Mateu 26:1-75
26 Rü jexguma Ngechuchu nüxü̃ rüchaxgu ga jema orexü̃ na jaxuxü̃, rü nhanagürü norü ngúexü̃güxü̃:
2 —Pema nüxü̃ pecua̱x rü taxre i ngunexü̃ nataxu na nangõ̱xgüãxü̃ca̱x i ngẽma õna i Üpetüchigaarü petaca̱x naxügüxü̃. Rü ngẽxguma tá nixĩ i choxü̃ jajauxgüxü̃ i chorü uwanügü na curuchawa choxü̃ japotagüxü̃ca̱x —nhanagürü.
3 Rü jexgumaü̃cüü ga paigüarü ãẽ̱xgacügü, rü ngúexẽẽruü̃gü ga ore ga mugüwa ngu̱xẽẽtaegüxü̃, rü togü ga ãẽ̱xgacügü ga jaguã̱xgü rü nangutaque̱xegü ga napatawa ga Caipá ga paigüarü ãẽ̱xgacü ixĩcü.
4 Rü jéma nügümaã nanamexẽẽgü na Ngechuchuxü̃ nawomüxẽẽgüãcüma na jajauxgüãxü̃ca̱x rü na jama̱xgüãxü̃ca̱x.
5 Notürü nügümaã nhanagürügü: —Taxucürüwama i nhu̱xma petagu tajajauxgü, erü duü̃xü̃gü rü tá tamaã nanuẽ —nhanagürügü.
Wüxi ga nge rü Ngechuchuerugu inaba ga pumara
6 Rü Ngechuchu rü Betániãwa najexma napatawa ga Chimáũ ga rüchaxünecümaã naxugüãcü.
7 Rü Ngechuchuca̱x jéma ijaxũ ga wüxi ga ngecü ga jéma nangecü ga wüxiweü̃ ga pumara ga tatanüxü̃chixü̃ ga mexẽchicü ga garapamaã ãchiü̃xü̃. Rü jexguma mechawa ínachibüjane ga Ngechuchu, rü ngĩma rü naẽrugu inaba ga jema pumara.
8 Rü jexguma jemaxü̃ nadaugügu ga Ngechuchuarü ngúexü̃gü, rü naãẽwa nangu̱xgü, rü inanaxügüe ga na nhagüxü̃. —¿Tü̱xcüü̃ ngẽxma inaxaijaxü̃ i ngẽma pumara?
9 —Rü narümemaẽ chi nixĩ i tatanüxü̃gu namaã itaxe, rü nhu̱xmachi ngẽma dĩẽrumaã nüxü̃ irüngü̃xẽẽ i ngẽma duü̃xü̃gü i ngearü dĩẽruã̱xgüxü̃ —nhanagürügü.
10 Rü Ngechuchu nüxü̃ naxĩnü. Rü nhu̱xmachi nhanagürü norü ngúexü̃güxü̃: —¿Tü̱xcüü̃ ngĩxü̃ pechixewe i ngẽma nge? Erü ngẽma chamaã naxüxü̃ rü wüxi i mexü̃ nixĩ.
11 —Ngẽma ngearü dĩẽruã̱xgüxü̃ rü guxü̃gutáma petanüwa nangẽxmagü. Notürü chama rü tãũxü̃táma guxü̃gu petanüwa changẽxma.
12 —Rü ngẽma chamaã naxüxü̃ i nhaã ngecü na chaxunegu nabaãxü̃ i ngẽma pumara i paacaxü̃, rü ngẽmaãcü inaxü erü paxa tá chaju rü tá choxü̃ inata̱xgü. Rü ngẽmaca̱x nixĩ i chaxunegu nabaãxü̃ i ngẽma pumara.
13 —Rü aixcuma pemaã nüxü̃ chixu rü guxü̃ i naãnewa i ngextá duü̃xü̃gü nüxü̃ íixugügüxü̃wa i Tupanaãrü ore i mexü̃, rü nhaã ngecü chamaã üxü̃ rü tá ta nüxü̃ nixugügü. Rü ngẽmaãcü tá ngĩxna nacua̱xãchie i duü̃xü̃gü —nhanagürü ga Ngechuchu.
