Mateu 25:1-46
25 Rü nhanagürü ga Ngechuchu: —Pemaã tá nüxü̃ chixu i wüxi i ore na nawa nüxü̃ pecuáxü̃ca̱x i nhuxãcü tá duü̃xü̃güarü ãẽ̱xgacü na jiĩxü̃ ja Tupana i ngẽxguma nagu̱xgu i naãne. Rü ijexma ga 10 ga pacü ga ngĩrü daparinamaã ngĩgüarü petawa ĩcü na jaxümücügüãxü̃ca̱x ga guma jatü ga ingĩxchaü̃cü.
2 —Rü 5 ga jema pacü rü tama ixuãẽgü. Rü jema naĩ ga 5 ga pacü rü meãma ixuãẽgü.
3 —Rü jema tama uãẽgücü, rü jexguma ngĩrü daparina íjangegügu rü tama to ga ngĩrü querujinu ta íjangegü.
4 —Notürü ga jema uãẽgücü rü to ga ngĩrü querujinu ta íjangegü.
5 —Notürü ga guma jatü ga ingĩxchaü̃cü rü tama paxa ínangu. Rü düxwa ga jema pacügü rü ipee jerü ijaxtae.
6 —Rü jexguma ngãxü̃cüüwa nanguxgu, rü jema pacügü nüxü̃ ixĩnüẽ ga wüxi ga naga ga nhaxü̃:
“Dama nixĩ ja jima jatü ja ingĩxchaü̃cü. ¡Rü íperüdagü, rü ípejadaugü!” nhaxü̃.
7 —Rü gu̱xcüma ga jema pacügü rü íirüdagü, rü ijamexẽẽgü ga ngĩrü daparinagü.
8 —Rü jexguma ga jema 5 ga pacügü ga tama uãẽgücü rü ngĩgürügügü ngĩxü̃ ga jema pacügü ga uãẽgücü:
“¡Íraxü̃ i perü querujinu toxnata pexã, erü torü omügü rü nixogü!” ngĩgürügügü.
9 —Notürü ga jema pacügü ga uãẽgücü rü ngĩxü̃ ingãxü̃gü, rü ngĩgürügügü:
“Taxucürüwa pexna ta taxã, erü ngẽxguma chi pexna ta taxãxgu rü tau chima ningu i toxca̱x rü pexca̱x. Rü ngẽmaca̱x narümemaẽ nixĩ i ngextá namaã ínataxegüxü̃wa pegüxü̃́ nawa pexĩ”, ngĩgürügügü.
10 —Notürü jexguma ga jema 5 ga pacügü ga tama uãẽgücü ngĩrü querujinuwa naxĩjane, rü ínangu ga guma jatü ga ingĩxchaü̃cü. Rü ga jema pacügü ga uãẽgücü rü ijachocu nawa ga guma ĩ ga nawa ijangĩxü̃ne. Rü nhu̱xmachi narüwãxta ga ĩã̱x.
11 —Rü jemawena íingugü ga jema pacügü ga tama uãẽgücü, rü ngĩgürügügü:
“¡Pa Corix, toxca̱x jawãxna i ĩã̱x!” ngĩgürügügü.
12 —Notürü nüma ga cori, rü ngĩxü̃ nangãxü̃, rü nhanagürü:
“Pemaã nüxü̃ chixu rü aixcuma tama pexü̃ chacua̱x na texégü peixĩgüxü̃”, nhanagürü.
13 Rü nhu̱xmachi nhanagürü ga Ngechuchu: —¡Ípexuãẽgü! Erü tama nüxü̃ pecua̱x i ṯacü rü ngunexü̃ rü ṯacü rü ngora tá íchangu i chama i Tupana Nane na duü̃xü̃xü̃ chiĩxü̃ —nhanagürü.
Cua̱xruü̃ ga dĩẽrugu ixuxü̃
14 Rü nhanagürü ta ga Ngechuchu: —Rü ngẽma Tupana na duü̃xü̃güarü ãẽ̱xgacü na ixĩxü̃ rü nhama wüxi ga jatü ga ixũãchichaü̃cü ga to ga nachiü̃ãnewa na naxũxü̃ca̱xrüü̃ nixĩ. Rü nüma ga guma jatü rü norü duü̃xü̃güca̱x naca, rü nüxna ngĩxü̃ naxã ga dĩẽru na nüxü̃́ ngĩmaã nanguxü̃xü̃ca̱x rü ngĩmaã na ínapuracüexü̃ca̱x.
