̃gü nüxü̃ daugüxü̃ca̱x. Rü inajangegü i Tupanaãrü ore na ngẽmaãcü duü̃xü̃gü nagu rüxĩnüẽgu rü aixcuma Tupanaãrü duü̃xü̃gü na jiĩgüxü̃. Rü nügü nanga̱xãẽgü na duü̃xü̃gü nüxü̃ rüdaunüxü̃ca̱x.
6 —Rü petagüarü õnawa rü nümagü i Parichéugü rü nanaxwa̱xegü i õnaãrü joraxü̃tawaxü̃chi na natogüxü̃ na duü̃xü̃gü ngẽ́ma nüxü̃ rüdaunüxü̃ca̱x. Rü ngutaque̱xepataü̃güwa rü nanaxwa̱xegü na nape̱xewaxü̃chi ügüxü̃ i naxma̱xwe̱xegüwa natogüxü̃.
7 —Rü ĩãnemaü̃güwa rü nanaxwa̱xegü na duü̃xü̃gü meã nüxü̃ rümoxẽgüxü̃ nhama ãẽ̱xgacüxü̃ meã rümoxẽxü̃rüü̃. Rü nanaxwa̱xegü na duü̃xü̃gü rü: “Pa Ngúexẽẽruü̃x” nhagüxü̃ nüxü̃.
8 —¡Notürü pema rü tãũxü̃táma ngẽmagu perüxĩnüẽ! Erü guxãma i pema rü pegüeneẽgü peixĩgü, rü wüxixicatama nixĩ ja perü ngúexẽẽruü̃ ixĩcü.
9 —Rü tama name i nhama i naãnecü̱̃ã̱xmaã pexãnatü, erü wüxixicatama nixĩ ja Penatü, rü nüma rü dauxü̃wa nangẽxma.
10 —Rü tama name i texé: “Pa Ãẽ̱xgacüx” nhatarügü pexü̃. Erü chaxicatama nixĩ i perü ãẽ̱xgacü chiĩxü̃.
11 —Rü jíxema petanüwa guxããrü jexera ixĩxẽ rü tanaxwa̱xe na guxü̃ma i tümamücüarü ngü̃xẽẽruü̃ tiĩxü̃.
12 —Erü jíxema tügü írütaxe rü Tupana tá tüxü̃ naxãnexẽẽ. Notürü jíxema tügü írüxíraxe, rü Tupana tá tüxü̃ nicua̱xüü̃.
13 —Pa Ngúexẽẽruü̃gü i Ore i Mugüwa Ngu̱xẽẽtaegüxü̃ rü Pa Parichéugüx, pema nixĩ i togü i duü̃xü̃güpe̱xewa meã pemaxẽnetaxü̃ notürü peãẽwa rü chixexü̃gu perüxĩnüẽxü̃. Rü wüxi i ngechaü̃ nixĩ i pexca̱x erü pegagu nixĩ na tama Tupanaxü̃tawa nangugüxü̃ i togü i duü̃xü̃gü. Rü pema rü ta rü tãũxü̃táma ngẽxma pechocu, Rü ngẽxgumarüü̃ ta rü nüxü̃́ penaguxchaxẽẽ na tama ngẽxma nachocuxü̃ca̱x i togü i ngẽxma chocuchaü̃xü̃.
14 —Pa Ngúexẽẽruü̃gü i Ore i Mugüwa Ngu̱xẽẽtaegüxü̃ rü Pa Parichéugüx, pema nixĩ i togü i duü̃xü̃güpe̱xewa meã pemaxẽnetaxü̃ notürü peãẽwa rü chixexü̃gu perüxĩnüẽxü̃. Rü wüxi i ngechaü̃ nixĩ i pexca̱x erü tüxna penapuxü̃ ja tümapata ja jíxema jutegüxe. Rü nhu̱xmachi penama̱xẽẽ i perü jumuxẽgü na duü̃xü̃gü nagu rüxĩnüẽgu rü aixcuma mexü̃ i Tupanaãrü duü̃xü̃gü na peixĩgüxü̃. Rü ngẽmaca̱x pema tá nixĩ i togü i duü̃xü̃güarü jexera pepocuexü̃.
