Mateu 27:1-66
27 Rü jexguma jangunegu rü guxü̃ma ga paigüarü ãẽ̱xgacügü rü jema togü ga ãẽ̱xgacügü ga tacügü ga jaguã̱xgü, rü nügümaã nanamexẽẽgü na nhuxãcü Ngechuchuxü̃ jama̱xgüxü̃.
2 Rü najana̱ĩ̱xgüchacüügü rü jemaãcü ãẽ̱xgacü ga Piratuxü̃tawa nanagagü. Piratu nixĩ ga Romacü̱̃ã̱x ga ãẽ̱xgacü ga Judéaanemaã icuácü.
Naju ga Juda
3 Rü nüma ga Juda ga Ngechuchuxü̃ íjaxuaxü̃xü̃ rü nüxü̃ nadau ga Ngechuchuxü̃ na napocuexü̃. Rü poraãcü nagu narüxĩnü ga jema chixexü̃ ga nümatama naxüxü̃. Rü jéma naxũ naxü̃tawa ga jema paigüarü ãẽ̱xgacügü rü togü ga ãẽ̱xgacügü ga tacügü ga jaguã̱xgü. Rü ngĩxü̃ najataeguxẽẽ ga jema 30 tachinü ga dĩẽru ga nüxna ngĩxü̃ naxãgücü.
4 Rü nhanagürü nüxü̃: —Chama rü marü chixexü̃ chaxü, erü naẽchita íchajaxuaxü̃ i wüxi i jatü i taxuü̃ma i chixexü̃ üxü̃, rü nhu̱xma rü tá ngẽmagagu naju —nhanagürü. Notürü nümagü ga ãẽ̱xgacügü rü nanangãxü̃gü, rü nhanagürügü: —Toma rü tama nüxü̃ tacuáxchaü̃ i ngẽma. Cugagutama nixĩ, rü cuma i nüxü̃ cucuáxü̃ na nhuxãcü cugümaã cunamexẽẽxü̃ i ngẽma —nhanagürügü.
5 Rü jexguma ga Juda rü jexma tupauca ga taxü̃nechiãgu ngĩxü̃ nawotanü ga jema dĩẽru. Rü nhu̱xmachi ínixũ rü nügü najawẽxnaxã.
6 Rü ga paigüarü ãẽ̱xgacügü rü ngĩxü̃ nade ga jema dĩẽru. Rü nhanagürügü: —Taxucürüwa tupauca ja taxü̃neãrü dĩẽruchiü̃gu ngĩxü̃ tanu i nhaã dĩẽru, erü ngẽmamaã tanaxütanü i ngẽma jatü i tá juxü̃ —nhanagürügü.
7 Rü nhu̱xmachi nügümaã nanamexẽẽgü na jema dĩẽrumaã naxca̱x nataxegüxü̃ca̱x ga wüxi ga naãne ga waixü̃mü ga üwechixü̃ nawa najauxgüxü̃. Rü jema naãneca̱x nataxegü na nüxü̃́ najexmaxü̃ca̱x ga nachica ga ngexta na nata̱xgüãxü̃ca̱x ga jema duü̃xü̃gü ga togü ga nachiü̃ãnecü̱̃ã̱x ixĩgüxü̃.
8 Rü ngẽmaca̱x i nhu̱xma rü ta i ngẽma naãne rü Nagüchitaü̃gu naxãẽ́ga.
9 Rü jemaãcü ningu ga Tupanaãrü ore ga nuxcümaxü̃cü ga norü orearü uruü̃ ga Jeremíã ümatüxü̃ ga nhaxü̃:“Rü nümagü ngĩxü̃ nade ga jema 30 tachinü ga dĩẽru ga Cristutanü Judéugü ngĩxü̃ ixãgücü.
10 Rü jema dĩẽrumaã naxca̱x nataxegü ga wüxi ga naãne ga waixü̃mü ga üwechixü̃ nawa najauxgüxü̃, jema Cori ga Tupana chamaã nüxü̃ ixuxü̃rüü̃”,
nhaxü̃.