Juda rü ãẽ̱xgacügümaã nanamexẽẽ na nhuxãcü Ngechuchuxü̃ jajauxgüxü̃ca̱x
14 Rü nhu̱xmachi ga wüxi ga Ngechuchuarü ngúexü̃ ga Juda ga Icarióti rü paigüarü ãẽ̱xgacügüxü̃tawa naxũ rü namaã najarüdexa.
15 Rü Juda rü nhanagürü nüxü̃: —¿Nhuxre tá choxü̃́ penaxütanüxü̃ i ngẽxguma pexü̃́ chanatauxchaxẽẽgu na Ngechuchuxü̃ pejauxgüxü̃ca̱x? —nhanagürü. Rü jexguma ga nümagü ga paigüarü ãẽ̱xgacügü rü 30 tachinü ga dĩẽrugu namaã naxuneta.
16 Rü jexgumama inanaxügü ga Juda ga naxca̱x na nadauxü̃ ga nhuxãcü nüxü̃́ na natauxchaxẽẽgüãxü̃ na Ngechuchuxü̃ jajauxgüxü̃ca̱x.
Üpetüchigaarü õnawa nachibü ga Cori
17 Rü nawa nangu ga ngunexü̃ ga nagu inaxügüxü̃ ga jema peta ga põũ ga ngearü puxẽẽruü̃ã́xü̃ nagu nangõ̱xgüxü̃. Rü norü ngúexü̃gü rü Ngechuchuca̱x naxĩ, rü nhanagürügü nüxü̃: —¿Ngextá tá tanamexẽẽ i nachica i nawa nangõ̱xgüxü̃ i õna i Üpetüchigaarü petagu ingṍxü̃? —nhanagürügü.
18 Rü nüma ga Ngechuchu rü nhanagürü nüxü̃: —¡Ngẽ́ma ĩãnewa pexĩ, rü jima jatü ja pemaã nüxü̃ chaxunetacüpatawa pexĩ! ¡Rü namaã nüxü̃ peixu rü nhapegügü:
“Torü ngúexẽẽruü̃ rü nhanagürü: ‘Marü ningaicaxü̃chi na chajuxü̃ rü nuã cupatawa rü chorü ngúexü̃gümaã chanangupetüxẽẽchaü̃ i Üpetüchigaarü peta’,” nhaperügügü tá nüxü̃!
19 Rü jéma naxĩ ga jema norü ngúexü̃gü. Rü jema Ngechuchu namaã nüxü̃ ixuxü̃rüü̃ nanaxügü. Rü nanamexẽẽgü ga jema õna ga Üpetüchigaarü petagu tá nangõ̱xgüxü̃.
20 Rü jexguma nachütagu rü jéma mechawa nachibü ga Ngechuchu namaã ga jema 12 ga norü ngúexü̃gü.
21 Rü jexguma ínachibüejane, rü Ngechuchu rü nhanagürü nüxü̃: —Aixcuma pemaã nüxü̃ chixu rü wüxie i petanüwa tá tixĩ ja bexma chauechita choxü̃ íjaxuaxü̃xẽ —nhanagürü.
22 Rü jexguma ga nümagü ga norü ngúexü̃gü rü poraãcü nangechaü̃gü. Rü wüxichigü nüxna nicachigü, rü nhanagürügü: —Pa Corix, ¿chama e̱xna tá chiĩxü̃ ja jíxema cuxü̃ íjaxuaxü̃xẽ? —nhanagürügü.
23 Rü nüma ga Ngechuchu nanangãxü̃ rü nhanagürü: —Ngẽma wüxi ja poratuwa namaã tá chachibüxü̃, rü ngẽma tá nixĩ i chauechita choxü̃ íjaxuaxü̃xü̃.
