Salmo 1:1-6
1 Rü tataãxẽ ya yíxema tama naga ĩnüxe i ngẽma chixexü̃ i duü̃xü̃güarü ucu̱xẽ rü tama nagu ixũxẽ i ngẽma chixexü̃ ügüxü̃cüma rü tama nanaãxẽraxü̃xe i ngẽma duü̃xü̃gü i Tupanaxü̃ cugüexü̃.
2 Notürü tümaarü taãxẽ nixĩ nax nagu tamaxü̃xü̃ i Tupanaarü mugü rü guxü̃guma chütacü rü ngunecü ngẽmagu tarüxĩnü.
3 Rü yíxema duü̃xẽ rü nhama wüxi i nanetü i natüanacü toxü̃ rü guxü̃guma oxü̃ rü taguma rünhẽ̱xatüxü̃rüxü̃ tixĩ. Rü guxü̃ma i ta̱xacü i taxüxü̃wa rü mea tüxü̃́ ínanguxuchi.
4 Notürü ngẽma duü̃xü̃gü i chixexü̃ ügüxü̃ rü tama ngẽmaãcü mexü̃ nüxü̃ naxüpetü. Rü nhama maxẽ ya pacü ya buanecüema cuenagüxü̃rüxü̃ nixĩgü.
5 Rü ngẽmaca̱x i ngẽma duü̃xü̃gü i chixri maxẽxü̃ rü ngẽxguma Tupana nüxü̃ icagügu, rü taxumaxãtáma nügü ínapoxü̃gü rü poxcu i taguma gúxü̃ tá namaxã naxuegu. Rü ngẽma chixexü̃ ügüxü̃ rü tá nangechica natanüwa i ngẽma duü̃xü̃gü i aixcuma Tupanape̱xewa imexü̃.
6 Erü nüma ya Cori ya Tupana rü meama nüxü̃ nacua̱x i tümaarü maxü̃ rü tüxna nadau ya yíxema aixcuma naga ĩnüexe, notürü ngẽma chixexü̃ i duü̃xü̃gü i tama naga ĩnüechaü̃xü̃ rü nagagu tátama poxcuwa naxĩ.
