Mateu 9:1-38
9 Rü jexguma ga Ngechuchu rü wüxi ga nguegu nixüe. Rü naxtaxaarü tocutüwa naxũ, rü noxrütama ĩãnewa nangu.
2 Rü jéma guma ĩãnewa rü duü̃xü̃gü rü Ngechuchuxü̃tawa nanangetaü̃gü ga wüxi ga jatü ga naw̱ãĩxãchicü. Rü jexguma Ngechuchu nüxü̃ da̱xgu ga nhuxãcü aixcuma na jaxõgüãxü̃ ga jema duü̃xü̃gü rü nhanagürü nüxü̃ ga guma iḏaawecü: —¡Nataãẽ, Pa Chaunex! Erü curü pecadugü rü marü cuxü̃́ nüxü̃ changechaü̃ —nhanagürü.
3 Rü jéma najexma ga nhuxre ga ngúexẽẽruü̃gü ga ore ga mugüwa ngu̱xẽẽtaegüxü̃. Rü nümagü rü nügüãẽwa nhanagürügü: —¿Nhaã jatü rü ṯacü Tupanamaã nixugü? —nhanagürügü.
4 Notürü ga Ngechuchu rü nüxü̃ nacua̱xama ga jema naãẽwa nagu naxĩnüẽxü̃. Rü jemaca̱x nhanagürü nüxü̃: —¿Tü̱xcüü̃ chixexü̃gu perüxĩnüẽ?
5 —¿Ṯacü nixĩ i ngẽma rütauxchamaẽxü̃ na namaã nüxü̃ ixuxü̃ ja daa naw̱ãĩxãchicü:
“Rü curü pecadugü rü marü cuxü̃́ nüxü̃ changechaü̃”, rü e̱xna:
“¡Inachi rü íixũ!” nhagüxü̃ nüxü̃?
6 —Notürü i nhu̱xma rü tá pexü̃ nüxü̃ chadauxẽẽ na Chaunatü ja Tupana núma choxü̃ muxü̃ na duü̃xü̃güaxü̃́ nüxü̃ changechaü̃xü̃ca̱x i norü pecadugü —nhanagürü. Rü jexguma rü nhanagürü nüxü̃ ga guma naw̱ãĩxãchicü: —¡Inachi, rü najaxu i curü caruü̃, rü cupatawa naxũ! —nhanagürü.
7 —Rü jexgumatama ga guma naw̱ãĩxãchicü rü inachi, rü napatawa naxũ.
8 Rü jexguma jemaxü̃ nadaugügu ga duü̃xü̃gü, rü poraãcü namuü̃ẽ. Rü Tupanaxü̃ nicua̱xüü̃gü, rü nhanagürügü: —Moxẽ, Pa Tupanax, erü cunaporaxẽẽ i nhaã jatü na ngẽmaãcü mexü̃ toxca̱x naxüxü̃ca̱x —nhanagürügü.
Mateuca̱x naca ga Ngechuchu
9 Rü jexguma jéma inaxũãchigu ga Ngechuchu, rü jéma nüxü̃ nadau ga wüxi ga jatü ga Mateugu ãẽ́gaxü̃ ga jéma rütoxü̃ ga ngextá Romaãrü ãẽ̱xgacüca̱x dĩẽru ngĩxü̃ ínajauxgüxü̃wa jerü woetama jemawa napuracü. Rü Ngechuchu rü nhanagürü nüxü̃: —¡Chawe rüxũ! —nhanagürü. Rü jexguma ga Mateu rü inachi, rü nawe narüxũ.
10 Rü Mateupatawa naxũ ga Ngechuchu, rü jéma nachibü. Rü ínangugü ta ga muxü̃ma ga togü ga duü̃xü̃gü ga Romaãrü ãẽ̱xgacüca̱x dĩẽru ngĩxü̃ jauxgüxü̃wa puracüexü̃, rü togü ga duü̃xü̃gü ga taxúema nacümamaã taãẽgüxü̃. Rü jema duü̃xü̃gü rü jéma mechawa narütogü namaã ga Ngechuchu rü norü ngúexü̃gü.