24 —Rü chama i Tupana Nane na duü̃xü̃xü̃ chiĩxü̃ rü tá chaju ngẽxgumarüü̃ i Tupanaãrü ore i ümatüxü̃ nüxü̃ ixuxü̃rüü̃. Notürü wüxi i ngechaü̃xü̃chi nixĩ naxca̱x i ngẽma jatü i choxü̃ íjaxuaxü̃xü̃. Rü narümemaẽ chi nixĩ ga noxtacüma tau chima na nabuxü̃ —nhanagürü.
25 Rü nadexaãchi ga Juda ga naẽchita íjaxuaxü̃xü̃, rü nhanagürü: —Pa Ngúexẽẽruü̃x, ¿tãũxü̃táma chama nixĩ? —nhanagürü. Rü Ngechuchu nanangãxü̃ rü nhanagürü: —Ngẽmáãcü cuma nixĩ —nhanagürü.
26 Rü jexguma ínachibüejane rü Ngechuchu nanajaxu ga wüxi ga põũ. Rü Tupanana moxẽ naxã, rü inanabücu, rü norü ngúexü̃güxü̃ najanu. Rü nhanagürü: —Nhaã põũ rü chaxunechiga nixĩ. Rü ¡penangṍ! —nhanagürü.
27 Rü jemawena rü nanajaxu ga wüxi ga copu ga wĩũmaã ããcuxü̃. Rü jexgumarüü̃ ta Tupanana moxẽ naxca̱x naxãxĩra, rü nhu̱xmachi norü ngúexü̃güna nanaxã, rü nhanagürü nüxü̃: —¡Rü guxãma i pema rü pejaxa̱ü̱x ja daa wĩũ!
28 —Erü daa wĩũ rü nachiga nixĩ ja chaugü ja muxü̃ma i duü̃xü̃güca̱x tá ibacü na ngẽmaãcü Tupana nüxü̃́ nüxü̃ nangechaü̃xü̃ca̱x i norü pecadugü. Rü jimawa Tupana nanango̱xẽẽ na aixcuma jiĩxü̃ i norü uneta.
29 —Rü pemaã nüxü̃ chixu rü tagutáma wena wĩũ chajaxaxü nhu̱xmatáta Chaunatü ja Tupana ãẽ̱xgacü íixĩxü̃wa ngexwacaxü̃cü ja wĩũ pemaã chajaxa̱ü̱x —nhanagürü.
Ngechuchu nüxü̃ nixu na Pedru tá nügü icúxü̃ na norü ngúexü̃ jiĩxü̃
30 Rü nhu̱xmachi nawijaegü ga wüxi ga Tupanaãrü wijaegu. Rü jemawena rü guma Ma̱xpǘne ga Oriwéranecügu ãẽ́ganewa naxĩ.
31 Rü jexguma ga Ngechuchu rü nhanagürü nüxü̃ ga norü ngúexü̃gü: —Guxãma i pema rü tá choxü̃ ípeta̱xgü i nhama i chütaxü̃gu. Erü Tupanaãrü ore i ümatüxü̃wa rü nhanagürü:“Tá chajama̱x ja carneruarü daruü̃, rü tá nanaxüanemare i carnerugü”,
nhanagürü i ngẽma ore.
32 —Notürü ngẽxguma marü juwa ícharüdaxguwena, rü tá chaxira pexü̃pa Gariréaanewa chaxũ —nhanagürü.
33 Rü jexguma ga Pedru rü nanangãxü̃ rü nhanagürü: —Rü woo guxü̃ma i togü cuxü̃ íta̱xgu, notürü i chamax rü tãũxü̃táma cuxü̃ íchata̱x —nhanagürü.
34 Rü Ngechuchu nhanagürü nüxü̃: —Aixcuma cumaã nüxü̃ chixu rü nhamatama i chütaxü̃gu rü naxü̃pa na ota ic̱axü̃, rü tamaẽ̱xpü̱xcüna tá cugü icuicu̱x na chorü duü̃xü̃ cuiĩxü̃.
