Salmo 103:1-22
Tupanaxü̃ tá chicua̱xüxü̃
103 Rü guxü̃ma i chorü ĩnümaxã rü nhaa chauãẽmaxã tá nüxü̃ chicua̱xüxü̃ ya nüma ya Cori ya Tupana ya üünecü.
2 Rü guxü̃ma i chorü ĩnümaxã tá nüxü̃ chicua̱xüxü̃ ya Cori ya Tupana rü taxũtáma nüxü̃ icharüngüma i norü ngü̃xẽẽgü i cha̱u̱xca̱x naxüxü̃ rü bai i wüxi.
3 Rü nüma rü choxü̃́ nüxü̃ inayarüngüma i guxü̃ma i chixexü̃ i chaxüxü̃ rü cha̱u̱xca̱x nayataanexẽxẽ nawa i chorü da̱xawegü.
4 Rü nüma nixĩ i yuwa choxü̃ ínanguxuchixẽẽxü̃. Rü nüma rü poraãcü choxü̃ nangechaü̃ rü chamaxã namecüma.
5 Rü nüma nixĩ i guxü̃ma i mexü̃gü choxna naxãxü̃. Rü nüma rü choxü̃ naporaxẽẽchigüama nax nhama ĩyürüxü̃ chaporaxü̃ca̱x.
6 Rü nüma rü aixcuma mea tümamaxã inacua̱x ya yíxema togü chixri tümamaxã icua̱xgüe.
7 Rü nüma ga Tupana rü Moichéxü̃ rü yema Iraéutanüxü̃xü̃ nüxü̃ nacua̱xẽxẽ ga yema nagu naxĩnüxü̃ rü nape̱xewa inanawe̱x ga muxü̃ma ga mexü̃gü ga norü poramaxã naxüxü̃.
8 Rü nüma ya Cori rü namecüma rü nüxü̃́ tangechaü̃tümüxü̃gü rü yaxna tamaxã naxĩnü rü poraãcü tüxü̃ nangechaü̃.
9 Rü tama taxchi naxai rü tama tamaxã nanuecha.
10 Rü woo nax nataxü̃ i ngẽma chixexü̃ i íxüxü̃ notürü i nümax rü tama nanangexgumaraxü̃ i ngẽma poxcu i tüxna naxãxü̃.
11 Erü ngẽma norü ngechaü̃ rü taguma inayagu̱x tümaca̱x ya yíxema naga ĩnüexe. Erü norü ngechaü̃ rü nataxüchi ngẽma dauxü̃guxü̃ i naane rü nhama i naanexü̃ yadüxüxü̃rüxü̃.
12 Rü ngẽma tórü chixexü̃gü rü marü tüxna nanayáxü̃guxẽxẽ nhama léste rü oéste nügüna nax nanayáxü̃guxẽẽxü̃rüxü̃.
13 Rü nüma ya Cori rü tüxü̃ nangechaü̃ ya yíxema naga ĩnüexe nhama wüxi i papá naxacügüxü̃ ngechaü̃xü̃rüxü̃.
14 Erü nüma rü meama nüxü̃ nacua̱x nax ta̱xacüwa tüxü̃ naxüxü̃ rü nüxü̃ nacua̱x nax waixümüte̱xe ixĩgüxü̃.
15 Rü duü̃xü̃güarü maxü̃ rü tama nama̱x. Rü nhama wüxi i natüanerüxü̃ nixĩ rü nhama wüxi i putüra i naixnecücüã̱x i boxchacuxü̃rüxü̃ nixĩ.
16 Rü ngẽxguma buanecü nagu nguxgu i ngẽma putürachacu rü ngẽxma narüxo rü taguma texé wena nüxü̃ tadau.
17 103:17-18 Notürü ngẽma Tupanaarü ngechaü̃ tümaca̱x ya yíxema naga ĩnüexe rü taguma inayacua̱x. Rü tümaxacügüwa naxüe nax guxü̃guma Tupana tümamaxã mecümaxü̃ ya yíxema mea yanguxẽẽgüxe i norü uneta rü tama nüxü̃ irüngümaexe nax naga taxĩnüexü̃ i norü mugü.
18 Nüü̃ nadau 103:17
19 Rü nüma ya Cori ya Tupana rü dauxü̃guxü̃ i naanewa nanangexmaxẽxẽ i norü tochicaxü̃ rü ngẽ́ma namaxã inacua̱x i guxü̃ma.
20 Pa Dauxü̃cüã̱x i Orearü Ngeruxü̃ i Poraexü̃ i Yanguxẽẽgüxe i Ngẽma Tupana Pexü̃ Muxü̃x ¡rü mexü̃ Corimaxã pexuegugü!
21 Rü guxãma i pemax, Pa Dauxü̃cüã̱x ya Coriaxü̃́ Puracüexe rü Norü Ngúchaü̃ Ügüxex ¡rü mexü̃ Corimaxã pexuegugü!
22 Rü guxãma i pema ya Cori ya Tupana pexü̃ ngo̱xexẽ́xẽx ¡rü Cori ya Tupanaxü̃ pecua̱xüxü̃gü i guxü̃ma i norü naanewa! Rü chama rü tá ta guxü̃ i chorü maxü̃maxã Cori ya Tupanaxü̃ chicua̱xüxü̃.