15 —Rü wüxi ga jema norü duü̃xü̃na ngĩxü̃ naxã ga 5000 tachinü ga dĩẽru. Rü jema tona ngĩxü̃ naxã ga 2000 tachinü ga dĩẽru. Rü jema tona ngĩxü̃ naxã ga 1000 tachinü ga dĩẽru. Rü jemaãcü nanangugü na nhuxãcü tá jema dĩẽrumaã napuracüexü̃ ga wüxichigü ga norü duü̃xü̃gü rü jemaãcü wüxichigüna ngĩxü̃ naxã ga jema dĩẽru. Rü nhu̱xmachi inaxũãchi ga jema cori na to ga nachiü̃ãnewa naxũxü̃ca̱x.
16 —Rü jema norü duü̃xü̃ ga 5000 tachinü ga dĩẽru ngĩxü̃ jaxuxü̃, rü ngĩmaã napuracü, rü naĩ ga 5000 tachinü ngĩmaã najaxu.
17 —Rü jexgumarüü̃ ta ga jema norü duü̃xü̃ ga 2000 tachinü ga dĩẽru ngĩxü̃ jaxuxü̃, rü ngĩmaã napuracü, rü naĩ ga 2000 tachinü ngĩmaã najaxu.
18 —Notürü ga jema norü duü̃xü̃ ga 1000 tachinü ga dĩẽru ngĩxü̃ jaxuxü̃, rü ngĩmaã ínixũ. Rü ngĩxü̃ nixaixmaü̃, rü jexma ngĩxü̃ nata̱x ga jema norü coriarü dĩẽru.
19 —Rü nuxcüxürama nataegu ga jema duü̃xü̃güarü cori. Rü jexguma ínanguxgu rü inanaxügü ga norü duü̃xü̃gümaã na namexẽẽãxü̃ ga norü dĩẽruchiga.
20 —Rü nüxĩra norü corixü̃tawa naxũ ga jema norü duü̃xü̃ ga 5000 tachinü ga dĩẽru ngĩxü̃ jaxuxü̃. Rü norü corina ngĩxü̃ naxã ga jema 5000 tachinü. Rü ngĩẽ́tü ngĩxü̃ inaxã ga naĩ ga 5000 tachinü ga ngĩxü̃ najaxucü ngĩmaã ga jema norü cori nüxna ngĩxü̃ ãcü ga dĩẽru. Rü nhanagürü norü corixü̃:
“Dücax Pa Corix, nhaã ijixĩ ga jema 5000 tachinü ga dĩẽru ga choxna ngĩxü̃ cuxãcü. Marü ngĩmaã chapuracü rü ngĩmaã cuxü̃́ ngĩxü̃ chajaxu i nhaã naĩ i 5000 tachinü”, nhanagürü.
21 —Rü norü cori rü nhanagürü nüxü̃:
“Pa Chorü Duü̃xü̃x, wüxi i mexẽchixü̃ cuixĩ, rü meãma cupuracü. Rü meã nüxna cudau ga jema noxre ga dĩẽru ga cuxna ngĩxü̃ chaxãcü, rü meãma ngĩmaã cupuracü. Rü ngẽmaca̱x i nhu̱xma rü tá rümumaẽcüna cuxü̃ chadauxẽẽ. ¡Rü ixücu i chapatawa rü ngĩxã tataãẽgü!” nhanagürü.
22 —Rü jemawena ínangu ga jema to ga norü duü̃xü̃ ga 2000 tachinü ga dĩẽru ngĩxü̃ jaxuxü̃. Rü nhanagürü norü corixü̃:
“Dücax Pa Corix, nhaã ijixĩ ga jema 2000 tachinü ga dĩẽru ga choxna ngĩxü̃ cuxãcü. Marü ngĩmaã chapuracü rü ngĩmaã cuxü̃́ ngĩxü̃ chajaxu i naĩ i 2000 tachinü. Rü nhaã ijixĩ”, nhanagürü.
23 —Rü norü cori rü nhanagürü nüxü̃:
“Pa Chorü Duü̃xü̃x, wüxi i mexẽchixü̃ cuixĩ, rü meãma cupuracü. Rü meã nüxna cudau ga jema noxre ga dĩẽru ga cuxna ngĩxü̃ chaxãcü, rü meãma ngĩmaã cupuracü. Rü ngẽmaca̱x i nhu̱xmax rü tá rümumaẽcüna cuxü̃ chadauxẽẽ. ¡Rü ixücu i chapatawa rü ngĩxã tataãẽgü!” nhanagürü.
24 —Notürü jexguma norü corixü̃tawa nanguxgu ga jema norü duü̃xü̃ ga 1000 tachinü ga dĩẽru ngĩxü̃ jaxuxü̃, rü nhanagürü norü corixü̃:
“Dücax Pa Corix, chama nüxü̃ chacua̱x rü wüxi i jatü i aüxü̃ cuixĩ. Rü cunajaxu i nanetüarü o i ngextá tama ícutoexü̃wa, rü cunabuxarü oõ̱x i nanetü i tama icutoxü̃.