35 Rü Pedru nanangãxü̃ rü nhanagürü: —Rü woo wüxigu cumaã chaju̱xgu rü tãũxü̃táma chaugü ichicu̱x na curü duü̃xü̃ chiĩxü̃ —nhanagürü. Rü guxü̃ma ga togü ga norü ngúexü̃gü rü ta jema nhanagürügü.
Ngechuchu rü Jechemaníwa najajumuxẽ
36 Rü Ngechuchu rü norü ngúexü̃gü rü nawa nangugü ga wüxi ga nachica ga Jechemaní ga naẽ́ga. Rü Ngechuchu rü nhanagürü nüxü̃: —¡Nuã perütogü! Rü paxa joxni jéa chajajumuxẽ —nhanagürü.
37 Rü Ngechuchu nügüwe nanagagü ga Pedru rü Zebedéu nanegü ga Tiagu rü Juã́ũ. Rü Ngechuchuca̱x inaxügü ga na poraãcü nangechaü̃xü̃ rü naxi̱xãchiãẽxü̃.
38 Rü jexguma ga Ngechuchu rü nhanagürü nüxü̃: —Poraãcü changechaü̃ rü nagu charüxĩnü rü ngẽmamaã tá chaju. ¡Rü nuxa perücho i pemax, rü chauxrüü̃ ipedaue! —nhanagürü.
39 Rü jexguma ga Ngechuchu rü jéaxüra naxũ. Rü waixü̃müãnegu nanangücuchi. Rü najumuxẽ rü nhanagürü: —Pa Chaunatüx, ngẽxguma cuma cunaxwa̱xegu, ¡rü nüxna choxü̃ ínanguxuchixẽẽ i nhaã ngúxü̃ i tá choxü̃ üpetüxü̃! Notürü chanaxwa̱xe i cuxrütama ngúchaü̃ cuxü rü tama i choxrü —nhanagürü.
40 Rü jemawena ga Ngechuchu rü nataegu ga jema norü ngúexü̃gü íjexmagüxü̃wa. Rü nüxü̃ inajangau ga na ínapeexü̃. Rü nhanagürü Pedruxü̃: —Pa Pedrux, ¿taxucürüwama e̱xna namaã peporae na chamaã ipedauexü̃, rü bai i wüxi i ngora?
41 —¡Rü pexuãẽgü rü Tupanana naxca̱x pec̱a na pexü̃ nangü̃xẽẽxü̃ca̱x na tama choxü̃ ípetáxü̃ca̱x ega ngẽxguma ṯacü rü guxchaxü̃ pexü̃ üpetügu! Erü aixcuma peãẽwa rü ípememare, notürü pexene nixĩ ituraxü̃ —nhanagürü.
42 Rü jexguma rü wenaxãrü noxri ínajumuxẽxü̃ca̱x nataegu ga Ngechuchu. Rü wenaxãrü najumuxẽ, rü nhanagürü: —Pa Chaunatüx, ngẽxguma tama cunaxwa̱xegu na nawa choxü̃ ícunguxuchixẽẽxü̃ i nhaã ngúxü̃ i tá chingexü̃, rü marü name i ngẽma cuma cunaxwa̱xexü̃ãcüma chamaã cunaxü —nhanagürü.
43 Rü nhu̱xmachi wenaxãrü norü ngúexü̃gü íjexmagüxü̃wa naxũ. Rü nüxü̃ inajangau ga na ínapeexü̃, jerü poraãcü najaxtaexü̃chi.
44 Rü jéma nüxna nixũ, rü wenaxãrü najajumuxẽ. Rü noxriãcütama najumuxẽ.
45 Rü jemawena rü norü ngúexü̃gü íjexmagüxü̃wa naxũ. Rü nhanagürü nüxü̃: —¡Nhu̱xma waxi pepee rü iperüngü̃ẽ! Erü marü nawa nangu i ngora na chorü uwanü choxü̃ ijauxgüxü̃ rü pecaduã̱xgüxü̃na choxü̃ namugüxü̃.
