Salmo 106:1-48
106 Rü name i Cori ya Tupanaxü̃ ticua̱xüxü̃gü. ¡Rü moxẽ nüxna pexã! Erü nüma rü namecüma rü ngẽma norü ngechaü̃ rü taguma inayacua̱x.
2 ¿Rü texé nüxü̃ tacua̱x nax nüxü̃ tixuxü̃ i guxü̃ma i ngẽma nüma norü poramaxã naxüxü̃? ¿Rü texé nüxü̃ tacua̱x nax nüma nanaxwa̱xexü̃ãcüma nüxü̃ ticua̱xüxüxü̃?
3 Rü tataãxẽgü ya yíxema aixcuma mexü̃gu rüxĩnüexe rü naxügüxe i ngẽma aixcuma we̱xguxü̃.
4 106:4-5 ¡Rü choxna nacua̱xãchi, Pa Corix, i ngẽxguma nüxü̃ curüngü̃xẽẽgu i curü duü̃xü̃gü! Rü ngẽxguma núma cuxũxgu nax ícunanguxü̃xẽẽ̱xü̃ca̱x ¡rü choxü̃ rü ta natanüwa nangexmaxẽxẽ nax ngẽmaãcü nüxü̃ chadauxü̃ca̱x i norü taãxẽ i ngẽma curü duü̃xü̃gü i cuma quidexechixü̃, rü ngẽmaãcü chama rü ta wüxigu curü duü̃xü̃gümaxã chataãxẽxü̃ca̱x!
5 Nüü̃ nadau 106:4
6 Rü toma rü cupe̱xewa poraãcü chixexü̃ taxü torü o̱xigürüü̃tama. Rü nüxna ítachocu i curü mugü nax toxrütama ngúchaü̃ i chixexü̃gu tamaxẽxü̃ca̱x.
7 Rü nüma ga torü o̱xigü rü tama aixcuma nagu narüxĩnüe ga yema taxü̃gü ga mexü̃gü ga curü poramaxã cuxüxü̃. Rü nüxü̃ inayarüngümae nax cuma rü nüxü̃ cungechaü̃xü̃. Rü yema Már ga Dauchiüxü̃cutüwa rü cumaxã nayanue.
8 Notürü nüma ga Tupana rü Eyítuanecüã̱xarü ãẽ̱xgacüme̱xẽwa ínananguxü̃xẽẽama yerü taxucürüwama inayanaxoxẽxẽ ga norü uneta ga marü Abraáũmaxã nüxü̃ yaxuxü̃.
9 Rü nüma ga Tupana rü yema Már ga Dauchiüxü̃xü̃ namu nax yapayexü̃ca̱x. Rü nhama wüxi i naxnecü i paxü̃rüxü̃ nixĩ. Rü yemawa nayachoü̃xẽxẽ ga tórü o̱xigü.
10 Rü yemaacü nixĩ ga norü uanügü ga naxchi aiexü̃me̱xẽwa ínanguxü̃xẽẽãxü̃.
11 Rü yexguma tórü o̱xigüwe yachoü̃gu ga tümaarü uanügü rü nüma ga dexá rü naétüwa naya̱x. Rü guxü̃ma ga tümaarü uanügü rü yexma nayue rü bai ga wüxi ga maxü̃xü̃ ga íyaxüxü̃.
12 Rü yexgumaama ga tórü o̱xigü rü düxwa nayaxõgü ga Tupanaarü unetagü rü norü wiyaegümaxã nüxü̃ nicua̱xüxü̃gü.
13 Notürü paxama nüxü̃ inayarüngümaexü̃ ga yema taxü̃ ga mexü̃gü ga Tupana naxca̱x üxü̃. Rü tama ínanangu̱xẽẽgü ga yema Tupana nagu rüxĩnüxü̃.
14 Rü yema ínachianexü̃wa rü Tupanaxü̃ naxügü ga tórü o̱xigü. Rü naxca̱x ínacagü nax Tupana paxa nüxü̃́ naxüxü̃ca̱x ga yema nümatama ga duü̃xü̃gü nagu rüxĩnüexü̃.
