Salmo 105:1-45
105 ¡Rü moxẽ nüxna pexãgü ya Cori ya Tupana! ¡Rü guxü̃wama nüxü̃ pexuchiga! ¡Rü guxü̃ma i duü̃xü̃gümaxã nüxü̃ pexu i ngẽma mexü̃gü i pexca̱x naxüxü̃!
2 ¡Rü perü wiyaegümaxã nüxü̃ pecua̱xüxü̃gü! ¡Rü pegümaxã nüxü̃ pexu i ngẽma taxü̃ i mexü̃gü i naxüxü̃!
3 ¡Rü pegü namaxã pecua̱xüxü̃gü ya yimá üünecü! Rü pema nax naxca̱x pedaugüxü̃ ¡rü petaãxẽgü!
4 ¡Rü naxca̱x pexĩ ya Cori ya Tupana, rü norü poraca̱x pedaugü! ¡Rü guxü̃guma norü ngü̃xẽẽca̱x pedaugü!
5 105:5-6 ¡Rü nüxna pecua̱xãchie ga yema mexü̃gü ga taxü̃gü ga norü poramaxã naxüxü̃ rü ngẽma norü mugü ga pemaxã nüxü̃ yaxuxü̃ i pema nax Tupanaarü duü̃ ya Abraáũtaagü pexĩgüxü̃ rü Yacútaagü i Tupana pexü̃ unetagüxe pexĩgüxü̃!
6 Nüü̃ nadau 105:5
7 Rü nüma nixĩ i Cori ya tórü Tupana yixĩxü̃. Rü nüma nixĩ i nhama i naanemaxã inacuáxü̃.
8 105:8-10 Rü woo chi 1000 i natücumü i tataagü ngupetügu, rü nüma ya Tupana rü tagutáma nüxü̃ inayarüngüma i norü uneta ga noxri Abraáũmaxã nüxü̃ yaxuxü̃, rü nawena nane ga Isáquimaxã nüxü̃ yaxuxü̃, rü yemawena Yacúmaxã rü ta nüxü̃ yaxuxü̃ nax guxü̃gutáma nüxü̃ nangü̃xẽẽxü̃ i nataagü i Iraéutanüxü̃gü.
9 Nüü̃ nadau 105:8
10 Nüü̃ nadau 105:8
11 Rü yemaca̱x Yacúmaxã nüxü̃ nixu rü nhanagürü: “Chama rü tá cuxna chanaxã i guxü̃ma i nhaa Canaã́ane nax guxü̃gutáma cuxrü rü cutaagüarü yixĩxü̃ca̱x”, nhanagürü.
12 105:12-15 Rü nümagü ga tórü o̱xigü rü woo noxretama nixĩgü ga noxri rü toxnamanacüã̱x nixĩgü, rü woo nhuxre ga nachixü̃anegüwa nichopetüetanü, rü nhuxre ga ãẽ̱xgacügüme̱xẽwa íninguxü̃etanü nax nhaa naanewa nangugüxü̃ca̱x, notürü nüma ga Tupana rü tama nanaxwa̱xe nax texé chixri namaxã icuáxü̃. Rü yemaca̱x yema ãẽ̱xgacügü ga naxme̱xwa nayexmagüxü̃maxã nüxü̃ nixu rü nhanagürü nüxü̃: “Tama chanaxwa̱xe i ngẽma chama nüxü̃ chaxunetaxü̃ i duü̃xü̃gü rü chixri namaxã ipecua̱x. Rü ngẽma chorü orearü uruü̃gü rü tama chanaxwa̱xe i ngúxü̃ nüxü̃ pingexẽẽgü”, nhanagürü.
13 Nüü̃ nadau 105:12
14 Nüü̃ nadau 105:12
15 Nüü̃ nadau 105:12
16 Rü nüma ga Tupana rü yema naanewa nanangebüanexẽxẽ rü yemaca̱x ínangu ga taxü̃ ga taiya.
17 Notürü Tupana rü naxü̃pa Eyítuanewa nanamu ga Yúche. Rü gumá nixĩ ga naeneegü namaxã taxecü nax togüme̱xẽwa nayexmaxü̃ca̱x ga Eyítuanewa.
18 Rü poxcupataü̃gu nanapoxcu. Rü féruwa nayachotanaxãgü rü curẽchimaxã nayachotaparagü, rü yemaacü nanapi̱xcutü.
19 Rü yemaacü Tupana Yúchexü̃ naxü rü nhu̱xmata yangu ga yema ore ga Yúche nüxü̃ ixuxü̃.
20 Rü yemawena ga Eyítuanecüã̱xarü ãẽ̱xgacü ga muxü̃ma ga duü̃xü̃gümaxã icuácü rü nanamu nax Yúchexü̃ poxcupataü̃wa ínanguxuchigüxẽẽxü̃ca̱x.
21 Rü nüma ga ãẽ̱xgacü rü nüxü̃ naxuneta nax norü ngü̃xẽẽruxü̃ yixĩxü̃ca̱x. Rü naxme̱xgu nanaxǘ ga guxü̃ma ga napata rü guxü̃ma ga norü yemaxü̃gü nax nüma namaxã inacuáxü̃ca̱x.
22 Rü nüma ga ãẽ̱xgacü rü guxü̃ma ga norü ngü̃xẽẽruü̃güétüwa rü norü ucu̱xẽruü̃güétüwa nanaxǘxẽxẽ ga Yúche nax nüma namaxã inacuáxü̃ca̱x rü nangúexẽẽãxü̃ca̱x nax cua̱x nüxü̃́ yexmagüxü̃ca̱x.