46 ¡Ipechigü rü ngĩxã ítixĩ! Erü marü nhamatáma nixĩ i ngẽma choxü̃ íjaxuaxü̃xü̃ —nhanagürü.
Ngechuchuxü̃ nijauxgü
47 Rü jexguma íjadexajane ga Ngechuchu, rü ínangu ga Juda ga norü ngúexü̃chire̱x ixĩxü̃. Rü nawe narüxĩ ga muxü̃ma ga duü̃xü̃gü ga taramaã rü naĩmaã ixãxnexü̃. Rü jema nixĩ ga duü̃xü̃gü ga paigüarü ãẽ̱xgacügü rü togü ga ãẽ̱xgacügü ga jaguã̱xgü jéma mugüxü̃.
48 Rü ga Juda ga ínaxuaxü̃xü̃ rü marü jema duü̃xü̃gümaã nanamexẽẽ, rü nhanagürü: —Ngẽma nüxü̃ chawãxĩxü̃ tá nixĩ i Ngechuchu. Rü ngẽma tá nixĩ i pejauxgüxü̃ —nhanagürü:
49 Rü jexguma Ngechuchuca̱x nixũ, rü nhanagürü nüxü̃: —Nuxmaẽ Pa Ngúexẽẽruü̃x —nhanagürü. Rü nhu̱xmachi nüxü̃ nawãxĩ.
50 Rü Ngechuchu nanangãxü̃ rü nhanagürü: —Pa Chamücüx, ¿ṯacüwa nuã cuxũ? —nhanagürü. Rü jexgumatama Ngechuchuxü̃ nijauxgü ga jema duü̃xü̃gü ga Judawe rüxĩxü̃.
51 Rü wüxi ga Ngechuchumücü nanawe̱xechi ga norü tara, rü paigüarü ãẽ̱xgacüarü duü̃xü̃xü̃ ínadaechinü.
52 Rü jexguma ga Ngechuchu rü nhanagürü: —¡Naxchiü̃gu jaxücuchi i curü tara! Erü guxãma ja jíxema taramaã nuẽxẽ, rü taragu tátama tajue.
53 —¿Tama e̱xna nüxü̃ cucua̱x rü ngẽxguma chi chama chanaxwa̱xegu, rü Chaunatüna chi naxca̱x chaca na choxü̃́ núma namugüãxü̃ca̱x i muxü̃ma i norü orearü ngeruü̃gü i dauxü̃cü̱̃ã̱x na choxü̃ janangü̃xẽẽgüxü̃ca̱x?
54 —Notürü ngẽxguma chi ngẽma chaxü̱xgu, rü ¿nhuxãcü chi ningu i Tupanaãrü ore i ümatüxü̃ i nüxü̃ ixuxü̃ na chama rü tá chajuxü̃?
55 Rü jexguma ga Ngechuchu rü nhanagürü nüxü̃ ga jema duü̃xü̃gü: —¿Tü̱xcüü̃ taragü rü naĩxmena̱xãgümaã chauxca̱x nuã pexĩ na choxü̃ pejarüjauxgüxü̃ca̱x nhama wüxi i ngĩ́ta̱xáxü̃ chiĩxü̃rüü̃? Rü guxü̃ ga ngunexü̃gu rü tupauca ga taxü̃newa changu̱xẽẽtae notürü taguma jexma choxü̃ pejauxgü.
56 —Notürü guxü̃ma i nhaã nhu̱xma ngupetüxü̃, rü ngẽmaãcü nangupetü na janguxü̃ca̱x i Tupanaãrü ore ga nuxcümaxü̃güxü̃ ga norü orearü uruü̃gü ümatügüxü̃ —nhanagürü. Rü jexguma ga guxü̃ma ga norü ngúexü̃gü rü nüxna nibuxmü. Rü nüxĩcatama jéma nanata̱xgü ga Ngechuchu.