15 —Pa Ngúexẽẽruü̃gü i Ore i Mugüwa Ngu̱xẽẽtaegüxü̃ rü Pa Parichéugüx, pema nixĩ i togü i duü̃xü̃güpe̱xewa meã pemaxẽnetaxü̃ notürü peãẽwa rü chixexü̃gu perüxĩnüẽxü̃. Rü wüxi i ngechaü̃ nixĩ i pexca̱x erü guxü̃wama pexĩ na togü i duü̃xü̃gümaã nüxü̃ pejarüxuxü̃ca̱x i ore na wüxitama ja duü̃xẽ pexrüü̃ na jaxõxü̃ca̱x. Rü ngẽxguma marü pexü̃ tanguü̃xgu, rü tüxü̃ pechixexẽẽ na düxwa taxree̱xpü̱xcüna perü jexera chixexü̃wa tangẽxmaxü̃ca̱x.
16 —Pa Ngúexẽẽruü̃gü i Ore i Mugüwa Ngu̱xẽẽtaegüxü̃ rü Pa Parichéugüx, pema rü nhama cua̱xruü̃gü i ngexetüxü̃rüü̃ peixĩgü. Rü wüxi i ngechaü̃ nixĩ i pexca̱x, erü nüxü̃ peixuxgu rü:
“Ngẽxguma texé ja tupauca ja taxü̃neẽ́gagu ṯacüca̱x ixunetagu, rü marü name ega tama tajanguxẽẽgu i ngẽma tümaãrü uneta”, nhaperügügü. Notürü ngẽxguma texé tupauca ja taxü̃neãrü dĩẽruégagu ṯacüca̱x ixunetagu, rü:
“Tanaxwa̱xe i aixcuma tajanguxẽẽ i ngẽma tümaãrü uneta”, nhaperügügü.
17 —Pema rü pengẽãẽgü rü nhama pengexetügüxü̃rüü̃ peixĩgü. ¿Pexca̱x rü ṯacü nixĩ i jexera rümemaẽxü̃, tupauca ja taxü̃neãrü dĩẽru rü e̱xna nümatama ja tupauca ja nagagu naxüünene i ngẽma dĩẽru?
18 —Rü tupauca ja taxü̃newa nangẽxma i ngẽma ãmarechica i ngexta Tupanaca̱x ínadaiaxü̃wa i naxü̃nagü na Tupanana naxãmarexü̃ca̱x. Rü pema rü nhaperügügü:
“Rü ngẽxguma texé ja tupauca ja taxü̃neãrü ãmarechicaégagu ṯacüca̱x ixunetagu, rü marü name ega tama tajanguxẽẽgu i ngẽma tümaãrü uneta. Notürü ngẽxguma texé tupauca ja taxü̃neãrü ãmarechicawa ngẽxmaxü̃ i ãmareégagu ṯacüca̱x ixunetagu, rü tanaxwa̱xe i aixcuma tajanguxẽẽ i ngẽma tümaãrü uneta”, nhaperügügü.
19 —Pema rü pengẽãẽgü rü nhama pengexetügüxü̃rüü̃ peixĩgü. ¿Pexca̱x rüṯacü nixĩ i jexera rümemaẽxü̃, rü jima tupauca ja taxü̃ne ãmarechicawa ngẽxmaxü̃ i ãmare rü e̱xna nümatama ja tupauca ja taxü̃neãrü ãmarechica i nagagu naxüünexü̃ i ngẽma ãmare?
20 —Erü jíxema tupauca ja taxü̃neãrü ãmarechicaégagu ṯacüca̱x ixunetaxe, rü tama ngẽma nachicaégaguxicatama itaxuneta, notürü ngẽma ãmare i ngẽma nachicawa ngẽxmaxü̃ẽ́gagu rü ta itaxuneta.
21 —Rü jíxema tupauca ja taxü̃neẽ́gagu ṯacüca̱x ixunetaxe, rü tama ngẽma tupaucaégaguxicatama itaxuneta, notürü Tupana ja ngẽxma ãchiü̃cüégagu rü ta itaxuneta.
