Neemias 2:1-20
2 Rü yexguma ga chama rü ãẽ̱xgacü ga Artayérearü cópuarü üãcuxü̃ruxü̃ chixĩ. Rü wüxi ga ngunexü̃ ga Nisã́ũarü tauemacügu (abríu) ga yexguma Artayére marü 20 ga taunecü ãẽ̱xgacü yixĩxgu, rü naxpáxü̃ wíũmaxã chaxüãcuyane rü nüma ga ãẽ̱xgacü rü choxü̃ nadawenü ga nax changechaü̃chametüxü̃. Rü yemaca̱x choxna naca rü nhanagürü:
2 “Cuxü̃ chadau nax cungechaü̃chametüxü̃. ¿Ta̱xacü cuxü̃ nangupetü? Tama cuwa nango̱x nax quida̱xawexü̃. ¿Rü ngẽmaca̱x ta̱xacü cuxü̃́ nangexma? ¿Ẽ̱xna wüxi i guxchaxü̃?”, nhanagürü choxü̃. Rü yexguma ga chama rü poraãcü chamuü̃.
3 Rü ãẽ̱xgacüxü̃ changãxü̃ga rü nhachagürü: “Pa Ãẽ̱xgacüx ¡Guxü̃guma namaxü̃! ¿Nhuxãcü chi i tama changechaü̃xü̃? Erü yima ĩane ya chaunatügü nagu ta̱xgüne rü nachicaxicatama nixĩ, rü natapü̱xarü ĩã̱xgü rü ínanagu”, nhachagürü.
4 Rü nüma ga ãẽ̱xgacü rü choxna naca rü nhanagürü: “¿Ta̱xacüwa i cuxü̃ charüngü̃xẽẽxü̃?” nhanagürü. Rü yexguma ga chama rü Tupaname̱xẽgu chaugü chaxǘ.
5 Rü ãẽ̱xgacüxü̃ changãxü̃ga rü nhachagürü: “Ngẽxguma chi cuxca̱x namexgu, Pa Ãẽ̱xgacüx, rü choxü̃ curüngü̃xẽẽchaü̃xgux, rü cuxna chaca, Pa Ãẽ̱xgacüx, nax Yudáanewa choxü̃ cumuxü̃ nawa ya yima ĩane ya chaunatügü nagu ta̱xgüne, nax ngẽmaãcü wena chanamexẽẽxü̃ca̱x”, nhachagürü.
6 Rü ngĩma ga ãẽ̱xgacüma̱x rü nacüwawa irüto. Rü nüma ga ãẽ̱xgacü rü choxna naca rü nhanagürü: “¿Nhuxre i ngunexü̃ tá icuyarütaxuxü̃ nax ngẽ́ma cuxũxü̃? ¿Rü nhuxgu tá cutáeguxü̃?” nhanagürü. Rü chama rü namaxã nüxü̃ chixu ga ngunexü̃ ga nagu tá chatáeguxü̃. Rü yexguma ga nüma rü yéma choxü̃ namu.
7 Rü yema to ga naxca̱x íchaca̱xaxü̃ nixĩ ga choxna naxããxü̃ ga wüxi ga popera naxca̱x ga yema ãẽ̱xgacügü ga taxtü ga Eufrátearü tocutüwa yexmagüxü̃ nax yemaacü norü naanewa mea choxü̃ namupetügüxü̃ca̱x nhu̱xmata Yudáanewa changu.
8 Rü to ga popera ga naxca̱x íchaca̱xaxü̃, rü Acháca̱x nixĩ. Rü nüma nixĩ ga ãẽ̱xgacüarü naixnecüarü daruxü̃ yixĩxü̃. Rü yema poperawa rü ãẽ̱xgacü nüxna naxãga nax mürapewa choxna tanaxãxü̃ca̱x nax ngẽmamaxã chanamexẽẽxü̃ca̱x i norü ĩã̱xgü ya yima Tupanapataarü dauxü̃taechica rü ngẽma ĩanearü poxeguxü̃arü ĩã̱xgü, rü yima ĩpata ya nawa tá changexmane. Rü nüma ga ãẽ̱xgacü rü choxna nanaxã ga guxü̃ma ga yema naxca̱x íchaca̱xaxü̃, yerü Cori ya Tupana rü poraãcü choxü̃ narüngü̃xẽẽ.
9 Rü yexguma taxtü ga Eufrátearü tocutüwa yexmagüxü̃ ga ãẽ̱xgacügüxü̃tawa changuxgu, rü nüxna chanana ga yema poperagü ga ãẽ̱xgacü ga Artayére yéma mugüxü̃. Rü choxü̃ ínixümücügü ga nhuxre ga churaragüarü ãẽ̱xgacügü namaxã ga norü churaragü ga cowarutagu ĩxü̃.
10 Notürü yexguma Chaü̃bára ga Oróũtanüxü̃güarü ãẽ̱xgacü, rü Tobía ga Amóũtanüxü̃güarü ãẽ̱xgacü nüxü̃ cua̱xgügu nax íchanguxü̃, rü poraãcü nanue yerü nüxü̃ nacua̱xgü nax chautanüxü̃gü ga Iraéutanüxü̃güarü ngü̃xẽẽwa nax chaxũxü̃.