23 Rü yemawena rü Eyítuanewa nangu ga Yacú ga Tupana Iraéugu naxüégacü. Rü yexma Eyítuanegu naxãchiü̃. Rü yemaacü Eyítuanewa nayexma, notürü guxü̃guma nagu narüxĩnü nax noxrütama naaneca̱x nawoeguxü̃ ga nataagü.
24 Rü Tupana rü nayamuxẽxẽ ga yema norü duü̃xü̃gü rü düxwa Eyítuanecüã̱xgüarü yexera narüporamaegü.
25 Rü yemawena ga Tupana rü yema Eyítuanecüã̱xgüna naxĩnü nax yema Tupanaarü duü̃xü̃güchi naxaiexü̃ca̱x. Rü yemaca̱x ga Eyítuanecüã̱xgü nagu narüxĩnüe nax nhuxãcü naxüãxü̃ nax tama timuxü̃ca̱x ga guxema Tupanaarü duü̃xü̃gü.
26 Rü yemawena ga Tupana rü nanamu ga norü duü̃ ga Moiché rü naenexẽ ga Aróũ ga nümatama ga Tupana nüxü̃ unetacü.
27 Rü nümagü ga Moiché rü Aróũ rü Tupanaarü poramaxã ínananguxẽẽgü ga cua̱xruü̃gü ga ãũcümaxü̃ ga Eyítuanewa.
28 Rü nüma ga Tupana rü guxü̃wama ga Eyítuanewa ínananguxẽxẽ ga ẽanexü̃. Notürü yema Eyítuanecüã̱xgü rü tama naga naxĩnüe.
29 Rü nagüxü̃ nayanguxuchixẽxẽ ga natügüarü dexá rü yemaca̱x nayue ga choxni.
30 Rü cururugü yema nachixü̃anewa ínangugüxẽxẽ. Rü woo ãẽ̱xgacüarü pechicaxü̃gu rü naxĩgü.
31 Rü Tupana rü nanamu ga muxũchixü̃ ga murenügü rü naxchigü. Rü guxü̃ma ga Eyítuane rü namaxã nanapá.
32 Rü pucüxchicüxü yema nachixü̃aneétügu nanayixẽxẽ ga gáuxü̃. Rü ãẽmacü inaxüxẽxẽ.
33 Rü yemaacü nanachixexẽxẽ ga norü úwanecügü rü norü figunecügü. Rü guxü̃wama nanabüü̃tanüxẽxẽ ga norü naigü ga Eyítuanewa.
34 Rü Tupana naxca̱x naca ga muxũchixü̃ ga munügü. Rü taxucürüwa texé tayaxugü ga norü mu.
35 Rü nayawaátü ga nanetügü ga naanegüwa yexmagüxü̃ rü guxü̃ma ga yema nachixü̃anewa rüxügüxü̃.
36 Rü yemawena rü wüxichigü ga Eyítuanecüã̱xpatawa rü nanadai ga nüxíraxü̃xü̃ ga nane.
37 Rü yemaacü ga Tupana rü Eyítuanewa ínanagaxü̃ ga norü duü̃xü̃gü. Rü nayana ga taxü̃ ga úiru rü diẽrumügü. Rü taxuxü̃ma nida̱xawee ga norü duü̃xü̃gü rü taxuxü̃ma natura.
38 Rü nümagü ga Eyítuanecüã̱xgü rü nataãxẽgü ga yexguma nüxü̃ nadaugügu ga nax inaxĩãchixü̃, yerü poraãcü naxcha̱xwa namuü̃e.
39 Rü Tupana rü naétüwa nanayexmaxẽxẽ ga wüxi ga caixanexü̃ nax yema yadüxétüxü̃ca̱x naxcha̱xwa ya üa̱xcüema. Rü chütacü rü wüxi ga üxüemamaxã nanangóonetanüxẽxẽ.
40 Rü yexguma namachica̱x ínacagügu, rü nüma ga Tupana rü ngugagü naxca̱x ínayachõõchixẽxẽ. Rü poũ ga dauxü̃wa rüyiíxü̃maxã nanachibüexẽxẽ. Rü yemaacü meama nüxü̃́ ningugü.
41 Rü yexguma Tupana nuta nangǘxtexẽẽgu rü taxü̃ ga dexá yéma nayagoxü̃chixü. Rü yema dexá rü nhama wüxi ga natürüxü̃ ínachianexü̃wa naya̱x.
42 Rü yemaacü aixcuma nayanguxẽxẽ ga yema norü uneta ga üünexü̃ ga nũxcüma norü duü̃ ga Abraáũmaxã nüxü̃ yaxuxü̃.
43 Rü yemaacü nixĩ ga Tupana ga Eyítuanewa ínagaxü̃ ga norü duü̃xü̃gü ga nüma nüxü̃ naxunetaxü̃. Rü yexguma ínagaxü̃ãgu rü poraãcü nataãxẽgü.
44 Rü togü ga duü̃xü̃güarü naane nüxna naxã. Rü nabü ga togüarü puracüwa ne ũxü̃maxã nanachibüexẽxẽ.
45 Rü yemaacü Tupana nüxü̃ narüngü̃xẽẽ ga yema duü̃xü̃gü yerü nanaxwa̱xe nax nagu namaxẽxü̃ ga norü mugü rü nagu naxĩxü̃ ga norü ngu̱xẽẽtae ga nüma namaxã nüxü̃ yaxuxü̃. Rü name i Cori ya Tupanaxü̃ ticua̱xüxü̃gü.