22 Rü jíxema dauxü̃guxü̃ i naãneẽ́gagu ṯacüca̱x ixunetaxe, rü Tupanaãrü toruü̃ẽ́gagu rü ta itaxuneta, rü ngẽxgumarüü̃ ta Tupana ja ngẽ́ma rütocüégagu rü ta itaxuneta.
23 —Pa Ngúexẽẽruü̃gü i Ore i Mugüwa Ngu̱xẽẽtaegüxü̃ rü Pa Parichéugüx, pema nixĩ i togü i duü̃xü̃güpe̱xewa meã pemaxẽnetaxü̃, notürü peãẽwa rü chixexü̃gu perüxĩnüẽxü̃. Rü wüxi i ngechaü̃ nixĩ i pexca̱x, erü woo ṯacü i íraxü̃ i pexü̃́ ngẽxmaxü̃ rü Tupanana penaxã i ngẽma nüxna üxü̃. Notürü tama naga pexĩnüẽ i Tupanaãrü mugü i guxü̃ i mugüarü jexera ixĩxü̃. Erü pexü̃́ nataxu na ãẽ̱xgacügü i aixcuma meãma duü̃xü̃gümaã icua̱xgüxü̃ na peixĩgüxü̃, rü pexü̃́ nataxu na duü̃xü̃gü pexü̃́ nangechaü̃tümüü̃güxü̃, rü aixcuma meã Tupanamaã peixaixcümagüxü̃. Rü guxü̃ma i ngẽma nixĩ i Tupana naxwa̱xexü̃ na penaxüxü̃, tama nüxü̃ ipejarüngümaẽãcüma i ngẽma mexü̃ i marü pexüxü̃.
24 —Pa Cua̱xruü̃gü i Ngexetügüxü̃x, pema rü guxü̃ma i mugü i woo íraxü̃chixü̃ rü meãma penaxaure, notürü tama Tupana naxwa̱xexü̃ãcüma pemaxẽ. Pema rü nhama wüxi i duü̃xü̃ i tunüca̱x norü axexü̃ bapetüxü̃ rü nhu̱xmachi arü wüxi i cameru ixaxwetaü̃xü̃rüü̃ peixĩgü.
25 —Pa Ngúexẽẽruü̃gü i Ore i Mugüwa Ngu̱xẽẽtaegüxü̃ rü Pa Parichéugüx, pema nixĩ i togü i duü̃xü̃güpe̱xewa meã pemaxẽnetaxü̃ notürü peãẽwa rü chixexü̃gu perüxĩnüẽxü̃. Rü wüxi i ngechaü̃ nixĩ i pexca̱x, erü perü düxétüxü̃newaxicatama pegü pemexẽẽchaü̃, notürü perü maxü̃wa rü poraãcü pechixe. Erü penawomüxẽẽãcüma poraãcü naxca̱x pengĩ̱x i duü̃xü̃güarü ngẽmaxü̃gü, rü pegüguxicatama perüxĩnüẽ.
26 —Pa Parichéugü i Nhama Ngexetüxü̃rüü̃ Ixĩgüxü̃x, name nixĩ i pegü pemexẽẽ i perü aixepewa i perü maxü̃wa. Rü ngẽxguma tá nixĩ i perü düxétüwa rü tá ta pemexü̃.
27 23:27-28 —Pa Ngúexẽẽruü̃gü i Ore i Mugüwa Ngu̱xẽẽtaegüxü̃ rü Pa Parichéugüx, pema nixĩ i togü i duü̃xü̃güpe̱xewa meã pemaxẽnetaxü̃ notürü peãẽwa rü chixexü̃gu perüxĩnüẽxü̃. Rü wüxi i ngechaü̃ nixĩ i pexca̱x, erü nhama juetachique̱xegü i düxétüwa cómüxü̃maã chauxetügüxü̃ notürü aixepewa rü juetachinaxãmaã rü nagúxü̃raü̃xü̃ i ãũãchixü̃maã napagüxü̃rüü̃ peixĩgü. Erü perü düxétüwa i duü̃xü̃gü nüxü̃ ídaugüxü̃waxicatama peme, notürü aixepewa i peãẽwa rü poraãcü pechixe.
