Mateu 7:1-29
7 Rü Ngechuchu rü nhanagürü ta: —¡Tãṹ i togüxü̃ peixuxü̃ na tama Tupana pexna c̱axü̃ca̱x!
2 —Erü ngẽxgumarüü̃ na togüarü maxü̃xü̃ na pengugüxü̃rüü̃, rü Tupana tá pexü̃ nangugü. Rü ngẽxgumarüü̃ na togümaã penaxüxü̃rüü̃, rü Tupana tá pemaã nanaxü.
3 —¿Rü tü̱xcüü̃ i nüxü̃ cudawenüxü̃ i ngẽma cueneẽãrü üxaxetüxü̃ i íraxü̃, ega chi tama naxca̱x cuxoegaãẽgu i ngẽma cuxetüwatama ngẽxmaxü̃ i naĩpüta i taxü̃?
4 —Rü ngẽxguma cuxetüwatama nangẽxmagu i wüxi i naĩpüta i taxü̃ ¿rü nhuxãcü i cueneẽxü̃ cuchixewexü̃, rü nhácuxü̃ nüxü̃:
“¡Pa Chaueneẽx, cuxü̃ chanajauxchaü̃ i ngẽma curü üxaxetüxü̃!” —nhácuxü̃?
5 —Pa Duü̃xü̃ i Meã Maxnetaxü̃x, rü name nixĩ i cunajauxira i ngẽma naĩpüta i cuxetüwatama ngẽxmaxü̃, rü ngẽmaãcü tá mea nüxü̃ cudau na cunajaxuxü̃ca̱x i ngẽma cueneẽãrü üxaxetüxü̃. [Rü ngẽmaca̱x name nixĩ i cuxira nüxü̃ curüxo i ngẽma chixexü̃ i taxü̃ i cumatama cuxüxü̃, rü ngẽxguma tá cume na nüxü̃ curüngü̃xẽẽxü̃ca̱x i cueneẽ na nüxü̃ naxoxü̃ca̱x i ngẽma chixexü̃ i íraxü̃ i naxüxü̃.]
6 —Rü tama name i Tupanaãrü ore i üünexü̃maã penachixewe i ngẽma duü̃xü̃gü i chixecümagüxü̃ i tama jaxõgüchaü̃xü̃, erü ngürüãchi ngẽmaca̱x tá pexü̃ nima̱xgü. Rü ngẽxgumarüü̃ tama name i Tupanaãrü oremaã penachixewe i ngẽma duü̃xü̃gü i tama nüxü̃ cua̱xgüchaü̃xü̃, erü tá ínanata̱xgü.
Name nixĩ i tórü jumuxẽwa Tupanana naxca̱x taca rü naxca̱x tadaugü rü ĩã̱xwa: Tu tu tu, nhatarügügü
7 —¡Tupanana naxca̱x peca! rü nüma tá pexna nanaxã. ¡Rü Tupanaxü̃tagu naxca̱x pedau! rü tá nüxü̃ ipejangau. ¡Rü norü ĩã̱xwa: Tu tu tu, nhapegü! rü tá pexca̱x najawãxna.
8 —Erü guxãma ja jíxema naxca̱x íc̱axe, rü tanajaxu. Rü guxãma ja naxca̱x dauxe, rü nüxü̃ itajangau. Rü guxãma ja jixema ĩã̱xwa: Tu tu tu, nhagüxe, rü tá tümaca̱x niwãxna.
9 —Rü dücax i pemax, rü ngẽxguma chi wüxi i pexacü pexna caxgu, rü ¿nhuxãcü chi wüxi ja nuta nüxna pexãxü̃?
10 —Rü ngẽxguma chi choxnica̱x pexna nacaxgu rü ¿nhuxãcü chi i ãxtape nüxna penaxãxü̃?
11 —Rü pema na pechixecümachiréxü̃ rü nüxü̃ pecua̱x na mexü̃ i ãmare pexacügüna pexãxü̃. Notürü Penatü ja dauxü̃gucü rü ngẽma pema pexacügüna pexãxü̃ãrü jexera tá tüxna naxã ja jíxema naxü̃tawa naxca̱x íc̱axe.
12 —Rü pemaã nüxü̃ chixu, rü ngẽma pema penaxwa̱xexü̃ i togü pemaã na naxüxü̃, rü name nixĩ i pema rü ta ngẽmaãcütama namaã penaxü. Erü ngẽmaãcü tüxü̃ namu i Tupanaãrü ore ga Muĩsé ümatüxü̃ rü jema ore ga nuxcümaxü̃güxü̃ ga Tupanaãrü orearü uruü̃gü ümatüxü̃.
Ĩã̱x i íraxü̃chiga
13 —Name nixĩ i ngẽma ĩã̱x i íraxü̃waama peichocu. Erü ngẽma ĩã̱x i juwa tüxü̃ gaxü̃ rü ngẽma nama i juwa daxü̃ rü nata. Rü muxũchixü̃ma i duü̃xü̃gü nagu naxĩ.