15 Rü nüma ga Tupana rü naga naxĩnü, rü nanaxü ga yema naxca̱x ínacagüxü̃. Notürü yemawena rü naxca̱x ínananguxẽxẽ ga daaweane ga namaxã nayuexü̃.
16 Rü yéma ínapegüxü̃wa rü yema duü̃xü̃gü rü tama gumá Moichéga rü gumá Tupana nüxü̃ unetacü ga Aróũga naxĩnüechaü̃ yerü naxca̱x nixauxãchie nax norü ãẽ̱xgacü yixĩgüxü̃.
17 Rü yemaca̱x Tupana nanapoxcue. Rü naxca̱x nayange̱xẽxẽ ga naane rü yemagu nayicu ga Datáũ rü Abiráũ namaxã ga namücügü.
18 Rü yema namücügü ga tama Tupanaga ĩnüexü̃ rü Tupana naxca̱x yéma nanamu ga üxüema nax yemamaxã yaxaexü̃ca̱x ga yema chixexü̃ ügüxü̃.
19 Rü guma ma̱xpǘne ga Orébiwa rü nüma ga Iraéutanüxü̃gü nanaxügü ga wüxi ga wocaxacüchicüna̱xã ga úirunaxca̱x. Rü yemaxü̃ nicua̱xüxü̃gü.
20 Rü yemaacü Tupana ya üünecüxü̃ naxüchicüügü namaxã ga wüxi ga woca i maxẽ ingṍxü̃chicüna̱xã.
21 106:21-22 Rü nüxü̃ inayarüngümae ga Tupana ga norü poxü̃ruxü̃ ixĩcü ga naxücü ga taxü̃ ga guxchaxü̃gü ga Eyítuanewa rü ba̱i̱xãchixẽẽruü̃gü ga Cáü̃tanüxü̃anewa rü ãũcümaxü̃ ga Már ga Dauchiüxü̃wa.
22 Nüü̃ nadau 106:21
23 Rü nüma ga Tupana rü nüxü̃ nixu rü tá nanadai ga yema duü̃xü̃gü. Notürü ga nüma ga Moiché rü naétüwa nachogüama rü yemaca̱x narüngüxmü ga Tupana rü tama nanadai.
24 Rü yemawena rü nüxü̃ naxoe ga yema naane ga mexechixü̃ yerü tama nayaxõgü ga yema Tupanaarü uneta.
25 Rü nachiü̃wachigü rü chixri Cori ya Tupanachiga nidexagü rü tama naga naxĩnüe ga yema norü mugü.
26 Rü yemaca̱x ga nüma ga Cori ya Tupana rü namaxã nanaxuegu rü tá nadaiaxü̃ yema ínachianexü̃gu.
27 Rü yexgumarüxü̃ ta ga nataagümaxã rü nanaxuegu rü tá nadaiaxü̃ rü to ga nachixü̃anegü ga tama nüxü̃́ yaxõgüxü̃gu nawooneãxü̃.
28 Rü yema tórü o̱xigü rü tupananeta ga Baáme̱xẽwa nügü nayexmagüxẽxẽ. Rü nanangõ̱xgü ga õna ga yema norü tupananetachicüna̱xãgü i ngearü maxü̃ã́xü̃ca̱x nadaixü̃.
29 Rü yemaacü norü chixexü̃gümaxã Tupanaxü̃ nanuxẽẽgü. Rü yemaca̱x ga nüma ga Tupana rü natanüwa ínananguxẽxẽ ga daaweane ga nawa iyuxü̃.
30 Notürü nüma ga chacherdóte ga Finéya rü inaxũãchi rü nayama̱x ga yema duü̃xü̃ ga chixexü̃ üxü̃. Rü yexguma ínayachaxãchi ga yema daaweane.