Piratupe̱xewa najexma ga Ngechuchu
11 Rü ãẽ̱xgacü ga Piratuxü̃tawa Ngechuchuxü̃ nagagü. Rü nüma ga Piratu rü Ngechuchuna naca, rü nhanagürü: —¿Cuma cuiĩxü̃ i Judéugüarü ãẽ̱xgacü ja tacü? —nhanagürü. Rü Ngechuchu nanangãxü̃, rü nhanagürü: —Ngü̃, rü ngẽma nüxü̃ cuixuxü̃ chixĩ i chamax —nhanagürü.
12 Rü Ngechuchuxü̃ ínaxuaxü̃gü ga paigüarü ãẽ̱xgacügü rü togü ga ãẽ̱xgacügü ga tacügü ga jaguã̱xgü. Notürü ga Ngechuchu rü taxuxü̃maãma nanangãxü̃.
13 Rü jexguma ga Piratu rü nhanagürü: —¿Tama e̱xna nüxü̃ cuxĩnü i ngẽma ore i namaã cuxü̃ ínaxuaxü̃güxü̃? —nhanagürü.
14 Notürü ga Ngechuchu rü taxuxü̃maãma nanangãxü̃. Rü jemaca̱x poraãcü naḇaixãchiãẽ ga ãẽ̱xgacü ga Piratu.
Piratu rü Ngechuchumaã nanaxuegu na najuxü̃ca̱x
15 Rü guxü̃guma ga jema Üpetüchigaarü petagu, rü Piratu ínananguxuchixẽẽxü̃ ga wüxi ga pocuxü̃ ga duü̃xü̃gü naxca̱x ícagüxü̃, jerü jema nixĩ ga nacüma.
16 Rü jéma najexma ga wüxi ga pocuxü̃ ga guxü̃ ga duü̃xü̃gü meã nüxü̃ cuáxü̃. Rü Barabá nixĩ ga naẽ́ga.
17 Rü jexguma jéma nangutaque̱xegügu ga duü̃xü̃gü, rü Piratu nüxna naca, rü nhanagürü: —¿Texé ja petümawa̱xéxe na pexca̱x tüxü̃ chingéxü̃? ¿Penaxwa̱xexü̃ na pexca̱x chajangéxü̃ i Barabá rü e̱xna Ngechuchu i Cristugu ãẽ́gaxü̃? —nhanagürü.
18 Rü jema nhanagürü ga Piratu jerü nüxü̃ nacua̱x na Ngechuchuchi naxaiexü̃ ga Judéugüarü ãẽ̱xgacügü, rü jemaca̱x nixĩ ga naxü̃tawa nagagüãxü̃.
19 Rü jexguma norü tochicawa nato̱xgu ga Piratu, rü naxma̱x jéma imuga, rü ngĩgürügü: —Tama name i cunapocu i ngẽma jatü i taxuü̃ma i chixexü̃ üxü̃. Jerü nagagu ĩne chütacü rü poraãcü chachixenegü —ngĩgürügü.
20 Notürü ga paigüarü ãẽ̱xgacügü rü togü ga ãẽ̱xgacügü ga itaxü̃gü ga jaguã̱xgü, rü duü̃xü̃güxü̃ naxucu̱xẽgü na naxca̱x ínacagüxü̃ca̱x na Barabáxü̃ jangéxü̃ca̱x rü Ngechuchuxü̃ na najuxẽẽgüxü̃ca̱x.
21 Rü ãẽ̱xgacü ga Piratu rü wenaxãrü duü̃xü̃güna naca, rü nhanagürü: —¿Ngẽxü̃rüüxü̃ i ngẽma taxrewa i pema penaxwa̱xexü̃ na chajangéxü̃? —nhanagürü. Rü nümagü ga duü̃xü̃gü nanangãxü̃gü, rü nhanagürügü: —Tanaxwa̱xe i Barabáxü̃ cuinge̱x —nhanagürügü.