11 Notürü jexguma jemaxü̃ nadaugügu ga Parichéugü, rü Ngechuchuarü ngúexü̃güna nacagü, rü nhanagürügü: —¿Nhuxãcü i perü ngúexẽẽruü̃ rü namaã nachibü i ãẽ̱xgacüarü duü̃xü̃gü i dĩẽruarü jauxwa puracüexü̃, rü duü̃xü̃gü i pecaduã̱xgüxü̃? —nhanagürügü.
12 Rü jexguma jemaxü̃ naxĩnügu ga Ngechuchu, rü nhanagürü nüxü̃ ga Parichéugü: —Ngẽma poraexü̃ rü tama nanaxwa̱xegü ja duturu, notürü ngẽma iḏaaweexü̃ nixĩ i naxwa̱xegüxü̃.
13 —¡Rü ípeixĩ, rü nawa pengúe i Tupanaãrü ore i ümatüxü̃ i nhaxü̃:“Chama rü tama chanaxwa̱xe i chauxca̱x pejama̱x i carnerugü, notürü chanaxwa̱xe i togü pexü̃́ nangechaü̃tümüü̃gü”,
nhaxü̃! Rü nhanagürü ta ga Ngechuchu: —Chama rü tama mexü̃güna na chaxuxü̃ca̱x nixĩ i núma chaxũxü̃, notürü núma chaxũ na nüxna chaxuxü̃ca̱x i ngẽma pecaduã̱xgüxü̃ na ngẽmaãcü nüxü̃ naxoexü̃ca̱x i nacümagü i chixexü̃gü —nhanagürü.
Ngechuchuna nacagüe ga aurechiga
14 Rü jexguma ga Juã́ũ ga baiü̃xẽẽruü̃ãrü ngúexü̃gü, rü Ngechuchuca̱x naxĩ, rü nüxna nacagüe, rü nhanagürügü: —Toma i Juã́ũãrü ngúexü̃gü na tixĩgüxü̃ rü nümagü i Parichéugü rü muẽ̱xpü̱xcüna tama tachibüe erü Tupanagu tarüxĩnüẽ. ¿Rü tü̱xcüü̃ i curü ngúexü̃gü rü tama toxrüü̃ Tupanaca̱x naxauregü? —nhanagürügü.
15 Rü Ngechuchu nanangãxü̃ rü nhanagürü: —¿E̱xna wüxi i ngĩgüarü petawa rü pexca̱x namexü̃ na ngẽma nüxna naxugüxü̃ nangechaü̃ẽxü̃ rü naxaureexü̃ ega natanüwa nangẽxmagu i ngẽma jatü i ngexwacax ãmaxü̃? Maneca tama nixĩ. Notürü wüxi i ngunexü̃gu rü ngẽma jatü i ngexwacax ãmaxü̃ rü tá namücügüna nixũgachi. Rü ngẽma ngunexü̃gu tá nixĩ i aixcuma naxaureexü̃ i namücügü.
16 —Rü taxúema tanapaita i wüxi i naxchiru i ṉg̱auxü̃ namaã i wüxi i natüchi i ngexwacaxü̃xü̃ i taũta nanhaãchimüxü̃. Erü ngẽxguma najau̱xgu i ngẽma naxchiru rü tá nügü ínanaxíraxãchi i ngẽma natüchi i ngexwacaxü̃xü̃, rü tá nanagauxẽẽ i ngẽma wexachiru. Rü noxriarü jexera tá nixĩ i na nagauxü̃.
17 —Rü ngẽxgumarüü̃ ta rü taxúema ngexwacaxü̃cü ja wĩũ rü nagu tajabacuchi i wüxi i naxchixü̃ i marü ṉg̱auxü̃ i naxcha̱xmünaxca̱x. Erü ngẽxguma ngẽmaãcü naxü̱xgu rü jima wĩũ ja ngexwacaxü̃cü rü narüngu, rü tá najawã̱ĩ̱xẽẽ i ngẽma naxchixü̃ i ṉg̱auxü̃ i naxcha̱xmünaxca̱x. Rü ngẽxma tá najarütaxu ja wĩũ rü ngẽma naxchixü̃ rü ta. Rü ngẽmaca̱x tanaxwa̱xe ja ngexwacaxü̃cü ja wĩũ rü ngexwacaxü̃xü̃ i naxchixü̃gu tajabacuchi. Rü ngẽmaãcü tãũxü̃táma inajarütaxu. [Rü chorü ngu̱xẽẽtae i ngexwacaxü̃xü̃ rü ngẽxgumarüü̃ ta nixĩ na taxucürüwama namaã nawüxiguxü̃ i ngẽma nuxcümaxü̃xü̃ i pecümagü —nhanagürü ga Ngechuchu.]
