Rute 4:1-22
4 Rü nüma ga Buá rü guma ĩanearü ücuchicawa nayarüto yerü yéma nixĩ ga guxü̃ma ga duü̃xü̃gü nachopetüxü̃ rü namexẽẽãxü̃ ga norü guxchaxü̃gü. Rü yexguma yéma natoyane rü yéma naxüpetü ga guma natanücü ga Buá Rúchimaxã nüxü̃ yaxucü. Rü nüma ga Buá rü naxca̱x naca rü nhanagürü nüxü̃: —¡Dücax, nua chauxü̃tawa naxũ rü írüto, rü paxaãchi tá tidexagü! —nhanagürü. Rü nüma ga yema natanücü rü yéma naxũ, rü naxü̃tawa nayarüto.
2 Rü nüma ga Buá rü naxca̱x naca ga 10 ga ãẽ̱xgacügü ga guma ĩanecüã̱x ixĩgüxü̃, rü yemagü rü ta ínanatogüxẽxẽ nax nümagü rü ta ĩnütanüxü̃ yixĩgüxü̃ca̱x.
3 Rü nüma ga Buá rü gumá natanücüxü̃ nhanagürü: —Ngẽma Noemí ga Moábianewa táegucü rü namaxã itaxechaü̃ i ngĩrü naane ga gumá tatanücü ga Erimeréarü ixĩxü̃.
4 Rü cumaxã nüxü̃ chixu nax nüxü̃ cucuáxü̃ca̱x i ngẽmachiga. Rü ngẽxguma cuxü̃́ nangúchaü̃gu nax naxca̱x cutaxexü̃ rü name nixĩ i nhu̱xmatama naxca̱x cutaxe nape̱xewa i nhaa ãẽ̱xgacügü i ĩnüetanüxü̃ruxü̃ ixĩgüxü̃. Erü cuma nixĩ i chorü yexera natanücü quixĩxü̃ ya Erimeré, rü ngẽmaca̱x cuxna naxü nax naxca̱x cutaxexü̃ i ngẽma naane. Notürü ngẽxguma cuma tama naxca̱x cutaxegu, rü ¡chamaxã nüxü̃ ixu! Erü chama nixĩ i cuweama chaxüxü̃ nax choxna naxüxü̃ i ngẽma naane —nhanagürü. Rü yexguma nüma ga gumá natanücü rü nanangãxü̃ rü nhanagürü: —Ngẽmáacüx, naxca̱x chataxe tá —nhanagürü.
5 Rü yexguma ga Buá rü nhanagürü: —Rü ngẽxguma Noemíxü̃tawa naxca̱x cutaxegu i ngẽma naane rü cuxna naxü ta nax Rúchimaxã cuxãmaxü̃, nax ngẽmaãcü naxãxacüxü̃ca̱x, rü yimá ngĩne rü tauxeta i ngĩtechicüxü nüxna naxüxü̃ca̱x i ngẽma naane —nhanagürü.
6 Rü yemaxü̃ naxĩnügu ga guma natanücü rü nanangãxü̃ rü nhanagürü: —Ega ngẽmaãcü yixĩgu, rü taxuacüma naxca̱x chataxe, erü chi ngẽxguma naxca̱x chataxegu rü ngẽma choxna üxü̃ i naane rü chi ta ngĩnena naxüe. Rü aixcuma cumaxã nüxü̃ chixu rü ¡cuma naxca̱x nataxe! —nhanagürü.
7 Rü woetama nũxcüma nixĩ ga Iraéutanüxü̃gü rü yexguma ta̱xacü ga nüxna üxü̃ natanüxü̃na naxãxgu, rü ínacua̱xichi ga wüxicutü ga norü chapatu rü yema to ga natanüxü̃na nanaxã. Rü yemawa nixĩ ga duü̃xü̃güxü̃ nüxü̃ nacua̱xẽẽxü̃ ga aixcuma nügüna nax naxãgüãxü̃.
8 Rü yemaca̱x ga gumá Buátanücü rü ínacua̱xichi ga wüxicutü ga norü chapatu rü Buána nanaxã rü nhanagürü nüxü̃: —¡Cuma naxca̱x nataxe i ngẽma naane! —nhanagürü.
9 Rü yexguma nüma ga Buá rü nhanagürü nüxü̃ ga yema ãẽ̱xgacügü ga ĩnüetanüxü̃ruxü̃ ixĩgüxü̃, rü yema togü ga yéma irüdaunüxü̃: —Guxãma i pemagü i nhu̱xmax nua rüdaunüxe, rü pema nixĩ i nüxü̃ pexĩnüexü̃ nax chama ngĩxü̃ naxca̱x chataxexü̃ i Noemí i ngẽma naane ga Erimeréarü, rü Querióü̃arü, rü Maróü̃arü ixĩxü̃.