Ãẽ̱xgacügü ga taxü̃güpe̱xewa Ngechuchuxü̃ nagagü
57 Rü Caipá ga paigüarü ãẽ̱xgacüxü̃tawa Ngechuchuxü̃ nagagü ga jema duü̃xü̃gü ga jajauxgüxü̃. Rü jéma nixĩ ga nangutaque̱xegüxü̃ ga ngúexẽẽruü̃gü ga ore ga mugüwa ngu̱xẽẽtaegüxü̃ rü ãẽ̱xgacügü ga jaguã̱xgü.
58 Notürü ga Pedru rü jaxü̃gu nawe nixãchigü nhu̱xmata paigüarü ãẽ̱xgacü ga Caipáxü̃tawa nangu. Rü purichíagü ga tupaucaarü daruü̃gümaã jéma ĩã̱xtüwa narüto, jerü nüxü̃ nadauxchaü̃ ga ṯacü tá Ngechuchumaã na naxüexü̃.
59 Rü ga paigüarü ãẽ̱xgacügü rü guxü̃ma ga Judéugüarü ãẽ̱xgacügü ga taxü̃gütücumü rü naxca̱x nadaugü ga wüxi ga ore ga doramare ixĩxü̃ na jemamaã Ngechuchuxü̃ ínaxuaxü̃güxü̃ca̱x na jama̱xgüãxü̃ca̱x.
60 26:60-61 Notürü woo muxü̃ma ga duü̃xü̃gü ga doraxü̃mare nachigaxü̃ jéma jarüxugügüxü̃, rü taxucürüwa nüxü̃ inajangaugü ga ṯacüca̱x tá na jama̱xgüãxü̃. Rü düxwa jéma naxĩ ga taxre ga jatügü ga doraxü̃mare jéma jarüxugüxü̃. Rü nhanagürügü: —Toma nüxü̃ taxĩnüẽ i nhaã jatü rü nhanagürü:“Tá nagu chapogü ja daa tupauca ja taxü̃ne ja Tupanaãrü, rü tamaẽ̱xpü̱x i ngunexü̃gu tá wenaxãrü íchanadaxẽẽ”, nhanagürügü.
61 Nüü̃ nadau 26:60
62 Rü jexguma ga paigüarü ãẽ̱xgacü ga Caipá rü inachi, rü nhanagürü Ngechuchuxü̃: —¿Rü ṯacümaã cunangãxü̃ i nhu̱xmax? ¿Rü nhuxũ nhaxü̃ jiĩxü̃ i ngẽma cuchiga i nüxü̃ jaxugügüxü̃? —nhanagürü.
63 Notürü ga Ngechuchu rü nangea̱xmare. Rü jemaca̱x ga paigüarü ãẽ̱xgacü ga Caipá rü nhanagürü nüxü̃: —Tupana ja Maxü̃cüégagu chanaxwa̱xe i aixcuma tomaã nüxü̃ cuixu na texé cuiĩxü̃. ¿Rü cuma e̱xna i Cristu ja Tupana Nane cuiĩxü̃, rü e̱xna tama? —nhanagürü.
64 Rü Ngechuchu nanangãxü̃ rü nhanagürü: —Ngü̃, rü ngẽma nüxü̃ cuixuxü̃ chixĩ. Rü pemaã nüxü̃ chixu rü tá choxü̃ pedaugü i ngẽxguma Chaunatü ja Poracüxü̃tawa charüto̱xgu rü ngẽxguma caixanexü̃gu wenaxãrü núma chaxũxgu —nhanagürü.
65 Rü jexguma ga paigüarü ãẽ̱xgacü rü norü numaã nügüchirugu nagaugü. Rü nhanagürü: —Rü nhaã jatü rü ṯacü Tupanamaã nixugü. Rü taxuü̃ca̱xma marü tanaxwa̱xe i nhu̱xma i to i ore na napocuxü̃ca̱x i nhaã jatü. Rü pematama marü nüxü̃ pexĩnüẽ na nhuxãcü chixexü̃maã na jadexaxü̃.