Wena nanamexẽxẽ ga Yerucharéü̃tapü̱x
11 2:11-12 Rü düxwa Yerucharéü̃arü ĩanewa changu. Rü yexguma tamaepü̱x ga ngunexü̃ yéma chayexmagu, rü chütacü rü ícharüda. Rü choxü̃ nixümücügü ga nhuxre ga yatü nax ítayadaugüxü̃ca̱x ga guma ĩanearü poxeguxü̃. Notürü taxúemaama nüxü̃ chixu ga yema Tupana chauãẽwa nguxẽẽxü̃ nax ta̱xacüca̱x Yerucharéü̃wa chaxũxü̃. Rü chaxicatama búruétügu chixũ.
12 Nüü̃ nadau 2:11
13 Rü yematama chütaxü̃gu rü Ngategu ãégaxü̃ ga ĩã̱xwa íchayaxũxũ rü Dragóũarü Puchuwaama chaxũ nhu̱xmata Guxchirearü ĩã̱xwa changu. Rü meama chanangugü ga yema natapü̱x ga guma Yerucharéü̃arü poxeguxü̃ ga nagu napogüexü̃ rü norü ĩã̱xgü ga ínaguxü̃.
14 Rü nhu̱xũchi ichixũchigü nhu̱xmata Dexá i Chuchuxü̃gu ãégaxü̃ ga ĩã̱xwa changu ga ãẽ̱xgacüarü puchu íyexmaxü̃wa. Notürü ga chorü búru rü taxuacüma naétüwa naxüpetü ga yema natapü̱xarü puexü̃.
15 Rü yexguma rü tautama ningune. Rü yema ngatexü̃wa dauxü̃ chaxĩ rü yéma chayangugü ga yema natapü̱x. Rü yemaacü nüxü̃ íchayaxüegu ga guma ĩanetapü̱x, rü wenaxarü Ngategu ãégaxü̃ ga ĩã̱xwa chixücu.
16 Rü gumá ĩanearü ãẽ̱xgacügü rü tama nüxü̃ nacua̱x ga ngextá nax chaxũxü̃ rü ta̱xacüca̱x yéma chaxũxü̃. Yerü taxũta yema chacherdótegümaxã, rü ĩanearü ãẽ̱xgacügümaxã, rü puracütanüxü̃maxã, rü yema togü ga Yudéugümaxã nüxü̃ chixu nax ta̱xacüca̱x Yerucharéü̃wa changuxü̃.
17 Rü yemaca̱x chanangutaque̱xexẽxẽ ga yema duü̃xü̃gü rü nhachagürü nüxü̃: “Pema meama nüxü̃ pecua̱x nax wüxi i guxchaxü̃wa ingexmagüxü̃, rü daa ĩane ya Yerucharéü̃ rü nachixe, rü natapü̱xarü ĩã̱xgü rü ínagu. ¡Rü ngĩxã wüxigu tanamexẽxẽ ya daa ĩanearü poxeguxü̃ nax ngẽmaãcü marü tama wüxi i cugüruxü̃ ixĩgüxü̃ca̱x!” nhachagürü.
18 Rü yexguma namaxã nüxü̃ chixuxgu nax nhuxãcü Tupana poraãcü choxü̃ rüngü̃xẽẽxü̃ rü yema ore ga ãẽ̱xgacü ga Artayére chamaxã nüxü̃ ixuxü̃, rü nüma ga duü̃xü̃gü rü choxü̃ nangãxü̃gagü rü nhanagürügü: “¡Ngĩxã itanaxügü nax namexẽẽxü̃ ya daa ĩanearü poxeguxü̃!” nhanagürügü. Rü inanaxügüe ga nax napuracüexü̃.
19 Notürü yexguma Chaü̃bára ga Oróũtanüxü̃güarü ãẽ̱xgacü, rü Tobía ga Amóũtanüxü̃güarü ãẽ̱xgacü, rü Yechéü̃ ga Árabe ixĩxü̃ nüxü̃ cuáchigagu ga yema puracü rü toxü̃ nacugüe rü togu nidauxcüraxü̃gü. Rü toxna naca rü nhanagürügü toxü̃: “¿Ta̱xacü ípexüe? ¿Ẽ̱xna nagu perüxĩnüe nax tama ãẽ̱xgacüga pexĩnüexü̃?” nhanagürügü.
20 Notürü ga chama rü chanangãxü̃ga rü nhacharügü: “Nüma ya dauxü̃cüã̱x ya Tupana rü tá toxü̃ narüngü̃xẽẽ. Toma i norü duü̃xü̃gü rü itanaxügü nax tanamexẽẽxü̃ ya daa ĩanearü poxeguxü̃. Notürü i pemax rü nataxuma i ta̱xacü i pexna üxü̃ nawa i nhaa puracü”, nhachagürü nüxü̃.
