Mateu 4:1-25
4 Rü jemawena rü Tupanaãẽ i Üünexü̃ rü wüxi ga nachica ga ngextá taxúema íxãpataxü̃wa Ngechuchuxü̃ naga na jéma Chataná nüxü̃ üxü̃ca̱x.
2 Rü taguma nachibü ga 40 ga ngunexü̃ rü 40 ga chütaxü̃. Rü jemawena rü nataija.
3 Rü jexguma ga ṉg̱oxo ga Chataná rü Ngechuchuxü̃tawa nangu, na nüxü̃ naxüxü̃ca̱x. Rü nhanagürü nüxü̃: —Ega aixcuma Tupana Nane cuixĩgu, ¡rü daa nutagüxü̃ namu na põũxü̃ nanguxü̃xü̃ca̱x! —nhanagürü ga Chataná.
4 Notürü Ngechuchu nanangãxü̃, rü nhanagürü: —Tupanaãrü ore i ümatüxü̃ rü nhanagürü:“Tãũxü̃táma põũxĩca nanamaxẽxẽẽ i duü̃xü̃gü, notürü guxü̃ma i ore i Tupana nüxü̃ ixuxü̃ nixĩ i duü̃xü̃güxü̃ maxẽxẽẽxü̃”,
nhanagürü.
5 Rü jexguma ga ṉg̱oxo ga Chataná rü guma ĩãne ga üünene ga Jerucharéü̃wa nanaga. Rü tupauca ga taxü̃netape̱xegu nanamunagü.
6 Rü nhanagürü nüxü̃: —Ega aixcuma Tupana Nane cuixĩgu, ¡rü nuã cugü rütáe! Erü Tupanaãrü ore i ümatüxü̃wa rü nhanagürü:“Tupana tá nanamu i norü orearü ngeruü̃gü i dauxü̃cü̱̃ã̱x na cuxna nadaugüxü̃ca̱x. Rü naxme̱xmaã tá cuxü̃ nijauxgü na tama ṯacü rü nutagu cunguxü̃ca̱x”,
nhanagürü.
7 Rü Ngechuchu nanangãxü̃ rü nhanagürü: —Rü Tupanaãrü ore i ümatüxü̃ rü nhanagürü ta:“¡Tama name i nüxü̃ na cuxüxü̃ ja Cori ja curü Tupana!”
nhanagürü.
8 Rü jexguma wenaxãrü ga ṉg̱oxo ga Chataná rü wüxi ga ma̱xpǘne ga máxpü̱xüchinetape̱xewa nanaga. Rü jéma Ngechuchuxü̃ nanawe̱x ga guxü̃ma ga nachiü̃ãnegü na nhuxãcü jamexẽchixü̃.
9 Rü Chataná rü nhanagürü nüxü̃: —Chama chi cuxna chanaxã i guxü̃ma i nhaã cuxü̃ chawéxü̃ i ngẽxguma chi chape̱xegu cucaxã́pü̱xügu rü choxü̃ cuicua̱xüü̃gu —nhanagürü.
10 Rü jexguma ga Ngechuchu rü nhanagürü nüxü̃: —¡Choxna ixũgachi, Pa Chatanáx! Erü Tupanaãrü ore i ümatüxü̃ rü nhanagürü:“¡Nüxü̃ icua̱xüü̃ ja Cori ja curü Tupana, rü jimaãxü̃́xĩcatama napuracü!”
nhanagürü.
11 Rü jexguma ga ṉg̱oxo ga Chataná rü Ngechuchuna nixũgachi. Rü Ngechuchuxü̃tawa nangugü ga dauxü̃cü̱̃ã̱x ga Tupanaãrü orearü ngeruü̃gü. Rü Ngechuchuxü̃ narüngü̃xẽẽgü rü nüxna nadaugü.
Ngechuchu rü inanaxügü ga norü puracü ga Gariréaanewa
12 Rü jexguma Ngechuchu nüxü̃ ĩnügu ga na napocuxü̃ ga Juã́ũ ga baiü̃xẽẽruü̃, rü Gariréaanewa naxũ.
13 Notürü tama ĩãne ga Nacharétugu narüxã̱ũ̱x, rü ĩãne ga Caparnáũwa naxũ na jexma jaxãchiü̃xü̃ca̱x. Rü guma ĩãne rü naxtaxa ga Gariréacutüwa najexma ga Jeburã́ũtanüxü̃ rü Natarítanüxü̃ ga duü̃xü̃gü ixãchiü̃güxü̃wa.