10 Rü ngẽxgumarüxü̃ ta nüxü̃ pexĩnüe nax ngĩxü̃ chayaxuxü̃ i ngẽma yutecü i Moábianecüã̱x i Rúchi nax ngẽmaãcü naxãxacüxü̃ca̱x rü yimá ngĩne rü guma tauxeta ngĩte ga Maróü̃chicüxü nüxna naxüxü̃ca̱x i ngẽma naane —nhanagürü.
11 Rü nüma ga yema ãẽ̱xgacügü rü guxü̃ma ga yema duü̃xü̃gü ga yéma irüdaunüxü̃ rü nanangãxü̃ga rü nhanagürügü: —Aixcuma toma nixĩ i nua itarüdaunüxü̃ rü itarüxĩnüexü̃. Rü nüma ya Tupana i nhu̱xmax cuxna imucü i nhaa nge, rü tanaxwa̱xe i ngĩxü̃ narüngü̃xẽẽ nax naxãxacüxü̃ca̱x ngĩxrüxü̃ ga Raquéu rü Leí ga ngĩwa ne ixĩcü i guxãma i yixema i Iraéutanüxü̃gü. Rü cumax, Pa Buáx ¡rü Tupana cuxü̃ rüngü̃xẽxẽ nax wüxi ya yatü ya duü̃xü̃güpe̱xewa mecü quixĩxü̃ i nua Beréü̃wa i Efrátawa!
12 ¡Rü Cori ya Tupana cuxna namugü i muxü̃ i cunegü ngĩwa i nhaa nge, rü yamu i cutanüxü̃gü yexgumarüxü̃ ga nax yamuxü̃ ga nanegü ga guma Pére ga Yudá nane ixĩcü ga Tamáwaü̃cü! —nhanagürügü.
13 Rü yemaacü nixĩ ga Buá rü Rúchimaxã naxãmaxü̃. Rü Tupana rü ngĩxna nanamu ga wüxi ga ngĩne.
14 Rü yexguma ga yema ngexü̃gü ga guma ĩanecüã̱x rü Noemíxü̃ ngĩgürügügü: —Namecümaxü̃chi nixĩ ya Tupana erü marü cuxü̃́ nanangexmaxẽxẽ ya daa cutaxa. Rü chierü natáchigagu i Iraéuanecüã̱xgütanüwa.
15 Rü nüma tá nixĩ i cuxü̃ nataãxẽxẽẽxü̃ rü cuxna nadauxü̃ i ngẽxguma cuya̱xgu, erü ngẽma cuneã̱x i cuxü̃ ngechaü̃xü̃chicü ngĩne nixĩ. Rü ngĩma rü cuxü̃́ ime i norü yexera ya 7 ya cunegü ega chi ngẽxgumaepü̱x cuxü̃́ ngẽxmaxgu —ngĩgürügügü.
16 Rü ngĩma ga Noemí rü tüxü̃ iyaxu rü tüxü̃ iyaxẽxẽ ga guxema ngĩtaxa.
17 Rü yemaxü̃ nadaugügu ga yema togü ga ngexü̃gü ga ngĩrü ngaicamagu ãchiü̃güxü̃ rü ngĩgürügü: —Wüxi ya ngĩtaxa ngĩxü̃́ nabu i Noemí —ngĩgürügügü. Rü Obéyigu inaxüégagü. Rü gumá Obéyi nixĩ ga Yeché nanatü rü ãẽ̱xgacü ga Dawíarü o̱xi ixĩcü.
Ãẽ̱xgacü ga Dawíarü o̱xigüchiga
18 4:18-22 Nhaa o̱xigü nixĩ ga Buáarü o̱xigü ixĩgüxü̃: Rü Pére rü Eróü̃ nanatü tixĩ, rü Eróü̃ rü Ráũ nanatü tixĩ. Rü Ráũ rü Aminadábi nanatü tixĩ, rü Aminadábi rü Naachóü̃ nanatü tixĩ. Rü Naachóü̃ rü Chamóü̃ nanatü tixĩ, rü Chamóü̃ rü Buá nanatü tixĩ. Rü Buá rü Obéyi nanatü tixĩ, rü guma Obéyi rü Yeché nanatü tixĩ, rü nüma ga Yeché rü Dawí nanatü tixĩ.
19 Nüü̃ nadau 4:18
20 Nüü̃ nadau 4:18
21 Nüü̃ nadau 4:18
22 Nüü̃ nadau 4:18