Salmo 101:1-8
Ãẽ̱xgacü ga Dawí rü Tupanamaxã inaxuneta
101 Pa Cori Pa Tupanax, rü chorü wiyaemaxã cuxü̃ chicua̱xüxü̃ naxca̱x nax toxü̃ cungechaxü̃xü̃ rü tomaxã mea icucuáxü̃.
2 Rü chanaxwa̱xe nax aixcuma mea cuxca̱x chamaxü̃xü̃. ¿Rü nhuxgu tá chauxü̃tawa cuxũ nax choxü̃ curüngü̃xẽẽxü̃ca̱x? Rü ngẽmaãcü aixcuma tá name i chorü maxü̃ nape̱xewa i chapatacüã̱xgü.
3 Rü taxũtáma marü naxca̱x íchidau i ta̱xacürü chixexü̃. Rü tama namaxã chataãxẽ i ngẽma duü̃xü̃gü i tama Tupanaga ĩnüexü̃. Rü taxũtáma chanayaxu.
4 Rü tá nüxü̃ chaxo i ngẽma ĩnügü i chixexü̃ i chauãxẽwa íngugüxü̃. Erü taxuxü̃ma i ta̱xacürü chixexü̃ chaxüxchaü̃.
5 Rü tá chayanangeã̱xgüxẽxẽ i ngẽma duü̃xü̃gü i namücügüechita chixri tümachiga idexagüxü̃. Rü taxũtáma yaxna namaxã chaxĩnü i ngẽma duü̃xü̃gü i to̱xguã̱xétüwa nügü ügüxẽẽchaü̃xü̃ rü ngẽma norü poramaxã nügü icua̱xüü̃güxü̃.
6 Rü tá naxca̱x chadau i yatügü i aixcuma mea maxẽxü̃ nax chauxü̃tawa nangexmagüxü̃ca̱x rü chorü ngü̃xẽẽruü̃gü yixĩgüxü̃ca̱x.
7 Rü ngẽma womüxẽẽwa̱xegüxü̃ rü tá nangechica i chapatawa. Rü taxuxü̃táma idorata̱xáxü̃ chauxü̃tawa nangexma.
8 Rü wüxichigü i ngunexü̃gu rü tá naxca̱x chadau i guxü̃ma i ngẽma chauchixü̃anewa chixexü̃ ügüxü̃ nax íchanawoxü̃xü̃ca̱x nawa ya daa Cori ya Tupanaarü ĩane.