22 Rü jexguma ga ãẽ̱xgacü ga Piratu rü nüxna naca, rü nhanagürü: —¿Ṯacü tá chaxüxü̃ namaã i ngẽma Ngechuchu i Cristugu ãẽ́gaxü̃? —nhanagürü. Rü guxü̃ma ga duü̃xü̃gü rü nanangãxü̃gü, rü nhanagürügü: —¡Curuchawa japota! —nhanagürügü.
23 Rü jexguma ga Piratu rü nhanagürü nüxü̃: —¿Notürü ṯacü rü chixexü̃ naxü? —nhanagürü. Notürü ga nümagü ga duü̃xü̃gü rü wenaxãrü tagaãcü nhanagürügü: —¡Curuchawa japota! —nhanagürügü.
24 Rü jexguma Piratu nüxü̃ da̱xgu ga marü taxucürüwama Ngechuchuxü̃ na ínanguxuchixẽẽẽ́gaxü̃, jerü ga duü̃xü̃gü rü marü nanaxi̱xãchiãẽgüchaü̃, rü jemaca̱x wüxi ga norü duü̃xü̃xü̃ namu ga dexá naxü̃tawa na tanangexü̃ca̱x. Rü nügü najaxme̱x ga Piratu nape̱xewa ga guxü̃ma ga jema duü̃xü̃gü. Rü nhanagürü: —Tama chaugagu tá nixĩ i na najuxü̃ i nhaã jatü i taxuü̃ma i chixexü̃ üxü̃, rü pegagu tátama nixĩ —nhanagürü.
25 Rü guxü̃ma ga jema duü̃xü̃gü nanangãxü̃gü, rü nhanagürügü: —Togagu rü toxocügügagu tá nixĩ i najuxü̃ —nhanagürügü.
26 Rü jexguma ga Piratu rü Barabáxü̃ ínanguxuchixẽẽ. Rü nhu̱xmachi norü churaragüxü̃ namu na Ngechuchuxü̃ nac̱uaixgüxü̃ca̱x, rü jemawena curuchawa na janapotagüãxü̃ca̱x.
27 Rü nhu̱xmachi ga jema churaragü rü Piratupataarü aixepewa Ngechuchuxü̃ nagagü. Rü jexma Ngechuchuxü̃tagu nanangutaque̱xexẽẽ ga guxü̃ma ga churaragü.
28 Rü nhu̱xmachi Ngechuchuxü̃ ínacu̱xuchigü, rü wüxi ga máxü̃ ga naxchiru ga dauxü̃gu najacu̱xẽẽgü.
29 Rü naẽruwa najanga̱xcuchigü ga wüxi ga nga̱xcueruü̃ ga chuchuxü̃wa naxügüxü̃. Rü wüxi ga naĩxmena̱xãxãcüxü̃ nüxü̃ najajauxãchixẽẽ ga norü tügüneme̱xẽwa. Rü nhu̱xmachi nape̱xegu nacaxã́pü̱xügü, rü nüxü̃ nacugüe, rü nhanagürügü: —¡Namaü̃x ja Judéugüarü Ãẽ̱xgacü ja Tacüx! —nhanagürügü.
30 Rü nüxna nac̱uaixgüe. Rü nüxna nanajauxgü ga guma naĩxmena̱xãxãcü, rü naẽruwa namaã nanac̱uaixcagü.
31 Rü jexguma nüxü̃ nacugüeguwena rü ínanacu̱xuchigü ga jema naxchiru ga daucharaxü̃. Rü wenaxãrü naxchirugutama najacu̱xẽẽgü. Rü nhu̱xmachi najagagü na curuchawa janapotagüãxü̃ca̱x.
Ngechuchuxü̃ curuchawa nipotagü
32 Rü jexguma jéma inaxĩãchigu, rü nüxü̃ nadaugü ga wüxi ga jatü ga Chirénecü̱̃ã̱x ga Chimáũgu ãẽ́gacü. Rü guma jatüxü̃ ngĩxü̃ iningexẽẽgü ga Ngechuchuarü curucha.