31 Rü yema Finéya üxü̃ rü Tupanape̱xewa name, rü name nax guxü̃guma wüxichigü i papá nanegümaxã nüxü̃ yaxuxü̃.
32 106:32-33 Rü yema tórü o̱xigü rü Meribáwa rü ta Tupanaxü̃ nanuxẽẽgü ga yexguma Moichéxü̃ nachixewegügu nax dexá nüxna naxãxü̃ca̱x. Rü yema duü̃xü̃gügagu guxchaxü̃ Moichéxü̃ nangupetü. Yerü düxwa Moichéxü̃ nanuxẽẽgü rü yemaca̱x naechita chixri nidexa.
33 Nüü̃ nadau 106:32
34 Rü yema tórü o̱xigü rü tama nanadai ga yema Canaã́cüã̱x ga Tupana namaxã nüxü̃ ixuxü̃ nax nadaiaxü̃ca̱x.
35 Notürü namaxã naxãmücügüama, rü namaxã nixãtegü, rü namaxã naxãxmagü ga yema duü̃xü̃gü ga tama Tupanaaxü̃́ yaxõgüxü̃. Rü nacümagü ga chixexü̃güca̱x nangúe.
36 Rü yema duü̃xü̃güarü tupananetachicüna̱xãgüxü̃ nicua̱xüxü̃gü rü yemagagu chixexü̃gu nayi.
37 Rü tüxü̃ ínamugü ga naxacüegü nax yema ngo̱xogüca̱x tüxü̃ ínaguxü̃ca̱x.
38 Rü yemaacü yema Canaã́anearü tupananetagüca̱x tüxü̃ nadai ga guxema nanegü rü naxacüegü ga taxuxü̃ma ga chixexü̃ ügǘxe. Rü nhama ga naane rü guma tümagümaxã naxãũãchi.
39 Rü yemaacü ga yema duü̃xü̃gü rü Tupanape̱xewa yexeraxü̃ ga chixexü̃ naxügü ga yexguma yema tupananetagüwe naxĩxgu.
40 Rü nüma ga Tupana rü poraãcü namaxã nanu ga yema norü duü̃xü̃gü. Rü yemaca̱x noxtacüma nüxü̃ naxo.
41 Rü yema uanügü ga tama yaxõgüxü̃na nanawogü nax yema namaxã icua̱xgüxü̃ca̱x.
42 Rü yema norü uanügü rü nüxü̃ narüporamae rü chixri namaxã inacua̱xgü.
43 Rü nüma ga Tupana rü mue̱xpü̱xcünama ínananguxü̃xẽxẽ. Notürü ga nümagü rü tama nüxü̃́ inarüxĩnüechaü̃ ga yema Tupana nagu rüxĩnüxü̃ rü norü chixexü̃ nüxü̃ narüyexera.
44 106:44-45 Notürü yexguma Tupana nüxü̃ ĩnügu ga norü axu rü nüxü̃ nada̱xgux nax taxü̃ ga guxchaxü̃wa nayexmagüxü̃, rü nüma ga Tupana rü nüxna nacua̱xãchi ga norü uneta ga namaxã nüxü̃ yaxuxü̃. Rü yemaca̱x nüxü̃́ nangechaü̃tümüxü̃ erü nataxüchi i norü ngechaü̃.
45 Nüü̃ nadau 106:44
46 Rü yema norü duü̃xü̃güarü uanügüãxẽwa ínananguxẽxẽ nax mea namaxã inacua̱xgüxü̃ca̱x.
47 Pa Cori Pa Torü Tupanax ¡toxü̃ rüngü̃xẽxẽ rü toxü̃ ínanguxü̃xẽxẽ naxme̱xwa i ngẽma to i nachixü̃anegü nax ngẽmaãcü nüxü̃ ticua̱xüü̃güxü̃ca̱x i cuéga i üünexü̃! Erü tanaxwa̱xe i taãxẽãcüma cuxü̃ ticua̱xüxü̃gü.
48 ¡Rü guxü̃guma namexechi ya yimá tórü Cori ya Iraéutanüxü̃arü Tupana! Rü name nixĩ i guxü̃ma i duü̃xü̃gü rü: “Ngẽmaãcü yixĩ”, nhanagürügü. ¡Rü ngĩxã tórü Cori ya Tupanaxü̃ ticua̱xüxü̃gü!
