Mateu 8:1-34
8 Rü jexguma guma ma̱xpǘnewa janaxüegu ga Ngechuchu, rü muxü̃ma ga duü̃xü̃gü nawe narüxĩ.
2 Rü Ngechuchuca̱x nixũ ga wüxi ga jatü ga chaxünemaã iḏaawecü. Rü Ngechuchupe̱xegu najacaxã́pü̱xü, rü nhanagürü nüxü̃: —Pa Corix, ngẽxguma chi cuma cunaxwa̱xegu, rü chi cuxü̃́ natauxcha na choxü̃ curümexẽẽxü̃ —nhanagürü.
3 Rü jexguma ga Ngechuchu rü nüxü̃ ningõgü, rü nhanagürü nüxü̃: —Ngü̃, chanaxwa̱xe. ¡Rüme! —nhanagürü. Rü jexguma jema nhaxgu ga Ngechuchu, rü naxca̱x nitaane ga guma jatü ga na nachaxüneã́xü̃.
4 Rü Ngechuchu rü nhanagürü nüxü̃: —¡Dücax, taxuxüü̃táma cuixu texémaã! ¡Notürü ngẽ́ma paixü̃tawa naxũ, rü cugü ijawe̱x! ¡Rü nüxna naxã i ngẽma ãmare ga Muĩsé tüxü̃ muxü̃ na duü̃xü̃gü nüxü̃ cuáxü̃ca̱x na curümexü̃! —nhanagürü.
Ngechuchu rü Romacü̱̃ã̱x ga churaragüarü ãẽ̱xgacüarü duü̃xü̃xü̃ narümexẽẽ
5 8:5-6 Rü Caparnáũwa naxũ ga Ngechuchu. Rü jexguma jéma nanguxgu, rü wüxi ga churaragüarü ãẽ̱xgacü ga capitã́ũ ga Romacü̱̃ã̱x rü Ngechuchuca̱x nixũ. Rü Ngechuchuxü̃ naca̱a̱xü̃, rü nhanagürü: —Pa Corix, chorü duü̃xü̃ rü nanaw̱ãĩxãchi. Rü ngürücarewa nangẽxma i chapatawa, rü poraãcüxü̃chima ngúxü̃ ninge —nhanagürü.
6 Nüü̃ nadau 8:5
7 Rü Ngechuchu rü nhanagürü nüxü̃: —Marü tá ngẽ́ma chaxũ na naxca̱x chajataanexẽẽxü̃ca̱x —nhanagürü.
8 Notürü nüma ga capitã́ũ nanangãxü̃, rü nhanagürü: —Pa Corix, chama rü taxuwama chame na chapatagu na cuxücuxü̃ca̱x. Rü chanaxwa̱xe i curü orewaxicatama nüxü̃ cuixu, rü tá naxca̱x nitaane i chorü duü̃xü̃.
9 —Erü chama rü ta rü chorü ãẽ̱xgacüme̱xẽwa changẽxma. Rü cha̱xme̱xwa nangẽxmagü ta i nhuxre i churaragü. Rü ngẽxguma chanamu̱xgu i wüxi na ngextá naxũxü̃ca̱x, rü ngẽ́ma naxũ. Rü ngẽxguma chaugüxü̃tawa naxca̱x changemagu i to, rü chauxü̃tawa nangu. Rü ngẽxguma wüxi i chorü duü̃xü̃xü̃ chamu̱xgu na ṯacü na naxüxü̃ca̱x, rü choxü̃́ nanaxü —nhanagürü.
10 Rü jexguma jemaxü̃ naxĩnügu ga Ngechuchu rü naḇaixãchiãẽ. Rü nhanagürü nüxü̃ ga jema duü̃xü̃gü ga nawe rüxĩxü̃: —Aixcuma pemaã nüxü̃ chixu rü taxuü̃ma i Judéugütanüwa nüxü̃ ichajangau i wüxi i duü̃xü̃ i nhaã jatürüü̃ aixcuma jaxõxü̃.
11 —Rü chama rü pemaã nüxü̃ chixu rü muxũchixü̃ i duü̃xü̃gü rü guxü̃wama tá ne naxĩ, rü Tupana ãẽ̱xgacü íixĩxü̃wa tá nachibüe namaã ja tórü o̱xigü ja Abrã́ũ rü Isaqui, rü Jacú.