28 Nüü̃ nadau 23:27
29 —Rü wüxi i ngechaü̃ nixĩ i pexca̱x, Pa Ngúexẽẽruü̃gü i Ore i Mugüwa Ngu̱xẽẽtaegüxü̃ rü Pa Parichéugüx. Pema rü pejamecagü ga naxchique̱xegü ga nuxcümaxü̃güxü̃ ga Tupanaãrü orearü uruü̃gü rü jema duü̃xü̃gü ga imexü̃ ga juexü̃.
30 —Rü nhu̱xmachi nhaperügügü:
“Rü jexguma chi nuxcümaxü̃güxü̃ ga tórü o̱xigü maxẽjane imaxẽgu, rü tau chima nüxü̃ tarüngü̃xẽẽ ga na nadaiãxü̃ ga jema nuxcümaxü̃güxü̃ ga Tupanaãrü orearü uruü̃gü”, nhaperügügü.
31 —Rü ngẽma oremaã rü pegü pengo̱xẽẽ na nataagü peixĩgüxü̃ ga jema duü̃xü̃gü ga nuxcümaxü̃güxü̃ ga Tupanaãrü orearü uruü̃güxü̃ ḏaixü̃.
32 —¡Ẽcü, noxtacüma chamaã rü ta pejanguxẽẽ̱x ga jema chixexü̃ ga nuxcümaxü̃güxü̃ ga perü o̱xigü ügüexü̃!
33 —Pa Ãxtapearü Duü̃xü̃güx, pema rü poraãcü pechixe. ¿Nhuxãcü tá naxchaxwa peibuxmü ja jima üxü ja Tupana tá namaã pexü̃ pocuene?
34 —Rü ngẽmaca̱x i chama rü tá pexca̱x núma chanamugü i Tupanaãrü orearü uruü̃gü, rü jatügü i mexü̃gü i nüxü̃ cua̱xü̃chigüxü̃, rü ngúexẽẽruü̃gü i mexü̃gü. Notürü pema rü tá curuchawa pejapotagüãcüma penadai i nhuxre. Rü togü rü ngutaque̱xepataü̃güwa rü tá pejac̱uaixgü, rü togü rü ĩãnechigüwa rü tá nawe peingẽxü̃tanü na chixexü̃ namaã pexügüxü̃ca̱x.
35 —Notürü Tupana tá pexü̃ napocue naxca̱x i guxü̃ma ga norü duü̃xü̃gü ga imexü̃gü ga perü o̱xigü ḏaixü̃. Rü Abéuwa nixĩ ga inaxügüãxü̃ ga na nadaiãxü̃ rü Chacaría ga tupauca ga taxü̃negu pejama̱xgücügu nixĩ ga jacuáxü̃ ga jema.
36 —Rü aixcuma pemaã nüxü̃ chixu rü guxü̃ma ga jema chixexü̃ca̱x rü Tupana tá nanapocue i duü̃xü̃gü i nhamaü̃cüü maxẽxü̃ —nhanagürü ga Ngechuchu.
Ngechuchu rü Jerucharéü̃cü̱̃ã̱x ga duü̃xü̃güca̱x naxaxu
37 Rü nhanagürü ta ga Ngechuchu: —Pa Jerucharéü̃cü̱̃ã̱x, pema penadai i Tupanaãrü orearü uruü̃gü, rü nutamaã ípenamuxũchigü i Tupanaãrü orearü ngeruü̃gü i pexca̱x núma namugüxü̃. Rü nhuxree̱xpü̱xcüna wüxigu chaugüxü̃tagu pexü̃ chanutaque̱xexẽẽchaü̃ nhama wüxi i ota i naxãcüxã nügütüü̃gu tüxü̃ nutaque̱xexü̃rüü̃. Notürü pema rü tama penaxwa̱xe.
38 —Dücax i nhu̱xma ja perü ĩãne, rü Tupana tá ínanata̱x.
39 —Rü pemaã nüxü̃ chixu rü tãũxü̃táma wena choxü̃ pedau nhu̱xmatáta dauxü̃guxü̃ i naãnewa ne chaxũ. Rü ngẽxguma rü tá choxü̃ pedaugü rü tá nhaperügügü:
“Namexẽchi nixĩ ja jima Cori ja Tupana núma namucü”, nhaperügügü tá —nhanagürü ga Ngechuchu.