Jáiruxacüchiga rü jema nge ga Ngechuchuchirugu ingõgücüchiga
18 Rü jexguma jemaãcü ínangúexẽẽtaejane ga Ngechuchu, rü naxü̃tawa nangu ga wüxi ga ãẽ̱xgacü ga Judéugüarü. Rü Ngechuchupe̱xegu najacaxã́pü̱xü, rü nhanagürü nüxü̃: —Pa Corix, chauxacü rü ngexwacax iju. Notürü ngẽxguma chi ngẽ́ma cuxũxgu rü ngĩxü̃ cuingõgügu, rü wena chixarü imaxü̃ —nhanagürü.
19 Rü inachi ga Ngechuchu, rü norü ngúexü̃gümaã jema ãẽ̱xgacüwe narüxũ.
20 Rü jexguma jéma naxũjane ga Ngechuchu rü wüxi ga ngecü ga 12 ga taunecü ãgüechacü rü naweama ne ixũ. Rü naxpechinüchirugu ijangõgü.
21 Jerü ngĩma rü nagu irüxĩnü rü jexguma chi naxchiruxü̃xĩcatama jangõgümaregu, rü chi ngĩxca̱x nitaane.
22 Notürü nüma ga Ngechuchu rü nügü ínidau, rü ngĩxü̃ nadau ga jema nge. Rü nhanagürü ngĩxü̃: —¡Nataãẽ, Pa Chauxacüx! Marü cuxca̱x nitaane, erü cujaxõ —nhanagürü. Rü jexgumatama ngĩxca̱x nitaane.
23 Rü jexguma jema ãẽ̱xgacüpatawa nanguxgu ga Ngechuchu, rü nüxü̃ nadau ga paxetatanüxü̃ ga marü na ínamemaregüxü̃ na ngĩxü̃ ijata̱xgüxü̃ ga jema bucü. Rü ga duü̃xü̃gü rü nixáicha rü naxauxe.
24 Rü Ngechuchu nhanagürü nüxü̃ ga jema duü̃xü̃gü: —¡Ípechoxü̃ i nuã! Erü ngẽma bucü rü tama iju. Rü ipemare —nhanagürü. Notürü nümagü ga duü̃xü̃gü rü Ngechuchuxü̃ nacugüeama.
25 Rü jexguma Ngechuchu ínachoxü̃xẽẽxgu ga duü̃xü̃gü, rü jema bucüarü ucapugu naxücu. Rü ngĩxme̱xgu najajauxãchi, rü jexgumatama íirüda ga ngĩmax.
26 Rü guxü̃wama ga jema naãnewa, rü duü̃xü̃gü nüxü̃ nixuchigagü ga jema Ngechuchu üxü̃.
Ngechuchu naxca̱x najataanexẽẽ ga taxre ga jatü ga ingexetüxü̃
27 Rü jexguma jéma ínaxũũxgu ga Ngechuchu, rü taxre ga ngexetüxü̃ rü nawe nangẽgü. Rü tagaãcü nhanagürügü: —Pa Ngechuchux, Pa Dawítanüxü̃x, ¡cuxü̃́ tangechaü̃tümüü̃gü! —nhanagürügü.
28 Rü jexguma Ngechuchu guma ĩ ga nagu napexü̃negu naxücuxgu, rü jema taxre ga ngexetüxü̃ rü naxca̱x naxĩ. Rü Ngechuchu nüxna naca, rü nhanagürü: —¿Pejaxõgüxü̃ jiĩxü̃ na chaporaxü̃ na pexü̃ charümeẽxẽẽxü̃ca̱x? —nhanagürü. Rü nümagü nanangãxü̃gü, rü nhanagürügü: —Ngü̃, Pa Corix, tajaxõgü —nhanagürügü.