25 —Rü jemaca̱x chamuü̃. Rü waixü̃mügu ngĩxü̃ chixaixmaü̃ rü ngĩxü̃ ichata̱x. Notürü nhaã ijixĩ i ngẽma curü dĩẽru”, nhanagürü.
26 Rü jexguma ga norü cori rü nanangãxü̃ rü nhanagürü:
“Pa Chorü Duü̃xü̃x, wüxi i chixexü̃ rü oxü̃ i chorü duü̃xü̃ cuixĩ. Rü cuma meãma nüxü̃ cucua̱x rü ngextá tama íchatoexü̃wa rü chanajaxu i nanetüarü o, rü chanabuxarü oõ̱x i nanetü i tama ichatoxü̃.
27 —Rü jemaca̱x narümemaẽ chi nixĩ ga bancugu choxü̃́ ngĩmaã na cunguxü̃xü̃ ga chorü dĩẽru na ngẽ́ma choxü̃́ ngĩxü̃ jamuxẽẽgüxü̃ca̱x, rü ngẽmaãcü mucü ngĩxü̃ na chajaxuxü̃ca̱x i ngẽxguma íchanguxgu”, nhanagürü.
28 —Rü jexguma ga jema cori rü nanamu ga jema togü ga norü duü̃xü̃gü ga jéma jexmagüxü̃, rü nhanagürü nüxü̃:
“¡Nüxna ngĩxü̃ pejau̱x i ngẽma dĩẽru, rü ngẽma jatü i 10,000 i dĩẽru nüxü̃́ ngẽxmaxü̃na ngĩxü̃ pexã!
29 —Erü jíxema tüxü̃́ nangẽma̱xcü rü jexera tá tüxna ngĩxü̃ taxã, rü ngẽmaãcü tá tüxü̃́ imuxũchi. Notürü jíxema tüxü̃́ natau̱xcü rü woo ngẽma noxre i tüxü̃́ ngẽma̱xcü rü tá tüxna ngĩxü̃ tajaxu.
30 —¡Rü jéama düxétüwa i poraãcü ínaxẽãnexü̃wa pejatá i nhaã chorü duü̃xü̃ i taxuwama mexü̃! Rü ngẽ́ma tá narüdoxü rü tá nixü̃́xchapüta”, nhanagürü.
Naãneãrü gu̱xgu rü Cristupe̱xewa tá nangutaque̱xegü i guxü̃ i nachiü̃ãnecü̱̃ã̱x i duü̃xü̃gü na jadexechiãxü̃ca̱x i ngẽma mexü̃gü rü na napocueãxü̃ca̱x i ngẽma chixexü̃gü
31 Rü nhanagürü ga Ngechuchu: —Rü ngẽxguma wenaxãrü núma chaxũxgu i chama i Tupana Nane na duü̃xü̃xü̃ chiĩxü̃, rü chorü orearü ngeruü̃gü i dauxü̃cü̱̃ã̱x rü tá choxü̃ naxümücügü. Rü ãẽ̱xgacü ja tacü tá chixĩ rü chorü tochica i mexẽchixü̃wa tá charüto.
32 —Rü guxü̃ i nachiü̃ãnecü̱̃ã̱x i duü̃xü̃gü rü tá chape̱xewa nangutaque̱xegü. Rü chama rü tá chajadexechi nhama wüxi i carneruarü daruü̃ i norü carnerugü rü bodegü noxrüwama mugüxü̃rüü̃.
33 —Rü ngẽma choxrü ixĩgüxü̃ rü chorü tügünecüwawa tá chanangẽxmagüxẽẽ. Rü ngẽma tama choxrü ixĩgüxü̃ rü chorü ṯoxwecüwawa tá chanangẽxmagüxẽẽ.
34 —Rü ngẽxguma i chama i tá ãẽ̱xgacü ja tacü na chiĩxü̃ rü nhacharügü tá nüxü̃ i ngẽma chorü duü̃xü̃gü:
“¡Nuã pexĩ i pema ja texé ja Chaunatü ja Tupana tüxü̃ rüngü̃xẽẽgüxe, rü penajaxu i ngẽma pechica i ngextá nüma ãẽ̱xgacü íjiĩxü̃wa! Jerü Chaunatü rü pexca̱x nanamexẽẽ i ngẽma pechica ga jexguma taũta naãne naxü̱xgu.
35 —Rü ngẽmaãcü tá pemaã namecüma jerü jexguma chataijagu rü pema rü choxü̃ pechibüxẽẽ. Rü jexguma chiṯawagu rü choxü̃ pexaxexẽẽ. Rü jexguma tama nüxü̃ pecua̱xgu na texé chiĩxü̃ rü meã choxü̃ pejauxgü ga pepatawa.
