Rute 3:1-18
3 Rü wüxi ga ngunexü̃gu ga Noemí rü Rúchixü̃ ngĩgürügü: —Pa Chauxacüx, chama rü tá cuxü̃́ naxca̱x chadau ya wüxi ya cute ya taãxẽ tá cuxna ãcü.
2 Rü dücax, rü yimá tatanüxü̃ ya Buá ya naxü̃tawa cupuracücü, rü nhama i chütaxü̃gu rü tá naanewa naxũ nax ngẽ́ma chewáda yabugüte̱xexü̃ca̱x.
3 Rü nhu̱xmax rü chanaxwa̱xe i cunaxü i ngẽma tá cumaxã nüxü̃ chixuxü̃. ¡Rü naxaiya rü cugü napumáraxü̃ne rü nagu icu̱x i ngẽma cuxchiru i rümemaexü̃, rü ngẽ́ma naanewa naxũ! ¡Notürü taxũtáma cugü nüxü̃ cucua̱xẽxẽ nax texé quixĩxü̃ naxü̃pa nax yanguxü̃ nax nachibüxü̃ rü naxaxexü̃ i nüma i Buá!
4 ¡Rü mea nangugü nax ngexta yixĩxü̃ i nacaxü̃ nax napexü̃ca̱x! ¡Rü ngẽma ínacaxü̃wa naxũ rü inangegücutü rü ngẽxma naca nacutüguama! Rü nümatátama nixĩ cumaxã nüxü̃ yaxuxü̃ nax ta̱xacü tá cuxüxü̃ —ngĩgürügü.
5 Rü ngĩma ga Rúchi rü Noemíxü̃ ingãxü̃ rü ngĩgürügü: —Marü tá chanaxü i guxü̃ma i ngẽma chamaxã nüxü̃ quixuxü̃ —ngĩgürügü.
6 Rü ngĩma ga Rúchi rü naanewa ixũ, rü inaxü ga guxü̃ma ga yema ngĩ̱xẽ ngĩmaxã nüxü̃ ixuxü̃.
7 Rü yexguma marü chibüwa yanguxgu ga Buá, rü inachi rü nataãxẽ rü nhu̱xũchi yexma ãũxchitaxü̃ ga chewádaxü̃tagu nayaca nax yexma napexü̃ca̱x. Rü yixcamaxü̃ra rü ngĩma ga Rúchi rü bexma naxca̱x iyaxũ rü íinangegücutü rü yexma ica.
8 Rü nüma ga Buá rü ngürüãchi ngãxü̃cüxü pewa naba̱i̱xãchi. Rü yexguma nangüeguxgu rü ngĩmaxã nayarünha. Rü nüxü̃ nicua̱xãchi ga wüxi ga nge nacutüwaama yexmaxü̃.
9 Rü ngĩxna naca rü nhanagürü: —¿Texé quixĩ i cumax? —nhanagürü. Rü ngĩma rü inangãxü̃ rü ngĩgürügü: —Chama nixĩ i Rúchi, rü cuma nixĩ i chautanüxü̃xü̃chi quixĩxü̃. Rü ngẽmaca̱x cugu nangu nax cuxma̱xü̃ choxü̃ quixĩxẽẽxü̃ ngẽma Tupanaarü mugü nüxü̃ ixuxü̃rüxü̃ —ngĩgürügü.
10 Rü yexguma ga nüma ga Buá rü nhanagürü: —¡Cori ya Tupana cuxü̃ rüngü̃xẽxẽ! Rü nhu̱xmawaxi nixĩ i mea cunango̱xẽẽxü̃ nax aixcuma nüxü̃ cungechaü̃xü̃ ga gumá cute ga marü yucü, erü choxü̃ cuyaxu cutexü̃ i chama i cutetanüxü̃ nax chixĩxü̃. Rü tama naxca̱x cudau ya wüxi ya cute ya choxü̃ rüngextü̱xümaecü ya diẽruã́cü, rü woo tama diẽruã́cü.