33 Rü nawa nangugü ga wüxi ga nachica ga Górgutagu ãẽ́gaxü̃. Rü ngẽma naẽ́ga rü Duü̃xẽẽruchina̱xã nhaxü̃chiga nixĩ.
34 Rü nüxna nanaxãgü ga wĩũ ga ngúxü̃ãrü naãchixẽẽruü̃maã ãẽ́xü̃cü na jaxaxãxü̃ca̱x. Rü Ngechuchu nüxü̃ naxaxneta, notürü tama najaxaxü.
35 Rü jexguma marü curuchawa japotagüãxguwena rü ga churaragü rü nanade ga Ngechuchuchiru. Rü nhu̱xmachi wüxi ga dĩẽru ngĩxü̃ nanhanagügü na jemawa nüxü̃ nacua̱xgüxü̃ca̱x na ṯacü tá najaxuxü̃ ga wüxichigü.
36 Rü nhu̱xmachi jéma narütogü ga churaragü na Ngechuchuna jéma nadaugüxü̃ca̱x.
37 Rü norü curuchatape̱xewa najapocuchi ga wüxi ga mürapewa ga ãẽ́gatachinüxü̃ ga nüxü̃ ixuxü̃ ga ṯacüca̱x Ngechuchuxü̃ curuchawa na japotagüxü̃. Rü nhanagürü: “Nhaã nixĩ i Ngechuchu i Judéugüarü Ãẽ̱xgacü ja Tacü”, nhanagürü.
38 Rü jexgumarüü̃ ta curuchawa najapotagü ga taxre ga máẽtagüxü̃. Rü wüxi rü Ngechuchuarü tügünecüwawa naxü, rü to ga norü ṯoxwecüwawa.
39 27:39-40 Rü jema duü̃xü̃gü ga jéma chopetüxü̃, rü Ngechuchumaã naguxchigagü, rü nanexãẽrugüãcüma nhanagürügü: —Dücax, cuma cunangutaü̃xẽẽẽ́ga ja tupauca ja taxü̃ne, rü tamaẽ̱xpü̱x i ngunexü̃gu wenaxãrü ícunadaxẽẽẽ́ga. ¡Cugütama namaxẽẽ i nhu̱xmax! Rü ngẽxguma chi aixcuma Tupana Nane cuixĩgu, rü ¡írüxĩ i curuchawa! —nhanagürügü.
40 Nüü̃ nadau 27:39
41 Rü jexgumarüü̃ ta Ngechuchuxü̃ nacugüecüraxü̃ ga paigüarü ãẽ̱xgacügü, rü ngúexẽẽruü̃gü ga ore ga mugüwa ngu̱xẽẽtaegüxü̃, rü Parichéugü, rü togü ga ãẽ̱xgacügü ga itaxü̃gü ga jaguã̱xgü. Rü nügümaã nhanagürügü:
42 —Rü nüma rü togüxü̃ namaxẽxẽẽ notürü tama nüxü̃ nacua̱x na nügütama namaxẽẽxü̃. Rü ngẽxguma chi aixcuma Judéugüarü ãẽ̱xgacü ja tacü jixĩgu, rü nhu̱xma rü ¡ínaxĩ̱x i curuchawa na nüxü̃́ jaxõgüxü̃ca̱x!
43 —Rü nüma nagu naxĩnügu rü Tupana tá nüxü̃ narüngü̃xẽẽ. Ẽcü, nhu̱xma rü Tupana nüxü̃ rüngü̃xẽẽ̱x ega aixcuma nüxü̃ nangü̃xẽẽchaü̃gu. ¿Tama e̱xna nümatama tamaã nüxü̃ jaxuxü̃ na Tupana Nane jiĩxü̃? —nhanagürügü.