12 —Notürü muxü̃ma i Abrã́ũtanüxü̃gü i Judéugü rü tãũxü̃táma nichocu i ngextá Tupana ãẽ̱xgacü íixĩxü̃wa. Rü ẽãnexü̃wa tá nawogü. Rü ngẽ́ma tá naxauxe, rü tá nixü̃́xchapütagü —nhanagürü.
13 Rü jexguma ga Ngechuchu rü nhanagürü jema capitã́ũxü̃: —¡Cupataca̱x nataegu! Rü tá naxca̱x nitaane i curü duü̃xü̃, erü cujaxõ na naxca̱x tá jataanexü̃ —nhanagürü. Rü jexgumatama naxca̱x nitaane ga jema capitã́ũãrü duü̃xü̃.
Ngechuchu rü Pedru na̱xẽca̱x najataanexẽẽ
14 Rü Pedrupatawa naxũ ga Ngechuchu. Rü jéma ngĩxü̃ nadau ga Pedru na̱xẽ ga ngürücaregu irüxã̱ũ̱xcü jerü ijaxaxüne.
15 Rü Ngechuchu ngĩxme̱xgu ningõgü, rü jexgumatama iga̱u̱xãchi ga jema na jaxaxünexü̃. Rü íirüda ga ngĩmax. Rü nhu̱xmachi naxca̱x inamexẽẽ ga õna.
Ngechuchu rü muxü̃ma ga iḏaaweexü̃ca̱x najataanexẽẽ
16 Rü jexguma marü janaxücuchaü̃gu ga üa̱xcü, rü Ngechuchuxü̃tawa nanagagü ga muxü̃ma ga duü̃xü̃gü ga ṉg̱oxoã̱xgüxü̃. Rü wüxitama ga oremaã Ngechuchu ínanawoxü̃ ga jema ṉg̱oxogü. Rü nanameẽxẽẽ ta ga guxü̃ma ga jema togü ga iḏaaweexü̃.
17 Rü jemaãcü Ngechuchu najanguxẽẽ ga jema ore ga nuxcümaxü̃xü̃ ga Tupanaãrü orearü uruü̃ ga Ichaía nüxü̃ ixuxü̃ ga nhaxü̃:“Rü nüma rü tüxü̃ naporaexẽẽ i ngẽxguma ituraegu, rü tüxü̃ narümeexẽẽ i ngẽxguma iḏaaweegu”,
nhaxü̃.
Duü̃xü̃gü ga Ngechuchuwe rüxĩxchaü̃xü̃chiga
18 Rü jexguma Ngechuchu nüxü̃ da̱xgu ga muxü̃ma ga duü̃xü̃gü na nüxü̃ íchomaẽguãchixü̃, rü norü ngúexü̃gümaã nüxü̃ nixu, rü nhanagürü: —¡Rü ngĩxã, rü naxtaxaarü tocutüwa taxĩ! —nhanagürü.
19 Rü wüxi ga ngúexẽẽruü̃ ga ore ga mugüwa ngu̱xẽẽtaexü̃, rü Ngechuchuca̱x nixũ, rü nhanagürü nüxü̃: —Pa Ngúexẽẽruü̃ Pa Ngechuchux, cuwe charüxũxchaü̃ i ngextá cuma ícuxũxü̃wa —nhanagürü.
20 Rü Ngechuchu nanangãxü̃ rü nhanagürü: —Ngowagü rü nüxü̃́ nangẽxma i naxmaü̃gü, rü werigü rü nüxü̃́ nangẽxma i naxchiãü̃gü. Notürü chama i Tupana Nane na duü̃xü̃xü̃ chiĩxü̃, rü nataxuma i chauchica i ngextá nagu chicuxeruxü̃ —nhanagürü.
21 Rü wüxi ga to ga norü ngúexü̃, rü nhanagürü nüxü̃: —Pa Corix, cuwe charüxũxchaü̃, notürü chanaxwa̱xe i chaunatü tüxü̃ ichajata̱xira —nhanagürü.
22 Rü Ngechuchu nanangãxü̃, rü nhanagürü nüxü̃: —¡Noxtacüma chawe rüxũ! Rü nüẽ́ i ngẽma cutanüxü̃ i tama jaxõgüxü̃ ijata̱xgü i ngẽma juexü̃ —nhanagürü.