14 —Notürü ngẽma nama i maxü̃wa nadaxü̃ rü ngẽma ĩã̱x i maxü̃ca̱x nawa ixücuxü̃ rü naxíra. Rü noxretama nixĩ i duü̃xü̃gü i nüxü̃ ijangaugüxü̃.
Wüxi i nanetü rü norü owa nixĩ i nüxü̃ icuáxü̃
15 —Rü naxca̱x pexuãẽgü i ngẽma dorata̱a̱xgüxü̃ i nügü ixugünetaxü̃ na Tupanaãrü orearü uruü̃gü jixĩgüxü̃. Erü nümagü rü petanüwa nangugü, rü nügü mexü̃ i duü̃xü̃güneta nixĩgüxẽẽ. Notürü naãẽwa rü poraãcü chixexü̃gu narüxĩnüẽ.
16 —Rü pema rü nacümawa tá nüxü̃ pecua̱x i ngẽma duü̃xü̃gü, ngẽxgumarüü̃ i wüxichigü i nanetügü rü norü owa na nüxü̃ icuáxü̃rüü̃ ngoxi name rü e̱xna tama. Rü wüxi i torawa rü taxucürüwama uwagü tajaxu. Rü wüxi i chuchuxü̃wa rü taxucürüwama ori i figu tajaxu.
17 —Erü guxü̃ma i nanetü i mexü̃ rü name i norü o. Rü guxü̃ma i nanetü i chixexü̃ rü nachixe i norü o.
18 —Rü wüxi i nanetü i mexü̃ rü taxucürüwama nachixe i norü o. Rü wüxi i nanetü i chixexü̃ rü taxucürüwama name i norü o.
19 —Rü guxü̃ma i nanetü i tama mexü̃ i norü o rü tajadaxüchi, rü nhu̱xmachi tajagu.
20 —Rü ngẽxgumarüü̃ nacümawa tá nüxü̃ pecua̱x i ngẽma duü̃xü̃gü i Tupanaãrü orearü uruü̃güneta ixĩgüxü̃.
Tãũxü̃táma guxü̃ma i duü̃xü̃gü nichocu i ngextá Tupana ãẽ̱xgacü íixĩxü̃wa
21 —Rü tama guxü̃ma i duü̃xü̃gü i nügü ixugüxü̃ na chorü duü̃xü̃gü jixĩgüxü̃ rü tá nichocu i ngextá Tupana ãẽ̱xgacü íixĩxü̃wa. Notürü jíxema aixcuma Chaunatü ja dauxü̃gucüga ĩnüẽxẽxĩcatátama tixĩ ja ngẽ́ma ichocuxe.
22 —Rü ngẽxguma ngẽma ngunexü̃ i naãneãrü gu̱xwa nanguxgu, rü muxü̃ma i duü̃xü̃gü rü choxü̃ tá nhanagürügü: —Pa Corix, toma rü togü i duü̃xü̃gümaã nüxü̃ tixu i curü ore, rü cuégagu ítanawoxü̃ i ṉg̱oxogü, rü cuégagu tanaxü i muxü̃ma i mexü̃ i taxü̃ i Tupanaãrü poramaã taxüxü̃ —nhanagürügü tá choxü̃.
23 —Notürü ngẽxguma rü tá nhacharügü nüxü̃: —Taguma chorü duü̃xü̃gü peixĩgü. ¡Rü choxna peixĩgachi i pema i chixexü̃ ügüe! —nhacharügü tá.
Jatü i Cristuga ĩnüxü̃ rü jatü i tama Cristuga ĩnüxü̃chiga
24 —Rü ngẽmaca̱x ja jíxema choxü̃ ĩnüxẽ rü naxǘxe i ngẽma chama tüxü̃ chamuxü̃, rü wüxi ga jatü ga meã naãẽxü̃ cuácü ga nuta ga tacüétügu üpatacürüü̃ tixĩ.
25 —Rü pucü ga tacü ínangu, rü narübai ga taxtü, rü nixũũchi ga wüxi ga poracü ga buanecü rü guma ĩgu nangu. Notürü guma ĩ rü tama niwa̱xtaü̃ jerü wüxi ga nutaétügu naxü.
26 —Notürü jíxema choxü̃ ĩnüxẽ rü tama naxǘxe i ngẽma chama tüxü̃ chamuxü̃, rü wüxi ga jatü ga tama naãẽxü̃ cuácü ga naxnücügumare üpatacürüü̃ tixĩ.
27 —Rü pucü ga tacü ínangu, rü narübai ga taxtü, rü wüxi ga poracü ga buanecü nixũũchi rü nagu nangu ga guma ĩ. Rü niwa̱xtaü̃, rü jexma najarüxo ga guxü̃ma —nhanagürü ga Ngechuchu.
28 Rü jexguma jagúegagu ga Ngechuchu ga na jadexaxü̃, rü ga duü̃xü̃gü rü naḇaixãchiãẽgü namaã ga norü ngu̱xẽẽtae.
29 Jerü nüma rü Tupanaãrü poramaã nanangúexẽẽ, rü tama jema ngúexẽẽruü̃gü ga ore ga mugüwa ngu̱xẽẽtaegüxü̃rüü̃ nixĩ.