44 Rü woo ga jema máẽtagüxü̃ ga naxrüü̃ curuchawa ipotagüxü̃, rü namaã naguxchigagü.
Naju ga Ngechuchu
45 Rü jexguma rü guxü̃ ga naãnewa naxẽãne. Rü tocuchigu inaxügü ga jema nhu̱xmata tamaẽ̱xpü̱xarü ngorawa nangu ga jáuanecü.
46 Rü jema tamaẽ̱xpü̱xarü ngoragu nixĩ ga Ngechuchu ga tagaãcü aita naxüxü̃, rü nhaxü̃: —Erí, Erí, ¿damá chabátani? —nhanagürü. Rü ngẽma rü nhaxü̃chiga nixĩ:
“Pa Chorü Tupana, Pa Chorü Tupanax, ¿tü̱xcüü̃ choxü̃ nuã cuta̱x?” nhaxü̃chiga nixĩ.
47 Rü nümaxü̃ ga duü̃xü̃gü ga jéma jexmagüxü̃ rü nüxü̃ naxĩnüẽ, rü nhanagürügü: —Nhaã jatü rü nuxcümaxü̃cü ga Tupanaãrü orearü uruü̃ ga Eríaca̱x naca —nhanagürügü.
48 Rü jexgumatama rü wüxi ga jema duü̃xü̃gü ga jéma jexmagüxü̃ rü inanhaãchi rü Ngechuchuxü̃tawa nanange ga wüxi ga tüaxmü ga wĩũ ga marü ngúchia̱xü̃chicümaã jawaixẽẽxü̃. Rü wüxi ga dexnewa najana̱ĩ̱x. Rü nhu̱xmachi Ngechuchua̱xgu nanawe̱x na nüxü̃ natuxuxü̃ca̱x.
49 Notürü ga jema togü ga duü̃xü̃gü ga jéma jexmagüxü̃ rü nhanagürügü: —Jixrüma. Rü ngĩxã itarüdaunü ngoxita Ería nuã ũ na nüxü̃ janangü̃xẽẽxü̃ca̱x —nhanagürügü.
50 Rü wenaxãrü tagaãcü aita naxü ga Ngechuchu, rü nhu̱xmachi naju.
51 Rü jexgumatama ga tupauca ga taxü̃neãrü tüjemachiãxü̃ rü taxregu narügaute. Rü dauxü̃wa inanaxügü ga na nagautexü̃ rü nhu̱xmata nhaxtüwa nangu. Rü naxĩã̱xãchiane, rü narüngǘxtegü ga nutagü ga itacü.
52 Rü juetamaü̃gü rü ningenagü. Rü wena namaxẽ ga muxü̃ma ga duü̃xü̃gü ga juechiréxü̃ ga Tupanaãxü̃́ jaxõgüxü̃.
53 Rü jexguma Ngechuchu wena maxü̃guwena, rü naxmaü̃wa ínachoxü̃ ga jema duü̃xü̃gü ga wena maxẽxü̃. Rü Jerucharéü̃wa naxĩ. Rü muxü̃ma ga duü̃xü̃gü nüxü̃ nadaugü.
54 Rü jema churaragüarü ãẽ̱xgacü rü norü churaragü ga Ngechuchuna ídaugüxü̃, rü nüxü̃ nadaugü ga na naxĩã̱xãchianexü̃ rü guxü̃ma ga jema ngupetüxü̃. Rü jexguma rü poraãcü namuü̃ẽ, rü nhanagürügü: —Aixcuma nixĩ ja daa jatü i Tupana Nane na jiĩxü̃ —nhanagürügü.
55 Rü ijexmagü ga mucüma ga ngecügü ga jéma jaxü̃wa nüxü̃ rüdaunücü. Rü jema ngecügü ijixĩ ga Ngechuchuxü̃ íixümücügücü rü nüxü̃ rüngü̃xẽẽgücü ga jexguma Gariréaanewa ne naxũxgu.
56 Rü jema ngecügütanüwa ijexma ga María ga Magadácü̱̃ã̱x, rü María ga Tiagu rü Juche naẽ, rü Zebedéu nama̱x ga Tiagu rü Juã́ũ naẽ.
