Salmo 10:1-18
Yumüxẽ i nawa Tupanaarü ngü̃xẽẽca̱x íca̱xaxü̃
10 Pa Corix, Pa Tupanax ¿Tü̱xcüü̃ toxna cuyáxü̃gu? ¿Rü tü̱xcüü̃ iquicu̱x ega ngúxü̃ tingegügu?
2 Erü ngẽma chixri maxü̃xü̃ rü nügü írütaxü̃ rü norü numaxã tüxü̃ nachixewe ya yíxema tama nüxü̃ cuáxe nax tügü ítapoxü̃xü̃. Notürü nümatátama nagu nangu i ngẽma chixexü̃ i toguxemaxã nagu naxĩnüxü̃.
3 Rü ngẽma chixexü̃ i duü̃xü̃ rü nügü namaxã nicua̱xüxü̃ i noxrütama ngúchaü̃. Rü ngẽma duü̃xü̃ i ngẽmaxü̃gü nügüna nanuxũchixü̃, rü Cori ya Tupanamaxã naguchiga rü nüxü̃ naxo.
4 Rü ngẽma yatü i chixexü̃ rü nügü nicua̱xüxü̃ rü nhanagürü: “Nataxuma ya Tupana. Rü taxúetáma choxna taca nachiga i ngẽma chaxüxü̃”, nhanagürü. Rü ngẽmaguxicatama narüxĩnü.
5 10:5-6 Rü ngẽma naxüxü̃wa rü guxü̃guma mea nüxü̃́ ínanguxuchi. Rü nüma rü nüxna nixũgachi i curü mugü rü nagu naxĩnügu rü tagutáma cunapoxcu, Pa Tupanax. Rü norü uanügüxü̃ nacugü rü nagu narüxĩnü nax taxúetáma iyanguxẽẽxü̃ rü tagutáma guxchaxü̃ nüxü̃́ ngẽxmaxü̃.
6 Nüü̃ nadau 10:5
7 Rü naã̱xwa ínaxũxũ i chixexü̃ i dexa rü doraxü̃ nixu rü naguxchigawa̱xe. Rü ngẽxguma yadexa̱xgu rü mexü̃ i oregu nayacu̱x i ngẽma chixexü̃ i nagu naxĩnüxü̃, rü ngẽmaãcü tüxü̃ nawomüxẽxẽ ya duẽxẽgü.
8 Rü chütacü rü ĩaneacügü i ẽanexü̃gu tüxü̃ ínicu̱xẽxü̃ rü ngẽxma tüxü̃ nima̱x ya yíxema ngẽ́ma üpetüxe. Rü guxü̃guma bexma tüxü̃ ínidawenüchigüxü̃ ya yíxema turaxe i taxucürüwama tügü ípoxü̃xe.
9 Rü nhama ai i naxmaxü̃wa naexü̃ca̱x idawenüxü̃rüxü̃ nügü nixĩxẽxẽ i ngẽma yatü i chixexü̃. Rü ngẽ́ma íyacúxü̃wa tüxü̃ nanangu̱xẽxẽ ya yíxema turaxe nax ngẽmaãcü tüxü̃ yayaxuxü̃ca̱x. Rü ngẽxguma tüxü̃ yayaxu̱xgu rü marü taxucürüwama nüxna tinha.
10 Rü nhama ai i yauxexü̃chaü̃xü̃rüxü̃ norü poramaxã tüxü̃ narüyexera ya yíxema turaexe rü ngẽmaãcü naxme̱xgu tayi.
11 Rü ngẽma yatü i chixexü̃ rü nagu narüxĩnü nax nüma ya Tupana rü marü nüxü̃ yanangümaxü̃ rü nügü yadüxchiwexü̃ nax tama nüxü̃ nadauxü̃ca̱x i ngẽma norü chixexü̃ i naxüxü̃ i ngẽma duü̃xü̃.
12 ¡Inachi Pa Corix, Pa Tupanax, rü naxunagüchacüxü! ¡Rü tauxü̃́ i tüxü̃ curüngümaxü̃ ya yíxema naxi̱xãchiãxẽgüxẽ!
13 ¿Rü tü̱xcüü̃, Pa Tupanax, icunaxüchicaxü̃ nax cuxü̃ nacugüxü̃ i ngẽma chixexü̃ i duü̃xü̃gü? Erü nümagü nagu narüxĩnüe rü tagutáma nüxna cuca nachiga i ngẽma chixexü̃ i naxügüxü̃.
14 Pa Corix, cumatama nüxü̃ cudau i ngẽma chixexü̃ i naxügüxü̃. ¡Ẽcü napoxcue naxca̱x i ngẽma guxchaxü̃gü i naxügüxü̃ rü ngúxü̃ nax duü̃xẽgüxü̃ yangexẽẽgüxü̃! Rü yíxema turaexe rü curü ngü̃xẽẽca̱x nixĩ itadaugüxü̃, erü cuma nixĩ i tümaarü poxü̃ruxü̃ quixĩxü̃. Rü cuma nixĩ i tüxü̃ curüngü̃xẽẽxü̃ ya yíxema taxcutagü.
15 ¡Rü íyanaxoxẽxẽ i ngẽma norü pora i ngẽma chixexü̃gü! ¡Rü nüxna naca nachiga i norü chixexü̃gü, rü bai tá i wüxi i nüxü̃ cuxüpetümarexü̃!
16 Rü nüma ya Cori ya Tupana nixĩ i ãẽ̱xgacü yixĩxü̃ i guxü̃guma. Rü ngẽma duü̃xü̃gü i tama Tupanaaxü̃́ yaxõgüxü̃, rü Tupanaarü naanewa tá ínawoxü̃.
17 Pa Corix, cuma rü nüxü̃ cuxĩnü i tümaarü yumüxẽ ya yíxema tama tügü icua̱xüü̃güxe. Rü cuma rü tüxü̃ cutaãxẽgüxẽxẽ rü tüxü̃ curüngü̃xẽẽ.
18 ¡Rü ẽcü tümaétüwa nachogü ya yíxema taxcutagü rü yíxema togüme̱xẽwa ngẽxmagüxe! Rü yima yatü ya waixümüwa cunaxücü, rü tama tanaxwa̱xe nax wena muü̃ naxca̱x ínanguxẽẽxü̃ i curü duü̃xü̃gü.