11 ¡Rü tauxü̃́ i cumuü̃xü̃, Pa Chauxacüx! Erü guxü̃ma i duü̃xü̃gü i daa chorü ĩanecüã̱x rü marü nüxü̃ nacua̱xgü rü cuma rü wüxi i nge i mecü nax quixĩxü̃. Rü ngẽmaca̱x i chama rü tá chanaxü i ngẽma choxna naxca̱x cucaxü̃.
12 Notürü nangexma i wüxi i guxchaxü̃. Rü aixcuma nixĩ i cutanüxü̃ chixĩxü̃ i chamax, notürü nangexma i to i chorü yexera cutanüxü̃xü̃chi ixĩxü̃.
13 ¡Ẽcü nuxã rüxã̱ũ̱x i nhama i chütaxü̃gu! Rü moxü̃ pa̱xmama rü tá ngẽma to i cutanüxü̃maxã chidexa rü ngoxi cumaxã naxãxma̱xchaü̃. Rü ngẽxguma nanaxwa̱xegu nax cumaxã naxãmaxü̃ rü marü name nax ngẽmaãcü yixĩxü̃, erü nüma rü chorü yexera cutanüxü̃xü̃chi nixĩ. Notürü ngẽxguma tama nanaxwa̱xegu, rü Tupanaégagu cumaxã nüxü̃ chixu nax chama tá cumaxã chaxãmaxü̃. ¡Ẽcü nape rü nuxã ingunexü̃! —nhanagürü.
14 Rü ngĩma ga Rúchi rü yexma ipe, rü Buácutüguama ica rü yexma iyangunexü̃. Rü moxü̃ãcü taxũtama yangóonexü̃chigu rü írüda yerü yema nhanagürü ngĩxü̃ ga Buá: “Tama chanaxwa̱xe nax texé nüxü̃ nacuáxü̃ i nua chauanewa nax cuxũxü̃ i chewáda yabugüte̱xegüxü̃wa”, nhanagürü.
15 Rü yexguma marü inaxũãchichaxü̱̃xgu ga Rúchi, rü nüma ga Buá rü nhanagürü ngĩxü̃: —¡Ẽcü ínacuxuchi i ngẽma curü deyuchiru rü mea nüxü̃ ingĩ! —nhanagürü. Rü ngĩma ga Rúchi rü mea nüxü̃ iyangĩ ga yema ngĩrü deyuchiru, rü nüma ga Buá rü yema ngĩrü deyuchirugu ngĩxü̃́ nanagü ga 40 quíru naguxü̃ ga chewáda. Rü nhu̱xũchi ngĩxü̃ narüngü̃xẽẽ ga ngĩétügu nax naxǘnagüpüü̃ãxü̃. Rü ngĩma rü yemamaxã ĩaneca̱x itáegu.
16 Rü yexguma ngĩ̱xẽxü̃tawa nanguxgu ga Rúchi, rü ngĩ̱xẽ ngĩxna taca rü ngĩgürügü: —¿Nhuxãcü cuxü̃ nangupetüxü̃, Pa Chauxacüx? —ngĩgürügü. Rü ngĩma ga Rúchi rü nüxü̃ iyaxu ga guxü̃ma ga nhuxãcü ngĩxü̃ nax nangü̃xẽẽxü̃ ga gumá Buá.
17 Rü nhu̱xũchi ngĩgürügü ta: —Rü choxna nanaxã i guxü̃ma i nhaa chewáda, rü nhu̱xũchi choxü̃ nhanagürü: “Tama name i ngeãcume̱xẽãcüma cu̱xẽca̱x cutáegu”, nhanagürü.
18 Rü yexguma ga ngĩma ga Noemí rü ngĩgürügü: —Nhu̱xma Pa Chauxacüx, rü name nixĩ i mea ícunangu̱xẽxẽ nax nhuxãcü tá nangupetüxü̃ i ngẽma cumaxã nüxü̃ yaxuxü̃. Erü nüma ya Buá rü taxũtáma nanangexrü ega tama namexẽẽãgu i ngẽma cumaxã nüxü̃ yaxuxü̃. Rü nüma rü nhu̱xmatátama nixĩ i namexẽẽãxü̃ —ngĩgürügü.