Ngechuchu rü naxmaü̃gu najaxücuchigü
57 Rü jexguma marü nachütachaü̃gu, rü jéma nangu ga wüxi ga jatü ga Arimatéacü̱̃ã̱x ga taarü dĩẽruã́cü ga Juchegu ãẽ́gacü. Rü nüma rü ta Ngechuchuaxü̃́ najaxõ.
58 Rü nüma rü Piratuna najaca rü ngoxita name na najauxãxü̃ ga Ngechuchuxü̃ne ga curuchawa. Rü Piratu norü churaragüxü̃ namu na nüxna naxãgüãxü̃ca̱x ga Ngechuchuxü̃ne.
59 Rü Juche nanajaxu ga Ngechuchuxü̃ne ga curuchawa. Rü wüxi ga naxchápenüü̃ ga ngẽmataxü̃maã nananuque.
60 Rü jema naxmaü̃ ga jexwacaxüxü̃ ga Juche nügüca̱xtama duü̃xü̃güxü̃ jacaxmaxẽẽxü̃ ga nuta ga tacüarü ma̱xpǘxü̃wa jexmaxü̃gu najaxücuchi ga Ngechuchuxü̃ne. Rü nhu̱xmachi nanangũxtaü̃ namaã ga wüxi ga nuta ga taxüchicü. Rü jemawena rü ínixũ.
61 Rü jéma Ngechuchumaü̃ãrü to̱xma̱xtawa irütogü ga María ga Magadácü̱̃ã̱x rü naĩ ga María.
Purichíagü nüxna nadaugü ga jema naxmaü̃ ga Ngechuchuxü̃ nagu jaxücuchigüxü̃
62 Rü moxü̃ãcü ga ngü̃xchigaarü ngunexü̃gu rü paigüarü ãẽ̱xgacügü rü Parichéugü rü jéma Piratuxü̃tawa naxĩ.
63 Rü nhanagürügü nüxü̃: —Pa Corix, nüxna tacua̱xãchie ga jema jatü ga Ngechuchu ga idorata̱xáxü̃ rü jexguma namaxü̃gu rü nhanagürü tomaã:
“Ngẽxguma chaju̱xgu rü tamaẽ̱xpü̱x i ngunexü̃guwena rü wena táxarü ícharüda”, nhanagürü tomaã.
64 —Rü ngẽmaca̱x tanaxwa̱xe i churaragü ngẽ́ma cumugü na nüxna jadaugüxü̃ca̱x i ngẽma naxmaü̃ nhu̱xmatáta tamaẽ̱xpü̱x i ngunexü̃wa nangu na tama chütacü ngẽ́ma naxĩxü̃ca̱x i norü ngúexü̃gü na jajauxgüãxü̃ca̱x i naxü̃ne rü nhu̱xmachi duü̃xü̃gümaã nüxü̃ na jaxugüxü̃ca̱x na marü wena namaxü̃xü̃. Erü ngẽxguma chi ngẽmaãcü naxüpetügu, rü noxriarü jexera tá nixĩ na duü̃xü̃güxü̃ nawomüxẽẽxü̃ —nhanagürügü.
65 Rü Piratu nhanagürü nüxü̃: —Ngẽãgü nixĩ i churaragü i pexca̱x. ¡Ẽcü ngẽ́ma namaã pexĩ na meãma pema penaxwa̱xexü̃ãcüma nüxna pedaugüxü̃ca̱x i naxmaü̃! —nhanagürü.
66 Rü jema churaragümaã jéma naxĩ, rü meãma najataixẽẽgü ga guma nuta ga Ngechuchumaxü̃ namaã rüngũxtaü̃cü. Rü nanaxüarü cua̱xruü̃ã̱xgü na taxúema naẽchita ínaxügachigüxü̃ca̱x ga guma nuta. Rü nhu̱xmachi jexma nanamugü ga churaragü na nüxna nadaugüxü̃ca̱x.