Ngechuchu rü buanecüxü̃ rü juãpexü̃ ínajachaxãchixẽẽ
23 Rü jexguma ga Ngechuchu rü wüxi ga nguegu nixüe. Rü norü ngúexü̃gü rü ta ínajaxümücügü, rü inaxĩãchi.
24 Rü ngürüãchi naxtaxaarü ngãxü̃tügu nüxü̃ naxü ga wüxi ga buanecü ga taxüchicü. Rü guma nguewa rü nijacuchichigü ga dexá. Notürü ga Ngechuchu rü nape.
25 Rü jexguma ga norü ngúexü̃gü rü ínanaḇaixgügü, rü nhanagürügü nüxü̃: —Pa Corix, ¡toxü̃ rüngü̃xẽẽ, erü ngẽmama itabaxü̃gü! —nhanagürügü.
26 Rü Ngechuchu nanangãxü̃, rü nhanagürü nüxü̃: —Pa Duü̃xü̃gü i Tama Aixcuma Jaxõgüxü̃x, ¿tü̱xcüü̃ pemuü̃ẽ? —nhanagürü. Rü jexguma ga Ngechuchu rü ínarüda. Rü buanecü rü juãpena nachogü. Rü ínajachaxãchi ga buanecü, rü inajarüxo ga juãpe, rü ínachaxanemare.
27 Rü nümagü ga norü ngúexü̃gü rü naḇaixãchiãẽgü, rü nügümaã nhanagürügü: —¿Ṯacü e̱xna nixĩ i nhaã jatü rü ngẽmaca̱x a̱i̱xrüxü̃ i buanecü rü juãpe rü naga naxĩnüẽxü̃? —nhanagürügü.
Jatügü ga Gadaracü̱̃ã̱x ga ṉg̱oxogü nawa jexmagüxü̃
28 Rü Ngechuchu rü norü ngúexü̃gü rü naxtaxaarü tocutüwa nangugü ga Gadaraarü naãnewa. Rü jexguma jéma nangugügu, rü Ngechuchuca̱x jéma nibuxmü ga taxre ga jatügü ga duü̃xẽchíque̱xetanügu jarüxauchigütanüneü̃xü̃. Rü jema taxre rü niṉg̱oxoã̱x, rü nidüraexüchi. Rü jemaca̱x taxucürüwama texé jéma namawa taxüpetü.
29 Rü jema taxre rü aita naxüe, rü nhanagürügü: —¿Tü̱xcüü̃ toxü̃ nuã cujachixewe, Pa Ngechuchu ja Tupana Nane? ¿E̱xna nuã cuxũ na toxü̃ ícujawoxü̃xü̃ca̱x taũta nawa nangujane na Tupana toxü̃ pocuexü̃? —nhanagürügü.
30 Rü jema nachicaarü ngaicamana nachibüe ga muxü̃ma ga cuchigü.
31 Rü jema ṉg̱oxogü rü Ngechuchuxü̃ naca̱a̱xü̃gü, rü nhanagürügü: —Rü ngẽxguma toxü̃ ícuwoxü̃gu, ¡rü ngẽma cuchigügu toxü̃ nachocuxẽẽ! —nhanagürügü.
32 Rü jexguma ga Ngechuchu, rü nhanagürü nüxü̃: —Ẽcü, ¡ngẽ́ma pexĩ! —nhanagürü. Rü jexguma ga jema ṉg̱oxogü rü ínachoxü̃ nawa ga jema taxre ga jatügü, rü jema cuchigügu najachocu. Rü nhu̱xmachi guxü̃ma ga jema cuchigü rü inaxü̃ãchi, rü naxtaxacutüarü ma̱xpǘxü̃wa najarüjuxgü, rü jexma naji.
33 —Rü jema cuchigüarü daruü̃gü rü naḇaixãchiãẽgü, rü ĩãneca̱x nibuxmü. Rü jexguma ĩãnewa nangugügu, rü nüxü̃ nixugügü ga guxü̃ma ga jema ngupetüxü̃ ga nhuxãcü naxca̱x na jataanegüxü̃ ga jema taxre ga jatügü ga ṉg̱oxoã̱xgüxü̃.
34 —Rü jexguma ga guxü̃ma ga jema ĩãnecü̱̃ã̱x ga duü̃xü̃gü, rü Ngechuchuxü̃tawa naxĩ. Rü jexguma Ngechuchuxü̃ nadaugügu, rü nüxü̃ naca̱a̱xü̃gü na ínaxũxũxü̃ca̱x ga jema norü naãnewa.