14 Rü jema nangupetü na janguxü̃ca̱x ga ore ga nuxcümaxü̃cü ga Tupanaãrü orearü uruü̃ ga Ichaía ümatüxü̃ ga nhaxü̃:
15 4:15-16 “Rü duü̃xü̃güca̱x tá nango̱x i wüxi i ngóonexẽẽruü̃ i Jeburã́ũãrü naãnewa, rü Nataríarü naãnewa, rü Judã́ũãrü tocutüwa rü ngẽma nama i taxtücutüwa nadaxü̃wa, rü Gariréaanewa i ngextá duü̃xü̃gü i tama Judéugü ixĩgüxü̃ ixãchiü̃güxü̃wa. Rü ngẽmaãcü i ngẽma duü̃xü̃gü ga noxri ẽãnexü̃wa jexmagüxü̃, rü tá nüxü̃ nadaugü i wüxi i taxü̃ i ngóonexẽẽruü̃. Rü ngẽma duü̃xü̃gü ga noxri jutüü̃wa jexmagüxü̃ rü tá nüxü̃ nabaxi i ngẽma ngóonexẽẽruü̃”,nhanagürü ga jema Ichaíaarü ore.
16 Nüü̃ nadau 4:15
17 Rü jexgumaü̃cüü nixĩ ga inaxügüãxü̃ ga Ngechuchu ga nüxü̃ na jaxuchigaxü̃ ga norü ore ga nhaxü̃: —¡Nüxü̃ perüxoe i pecüma i chixexü̃! Erü marü ningaica na perü ãẽ̱xgacü na jiĩxü̃ ja Tupana —nhaxü̃.
Ngechuchu rü naxca̱x naca ga ãgümücü ga püchaetanüxü̃
18 Rü jexguma naxtaxa ga Gariréaanacügu jaxũxgu ga Ngechuchu, rü jéma nüxü̃ nadau ga taxre ga jatü ga nügüeneẽgü ixĩgüxü̃. Rü wüxi rü Chimáũ ga Pedrugu ãẽ́gaxü̃ nixĩ. Rü to rü Ãdrégu ãẽ́gaxü̃ nixĩ. Rü nümagü rü ínapüchaegü, jerü woetama püchaetanüxü̃ nixĩgü.
19 Rü jexguma ga Ngechuchu rü nhanagürü nüxü̃: —¡Chawe perüxĩ! Rü chorü puracüwa tá pexü̃ chamugü na chauxü̃tawa penagagüxü̃ca̱x i duü̃xü̃gü —nhanagürü.
20 Rü jexgumatama ga jema taxre, rü jéma nanata̱xgü ga norü püchagü. Rü Ngechuchuwe narüxĩ.
21 Rü jéamaxü̃ra naxũ ga Ngechuchu, rü jéma nüxü̃ nadau ga to ga taxre ga nügüeneẽgü. Rü Tiagu nixĩ ga wüxi, rü Juã́ũ nixĩ ga to. Rü Zebedéu nanegü nixĩ ga nümagü. Rü nanatümaã wüxi ga nguewa najexmagü. Rü jéma ínanangáitagü ga norü püchagü. Rü Ngechuchu naxca̱x naca.
22 Rü jexgumatama jéma nguewa tüxü̃ nata̱xgü ga nanatü. Rü Ngechuchuwe narüxĩ.
Ngechuchu nanangúexẽẽ ga muxü̃ma ga duü̃xü̃gü
23 Rü guxü̃ ga Gariréaanegu nixũgüchigü ga Ngechuchu. Rü wüxichigü ga ĩãnewa, rü duü̃xü̃güarü ngutaque̱xepataü̃wa ningu̱xẽẽtaechigü. Rü duü̃xü̃gümaã nüxü̃ nixuchiga ga ore ga mexü̃ na nhuxãcü ãẽ̱xgacü jiĩxü̃ ja Tupana. Rü guxü̃ma ga duü̃xü̃gü ga jema iḏaaweexü̃ rü nanameẽxẽẽ ga woo nanhuxraü̃xü̃ ga norü ḏaawe nüxü̃́ jexmaxü̃, rü naxca̱x nitaanegü.
24 Rü Ngechuchuxü̃ nacuáchigagü ga guxü̃ma ga duü̃xü̃gü ga Síriaanecü̱̃ã̱x. Rü naxü̃tawa nanagagü ga nagúxü̃raü̃xü̃ ga iḏaaweexü̃. Rü jematanüwa najexma ga duü̃xü̃gü ga ngúanemaã iḏaaweexü̃, rü duü̃xü̃gü ga poraãcü naxü̃newa nangúxü̃, rü duü̃xü̃gü ga ṉg̱oxo nawa jexmaxü̃, rü duü̃xü̃gü ga óxwaã̱xgüxü̃, rü duü̃xü̃gü ga naw̱ãĩxãchigüxü̃. Rü Ngechuchu nanameẽxẽẽ ga guxü̃ma ga jema.
25 Rü Ngechuchuwe narüxĩ ga muxü̃ma ga duü̃xü̃gü ga Gariréaanecü̱̃ã̱x, rü Decaporíchiuanecü̱̃ã̱x rü Jerucharéü̃cü̱̃ã̱x, rü Judéaanecü̱̃ã̱x, rü natü ga Judã́ũãrü tocutücü̱̃ã̱x.
