Mateu 3:1-17
3 3:1-2 Rü jexguma Nacharétuwa najexmagu ga Ngechuchu, rü Juã́ũ ga baiü̃xẽẽruü̃ inanaxügü ga Tupanaãrü orexü̃ na jaxuxü̃ ga Judéaanewa ga dauxchitawa ngextá taxúema íxãpataxü̃wa. Rü duü̃xü̃gümaã nüxü̃ nixu rü nhanagürü: —¡Nüxü̃ perüxoe i pecüma i chixexü̃! Erü marü ningaica na perü ãẽ̱xgacü na jiĩxü̃ ja Tupana —nhanagürü.
2 Nüü̃ nadau 3:1
3 Rü guma Juã́ũ ga baiü̃xẽẽruü̃chiga nixĩ ga naxümatüãxü̃ ga nuxcümaxü̃cü ga Tupanaãrü orearü uruü̃ ga Ichaía ga jexguma nhaxgu:“Rü dauxchitawa i ngextá taxúema íxãpataxü̃wa tá nangẽxma i wüxi i duü̃xü̃ i ngẽ́ma tagaãcü nhaxü̃: ‘¡Pegü pemexẽẽ̱x naxca̱x ja Cori! ¡Rü naxca̱x ipejanawe̱xãchixẽẽ̱x i perü maxü̃!’ ”
nhaxü̃.
4 Rü naxchiru ga Juã́ũ rü cameruta̱xanaxca̱x nixĩ, rü norü gojexü̃ rü naxcha̱xmünaxca̱x nixĩ. Rü beruremaã rü munümaã naxãwemü.
5 Rü jéma Juã́ũxü̃tawa inajarüxĩnüẽgüxü̃ ga duü̃xü̃gü ga Jerucharéü̃cü̱̃ã̱x, rü duü̃xü̃gü ga guxü̃ ga Judéaanewa ne ĩxü̃, rü duü̃xü̃gü ga natü ga Judã́ũãrü ngaicamagu ãchiü̃güxü̃.
6 Rü guxema duü̃xẽgü ga nüxü̃ ixugüexe ga tümaãrü pecadugü, rü Juã́ũ rü tüxü̃ ínabaiü̃xẽẽ ga natü ga Judã́ũwa.
7 Notürü jexguma Juã́ũ nüxü̃ da̱xgu ga naxü̃tawa na nangugüxü̃ ga muxü̃ma ga ãẽ̱xgacügü ga Parichéugü rü Chaduchéugü na ínabaiü̃xẽẽãxü̃ca̱x, rü Juã́ũ nhanagürü nüxü̃: —Pa Ãxtapearü Duü̃xü̃güx, ¿rü texé pemaã nüxü̃ tixu na naxchaxwa peibuxmüxü̃ca̱x i ngẽma Tupanaãrü pocu i ãũcümaxü̃ i marü ingaicaxü̃?
8 —¡Rü penaxwa̱xe na Tupana naxwa̱xexü̃ãcüma pemaxẽxü̃ na ngẽmaãcü guxü̃ma i duü̃xü̃gü nüxü̃ nadaugüxü̃ca̱x na aixcuma marü nüxü̃ perüxoexü̃ i ngẽma pecüma i chixexü̃!
9 —Erü Tupanape̱xewa rü taxuwama name na pegü peixuxü̃ na Abrã́ũtanüxü̃ i Judéugü peixĩgüxü̃ erü tama ngẽmaca̱x nixĩ ja Tupana i duü̃xü̃güxü̃ najaxuxü̃. Rü pemaã nüxü̃ chixu rü ngẽxguma Tupana naxwa̱xegu, rü tama nüxü̃́ naguxcha na daa nutawa Abrã́ũtanüxü̃ nanguxü̃xẽẽxü̃.
10 —Rü Tupanaãrü juema rü marü íimemare na nadaxü̃xü̃ca̱x i ngẽma nanetügü i tama mexü̃. Rü guxü̃ma i nanetügü i chixearü õṍxü̃ rü tá nadaxü̃, rü nhu̱xmachi tá ínagu —nhanagürü.
11 Rü nhanagürü ta ga Juã́ũ: —Chama rü aixcuma dexáwamare pexü̃ íchabaiü̃xẽẽ na togü i duü̃xü̃gü nüxü̃ cuáxü̃ca̱x na aixcuma marü nüxü̃ perüxoexü̃ i pecüma i chixexü̃. Notürü chaweama tá ínangu i to i Tupanaãrü orearü uruü̃. Rü nüma tá pexü̃tawa nanamu i Tupanaãẽ i üünexü̃ na naporaexẽẽãxü̃ i ngẽma Tupanawe rüxĩxü̃, rü nüma tá nanapocue i ngẽma Tupanaxü̃ oexü̃. Erü nüma rü poraãcü choxü̃ narüjexera na ãẽ̱xgacü jiĩxü̃. Rü chama rü nape̱xewa rü taxuwama chame rü bai i norü chapatuarü ngewaxüra chame.
12 —Rü nüma rü marü ínamemare na nhama i naãnewa jadexechiãxü̃ca̱x i norü duü̃xü̃gü nhama wüxi i jatü trigu naã́tüna idexechixü̃rüü̃. Rü ngẽmaãcü tá najadexechi i ngẽma noxrü ixĩgüxü̃ na naxü̃tawa nangẽxmagüxü̃ca̱x, notürü ngẽma tama noxrü ixĩgüxü̃ rü tá ínanagu nawa ja jima üxü ja taguma ixoxü̃ne —nhanagürü ga Juã́ũ.
Ngechuchuarü baiechiga
13 Rü jexguma nixĩ ga Gariréaanewa ne naxũxü̃ ga Ngechuchu. Rü Juã́ũxü̃tawa nanguxü̃ ga Judã́ũ ga natüwa, na Juã́ũ ínabaiexẽẽxü̃ca̱x.
14 Rü noxri rü tama Ngechuchuxü̃ ínabaiexẽẽchaü̃ ga Juã́ũ. Rü nhanagürü nüxü̃: —Choxü̃ waxi nixĩ i namexü̃ na ícubaiexẽẽxü̃. ¿Rü nhuxãcü i cuma i chauxü̃tawa cuxũxü̃ na chama cuxü̃ íchabaiexẽẽxü̃ca̱x? —nhanagürü.
15 Notürü ga Ngechuchu rü nhanagürü nüxü̃: —Name nixĩ i choxü̃ ícubaiexẽẽ i nhu̱xmax. Erü name nixĩ i tanaxü i guxü̃ma i ngẽma Tupana tüxü̃ muxü̃ —nhanagürü. Rü jexguma ga Juã́ũ rü: —Ngü̃ —nhanagürü.
16 Rü jexguma marü Juã́ũ Ngechuchuxü̃ íbaiexẽẽguwena, rü dexáwa ínaxü̃ãchigu ga Ngechuchu. Rü jexgumatama niwãxna ga dauxü̃guxü̃ ga naãne, rü Ngechuchu nüxü̃ nadau ga Tupanaãẽ i Üünexü̃ ga wüxi ga muxtucurüü̃ na inagoxü̃ rü nüxna na nanguxü̃.
17 Rü dauxü̃wa inanaxũ ga wüxi ga naga ga nhaxü̃: —Daa nixĩ ja Chaune ja nüxü̃ changechaü̃xü̃chicü, rü poraãcü namaã chataãẽxü̃chicü —nhaxü̃.