29 Rü jexguma ga Ngechuchu rü naxẽtügügu ningõgü, rü nhanagürü nüxü̃: —¡Cü pexca̱x jataane, erü pejaxõgü! —nhanagürü.
30 Rü naxca̱x nitaanegü. Rü Ngechuchu rü poraãcü najaxucu̱xẽgü na taxúemaãma nüxü̃ na jaxugüxü̃ca̱x ga jema nüxü̃ ngupetüxü̃.
31 Notürü jema taxre rü jexguma jéma ínachoxü̃gu rü guxü̃wama ga jema naãnewa rü nüxü̃ nixugüeama ga jema Ngechuchu üxü̃.
Ngechuchu rü naxca̱x najataanexẽẽ ga wüxi ga jatü ga tama idexacü
32 Rü jexguma jema taxre ga jatü íchoü̃xguwena, rü nhuxre ga duü̃xü̃gü rü Ngechuchuxü̃tawa nanagagü ga wüxi ga jatü ga tama idexacü jerü ṉg̱oxo nawa najexma.
33 Rü Ngechuchu ínanata̱xüchi ga jema ṉg̱oxo. Rü jexgumatama inanaxügü ga na jadexaxü̃ ga guma jatü. Rü nümagü ga duü̃xü̃gü rü naḇaixãchiãẽgü. Rü nhanagürügü: —Taguma nüxü̃ tadau i nuã tachiü̃ãnewa i ṯacü i nhaãrüü̃ ixĩxü̃ —nhanagürügü.
34 Notürü ga Parichéugü rü nhanagürügü: —Nhaã jatü rü ṉg̱oxogüarü ãẽ̱xgacü i Chatanáãrü poramaã nixĩ i ínawoxü̃ãxü̃ i ṉg̱oxogü —nhanagürügü.
Ngechuchuaxü̃́ nangechaü̃tümüü̃gü ga duü̃xü̃gü
35 Rü jema naãnewa rü guxü̃nema ga ĩãnegügu rü ĩãnexãcügügu nixũgüchigü ga Ngechuchu. Rü wüxichigü ga ĩãnewa, rü duü̃xü̃güarü ngutaque̱xepataü̃wa ningu̱xẽẽtaechigü. Rü duü̃xü̃gümaã nüxü̃ nixuchigü ga ore ga mexü̃ na nhuxãcü ãẽ̱xgacü na jiĩxü̃ ja Tupana. Rü nanameẽxẽẽ ga duü̃xü̃gü ga iḏaaweexü̃. Rü woo nanhuxraü̃xü̃ ga norü ḏaawe nüxü̃́ jexmaxü̃, rü nanameẽxẽẽ.
36 Rü jexguma Ngechuchu nüxü̃ da̱xgu ga jema muxü̃ma ga duü̃xü̃gü ga naxü̃tawa ngugüxü̃, rü nüxü̃́ nangechaü̃tümüü̃gü. Jerü carnerugü ga ngearü daruü̃ã́xü̃rüü̃ nanaxi̱xãchiãẽgü, rü tama nataãẽgü.
37 Rü jexguma ga Ngechuchu rü nhanagürü nüxü̃ ga norü ngúexü̃gü: —Aixcuma pemaã nüxü̃ chixu rü nangẽxma i muxũchixü̃ i duü̃xü̃gü i ímemaregüxü̃ na jaxõgüãxü̃ i Tupanaãrü ore. Notürü nanoxree̱xpü̱x i Tupanaãrü puracütanüxü̃ na namaã nüxü̃ jaxugüxü̃ca̱x i ngẽma ore.
38 Rü ngẽmaca̱x name nixĩ i duü̃xü̃güarü jora ja Tupanana naxca̱x peca i perü jumuxẽwa na jamugüãxü̃ca̱x i norü puracütanüxü̃ i orearü uruü̃gü na ngẽma duü̃xü̃gümaã nüxü̃ jaxugüxü̃ca̱x i norü ore i mexü̃ —nhanagürü ga Ngechuchu.