66 —¿Nhuxũ nhapegüxü̃ i pemax? —nhanagürü. Rü nümagü ga togü ga ãẽ̱xgacügü rü nanangãxü̃gü rü nhanagürügü: —Ngẽmáãcü chixexü̃ naxü. Rü name nixĩ i noxtacüma naju —nhanagürügü.
67 Rü jexguma rü Ngechuchuchametüwa nac̱uaixgüe. Rü nüxna nanac̱uaixcagü. Rü togü rü nanapegüchametügü.
68 Rü nhanagürügü: —Pa Cristux, ¡nüxü̃ nacua̱x na texé cuxü̃ pegüchametügüxü̃ rü cuxna nac̱uaixcagüxü̃! —nhanagürügü.
Pedru inajacu̱x na Ngechuchuxü̃ nacuáxü̃
69 Rü joxni ga Pedru rü ãẽ̱xgacüpataa̱xtüwa narüto. Rü wüxi ga pacü ga jema ãẽ̱xgacüarü duü̃xü̃, rü Pedruca̱x ijaxũ. Rü ngĩgürügü nüxü̃: —Cuma rü ta namücü cuixĩ i ngẽma Ngechuchu i Gariréaanecü̱̃ã̱x —ngĩgürügü.
70 Notürü ga Pedru rü guxü̃ ga jema duü̃xü̃güpe̱xewa rü nügü inicu̱x na Ngechuchuarü duü̃xü̃ jiĩxü̃, rü nhanagürü: —Chama rü tama nüxü̃ chacua̱x i ṯacüchiga nixĩ i ngẽma nüxü̃ cuixuxü̃ —nhanagürü.
71 Rü jexguma marü jema ĩpataa̱xtüarü ĩã̱xwa ínaxũũxgu ga Pedru, rü naĩ ga pacü nüxü̃ idau. Rü ngĩgürügü namaã ga jema duü̃xü̃gü ga jéma jexmagüxü̃: —Nhaã jatü rü Ngechuchu ja Nacharétucü̱̃ã̱xmücü nixĩ —ngĩgürügü.
72 Notürü ga Pedru rü wenaxãrü nügü inicu̱x na Ngechuchuarü duü̃xü̃ jiĩxü̃. Rü nhanagürü: —Chama rü tama nüxü̃ chacua̱x i ngẽma jatü. Rü Tupana choxü̃ pocux ega tama aixcuma jixĩgu i chorü ore —nhanagürü.
73 Rü jixcamaxü̃ra rü jema duü̃xü̃gü ga jéma jexmagüxü̃ rü Pedruca̱x naxĩ, rü nhanagürügü nüxü̃: —Aixcuma nixĩ na cuma rü ta rü ngẽma Ngechuchutanüxü̃ cuiĩxü̃, erü wüxi i Gariréaanecü̱̃ã̱x idexaxü̃rüü̃ cuidexa —nhanagürügü.
74 Rü jexguma ga Pedru rü poraãcü nügü niixã, rü nhanagürü nüxü̃: —Rü aixcuma tama nüxü̃ chacua̱x i ngẽma jatü. Rü ngẽxguma doraxü̃ chixuxgu rü Tupana choxü̃ pocux —nhanagürü. Rü jexgumatama nica ga ota.
75 Rü jexguma ga Pedru rü nüxna nacua̱xãchi ga jema ore ga ü̃paacü Ngechuchu namaã nüxü̃ ixuxü̃ ga nhaxü̃:
“Rü naxü̃pa na ota ic̱axü̃, rü cuma rü tamaẽ̱xpü̱xcüna cugü tá cuicu̱x na chorü duü̃xü̃ cuiĩxü̃”, nhaxü̃. Rü jéma ínaxũxũ ga Pedru rü poraãcüxü̃chima naxaxu.