36 —Rü jexguma changexchirugu rü choxü̃ pexüxchiru. Rü jexguma chiḏaawegu rü choxü̃ perüngü̃xẽẽ. Rü jexguma pocupataü̃wa chajexmagu rü choxü̃ ípejadau”, nhacharügü tá nüxü̃.
37 —Rü ngẽxguma i ngẽma duü̃xü̃gü i chidexechixü̃ rü nhanagürügü tá choxü̃:
“Pa Corix, ¿nhuxgu ga cuxü̃ tadauxü̃ ga na cutaijaxü̃ rü cuxü̃ tachibüxẽẽxü̃? ¿Rü nhuxgu ga cuxü̃ tadauxü̃ ga na cuiṯaawaxü̃ rü cuxü̃ taxaxẽẽxü̃?
38 —¿Rü nhuxgu ga topatawa cunguxü̃ rü meã cuxü̃ tajauxgüxü̃ ga woo tama cuxü̃ tacua̱xgügu? ¿Rü nhuxgu ga cungexchiruxü̃ rü cuxü̃ taxüxchirugüxü̃?
39 —¿Rü nhuxgu ga cuxü̃ tadaugüxü̃ na cuiḏaawexü̃ rü e̱xna pocupataü̃wa cujexmaxü̃ rü cuxü̃ ítajadaugüxü̃?” nhanagürügü tá choxü̃.
40 —Rü chama na ãẽ̱xgacü ja tacü na chiĩxü̃, rü tá chanangãxü̃, rü nhacharügü tá:
“Aixcuma pemaã nüxü̃ chixu rü jexguma nüxü̃ perüngü̃xẽẽgügu i ngẽxü̃rüüxü̃ ga nhaã chorü duü̃xü̃gü ga jexguma nüxü̃́ natau̱xgu, rü choxü̃ nixĩ ga perüngü̃xẽẽgüxü̃”, nhacharügü tá nüxü̃.
41 Rü nhu̱xmachi i chama na ãẽ̱xgacü ja tacü na chiĩxü̃, rü nhacharügü tá nüxü̃ i ngẽma tama chorü duü̃xü̃gü ixĩgüxü̃:
“¡Choxna peixĩgachi i pema i perü chixexü̃ca̱x pocuexe! ¡Rü ngẽ́ma pexĩ nawa ja jima üxü ja taguma ixoxü̃ne ja Tupana ímexẽẽ́ne naxca̱x i ṉg̱oxo i Chataná rü norü duü̃xü̃gü!
42 —Jerü jexguma chataijagu rü pema rü tama choxü̃ pechibüxẽẽ. Rü jexguma chiṯawagu rü tama choxü̃ pexaxẽẽ.
43 —Rü jexguma tama nüxü̃ pecua̱xgu na texé chiĩxü̃ rü tama meã choxü̃ pejauxgü ga pepatawa. Rü jexguma changexchirugu rü tama choxü̃ pexüxchirugü. Rü jexguma chiḏaawegu rü pocupataü̃wa chajexmagu rü tama choxü̃ ípejadaugü”, nhacharügü tá nüxü̃.
44 —Rü ngẽxguma i nümagü i tama chorü duü̃xü̃gü ixĩgüxü̃, rü nhanagürügü tá choxü̃:
“Pa Corix, ¿nhuxgu topatawa cungu rü tama meã cuxü̃ tajauxgü jerü tama cuxü̃ tacua̱xgü? ¿Rü nhuxgu ga cuxü̃ tadaugüxü̃ ga na cutaijaxü̃, rü e̱xna na cuiṯaawaxü̃, rü e̱xna na cungexchiruxü̃, rü e̱xna cuiḏaawexü̃, rü e̱xna pocupataü̃wa na cujexmaxü̃, rü tama cuxü̃ tarüngü̃xẽẽgüxü̃?” nhanagürügü tá choxü̃.
45 —Rü chama na ãẽ̱xgacü ja tacü na chiĩxü̃, rü tá chanangãxü̃, rü nhacharügü tá nüxü̃:
“Aixcuma pemaã nüxü̃ chixu rü jexguma tama nüxü̃ perüngü̃xẽẽgügu ga ngẽxü̃rüüxü̃ ga nhaã chorü duü̃xü̃gü ga jexguma nüxü̃́ natau̱xgu, rü choxü̃ rü ta tama perüngü̃xẽẽgü”, nhacharügü tá nüxü̃.
46 —Rü nhu̱xmachi i ngẽma duü̃xü̃gü i tama chorü duü̃xü̃gü ixĩgüxü̃ rü tá pocu i taguma gúxü̃wa naxĩ. Notürü ngẽma duü̃xü̃gü i aixcuma meã chauxca̱x maxẽxü̃ rü tá nanajauxgü i maxü̃ i taguma gúxü̃, —nhanagürü ga Ngechuchu.
